Utshovঅধ্যায় 92
92.1
বৈশংপায়ন উবাচ
ততঃ প্রতীপো রাজা স সর্বভূতহিতে রতঃ
নিষসাদ সমা বহ্বীর্গঙ্গাতীরগতো জপন্
92.2
তস্য রূপগুণোপেতা গঙ্গা শ্রীরিব রূপিণী
উত্তীর্য সলিলাত্তস্মাল্লোভনীয়তমাকৃতিঃ
92.3
অধীয়ানস্য রাজর্ষের্দিব্যরূপা মনস্বিনী
দক্ষিণং শালসংকাশমূরুং ভেজে শুভাননা
92.4
প্রতীপস্তু মহীপালস্তামুবাচ মনস্বিনীম্
করবাণি কিং তে কল্যাণি প্রিয়ং যত্তেঽভিকাঙ্ক্ষিতম্
92.5
স্ত্র্যুবাচ
ত্বামহং কাময়ে রাজন্কুরুশ্রেষ্ঠ ভজস্ব মাম্
ত্যাগঃ কামবতীনাং হি স্ত্রীণাং সদ্ভির্বিগর্হিতঃ
92.6
প্রতীপ উবাচ
নাহং পরস্ত্রিয়ং কামাদ্গচ্ছেয়ং বরবর্ণিনি
ন চাসবর্ণাং কল্যাণি ধর্ম্যং তদ্বিদ্ধি মে ব্রতম্
92.7
স্ত্র্যুবাচ
নাশ্রেয়স্যস্মি নাগম্যা ন বক্তব্যা চ কর্হিচিৎ
ভজ মাং ভজমানাং ত্বং রাজন্কন্যাং বরস্ত্রিয়ম্
92.8
প্রতীপ উবাচ
ময়াতিবৃত্তমেতত্তে যন্মাং চোদয়সি প্রিয়ম্
অন্যথা প্রতিপন্নং মাং নাশয়েদ্ধর্মবিপ্লবঃ
92.9
প্রাপ্য দক্ষিণমূরুং মে ত্বমাশ্লিষ্টা বরাঙ্গনে
অপত্যানাং স্নুষাণাং চ ভীরু বিদ্ধ্যেতদাসনম্
92.10
সব্যতঃ কামিনীভাগস্ত্বয়া স চ বিবর্জিতঃ
তস্মাদহং নাচরিষ্যে ত্বয়ি কামং বরাঙ্গনে
92.11
স্নুষা মে ভব কল্যাণি পুত্রার্থে ত্বাং বৃণোম্যহম্
স্নুষাপক্ষং হি বামোরু ত্বমাগম্য সমাশ্রিতা
92.12
স্ত্র্যুবাচ
এবমপ্যস্তু ধর্মজ্ঞ সংয়ুজ্যেয়ং সুতেন তে
ত্বদ্ভক্ত্যৈব ভজিষ্যামি প্রখ্যাতং ভারতং কুলম্
92.13
পৃথিব্যাং পার্থিবা যে চ তেষাং যূয়ং পরায়ণম্
গুণা ন হি ময়া শক্যা বক্তুং বর্ষশতৈরপি
কুলস্য যে বঃ প্রস্থিতাস্তত্সাধুত্বমনুত্তমম্
92.14
স মে নাভিজনজ্ঞঃ স্যাদাচরেয়ং চ যদ্বিভো
তত্সর্বমেব পুত্রস্তে ন মীমাংসেত কর্হিচিৎ
92.15
এবং বসন্তী পুত্রে তে বর্ধয়িষ্যাম্যহং প্রিয়ম্
পুত্রৈঃ পুণ্যৈঃ প্রিয়ৈশ্চাপি স্বর্গং প্রাপ্স্যতি তে সুতঃ
92.16
বৈশংপায়ন উবাচ
তথেত্যুক্ত্বা তু সা রাজংস্তত্রৈবান্তরধীয়ত
