Utshovঅধ্যায় 89
89.1
জনমেজয় উবাচ
ভগবঞ্শ্রোতুমিচ্ছামি পূরোর্বংশকরান্নৃপান্
যদ্বীর্যা যাদৃশাশ্চৈব যাবন্তো যত্পরাক্রমাঃ
89.2
ন হ্যস্মিঞ্শীলহীনো বা নির্বীর্যো বা নরাধিপঃ
প্রজাবিরহিতো বাপি ভূতপূর্বঃ কদাচন
89.3
তেষাং প্রথিতবৃত্তানাং রাজ্ঞাং বিজ্ঞানশালিনাম্
চরিতং শ্রোতুমিচ্ছামি বিস্তরেণ তপোধন
89.4
বৈশংপায়ন উবাচ
হন্ত তে কথয়িষ্যামি যন্মাং ত্বং পরিপৃচ্ছসি
পূরোর্বংশধরান্বীরাঞ্শক্রপ্রতিমতেজসঃ
89.5
প্রবীরেশ্বররৌদ্রাশ্বাস্ত্রয়ঃ পুত্রা মহারথাঃ
পূরোঃ পৌষ্ট্যামজায়ন্ত প্রবীরস্তত্র বংশকৃৎ
89.6
মনস্যুরভবত্তস্মাচ্ছূরঃ শ্যেনীসুতঃ প্রভুঃ
পৃথিব্যাশ্চতুরন্তায়া গোপ্তা রাজীবলোচনঃ
89.7
সুভ্রূঃ সংহননো বাগ্মী সৌবীরীতনয়াস্ত্রয়ঃ
মনস্যোরভবন্পুত্রাঃ শূরাঃ সর্বে মহারথাঃ
89.8
রৌদ্রাশ্বস্য মহেষ্বাসা দশাপ্সরসি সূনবঃ
যজ্বানো জজ্ঞিরে শূরাঃ প্রজাবন্তো বহুশ্রুতাঃ
সর্বে সর্বাস্ত্রবিদ্বাংসঃ সর্বে ধর্মপরায়ণাঃ
89.9
ঋচেপুরথ কক্ষেপুঃ কৃকণেপুশ্চ বীর্যবান্
স্থণ্ডিলেপুর্বনেপুশ্চ স্থলেপুশ্চ মহারথঃ
89.10
তেজেপুর্বলবান্ধীমান্সত্যেপুশ্চেন্দ্রবিক্রমঃ
ধর্মেপুঃ সংনতেপুশ্চ দশমো দেববিক্রমঃ
অনাধৃষ্টিসুতাস্তাত রাজসূয়াশ্বমেধিনঃ
89.11
মতিনারস্ততো রাজা বিদ্বাংশ্চর্চেপুতোঽভবৎ
মতিনারসুতা রাজংশ্চত্বারোঽমিতবিক্রমাঃ
তংসুর্মহানতিরথো দ্রুহ্যুশ্চাপ্রতিমদ্যুতিঃ
89.12
তেষাং তংসুর্মহাবীর্যঃ পৌরবং বংশমুদ্বহন্
আজহার যশো দীপ্তং জিগায় চ বসুংধরাম্
89.13
ইলিনং তু সুতং তংসুর্জনয়ামাস বীর্যবান্
সোঽপি কৃত্স্নামিমাং ভূমিং বিজিগ্যে জয়তাং বরঃ
89.14
রথংতর্যাং সুতান্পঞ্চ পঞ্চভূতোপমাংস্ততঃ
ইলিনো জনয়ামাস দুঃষন্তপ্রভৃতীন্নৃপ
89.15
দুঃষন্তং শূরভীমৌ চ প্রপূর্বং বসুমেব চ
তেষাং জ্যেষ্ঠোঽভবদ্রাজা দুঃষন্তো জনমেজয়
89.16
দুঃষন্তাদ্ভরতো জজ্ঞে বিদ্বাঞ্শাকুন্তলো নৃপঃ
তস্মাদ্ভরতবংশস্য বিপ্রতস্থে মহদ্যশঃ
89.17
ভরতস্তিসৃষু স্ত্রীষু নব পুত্রানজীজনৎ
নাভ্যনন্দন্ত তান্রাজা নানুরূপা মমেত্যুত
89.18
ততো মহদ্ভিঃ ক্রতুভিরীজানো ভরতস্তদা
লেভে পুত্রং ভরদ্বাজাদ্ভুমন্যুং নাম ভারত
89.19
ততঃ পুত্রিণমাত্মানং জ্ঞাত্বা পৌরবনন্দনঃ
