Utshovঅধ্যায় 90
90.1
জনমেজয় উবাচ
শ্রুতস্ত্বত্তো ময়া বিপ্র পূর্বেষাং সংভবো মহান্
উদারাশ্চাপি বংশেঽস্মিন্রাজানো মে পরিশ্রুতাঃ
90.2
কিং তু লঘ্বর্থসংয়ুক্তং প্রিয়াখ্যানং ন মামতি
প্রীণাত্যতো ভবান্ভূয়ো বিস্তরেণ ব্রবীতু মে
90.3
এতামেব কথাং দিব্যামা প্রজাপতিতো মনোঃ
তেষামাজননং পুণ্যং কস্য ন প্রীতিমাবহেৎ
90.4
সদ্ধর্মগুণমাহাত্ম্যৈরভিবর্ধিতমুত্তমম্
বিষ্টভ্য লোকাংস্ত্রীনেষাং যশঃ স্ফীতমবস্থিতম্
90.5
গুণপ্রভাববীর্যৌজঃসত্ত্বোত্সাহবতামহম্
ন তৃপ্যামি কথাং শৃণ্বন্নমৃতাস্বাদসংমিতাম্
90.6
বৈশংপায়ন উবাচ
শৃণু রাজন্পুরা সম্যঙ্ময়া দ্বৈপায়নাচ্ছ্রুতম্
প্রোচ্যমানমিদং কৃত্স্নং স্ববংশজননং শুভম্
90.7
দক্ষস্যাদিতিঃ
অদিতের্বিবস্বান্
বিবস্বতো মনুঃ
মনোরিলা
ইলায়াঃ পুরূরবাঃ
পুরূরবস আয়ুঃ
আয়ুষো নহুষঃ
নহুষস্য যয়াতিঃ
90.8
যয়াতের্দ্বে ভার্যে বভূবতুঃ
উশনসো দুহিতা দেবয়ানী বৃষপর্বণশ্চ দুহিতা শর্মিষ্ঠা নাম
অত্রানুবংশো ভবতি
90.9
যদুং চ তুর্বসুং চৈব দেবয়ানী ব্যজায়ত
দ্রুহ্যুং চানুং চ পূরুং চ শর্মিষ্ঠা বার্ষপর্বণী
90.10
তত্র যদোর্যাদবাঃ
পূরোঃ পৌরবাঃ
90.11
পূরোর্ভার্যা কৌসল্যা নাম
তস্যামস্য জজ্ঞে জনমেজয়ো নাম
যস্ত্রীনশ্বমেধানাজহার
বিশ্বজিতা চেষ্ট্বা বনং প্রবিবেশ
90.12
জনমেজয়ঃ খল্বনন্তাং নামোপয়েমে মাধবীম্
তস্যামস্য জজ্ঞে প্রাচিন্বান্
যঃ প্রাচীং দিশং জিগায় যাবত্সূর্যোদয়াৎ
ততস্তস্য প্রাচিন্বত্বম্
90.13
প্রাচিন্বান্খল্বশ্মকীমুপয়েমে
তস্যামস্য জজ্ঞে সংয়াতিঃ
90.14
সংয়াতিঃ খলু দৃষদ্বতো দুহিতরং বরাঙ্গীং নামোপয়েমে
তস্যামস্য জজ্ঞে অহংপাতিঃ
90.15
অহংপাতিস্তু খলু কৃতবীর্যদুহিতরমুপয়েমে ভানুমতীং নাম
তস্যামস্য জজ্ঞে সার্বভৌমঃ
90.16
সার্বভৌমঃ খলু জিত্বাজহার কৈকেয়ীং সুনন্দাং নাম
তস্যামস্য জজ্ঞে জয়ত্সেনঃ
90.17
জয়ত্সেনঃ খলু বৈদর্ভীমুপয়েমে সুষুবাং নাম
তস্যামস্য জজ্ঞে অরাচীনঃ
90.18
অরাচীনোঽপি বৈদর্ভীমেবাপরামুপয়েমে মর্যাদাং নাম
তস্যামস্য জজ্ঞে মহাভৌমঃ
90.19
মহাভৌমঃ খলু প্রাসেনজিতীমুপয়েমে সুয়জ্ঞাং নাম
তস্যামস্য জজ্ঞে অয়ুতনায়ী
যঃ পুরুষমেধানাময়ুতমানয়ৎ
তদস্যায়ুতনায়িত্বম্
90.20
অয়ুতনায়ী খলু পৃথুশ্রবসো দুহিতরমুপয়েমে ভাসাং নাম
তস্যামস্য জজ্ঞে অক্রোধনঃ
90.21
অক্রোধনঃ খলু কালিঙ্গীং করণ্ডুং নামোপয়েমে