পুত্রজন্ম প্রতীক্ষংস্তু স রাজা তদধারয়ৎ
92.17
এতস্মিন্নেব কালে তু প্রতীপঃ ক্ষত্রিয়র্ষভঃ
তপস্তেপে সুতস্যার্থে সভার্যঃ কুরুনন্দন
92.18
তয়োঃ সমভবত্পুত্রো বৃদ্ধয়োঃ স মহাভিষঃ
শান্তস্য জজ্ঞে সংতানস্তস্মাদাসীত্স শংতনুঃ
92.19
সংস্মরংশ্চাক্ষয়াঁল্লোকান্বিজিতান্স্বেন কর্মণা
পুণ্যকর্মকৃদেবাসীচ্ছংতনুঃ কুরুসত্তম
92.20
প্রতীপঃ শংতনুং পুত্রং যৌবনস্থং ততোঽন্বশাৎ
পুরা মাং স্ত্রী সমভ্যাগাচ্ছংতনো ভূতয়ে তব
92.21
ত্বামাব্রজেদ্যদি রহঃ সা পুত্র বরবর্ণিনী
কাময়ানাভিরূপাঢ্যা দিব্যা স্ত্রী পুত্রকাম্যয়া
সা ত্বয়া নানুয়োক্তব্যা কাসি কস্যাসি বাঙ্গনে
92.22
যচ্চ কুর্যান্ন তত্কার্যং প্রষ্টব্যা সা ত্বয়ানঘ
মন্নিয়োগাদ্ভজন্তীং তাং ভজেথা ইত্যুবাচ তম্
92.23
এবং সংদিশ্য তনয়ং প্রতীপঃ শংতনুং তদা
স্বে চ রাজ্যেঽভিষিচ্যৈনং বনং রাজা বিবেশ হ
92.24
স রাজা শংতনুর্ধীমান্খ্যাতঃ পৃথ্ব্যাং ধনুর্ধরঃ
বভূব মৃগয়াশীলঃ সততং বনগোচরঃ
92.25
স মৃগান্মহিষাংশ্চৈব বিনিঘ্নন্রাজসত্তমঃ
গঙ্গামনুচচারৈকঃ সিদ্ধচারণসেবিতাম্
92.26
স কদাচিন্মহারাজ দদর্শ পরমস্ত্রিয়ম্
জাজ্বল্যমানাং বপুষা সাক্ষাত্পদ্মামিব শ্রিয়ম্
92.27
সর্বানবদ্যাং সুদতীং দিব্যাভরণভূষিতাম্
সূক্ষ্মাম্বরধরামেকাং পদ্মোদরসমপ্রভাম্
92.28
তাং দৃষ্ট্বা হৃষ্টরোমাভূদ্বিস্মিতো রূপসংপদা
পিবন্নিব চ নেত্রাভ্যাং নাতৃপ্যত নরাধিপঃ
92.29
সা চ দৃষ্ট্বৈব রাজানং বিচরন্তং মহাদ্যুতিম্
স্নেহাদাগতসৌহার্দা নাতৃপ্যত বিলাসিনী
92.30
তামুবাচ ততো রাজা সান্ত্বয়ঞ্শ্লক্ষ্ণয়া গিরা
দেবী বা দানবী বা ত্বং গন্ধর্বী যদি বাপ্সরাঃ
92.31
যক্ষী বা পন্নগী বাপি মানুষী বা সুমধ্যমে
যা বা ত্বং সুরগর্ভাভে ভার্যা মে ভব শোভনে
92.32
এতচ্ছ্রুত্বা বচো রাজ্ঞঃ সস্মিতং মৃদু বল্গু চ
বসূনাং সময়ং স্মৃত্বা অভ্যগচ্ছদনিন্দিতা
92.33
উবাচ চৈব রাজ্ঞঃ সা হ্লাদয়ন্তী মনো গিরা
ভবিষ্যামি মহীপাল মহিষী তে বশানুগা