ভুমন্যুং ভরতশ্রেষ্ঠ যৌবরাজ্যেঽভ্যষেচয়ৎ
89.20
ততস্তস্য মহীন্দ্রস্য বিতথঃ পুত্রকোঽভবৎ
ততঃ স বিতথো নাম ভুমন্যোরভবত্সুতঃ
89.21
সুহোত্রশ্চ সুহোতা চ সুহবিঃ সুয়জুস্তথা
পুষ্করিণ্যামৃচীকস্য ভুমন্যোরভবন্সুতাঃ
89.22
তেষাং জ্যেষ্ঠঃ সুহোত্রস্তু রাজ্যমাপ মহীক্ষিতাম্
রাজসূয়াশ্বমেধাদ্যৈঃ সোঽয়জদ্বহুভিঃ সবৈঃ
89.23
সুহোত্রঃ পৃথিবীং সর্বাং বুভুজে সাগরাম্বরাম্
পূর্ণাং হস্তিগবাশ্বস্য বহুরত্নসমাকুলাম্
89.24
মমজ্জেব মহী তস্য ভূরিভারাবপীডিতা
হস্ত্যশ্বরথসংপূর্ণা মনুষ্যকলিলা ভৃশম্
89.25
সুহোত্রে রাজনি তদা ধর্মতঃ শাসতি প্রজাঃ
চৈত্যয়ূপাঙ্কিতা চাসীদ্ভূমিঃ শতসহস্রশঃ
প্রবৃদ্ধজনসস্যা চ সহদেবা ব্যরোচত
89.26
ঐক্ষ্বাকী জনয়ামাস সুহোত্রাত্পৃথিবীপতেঃ
অজমীঢং সুমীঢং চ পুরুমীঢং চ ভারত
89.27
অজমীঢো বরস্তেষাং তস্মিন্বংশঃ প্রতিষ্ঠিতঃ
ষট্পুত্রান্সোঽপ্যজনয়ত্তিসৃষু স্ত্রীষু ভারত
89.28
ঋক্ষং ধূমিন্যথো নীলী দুঃষন্তপরমেষ্ঠিনৌ
কেশিন্যজনয়জ্জহ্নুমুভৌ চ জনরূপিণৌ
89.29
তথেমে সর্বপাঞ্চালা দুঃষন্তপরমেষ্ঠিনোঃ
অন্বয়াঃ কুশিকা রাজঞ্জহ্নোরমিততেজসঃ
89.30
জনরূপিণয়োর্জ্যেষ্ঠমৃক্ষমাহুর্জনাধিপম্
ঋক্ষাত্সংবরণো জজ্ঞে রাজন্বংশকরস্তব
89.31
আর্ক্ষে সংবরণে রাজন্প্রশাসতি বসুংধরাম্
সংক্ষয়ঃ সুমহানাসীত্প্রজানামিতি শুশ্রুমঃ
89.32
ব্যশীর্যত ততো রাষ্ট্রং ক্ষয়ৈর্নানাবিধৈস্তথা
ক্ষুন্মৃত্যুভ্যামনাবৃষ্ট্যা ব্যাধিভিশ্চ সমাহতম্
অভ্যঘ্নন্ভারতাংশ্চৈব সপত্নানাং বলানি চ
89.33
চালয়ন্বসুধাং চৈব বলেন চতুরঙ্গিণা
অভ্যয়াত্তং চ পাঞ্চাল্যো বিজিত্য তরসা মহীম্
অক্ষৌহিণীভির্দশভিঃ স এনং সমরেঽজয়ৎ
89.34
ততঃ সদারঃ সামাত্যঃ সপুত্রঃ সসুহৃজ্জনঃ
রাজা সংবরণস্তস্মাত্পলায়ত মহাভয়াৎ
89.35
সিন্ধোর্নদস্য মহতো নিকুঞ্জে ন্যবসত্তদা
নদীবিষয়পর্যন্তে পর্বতস্য সমীপতঃ
তত্রাবসন্বহূন্কালান্ভারতা দুর্গমাশ্রিতাঃ
89.36
তেষাং নিবসতাং তত্র সহস্রং পরিবত্সরান্
অথাভ্যগচ্ছদ্ভরতান্বসিষ্ঠো ভগবানৃষিঃ
89.37
তমাগতং প্রয়ত্নেন প্রত্যুদ্গম্যাভিবাদ্য চ
অর্ঘ্যমভ্যাহরংস্তস্মৈ তে সর্বে ভারতাস্তদা
