অধ্যায় 91

91.1

বৈশংপায়ন উবাচ
ইক্ষ্বাকুবংশপ্রভবো রাজাসীত্পৃথিবীপতিঃ
মহাভিষ ইতি খ্যাতঃ সত্যবাক্সত্যবিক্রমঃ

সোঽশ্বমেধসহস্রেণ বাজপেয়শতেন চ
তোষয়ামাস দেবেন্দ্রং স্বর্গং লেভে ততঃ প্রভুঃ

ততঃ কদাচিদ্ব্রহ্মাণমুপাসাং চক্রিরে সুরাঃ
তত্র রাজর্ষয়ো আসন্স চ রাজা মহাভিষঃ

অথ গঙ্গা সরিচ্ছ্রেষ্ঠা সমুপায়াত্পিতামহম্
তস্যা বাসঃ সমুদ্ধূতং মারুতেন শশিপ্রভম্

ততোঽভবন্সুরগণাঃ সহসাবাঙ্মুখাস্তদা
মহাভিষস্তু রাজর্ষিরশঙ্কো দৃষ্টবান্নদীম্

অপধ্যাতো ভগবতা ব্রহ্মণা স মহাভিষঃ
উক্তশ্চ জাতো মর্ত্যেষু পুনর্লোকানবাপ্স্যসি

স চিন্তয়িত্বা নৃপতির্নৃপান্সর্বাংস্তপোধনান্
প্রতীপং রোচয়ামাস পিতরং ভূরিবর্চসম্

মহাভিষং তু তং দৃষ্ট্বা নদী ধৈর্যাচ্চ্যুতং নৃপম্
তমেব মনসাধ্যায়মুপাবর্তত্সরিদ্বরা

সা তু বিধ্বস্তবপুষঃ কশ্মলাভিহতৌজসঃ
দদর্শ পথি গচ্ছন্তী বসূন্দেবান্দিবৌকসঃ

তথারূপাংশ্চ তান্দৃষ্ট্বা পপ্রচ্ছ সরিতাং বরা
কিমিদং নষ্টরূপাঃ স্থ কচ্চিত্ক্ষেমং দিবৌকসাম্

তামূচুর্বসবো দেবাঃ শপ্তাঃ স্মো বৈ মহানদি
অল্পেঽপরাধে সংরম্ভাদ্বসিষ্ঠেন মহাত্মনা

বিমূঢা হি বয়ং সর্বে প্রচ্ছন্নমৃষিসত্তমম্
সংধ্যাং বসিষ্ঠমাসীনং তমত্যভিসৃতাঃ পুরা

তেন কোপাদ্বয়ং শপ্তা যোনৌ সংভবতেতি হ
ন শক্যমন্যথা কর্তুং যদুক্তং ব্রহ্মবাদিনা

ত্বং তস্মান্মানুষী ভূত্বা সূষ্ব পুত্রান্বসূন্ভুবি
ন মানুষীণাং জঠরং প্রবিশেমাশুভং বয়ম্

ইত্যুক্তা তান্বসূন্গঙ্গা তথেত্যুক্ত্বাব্রবীদিদম্
মর্ত্যেষু পুরুষশ্রেষ্ঠঃ কো বঃ কর্তা ভবিষ্যতি

বসব ঊচুঃ
প্রতীপস্য সুতো রাজা শংতনুর্নাম ধার্মিকঃ
ভবিতা মানুষে লোকে স নঃ কর্তা ভবিষ্যতি

গঙ্গোবাচ
মমাপ্যেবং মতং দেবা যথাবদত মানঘাঃ
প্রিয়ং তস্য করিষ্যামি যুষ্মাকং চৈতদীপ্সিতম্

বসব ঊচুঃ
জাতান্কুমারান্স্বানপ্সু প্রক্ষেপ্তুং বৈ ত্বমর্হসি
যথা নচিরকালং নো নিষ্কৃতিঃ স্যাত্ত্রিলোকগে

গঙ্গোবাচ
এবমেতত্করিষ্যামি পুত্রস্তস্য বিধীয়তাম্
নাস্য মোঘঃ সংগমঃ স্যাত্পুত্রহেতোর্ময়া সহ

বসব ঊচুঃ
তুরীয়ার্ধং প্রদাস্যামো বীর্যস্যৈকৈকশো বয়ম্
তেন বীর্যেণ পুত্রস্তে ভবিতা তস্য চেপ্সিতঃ

ন সংপত্স্যতি মর্ত্যেষু পুনস্তস্য তু সংততিঃ
তস্মাদপুত্রঃ পুত্রস্তে ভবিষ্যতি স বীর্যবান্

বৈশংপায়ন উবাচ
এবং তে সময়ং কৃত্বা গঙ্গয়া বসবঃ সহ
জগ্মুঃ প্রহৃষ্টমনসো যথাসংকল্পমঞ্জসা