Utshovঅধ্যায় 88
88.1
বসুমনা উবাচ
পৃচ্ছামি ত্বাং বসুমনা রৌশদশ্বি;র্যদ্যস্তি লোকো দিবি মহ্যং নরেন্দ্র
যদ্যন্তরিক্ষে প্রথিতো মহাত্ম;ন্ক্ষেত্রজ্ঞং ত্বাং তস্য ধর্মস্য মন্যে
88.2
যয়াতিরুবাচ
যদন্তরিক্ষং পৃথিবী দিশশ্চ; যত্তেজসা তপতে ভানুমাংশ্চ
লোকাস্তাবন্তো দিবি সংস্থিতা বৈ; তে নান্তবন্তঃ প্রতিপালয়ন্তি
88.3
বসুমনা উবাচ
তাংস্তে দদামি পত মা প্রপাতং; যে মে লোকাস্তব তে বৈ ভবন্তু
ক্রীণীষ্বৈনাংস্তৃণকেনাপি রাজ;ন্প্রতিগ্রহস্তে যদি সম্যক্প্রদুষ্টঃ
88.4
যয়াতিরুবাচ
ন মিথ্যাহং বিক্রয়ং বৈ স্মরামি; বৃথা গৃহীতং শিশুকাচ্ছঙ্কমানঃ
কুর্যাং ন চৈবাকৃতপূর্বমন্যৈ;র্বিবিত্সমানঃ কিমু তত্র সাধু
88.5
বসুমনা উবাচ
তাংস্ত্বং লোকান্প্রতিপদ্যস্ব রাজ;ন্ময়া দত্তান্যদি নেষ্টঃ ক্রয়স্তে
অহং ন তান্বৈ প্রতিগন্তা নরেন্দ্র; সর্বে লোকাস্তব তে বৈ ভবন্তু
88.6
শিবিরুবাচ
পৃচ্ছামি ত্বাং শিবিরৌশীনরোঽহং; মমাপি লোকা যদি সন্তীহ তাত
যদ্যন্তরিক্ষে যদি বা দিবি শ্রিতাঃ; ক্ষেত্রজ্ঞং ত্বাং তস্য ধর্মস্য মন্যে
88.7
যয়াতিরুবাচ
ন ত্বং বাচা হৃদয়েনাপি বিদ্ব;ন্পরীপ্সমানান্নাবমংস্থা নরেন্দ্র
তেনানন্তা দিবি লোকাঃ শ্রিতাস্তে; বিদ্যুদ্রূপাঃ স্বনবন্তো মহান্তঃ
88.8
শিবিরুবাচ
তাংস্ত্বং লোকান্প্রতিপদ্যস্ব রাজ;ন্ময়া দত্তান্যদি নেষ্টঃ ক্রয়স্তে
ন চাহং তান্প্রতিপত্স্যেহ দত্ত্বা; যত্র গত্বা ত্বমুপাস্সে হ লোকান্
88.9
যয়াতিরুবাচ
যথা ত্বমিন্দ্রপ্রতিমপ্রভাব;স্তে চাপ্যনন্তা নরদেব লোকাঃ
তথাদ্য লোকে ন রমেঽন্যদত্তে; তস্মাচ্ছিবে নাভিনন্দামি দায়ম্
88.10
অষ্টক উবাচ
ন চেদেকৈকশো রাজঁল্লোকান্নঃ প্রতিনন্দসি
সর্বে প্রদায় ভবতে গন্তারো নরকং বয়ম্
88.11
যয়াতিরুবাচ
যদর্হায় দদধ্বং তত্সন্তঃ সত্যানৃশংস্যতঃ
অহং তু নাভিধৃষ্ণোমি যত্কৃতং ন ময়া পুরা
88.12
অষ্টক উবাচ
কস্যৈতে প্রতিদৃশ্যন্তে রথাঃ পঞ্চ হিরণ্ময়াঃ
উচ্চৈঃ সন্তঃ প্রকাশন্তে জ্বলন্তোঽগ্নিশিখা ইব
88.13
যয়াতিরুবাচ
যুষ্মানেতে হি বক্ষ্যন্তি রথাঃ পঞ্চ হিরণ্ময়াঃ
উচ্চৈঃ সন্তঃ প্রকাশন্তে জ্বলন্তোঽগ্নিশিখা ইব
88.14
অষ্টক উবাচ
