অধ্যায় 84

84.1

যয়াতিরুবাচ
অহং যয়াতির্নহুষস্য পুত্রঃ; পূরোঃ পিতা সর্বভূতাবমানাৎ
প্রভ্রংশিতঃ সুরসিদ্ধর্ষিলোকা;ত্পরিচ্যুতঃ প্রপতাম্যল্পপুণ্যঃ

অহং হি পূর্বো বয়সা ভবদ্ভ্য;স্তেনাভিবাদং ভবতাং ন প্রয়ুঞ্জে
যো বিদ্যয়া তপসা জন্মনা বা; বৃদ্ধঃ স পূজ্যো ভবতি দ্বিজানাম্

অষ্টক উবাচ
অবাদীশ্চেদ্বয়সা যঃ স বৃদ্ধ; ইতি রাজন্নাভ্যবদঃ কথংচিৎ
যো বৈ বিদ্বান্বয়সা সন্স্ম বৃদ্ধঃ; স এব পূজ্যো ভবতি দ্বিজানাম্

যয়াতিরুবাচ
প্রতিকূলং কর্মণাং পাপমাহু;স্তদ্বর্ততেঽপ্রবণে পাপলোক্যম্
সন্তোঽসতাং নানুবর্তন্তি চৈত;দ্যথা আত্মৈষামনুকূলবাদী

অভূদ্ধনং মে বিপুলং মহদ্বৈ; বিচেষ্টমানো নাধিগন্তা তদস্মি
এবং প্রধার্যাত্মহিতে নিবিষ্টো; যো বর্ততে স বিজানাতি জীবন্

নানাভাবা বহবো জীবলোকে; দৈবাধীনা নষ্টচেষ্টাধিকারাঃ
তত্তত্প্রাপ্য ন বিহন্যেত ধীরো; দিষ্টং বলীয় ইতি মত্বাত্মবুদ্ধ্যা

সুখং হি জন্তুর্যদি বাপি দুঃখং; দৈবাধীনং বিন্দতি নাত্মশক্ত্যা
তস্মাদ্দিষ্টং বলবন্মন্যমানো; ন সংজ্বরেন্নাপি হৃষ্যেত্কদাচিৎ

দুঃখে ন তপ্যেন্ন সুখেন হৃষ্যে;ত্সমেন বর্তেত সদৈব ধীরঃ
দিষ্টং বলীয় ইতি মন্যমানো; ন সংজ্বরেন্নাপি হৃষ্যেত্কদাচিৎ

ভয়ে ন মুহ্যাম্যষ্টকাহং কদাচি;ত্সংতাপো মে মানসো নাস্তি কশ্চিৎ
ধাতা যথা মাং বিদধাতি লোকে; ধ্রুবং তথাহং ভবিতেতি মত্বা

সংস্বেদজা অণ্ডজা উদ্ভিদাশ্চ; সরীসৃপাঃ কৃময়োঽথাপ্সু মত্স্যাঃ
তথাশ্মানস্তৃণকাষ্ঠং চ সর্বং; দিষ্টক্ষয়ে স্বাং প্রকৃতিং ভজন্তে

অনিত্যতাং সুখদুঃখস্য বুদ্ধ্বা; কস্মাত্সংতাপমষ্টকাহং ভজেয়ম্
কিং কুর্যাং বৈ কিং চ কৃত্বা ন তপ্যে; তস্মাত্সংতাপং বর্জয়াম্যপ্রমত্তঃ

অষ্টক উবাচ
যে যে লোকাঃ পার্থিবেন্দ্র প্রধানা;স্ত্বয়া ভুক্তা যং চ কালং যথা চ
তন্মে রাজন্ব্রূহি সর্বং যথাব;ত্ক্ষেত্রজ্ঞবদ্ভাষসে ত্বং হি ধর্মান্

যয়াতিরুবাচ
রাজাহমাসমিহ সার্বভৌম;স্ততো লোকান্মহতো অজয়ং বৈ
তত্রাবসং বর্ষসহস্রমাত্রং; ততো লোকং পরমস্ম্যভ্যুপেতঃ

ততঃ পুরীং পুরুহূতস্য রম্যাং; সহস্রদ্বারাং শতয়োজনায়তাম্
অধ্যাবসং বর্ষসহস্রমাত্রং; ততো লোকং পরমস্ম্যভ্যুপেতঃ

ততো দিব্যমজরং প্রাপ্য লোকং; প্রজাপতের্লোকপতের্দুরাপম্
তত্রাবসং বর্ষসহস্রমাত্রং; ততো লোকং পরমস্ম্যভ্যুপেতঃ

দেবস্য দেবস্য নিবেশনে চ; বিজিত্য লোকানবসং যথেষ্টম্
সংপূজ্যমানস্ত্রিদশৈঃ সমস্তৈ;স্তুল্যপ্রভাবদ্যুতিরীশ্বরাণাম্

তথাবসং নন্দনে কামরূপী; সংবত্সরাণাময়ুতং শতানাম্
সহাপ্সরোভির্বিহরন্পুণ্যগন্ধা;ন্পশ্যন্নগান্পুষ্পিতাংশ্চারুরূপান্

তত্রস্থং মাং দেবসুখেষু সক্তং; কালেঽতীতে মহতি ততোঽতিমাত্রম্
দূতো দেবানামব্রবীদুগ্ররূপো; ধ্বংসেত্যুচ্চৈস্ত্রিঃ প্লুতেন স্বরেণ

এতাবন্মে বিদিতং রাজসিংহ; ততো ভ্রষ্টোঽহং নন্দনাত্ক্ষীণপুণ্যঃ
বাচোঽশ্রৌষং চান্তরিক্ষে সুরাণা;মনুক্রোশাচ্ছোচতাং মানবেন্দ্র

অহো কষ্টং ক্ষীণপুণ্যো যয়াতিঃ; পতত্যসৌ পুণ্যকৃত্পুণ্যকীর্তিঃ
তানব্রুবং পতমানস্ততোঽহং; সতাং মধ্যে নিপতেয়ং কথং নু

তৈরাখ্যাতা ভবতাং যজ্ঞভূমিঃ; সমীক্ষ্য চৈনাং ত্বরিতমুপাগতোঽস্মি
হবির্গন্ধং দেশিকং যজ্ঞভূমে;র্ধূমাপাঙ্গং প্রতিগৃহ্য প্রতীতঃ