অধ্যায় 82

82.1

বৈশংপায়ন উবাচ
স্বর্গতঃ স তু রাজেন্দ্রো নিবসন্দেবসদ্মনি
পূজিতস্ত্রিদশৈঃ সাধ্যৈর্মরুদ্ভির্বসুভিস্তথা

দেবলোকাদ্ব্রহ্মলোকং সংচরন্পুণ্যকৃদ্বশী
অবসত্পৃথিবীপালো দীর্ঘকালমিতি শ্রুতিঃ

স কদাচিন্নৃপশ্রেষ্ঠো যয়াতিঃ শক্রমাগমৎ
কথান্তে তত্র শক্রেণ পৃষ্টঃ স পৃথিবীপতিঃ

শক্র উবাচ
যদা স পূরুস্তব রূপেণ রাজ;ঞ্জরাং গৃহীত্বা প্রচচার ভূমৌ
তদা রাজ্যং সংপ্রদায়ৈব তস্মৈ; ত্বয়া কিমুক্তঃ কথয়েহ সত্যম্

যয়াতিরুবাচ
গঙ্গায়মুনয়োর্মধ্যে কৃত্স্নোঽয়ং বিষয়স্তব
মধ্যে পৃথিব্যাস্ত্বং রাজা ভ্রাতরোঽন্ত্যাধিপাস্তব

অক্রোধনঃ ক্রোধনেভ্যো বিশিষ্ট;স্তথা তিতিক্ষুরতিতিক্ষোর্বিশিষ্টঃ
অমানুষেভ্যো মানুষাশ্চ প্রধানা; বিদ্বাংস্তথৈবাবিদুষঃ প্রধানঃ

আক্রুশ্যমানো নাক্রোশেন্মন্যুরেব তিতিক্ষতঃ
আক্রোষ্টারং নির্দহতি সুকৃতং চাস্য বিন্দতি

নারুংতুদঃ স্যান্ন নৃশংসবাদী; ন হীনতঃ পরমভ্যাদদীত
যয়াস্য বাচা পর উদ্বিজেত; ন তাং বদেদ্রুশতীং পাপলোক্যাম্

অরুংতুদং পুরুষং রূক্ষবাচং; বাক্কণ্টকৈর্বিতুদন্তং মনুষ্যান্
বিদ্যাদলক্ষ্মীকতমং জনানাং; মুখে নিবদ্ধাং নিরৃতিং বহন্তম্

সদ্ভিঃ পুরস্তাদভিপূজিতঃ স্যা;ত্সদ্ভিস্তথা পৃষ্ঠতো রক্ষিতঃ স্যাৎ
সদাসতামতিবাদাংস্তিতিক্ষে;ত্সতাং বৃত্তং চাদদীতার্যবৃত্তঃ

বাক্সায়কা বদনান্নিষ্পতন্তি; যৈরাহতঃ শোচতি রাত্র্যহানি
পরস্য বা মর্মসু যে পতন্তি; তান্পণ্ডিতো নাবসৃজেত্পরেষু

ন হীদৃশং সংবননং ত্রিষু লোকেষু বিদ্যতে
যথা মৈত্রী চ ভূতেষু দানং চ মধুরা চ বাক্

তস্মাত্সান্ত্বং সদা বাচ্যং ন বাচ্যং পরুষং ক্বচিৎ
পূজ্যান্সংপূজয়েদ্দদ্যান্ন চ যাচেত্কদাচন