তস্যামস্য জজ্ঞে দেবাতিথিঃ
90.22
দেবাতিথিঃ খলু বৈদেহীমুপয়েমে মর্যাদাং নাম
তস্যামস্য জজ্ঞে ঋচঃ
90.23
ঋচঃ খল্বাঙ্গেয়ীমুপয়েমে সুদেবাং নাম
তস্যাং পুত্রমজনয়দৃক্ষম্
90.24
ঋক্ষঃ খলু তক্ষকদুহিতরমুপয়েমে জ্বালাং নাম
তস্যাং পুত্রং মতিনারং নামোত্পাদয়ামাস
90.25
মতিনারঃ খলু সরস্বত্যাং দ্বাদশবার্ষিকং সত্রমাজহার
90.26
নিবৃত্তে চ সত্রে সরস্বত্যভিগম্য তং ভর্তারং বরয়ামাস
তস্যাং পুত্রমজনয়ত্তংসুং নাম
90.27
অত্রানুবংশো ভবতি
90.28
তংসুং সরস্বতী পুত্রং মতিনারাদজীজনৎ
ইলিনং জনয়ামাস কালিন্দ্যাং তংসুরাত্মজম্
90.29
ইলিনস্তু রথংতর্যাং দুঃষন্তাদ্যান্পঞ্চ পুত্রানজনয়ৎ
90.30
দুঃষন্তঃ খলু বিশ্বামিত্রদুহিতরং শকুন্তলাং নামোপয়েমে
তস্যামস্য জজ্ঞে ভরতঃ
তত্র শ্লোকৌ ভবতঃ
90.31
মাতা ভস্ত্রা পিতুঃ পুত্রো যেন জাতঃ স এব সঃ
ভরস্ব পুত্রং দুঃষন্ত মাবমংস্থাঃ শকুন্তলাম্
90.32
রেতোধাঃ পুত্র উন্নয়তি নরদেব যমক্ষয়াৎ
ত্বং চাস্য ধাতা গর্ভস্য সত্যমাহ শকুন্তলা
90.33
ততোঽস্য ভরতত্বম্
90.34
ভরতঃ খলু কাশেয়ীমুপয়েমে সার্বসেনীং সুনন্দাং নাম
তস্যামস্য জজ্ঞে ভুমন্যুঃ
90.35
ভুমন্যুঃ খলু দাশার্হীমুপয়েমে জয়াং নাম
তস্যামস্য জজ্ঞে সুহোত্রঃ
90.36
সুহোত্রঃ খল্বিক্ষ্বাকুকন্যামুপয়েমে সুবর্ণাং নাম
তস্যামস্য জজ্ঞে হস্তী
য ইদং হাস্তিনপুরং মাপয়ামাস
এতদস্য হাস্তিনপুরত্বম্
90.37
হস্তী খলু ত্রৈগর্তীমুপয়েমে যশোধরাং নাম
তস্যামস্য জজ্ঞে বিকুণ্ঠনঃ
90.38
বিকুণ্ঠনঃ খলু দাশার্হীমুপয়েমে সুদেবাং নাম
তস্যামস্য জজ্ঞেঽজমীঢঃ
90.39
অজমীঢস্য চতুর্বিংশং পুত্রশতং বভূব কৈকেয্যাং নাগায়াং গান্ধার্যাং বিমলায়ামৃক্ষায়াং চেতি
পৃথক্পৃথগ্বংশকরা নৃপতয়ঃ
তত্র বংশকরঃ সংবরণঃ
90.40
সংবরণঃ খলু বৈবস্বতীং তপতীং নামোপয়েমে
তস্যামস্য জজ্ঞে কুরুঃ
90.41
কুরুঃ খলু দাশার্হীমুপয়েমে শুভাঙ্গীং নাম
তস্যামস্য জজ্ঞে বিডূরথঃ
90.42
বিডূরথস্তু মাগধীমুপয়েমে সংপ্রিয়াং নাম
তস্যামস্য জজ্ঞেঽরুগ্বান্নাম
90.43
অরুগ্বান্খলু মাগধীমুপয়েমেঽমৃতাং নাম
তস্যামস্য জজ্ঞে পরিক্ষিৎ
90.44
পরিক্ষিত্খলু বাহুদামুপয়েমে সুয়শাং নাম
তস্যামস্য জজ্ঞে ভীমসেনঃ
90.45
ভীমসেনঃ খলু কৈকেয়ীমুপয়েমে সুকুমারীং নাম
তস্যামস্য জজ্ঞে পর্যশ্রবাঃ
যমাহুঃ প্রতীপং নাম
90.46
প্রতীপঃ খলু শৈব্যামুপয়েমে সুনন্দাং নাম