নিবেদ্য সর্বমৃষয়ে সত্কারেণ সুবর্চসে
89.38
তং সমামষ্টমীমুষ্টং রাজা বব্রে স্বয়ং তদা
পুরোহিতো ভবান্নোঽস্তু রাজ্যায় প্রয়তামহে
ওমিত্যেবং বসিষ্ঠোঽপি ভারতান্প্রত্যপদ্যত
89.39
অথাভ্যষিঞ্চত্সাম্রাজ্যে সর্বক্ষত্রস্য পৌরবম্
বিষাণভূতং সর্বস্যাং পৃথিব্যামিতি নঃ শ্রুতম্
89.40
ভরতাধ্যুষিতং পূর্বং সোঽধ্যতিষ্ঠত্পুরোত্তমম্
পুনর্বলিভৃতশ্চৈব চক্রে সর্বমহীক্ষিতঃ
89.41
ততঃ স পৃথিবীং প্রাপ্য পুনরীজে মহাবলঃ
আজমীঢো মহায়জ্ঞৈর্বহুভির্ভূরিদক্ষিণৈঃ
89.42
ততঃ সংবরণাত্সৌরী সুষুবে তপতী কুরুম্
রাজত্বে তং প্রজাঃ সর্বা ধর্মজ্ঞ ইতি বব্রিরে
89.43
তস্য নাম্নাভিবিখ্যাতং পৃথিব্যাং কুরুজাঙ্গলম্
কুরুক্ষেত্রং স তপসা পুণ্যং চক্রে মহাতপাঃ
89.44
অশ্ববন্তমভিষ্বন্তং তথা চিত্ররথং মুনিম্
জনমেজয়ং চ বিখ্যাতং পুত্রাংশ্চাস্যানুশুশ্রুমঃ
পঞ্চৈতান্বাহিনী পুত্রান্ব্যজায়ত মনস্বিনী
89.45
অভিষ্বতঃ পরিক্ষিত্তু শবলাশ্বশ্চ বীর্যবান্
অভিরাজো বিরাজশ্চ শল্মলশ্চ মহাবলঃ
89.46
উচ্চৈঃশ্রবা ভদ্রকারো জিতারিশ্চাষ্টমঃ স্মৃতঃ
এতেষামন্ববায়ে তু খ্যাতাস্তে কর্মজৈর্গুণৈঃ
89.47
জনমেজয়াদয়ঃ সপ্ত তথৈবান্যে মহাবলাঃ
পরিক্ষিতোঽভবন্পুত্রাঃ সর্বে ধর্মার্থকোবিদাঃ
89.48
কক্ষসেনোগ্রসেনৌ চ চিত্রসেনশ্চ বীর্যবান্
ইন্দ্রসেনঃ সুষেণশ্চ ভীমসেনশ্চ নামতঃ
89.49
জনমেজয়স্য তনয়া ভুবি খ্যাতা মহাবলাঃ
ধৃতরাষ্ট্রঃ প্রথমজঃ পাণ্ডুর্বাহ্লীক এব চ
89.50
নিষধশ্চ মহাতেজাস্তথা জাম্বূনদো বলী
কুণ্ডোদরঃ পদাতিশ্চ বসাতিশ্চাষ্টমঃ স্মৃতঃ
সর্বে ধর্মার্থকুশলাঃ সর্বে ভূতহিতে রতাঃ
89.51
ধৃতরাষ্ট্রোঽথ রাজাসীত্তস্য পুত্রোঽথ কুণ্ডিকঃ
হস্তী বিতর্কঃ ক্রাথশ্চ কুণ্ডলশ্চাপি পঞ্চমঃ
হবিঃশ্রবাস্তথেন্দ্রাভঃ সুমন্যুশ্চাপরাজিতঃ
89.52
প্রতীপস্য ত্রয়ঃ পুত্রা জজ্ঞিরে ভরতর্ষভ
দেবাপিঃ শংতনুশ্চৈব বাহ্লীকশ্চ মহারথঃ
89.53
দেবাপিস্তু প্রবব্রাজ তেষাং ধর্মপরীপ্সয়া
শংতনুশ্চ মহীং লেভে বাহ্লীকশ্চ মহারথঃ
89.54
ভরতস্যান্বয়ে জাতাঃ সত্ত্ববন্তো মহারথাঃ
দেবর্ষিকল্পা নৃপতে বহবো রাজসত্তমাঃ
89.55
এবংবিধাশ্চাপ্যপরে দেবকল্পা মহারথাঃ
জাতা মনোরন্ববায়ে ঐলবংশবিবর্ধনাঃ