অধ্যায় 87

87.1

অষ্টক উবাচ
কতরস্ত্বেতয়োঃ পূর্বং দেবানামেতি সাত্ম্যতাম্
উভয়োর্ধাবতো রাজন্সূর্যাচন্দ্রমসোরিব

যয়াতিরুবাচ
অনিকেতো গৃহস্থেষু কামবৃত্তেষু সংয়তঃ
গ্রাম এব বসন্ভিক্ষুস্তয়োঃ পূর্বতরং গতঃ

অপ্রাপ্য দীর্ঘমায়ুস্তু যঃ প্রাপ্তো বিকৃতিং চরেৎ
তপ্যেত যদি তত্কৃত্বা চরেত্সোঽন্যত্ততস্তপঃ

যদ্বৈ নৃশংসং তদপথ্যমাহু;র্যঃ সেবতে ধর্মমনর্থবুদ্ধিঃ
অস্বোঽপ্যনীশশ্চ তথৈব রাজং;স্তদার্জবং স সমাধিস্তদার্যম্

অষ্টক উবাচ
কেনাসি দূতঃ প্রহিতোঽদ্য রাজ;ন্যুবা স্রগ্বী দর্শনীয়ঃ সুবর্চাঃ
কুত আগতঃ কতরস্যাং দিশি ত্ব;মুতাহোস্বিত্পার্থিবং স্থানমস্তি

যয়াতিরুবাচ
ইমং ভৌমং নরকং ক্ষীণপুণ্যঃ; প্রবেষ্টুমুর্বীং গগনাদ্বিপ্রকীর্ণঃ
উক্ত্বাহং বঃ প্রপতিষ্যাম্যনন্তরং; ত্বরন্তি মাং ব্রাহ্মণা লোকপালাঃ

সতাং সকাশে তু বৃতঃ প্রপাত;স্তে সংগতা গুণবন্তশ্চ সর্বে
শক্রাচ্চ লব্ধো হি বরো ময়ৈষ; পতিষ্যতা ভূমিতলে নরেন্দ্র

অষ্টক উবাচ
পৃচ্ছামি ত্বাং মা প্রপত প্রপাতং; যদি লোকাঃ পার্থিব সন্তি মেঽত্র
যদ্যন্তরিক্ষে যদি বা দিবি শ্রিতাঃ; ক্ষেত্রজ্ঞং ত্বাং তস্য ধর্মস্য মন্যে

যয়াতিরুবাচ
যাবত্পৃথিব্যাং বিহিতং গবাশ্বং; সহারণ্যৈঃ পশুভিঃ পর্বতৈশ্চ
তাবল্লোকা দিবি তে সংস্থিতা বৈ; তথা বিজানীহি নরেন্দ্রসিংহ

অষ্টক উবাচ
তাংস্তে দদামি মা প্রপত প্রপাতং; যে মে লোকা দিবি রাজেন্দ্র সন্তি
যদ্যন্তরিক্ষে যদি বা দিবি শ্রিতা;স্তানাক্রম ক্ষিপ্রমমিত্রসাহ

যয়াতিরুবাচ
নাস্মদ্বিধোঽব্রাহ্মণো ব্রহ্মবিচ্চ; প্রতিগ্রহে বর্ততে রাজমুখ্য
যথা প্রদেয়ং সততং দ্বিজেভ্য;স্তথাদদং পূর্বমহং নরেন্দ্র

নাব্রাহ্মণঃ কৃপণো জাতু জীবে;দ্যা চাপি স্যাদ্ব্রাহ্মণী বীরপত্নী
সোঽহং যদৈবাকৃতপূর্বং চরেয়ং; বিবিত্সমানঃ কিমু তত্র সাধু

প্রতর্দন উবাচ
পৃচ্ছামি ত্বাং স্পৃহণীয়রূপ; প্রতর্দনোঽহং যদি মে সন্তি লোকাঃ
যদ্যন্তরিক্ষে যদি বা দিবি শ্রিতাঃ; ক্ষেত্রজ্ঞং ত্বাং তস্য ধর্মস্য মন্যে

যয়াতিরুবাচ
সন্তি লোকা বহবস্তে নরেন্দ্র; অপ্যেকৈকঃ সপ্ত সপ্তাপ্যহানি
মধুচ্যুতো ঘৃতপৃক্তা বিশোকা;স্তে নান্তবন্তঃ প্রতিপালয়ন্তি

প্রতর্দন উবাচ
তাংস্তে দদামি মা প্রপত প্রপাতং; যে মে লোকাস্তব তে বৈ ভবন্তু
যদ্যন্তরিক্ষে যদি বা দিবি শ্রিতা;স্তানাক্রম ক্ষিপ্রমপেতমোহঃ

যয়াতিরুবাচ
ন তুল্যতেজাঃ সুকৃতং কাময়েত; যোগক্ষেমং পার্থিব পার্থিবঃ সন্
দৈবাদেশাদাপদং প্রাপ্য বিদ্বাং;শ্চরেন্নৃশংসং ন হি জাতু রাজা

ধর্ম্যং মার্গং চেতয়ানো যশস্যং; কুর্যান্নৃপো ধর্মমবেক্ষমাণঃ
ন মদ্বিধো ধর্মবুদ্ধিঃ প্রজান;ন্কুর্যাদেবং কৃপণং মাং যথাত্থ

কুর্যামপূর্বং ন কৃতং যদন্যৈ;র্বিবিত্সমানঃ কিমু তত্র সাধু
ব্রুবাণমেবং নৃপতিং যয়াতিং; নৃপোত্তমো বসুমনাব্রবীত্তম্