Utshovঅধ্যায় 85
85.1
অষ্টক উবাচ
যদাবসো নন্দনে কামরূপী; সংবত্সরাণাময়ুতং শতানাম্
কিং কারণং কার্তয়ুগপ্রধান; হিত্বা তত্ত্বং বসুধামন্বপদ্যঃ
85.2
যয়াতিরুবাচ
জ্ঞাতিঃ সুহৃত্স্বজনো যো যথেহ; ক্ষীণে বিত্তে ত্যজ্যতে মানবৈর্হি
তথা তত্র ক্ষীণপুণ্যং মনুষ্যং; ত্যজন্তি সদ্যঃ সেশ্বরা দেবসংঘাঃ
85.3
অষ্টক উবাচ
কথং তস্মিন্ক্ষীণপুণ্যা ভবন্তি; সংমুহ্যতে মেঽত্র মনোঽতিমাত্রম্
কিংবিশিষ্টাঃ কস্য ধামোপয়ান্তি; তদ্বৈ ব্রূহি ক্ষেত্রবিত্ত্বং মতো মে
85.4
যয়াতিরুবাচ
ইমং ভৌমং নরকং তে পতন্তি; লালপ্যমানা নরদেব সর্বে
তে কঙ্কগোমায়ুবলাশনার্থং; ক্ষীণা বিবৃদ্ধিং বহুধা ব্রজন্তি
85.5
তস্মাদেতদ্বর্জনীয়ং নরেণ; দুষ্টং লোকে গর্হণীয়ং চ কর্ম
আখ্যাতং তে পার্থিব সর্বমেত;দ্ভূয়শ্চেদানীং বদ কিং তে বদামি
85.6
অষ্টক উবাচ
যদা তু তান্বিতুদন্তে বয়াংসি; তথা গৃধ্রাঃ শিতিকণ্ঠাঃ পতংগাঃ
কথং ভবন্তি কথমাভবন্তি; ন ভৌমমন্যং নরকং শৃণোমি
85.7
যয়াতিরুবাচ
ঊর্ধ্বং দেহাত্কর্মণো জৃম্ভমাণা;দ্ব্যক্তং পৃথিব্যামনুসংচরন্তি
ইমং ভৌমং নরকং তে পতন্তি; নাবেক্ষন্তে বর্ষপূগাননেকান্
85.8
ষষ্টিং সহস্রাণি পতন্তি ব্যোম্নি; তথা অশীতিং পরিবত্সরাণি
তান্বৈ তুদন্তি প্রপততঃ প্রপাতং; ভীমা ভৌমা রাক্ষসাস্তীক্ষ্ণদংষ্ট্রাঃ
85.9
অষ্টক উবাচ
যদেনসস্তে পততস্তুদন্তি; ভীমা ভৌমা রাক্ষসাস্তীক্ষ্ণদংষ্ট্রাঃ
কথং ভবন্তি কথমাভবন্তি; কথংভূতা গর্ভভূতা ভবন্তি
85.10
যয়াতিরুবাচ
অস্রং রেতঃ পুষ্পফলানুপৃক্ত;মন্বেতি তদ্বৈ পুরুষেণ সৃষ্টম্
স বৈ তস্যা রজ আপদ্যতে বৈ; স গর্ভভূতঃ সমুপৈতি তত্র
85.11
বনস্পতীংশ্চৌষধীশ্চাবিশন্তি; অপো বায়ুং পৃথিবীং চান্তরিক্ষম্
চতুষ্পদং দ্বিপদং চাপি সর্ব;মেবংভূতা গর্ভভূতা ভবন্তি
85.12
অষ্টক উবাচ
অন্যদ্বপুর্বিদধাতীহ গর্ভ; উতাহোস্বিত্স্বেন কামেন যাতি
আপদ্যমানো নরয়োনিমেতা;মাচক্ষ্ব মে সংশয়াত্প্রব্রবীমি
85.13
শরীরদেহাদিসমুচ্ছ্রয়ং চ; চক্ষুঃশ্রোত্রে লভতে কেন সংজ্ঞাম্
এতত্তত্ত্বং সর্বমাচক্ষ্ব পৃষ্টঃ; ক্ষেত্রজ্ঞং ত্বাং তাত মন্যাম সর্বে
85.14
