অধ্যায় 83

83.1

ইন্দ্র উবাচ
সর্বাণি কর্মাণি সমাপ্য রাজ;ন্গৃহান্পরিত্যজ্য বনং গতোঽসি
তত্ত্বাং পৃচ্ছামি নহুষস্য পুত্র; কেনাসি তুল্যস্তপসা যয়াতে

যয়াতিরুবাচ
নাহং দেবমনুষ্যেষু ন গন্ধর্বমহর্ষিষু
আত্মনস্তপসা তুল্যং কংচিত্পশ্যামি বাসব

ইন্দ্র উবাচ
যদাবমংস্থাঃ সদৃশঃ শ্রেয়সশ্চ; পাপীয়সশ্চাবিদিতপ্রভাবঃ
তস্মাল্লোকা অন্তবন্তস্তবেমে; ক্ষীণে পুণ্যে পতিতাস্যদ্য রাজন্

যয়াতিরুবাচ
সুরর্ষিগন্ধর্বনরাবমানা;ত্ক্ষয়ং গতা মে যদি শক্র লোকাঃ
ইচ্ছেয়ং বৈ সুরলোকাদ্বিহীনঃ; সতাং মধ্যে পতিতুং দেবরাজ

ইন্দ্র উবাচ
সতাং সকাশে পতিতাসি রাজং;শ্চ্যুতঃ প্রতিষ্ঠাং যত্র লব্ধাসি ভূয়ঃ
এবং বিদিত্বা তু পুনর্যয়াতে; ন তেঽবমান্যাঃ সদৃশঃ শ্রেয়সশ্চ

বৈশংপায়ন উবাচ
ততঃ প্রহায়ামররাজজুষ্টা;ন্পুণ্যাঁল্লোকান্পতমানং যয়াতিম্
সংপ্রেক্ষ্য রাজর্ষিবরোঽষ্টকস্ত;মুবাচ সদ্ধর্মবিধানগোপ্তা

কস্ত্বং যুবা বাসবতুল্যরূপঃ; স্বতেজসা দীপ্যমানো যথাগ্নিঃ
পতস্যুদীর্ণাম্বুধরান্ধকারা;ত্খাত্খেচরাণাং প্রবরো যথার্কঃ

দৃষ্ট্বা চ ত্বাং সূর্যপথাত্পতন্তং; বৈশ্বানরার্কদ্যুতিমপ্রমেয়ম্
কিং নু স্বিদেতত্পততীতি সর্বে; বিতর্কয়ন্তঃ পরিমোহিতাঃ স্মঃ

দৃষ্ট্বা চ ত্বাং বিষ্ঠিতং দেবমার্গে; শক্রার্কবিষ্ণুপ্রতিমপ্রভাবম্
অভ্যুদ্গতাস্ত্বাং বয়মদ্য সর্বে; তত্ত্বং পাতে তব জিজ্ঞাসমানাঃ

ন চাপি ত্বাং ধৃষ্ণুমঃ প্রষ্টুমগ্রে; ন চ ত্বমস্মান্পৃচ্ছসি যে বয়ং স্মঃ
তত্ত্বাং পৃচ্ছামঃ স্পৃহণীয়রূপং; কস্য ত্বং বা কিংনিমিত্তং ত্বমাগাঃ

ভয়ং তু তে ব্যেতু বিষাদমোহৌ; ত্যজাশু দেবেন্দ্রসমানরূপ
ত্বাং বর্তমানং হি সতাং সকাশে; নালং প্রসোঢুং বলহাপি শক্রঃ

সন্তঃ প্রতিষ্ঠা হি সুখচ্যুতানাং; সতাং সদৈবামররাজকল্প
তে সংগতাঃ স্থাবরজঙ্গমেশাঃ; প্রতিষ্ঠিতস্ত্বং সদৃশেষু সত্সু

প্রভুরগ্নিঃ প্রতপনে ভূমিরাবপনে প্রভুঃ
প্রভুঃ সূর্যঃ প্রকাশিত্বে সতাং চাভ্যাগতঃ প্রভুঃ