তস্যাং পুত্রানুত্পাদয়ামাস দেবাপিং শংতনুং বাহ্লীকং চেতি
90.47
দেবাপিঃ খলু বাল এবারণ্যং প্রবিবেশ
শংতনুস্তু মহীপালোঽভবৎ
অত্রানুবংশো ভবতি
90.48
যং যং করাভ্যাং স্পৃশতি জীর্ণং স সুখমশ্নুতে
পুনর্যুবা চ ভবতি তস্মাত্তং শংতনুং বিদুঃ
90.49
তদস্য শংতনুত্বম্
90.50
শংতনুঃ খলু গঙ্গাং ভাগীরথীমুপয়েমে
তস্যামস্য জজ্ঞে দেবব্রতঃ
যমাহুর্ভীষ্ম ইতি
90.51
ভীষ্মঃ খলু পিতুঃ প্রিয়চিকীর্ষয়া সত্যবতীমুদবহন্মাতরম্
যামাহুর্গন্ধকালীতি
90.52
তস্যাং কানীনো গর্ভঃ পরাশরাদ্দ্বৈপায়নঃ
তস্যামেব শংতনোর্দ্বৌ পুত্রৌ বভূবতুঃ
চিত্রাঙ্গদো বিচিত্রবীর্যশ্চ
90.53
তয়োরপ্রাপ্তয়ৌবন এব চিত্রাঙ্গদো গন্ধর্বেণ হতঃ
বিচিত্রবীর্যস্তু রাজা সমভবৎ
90.54
বিচিত্রবীর্যঃ খলু কৌসল্যাত্মজেঽম্বিকাম্বালিকে কাশিরাজদুহিতরাবুপয়েমে
90.55
বিচিত্রবীর্যস্ত্বনপত্য এব বিদেহত্বং প্রাপ্তঃ
90.56
ততঃ সত্যবতী চিন্তয়ামাস
দৌঃষন্তো বংশ উচ্ছিদ্যতে ইতি
90.57
সা দ্বৈপায়নমৃষিং চিন্তয়ামাস
90.58
স তস্যাঃ পুরতঃ স্থিতঃ কিং করবাণীতি
90.59
সা তমুবাচ
ভ্রাতা তবানপত্য এব স্বর্যাতো বিচিত্রবীর্যঃ
সাধ্বপত্যং তস্যোত্পাদয়েতি
90.60
স পরমিত্যুক্ত্বা ত্রীন্পুত্রানুত্পাদয়ামাস ধৃতরাষ্ট্রং পাণ্ডুং বিদুরং চেতি
90.61
তত্র ধৃতরাষ্ট্রস্য রাজ্ঞঃ পুত্রশতং বভূব গান্ধার্যাং বরদানাদ্দ্বৈপায়নস্য
90.62
তেষাং ধৃতরাষ্ট্রস্য পুত্রাণাং চত্বারঃ প্রধানা বভূবুর্দুর্যোধনো দুঃশাসনো বিকর্ণশ্চিত্রসেন ইতি
90.63
পাণ্ডোস্তু দ্বে ভার্যে বভূবতুঃ কুন্তী মাদ্রী চেত্যুভে স্ত্রীরত্নে
90.64
অথ পাণ্ডুর্মৃগয়াং চরন্মৈথুনগতমৃষিমপশ্যন্মৃগ্যাং বর্তমানম্
তথৈবাপ্লুতমনাসাদিতকামরসমতৃপ্তং বাণেনাভিজঘান
90.65
স বাণবিদ্ধ উবাচ পাণ্ডুম্
চরতা ধর্মমিমং যেন ত্বয়াভিজ্ঞেন কামরসস্যাহমনবাপ্তকামরসোঽভিহতস্তস্মাত্ত্বমপ্যেতামবস্থামাসাদ্যানবাপ্তকামরসঃ পঞ্চত্বমাপ্স্যসি ক্ষিপ্রমেবেতি
90.66
স বিবর্ণরূপঃ পাণ্ডুঃ শাপং পরিহরমাণো নোপাসর্পত ভার্যে
90.67
বাক্যং চোবাচ
স্বচাপল্যাদিদং প্রাপ্তবানহম্
শৃণোমি চ নানপত্যস্য লোকা সন্তীতি
90.68
সা ত্বং মদর্থে পুত্রানুত্পাদয়েতি কুন্তীমুবাচ
90.69
সা তত্র পুত্রানুত্পাদয়ামাস ধর্মাদ্যুধিষ্ঠিরং মারুতাদ্ভীমসেনং শক্রাদর্জুনমিতি
90.70
স তাং হৃষ্টরূপঃ পাণ্ডুরুবাচ
ইয়ং তে সপত্ন্যনপত্যা
সাধ্বস্যামপত্যমুত্পাদ্যতামিতি