আতিষ্ঠস্ব রথং রাজন্বিক্রমস্ব বিহায়সা
বয়মপ্যনুয়াস্যামো যদা কালো ভবিষ্যতি
88.15
যয়াতিরুবাচ
সর্বৈরিদানীং গন্তব্যং সহস্বর্গজিতো বয়ম্
এষ নো বিরজাঃ পন্থা দৃশ্যতে দেবসদ্মনঃ
88.16
বৈশংপায়ন উবাচ
তেঽধিরুহ্য রথান্সর্বে প্রয়াতা নৃপসত্তমাঃ
আক্রমন্তো দিবং ভাভির্ধর্মেণাবৃত্য রোদসী
88.17
অষ্টক উবাচ
অহং মন্যে পূর্বমেকোঽস্মি গন্তা; সখা চেন্দ্রঃ সর্বথা মে মহাত্মা
কস্মাদেবং শিবিরৌশীনরোঽয়;মেকোঽত্যগাত্সর্ববেগেন বাহান্
88.18
যয়াতিরুবাচ
অদদাদ্দেবয়ানায় যাবদ্বিত্তমবিন্দত
উশীনরস্য পুত্রোঽয়ং তস্মাচ্ছ্রেষ্ঠো হি নঃ শিবিঃ
88.19
দানং তপঃ সত্যমথাপি ধর্মো; হ্রীঃ শ্রীঃ ক্ষমা সৌম্য তথা তিতিক্ষা
রাজন্নেতান্যপ্রতিমস্য রাজ্ঞঃ; শিবেঃ স্থিতান্যনৃশংসস্য বুদ্ধ্যা
এবংবৃত্তো হ্রীনিষেধশ্চ যস্মা;ত্তস্মাচ্ছিবিরত্যগাদ্বৈ রথেন
88.20
বৈশংপায়ন উবাচ
অথাষ্টকঃ পুনরেবান্বপৃচ্ছ;ন্মাতামহং কৌতুকাদিন্দ্রকল্পম্
পৃচ্ছামি ত্বাং নৃপতে ব্রূহি সত্যং; কুতশ্চ কস্যাসি সুতশ্চ কস্য
কৃতং ত্বয়া যদ্ধি ন তস্য কর্তা; লোকে ত্বদন্যঃ ক্ষত্রিয়ো ব্রাহ্মণো বা
88.21
যয়াতিরুবাচ
যয়াতিরস্মি নহুষস্য পুত্রঃ; পূরোঃ পিতা সার্বভৌমস্ত্বিহাসম্
গুহ্যমর্থং মামকেভ্যো ব্রবীমি; মাতামহোঽহং ভবতাং প্রকাশঃ
88.22
সর্বামিমাং পৃথিবীং নির্জিগায়; প্রস্থে বদ্ধ্বা হ্যদদং ব্রাহ্মণেভ্যঃ
মেধ্যানশ্বানেকশফান্সুরূপাং;স্তদা দেবাঃ পুণ্যভাজো ভবন্তি
88.23
অদামহং পৃথিবীং ব্রাহ্মণেভ্যঃ; পূর্ণামিমামখিলাং বাহনস্য
গোভিঃ সুবর্ণেন ধনৈশ্চ মুখ্যৈ;স্তত্রাসন্গাঃ শতমর্বুদানি
88.24
সত্যেন মে দ্যৌশ্চ বসুংধরা চ; তথৈবাগ্নির্জ্বলতে মানুষেষু
ন মে বৃথা ব্যাহৃতমেব বাক্যং; সত্যং হি সন্তঃ প্রতিপূজয়ন্তি
সর্বে চ দেবা মুনয়শ্চ লোকাঃ; সত্যেন পূজ্যা ইতি মে মনোগতম্
88.25
যো নঃ স্বর্গজিতঃ সর্বান্যথাবৃত্তং নিবেদয়েৎ
অনসূয়ুর্দ্বিজাগ্রেভ্যঃ স লভেন্নঃ সলোকতাম্
88.26
বৈশংপায়ন উবাচ
এবং রাজা স মহাত্মা হ্যতীব; স্বৈর্দৌহিত্রৈস্তারিতোঽমিত্রসাহঃ
ত্যক্ত্বা মহীং পরমোদারকর্মা; স্বর্গং গতঃ কর্মভির্ব্যাপ্য পৃথ্বীম্