যয়াতিরুবাচ
বায়ুঃ সমুত্কর্ষতি গর্ভয়োনি;মৃতৌ রেতঃ পুষ্পরসানুপৃক্তম্
স তত্র তন্মাত্রকৃতাধিকারঃ; ক্রমেণ সংবর্ধয়তীহ গর্ভম্
85.15
স জায়মানো বিগৃহীতগাত্রঃ; ষড্জ্ঞাননিষ্ঠায়তনো মনুষ্যঃ
স শ্রোত্রাভ্যাং বেদয়তীহ শব্দং; সর্বং রূপং পশ্যতি চক্ষুষা চ
85.16
ঘ্রাণেন গন্ধং জিহ্বয়াথো রসং চ; ত্বচা স্পর্শং মনসা বেদ ভাবম্
ইত্যষ্টকেহোপচিতিং চ বিদ্ধি; মহাত্মনঃ প্রাণভৃতঃ শরীরে
85.17
অষ্টক উবাচ
যঃ সংস্থিতঃ পুরুষো দহ্যতে বা; নিখন্যতে বাপি নিঘৃষ্যতে বা
অভাবভূতঃ স বিনাশমেত্য; কেনাত্মানং চেতয়তে পুরস্তাৎ
85.18
যয়াতিরুবাচ
হিত্বা সোঽসূন্সুপ্তবন্নিষ্টনিত্বা; পুরোধায় সুকৃতং দুষ্কৃতং চ
অন্যাং যোনিং পবনাগ্রানুসারী; হিত্বা দেহং ভজতে রাজসিংহ
85.19
পুণ্যাং যোনিং পুণ্যকৃতো ব্রজন্তি; পাপাং যোনিং পাপকৃতো ব্রজন্তি
কীটাঃ পতংগাশ্চ ভবন্তি পাপা; ন মে বিবক্ষাস্তি মহানুভাব
85.20
চতুষ্পদা দ্বিপদাঃ ষট্পদাশ্চ; তথাভূতা গর্ভভূতা ভবন্তি
আখ্যাতমেতন্নিখিলেন সর্বং; ভূয়স্তু কিং পৃচ্ছসি রাজসিংহ
85.21
অষ্টক উবাচ
কিং স্বিত্কৃত্বা লভতে তাত লোকা;ন্মর্ত্যঃ শ্রেষ্ঠাংস্তপসা বিদ্যয়া বা
তন্মে পৃষ্টঃ শংস সর্বং যথাব;চ্ছুভাঁল্লোকান্যেন গচ্ছেত্ক্রমেণ
85.22
যয়াতিরুবাচ
তপশ্চ দানং চ শমো দমশ্চ; হ্রীরার্জবং সর্বভূতানুকম্পা
নশ্যন্তি মানেন তমোঽভিভূতাঃ; পুংসঃ সদৈবেতি বদন্তি সন্তঃ
85.23
অধীয়ানঃ পণ্ডিতং মন্যমানো; যো বিদ্যয়া হন্তি যশঃ পরেষাম্
তস্যান্তবন্তশ্চ ভবন্তি লোকা; ন চাস্য তদ্ব্রহ্ম ফলং দদাতি
85.24
চত্বারি কর্মাণ্যভয়ংকরাণি; ভয়ং প্রয়চ্ছন্ত্যয়থাকৃতানি
মানাগ্নিহোত্রমুত মানমৌনং; মানেনাধীতমুত মানয়জ্ঞঃ
85.25
ন মান্যমানো মুদমাদদীত; ন সংতাপং প্রাপ্নুয়াচ্চাবমানাৎ
সন্তঃ সতঃ পূজয়ন্তীহ লোকে; নাসাধবঃ সাধুবুদ্ধিং লভন্তে
85.26
ইতি দদ্যাদিতি যজেদিত্যধীয়ীত মে ব্রতম্
ইত্যস্মিন্নভয়ান্যাহুস্তানি বর্জ্যানি নিত্যশঃ
85.27
যেনাশ্রয়ং বেদয়ন্তে পুরাণং; মনীষিণো মানসমানভক্তম্
তন্নিঃশ্রেয়স্তৈজসং রূপমেত্য; পরাং শান্তিং প্রাপ্নুয়ুঃ প্রেত্য চেহ