অধ্যায় 86

86.1

অষ্টক উবাচ
চরন্গৃহস্থঃ কথমেতি দেবা;ন্কথং ভিক্ষুঃ কথমাচার্যকর্মা
বানপ্রস্থঃ সত্পথে সংনিবিষ্টো; বহূন্যস্মিন্সংপ্রতি বেদয়ন্তি

যয়াতিরুবাচ
আহূতাধ্যায়ী গুরুকর্মস্বচোদ্যঃ; পূর্বোত্থায়ী চরমং চোপশায়ী
মৃদুর্দান্তো ধৃতিমানপ্রমত্তঃ; স্বাধ্যায়শীলঃ সিধ্যতি ব্রহ্মচারী

ধর্মাগতং প্রাপ্য ধনং যজেত; দদ্যাত্সদৈবাতিথীন্ভোজয়েচ্চ
অনাদদানশ্চ পরৈরদত্তং; সৈষা গৃহস্থোপনিষত্পুরাণী

স্ববীর্যজীবী বৃজিনান্নিবৃত্তো; দাতা পরেভ্যো ন পরোপতাপী
তাদৃঙ্মুনিঃ সিদ্ধিমুপৈতি মুখ্যাং; বসন্নরণ্যে নিয়তাহারচেষ্টঃ

অশিল্পজীবী নগৃহশ্চ নিত্যং; জিতেন্দ্রিয়ঃ সর্বতো বিপ্রমুক্তঃ
অনোকসারী লঘুরল্পচার;শ্চরন্দেশানেকচরঃ স ভিক্ষুঃ

রাত্র্যা যয়া চাভিজিতাশ্চ লোকা; ভবন্তি কামা বিজিতাঃ সুখাশ্চ
তামেব রাত্রিং প্রয়তেত বিদ্বা;নরণ্যসংস্থো ভবিতুং যতাত্মা

দশৈব পূর্বান্দশ চাপরাংস্তু; জ্ঞাতীন্সহাত্মানমথৈকবিংশম্
অরণ্যবাসী সুকৃতে দধাতি; বিমুচ্যারণ্যে স্বশরীরধাতূন্

অষ্টক উবাচ
কতি স্বিদেব মুনয়ো মৌনানি কতি চাপ্যুত
ভবন্তীতি তদাচক্ষ্ব শ্রোতুমিচ্ছামহে বয়ম্

যয়াতিরুবাচ
অরণ্যে বসতো যস্য গ্রামো ভবতি পৃষ্ঠতঃ
গ্রামে বা বসতোঽরণ্যং স মুনিঃ স্যাজ্জনাধিপ

অষ্টক উবাচ
কথং স্বিদ্বসতোঽরণ্যে গ্রামো ভবতি পৃষ্ঠতঃ
গ্রামে বা বসতোঽরণ্যং কথং ভবতি পৃষ্ঠতঃ

যয়াতিরুবাচ
ন গ্রাম্যমুপয়ুঞ্জীত য আরণ্যো মুনির্ভবেৎ
তথাস্য বসতোঽরণ্যে গ্রামো ভবতি পৃষ্ঠতঃ

অনগ্নিরনিকেতশ্চ অগোত্রচরণো মুনিঃ
কৌপীনাচ্ছাদনং যাবত্তাবদিচ্ছেচ্চ চীবরম্

যাবত্প্রাণাভিসংধানং তাবদিচ্ছেচ্চ ভোজনম্
তথাস্য বসতো গ্রামেঽরণ্যং ভবতি পৃষ্ঠতঃ

যস্তু কামান্পরিত্যজ্য ত্যক্তকর্মা জিতেন্দ্রিয়ঃ
আতিষ্ঠেত মুনির্মৌনং স লোকে সিদ্ধিমাপ্নুয়াৎ

ধৌতদন্তং কৃত্তনখং সদা স্নাতমলংকৃতম্
অসিতং সিতকর্মস্থং কস্তং নার্চিতুমর্হতি

তপসা কর্শিতঃ ক্ষামঃ ক্ষীণমাংসাস্থিশোণিতঃ
যদা ভবতি নির্দ্বন্দ্বো মুনির্মৌনং সমাস্থিতঃ
অথ লোকমিমং জিত্বা লোকং বিজয়তে পরম্

আস্যেন তু যদাহারং গোবন্মৃগয়তে মুনিঃ
অথাস্য লোকঃ পূর্বো যঃ সোঽমৃতত্বায় কল্পতে