90.71
স এবমস্ত্বিত্যুক্তঃ কুন্ত্যা
90.72
ততো মাদ্র্যামশ্বিভ্যাং নকুলসহদেবাবুত্পাদিতৌ
90.73
মাদ্রীং খল্বলংকৃতাং দৃষ্ট্বা পাণ্ডুর্ভাবং চক্রে
90.74
স তাং স্পৃষ্ট্বৈব বিদেহত্বং প্রাপ্তঃ
90.75
তত্রৈনং চিতাস্থং মাদ্রী সমন্বারুরোহ
90.76
উবাচ কুন্তীম্
যময়োরার্যয়াপ্রমত্তয়া ভবিতব্যমিতি
90.77
ততস্তে পঞ্চ পাণ্ডবাঃ কুন্ত্যা সহিতা হাস্তিনপুরমানীয় তাপসৈর্ভীষ্মস্য বিদুরস্য চ নিবেদিতাঃ
90.78
তত্রাপি জতুগৃহে দগ্ধুং সমারব্ধা ন শকিতা বিদুরমন্ত্রিতেন
90.79
ততশ্চ হিডিম্বমন্তরা হত্বা একচক্রাং গতাঃ
90.80
তস্যামপ্যেকচক্রায়াং বকং নাম রাক্ষসং হত্বা পাঞ্চালনগরমভিগতাঃ
90.81
তস্মাদ্দ্রৌপদীং ভার্যামবিন্দন্স্ববিষয়ং চাজগ্মুঃ কুশলিনঃ
90.82
পুত্রাংশ্চোত্পাদয়ামাসুঃ
প্রতিবিন্ধ্যং যুধিষ্ঠিরঃ
সুতসোমং বৃকোদরঃ
শ্রুতকীর্তিমর্জুনঃ
শতানীকং নকুলঃ
শ্রুতকর্মাণং সহদেব ইতি
90.83
যুধিষ্ঠিরস্তু গোবাসনস্য শৈব্যস্য দেবিকাং নাম কন্যাং স্বয়ংবরে লেভে
তস্যাং পুত্রং জনয়ামাস যৌধেয়ং নাম
90.84
ভীমসেনোঽপি কাশ্যাং বলধরাং নামোপয়েমে বীর্যশুল্কাম্
তস্যাং পুত্রং সর্বগং নামোত্পাদয়ামাস
90.85
অর্জুনঃ খলু দ্বারবতীং গত্বা ভগিনীং বাসুদেবস্য সুভদ্রাং নাম ভার্যামুদবহৎ
তস্যাং পুত্রমভিমন্যুং নাম জনয়ামাস
90.86
নকুলস্তু চৈদ্যাং করেণুবতীং নাম ভার্যামুদবহৎ
তস্যাং পুত্রং নিরমিত্রং নামাজনয়ৎ
90.87
সহদেবোঽপি মাদ্রীমেব স্বয়ংবরে বিজয়াং নামোপয়েমে
তস্যাং পুত্রমজনয়ত্সুহোত্রং নাম
90.88
ভীমসেনস্তু পূর্বমেব হিডিম্বায়াং রাক্ষস্যাং ঘটোত্কচং নাম পুত্রং জনয়ামাস
90.89
ইত্যেতে একাদশ পাণ্ডবানাং পুত্রাঃ
90.90
বিরাটস্য দুহিতরমুত্তরাং নামাভিমন্যুরুপয়েমে
তস্যামস্য পরাসুর্গর্ভোঽজায়ত
90.91
তমুত্সঙ্গেন প্রতিজগ্রাহ পৃথা নিয়োগাত্পুরুষোত্তমস্য বাসুদেবস্য
ষাণ্মাসিকং গর্ভমহমেনং জীবয়িষ্যামীতি
90.92
সংজীবয়িত্বা চৈনমুবাচ
পরিক্ষীণে কুলে জাতো ভবত্বয়ং পরিক্ষিন্নামেতি
90.93
পরিক্ষিত্তু খলু মাদ্রবতীং নামোপয়েমে
তস্যামস্য জনমেজয়ঃ
90.94
জনমেজয়াত্তু বপুষ্টমায়াং দ্বৌ পুত্রৌ শতানীকঃ শঙ্কুশ্চ
90.95
শতানীকস্তু খলু বৈদেহীমুপয়েমে
তস্যামস্য জজ্ঞে পুত্রোঽশ্বমেধদত্তঃ
90.96
ইত্যেষ পূরোর্বংশস্তু পাণ্ডবানাং চ কীর্তিতঃ
পূরোর্বংশমিমং শ্রুত্বা সর্বপাপৈঃ প্রমুচ্যতে