অধ্যায় 81

81.1

বৈশংপায়ন উবাচ
এবং স নাহুষো রাজা যয়াতিঃ পুত্রমীপ্সিতম্
রাজ্যেঽভিষিচ্য মুদিতো বানপ্রস্থোঽভবন্মুনিঃ

উষিত্বা চ বনে বাসং ব্রাহ্মণৈঃ সহ সংশ্রিতঃ
ফলমূলাশনো দান্তো যথা স্বর্গমিতো গতঃ

স গতঃ সুরবাসং তং নিবসন্মুদিতঃ সুখম্
কালস্য নাতিমহতঃ পুনঃ শক্রেণ পাতিতঃ

নিপতন্প্রচ্যুতঃ স্বর্গাদপ্রাপ্তো মেদিনীতলম্
স্থিত আসীদন্তরিক্ষে স তদেতি শ্রুতং ময়া

তত এব পুনশ্চাপি গতঃ স্বর্গমিতি শ্রুতিঃ
রাজ্ঞা বসুমতা সার্ধমষ্টকেন চ বীর্যবান্
প্রতর্দনেন শিবিনা সমেত্য কিল সংসদি

জনমেজয় উবাচ
কর্মণা কেন স দিবং পুনঃ প্রাপ্তো মহীপতিঃ
সর্বমেতদশেষেণ শ্রোতুমিচ্ছামি তত্ত্বতঃ
কথ্যমানং ত্বয়া বিপ্র বিপ্রর্ষিগণসংনিধৌ

দেবরাজসমো হ্যাসীদ্যয়াতিঃ পৃথিবীপতিঃ
বর্ধনঃ কুরুবংশস্য বিভাবসুসমদ্যুতিঃ

তস্য বিস্তীর্ণয়শসঃ সত্যকীর্তের্মহাত্মনঃ
চরিতং শ্রোতুমিচ্ছামি দিবি চেহ চ সর্বশঃ

বৈশংপায়ন উবাচ
হন্ত তে কথয়িষ্যামি যয়াতেরুত্তরাং কথাম্
দিবি চেহ চ পুণ্যার্থাং সর্বপাপপ্রণাশিনীম্

যয়াতির্নাহুষো রাজা পূরুং পুত্রং কনীয়সম্
রাজ্যেঽভিষিচ্য মুদিতঃ প্রবব্রাজ বনং তদা

অন্তেষু স বিনিক্ষিপ্য পুত্রান্যদুপুরোগমান্
ফলমূলাশনো রাজা বনে সংন্যবসচ্চিরম্

সংশিতাত্মা জিতক্রোধস্তর্পয়ন্পিতৃদেবতাঃ
অগ্নীংশ্চ বিধিবজ্জুহ্বন্বানপ্রস্থবিধানতঃ

অতিথীন্পূজয়ামাস বন্যেন হবিষা বিভুঃ
শিলোঞ্ছবৃত্তিমাস্থায় শেষান্নকৃতভোজনঃ

পূর্ণং বর্ষসহস্রং স এবংবৃত্তিরভূন্নৃপঃ
অব্ভক্ষঃ শরদস্ত্রিংশদাসীন্নিয়তবাঙ্মনাঃ

ততশ্চ বায়ুভক্ষোঽভূত্সংবত্সরমতন্দ্রিতঃ
পঞ্চাগ্নিমধ্যে চ তপস্তেপে সংবত্সরং নৃপঃ

একপাদস্থিতশ্চাসীত্ষণ্মাসাননিলাশনঃ
পুণ্যকীর্তিস্ততঃ স্বর্গং জগামাবৃত্য রোদসী