92.34
যত্তু কুর্যামহং রাজঞ্শুভং বা যদি বাশুভম্
ন তদ্বারয়িতব্যাস্মি ন বক্তব্যা তথাপ্রিয়ম্
92.35
এবং হি বর্তমানেঽহং ত্বয়ি বত্স্যামি পার্থিব
বারিতা বিপ্রিয়ং চোক্তা ত্যজেয়ং ত্বামসংশয়ম্
92.36
তথেতি রাজ্ঞা সা তূক্তা তদা ভরতসত্তম
প্রহর্ষমতুলং লেভে প্রাপ্য তং পার্থিবোত্তমম্
92.37
আসাদ্য শংতনুস্তাং চ বুভুজে কামতো বশী
ন প্রষ্টব্যেতি মন্বানো ন স তাং কিংচিদূচিবান্
92.38
স তস্যাঃ শীলবৃত্তেন রূপৌদার্যগুণেন চ
উপচারেণ চ রহস্তুতোষ জগতীপতিঃ
92.39
দিব্যরূপা হি সা দেবী গঙ্গা ত্রিপথগা নদী
মানুষং বিগ্রহং শ্রীমত্কৃত্বা সা বরবর্ণিনী
92.40
ভাগ্যোপনতকামস্য ভার্যেবোপস্থিতাভবৎ
শংতনো রাজসিংহস্য দেবরাজসমদ্যুতেঃ
92.41
সংভোগস্নেহচাতুর্যৈর্হাবলাস্যৈর্মনোহরৈঃ
রাজানং রময়ামাস যথা রেমে তথৈব সঃ
92.42
স রাজা রতিসক্তত্বাদুত্তমস্ত্রীগুণৈর্হৃতঃ
সংবত্সরানৃতূন্মাসান্ন বুবোধ বহূন্গতান্
92.43
রমমাণস্তয়া সার্ধং যথাকামং জনেশ্বরঃ
অষ্টাবজনয়ত্পুত্রাংস্তস্যামমরবর্ণিনঃ
92.44
জাতং জাতং চ সা পুত্রং ক্ষিপত্যম্ভসি ভারত
প্রীণামি ত্বাহমিত্যুক্ত্বা গঙ্গাস্রোতস্যমজ্জয়ৎ
92.45
তস্য তন্ন প্রিয়ং রাজ্ঞঃ শংতনোরভবত্তদা
ন চ তাং কিংচনোবাচ ত্যাগাদ্ভীতো মহীপতিঃ
92.46
অথ তামষ্টমে পুত্রে জাতে প্রহসিতামিব
উবাচ রাজা দুঃখার্তঃ পরীপ্সন্পুত্রমাত্মনঃ
92.47
মা বধীঃ কাসি কস্যাসি কিং হিংসসি সুতানিতি
পুত্রঘ্নি সুমহত্পাপং মা প্রাপস্তিষ্ঠ গর্হিতে
92.48
স্ত্র্যুবাচ
পুত্রকাম ন তে হন্মি পুত্রং পুত্রবতাং বর
জীর্ণস্তু মম বাসোঽয়ং যথা স সময়ঃ কৃতঃ
92.49
অহং গঙ্গা জহ্নুসুতা মহর্ষিগণসেবিতা
দেবকার্যার্থসিদ্ধ্যর্থমুষিটাহং ত্বয়া সহ
92.50
অষ্টেমে বসবো দেবা মহাভাগা মহৌজসঃ
বসিষ্ঠশাপদোষেণ মানুষত্বমুপাগতাঃ
92.51
তেষাং জনয়িতা নান্যস্ত্বদৃতে ভুবি বিদ্যতে
মদ্বিধা মানুষী ধাত্রী ন চৈবাস্তীহ কাচন
92.52
তস্মাত্তজ্জননীহেতোর্মানুষত্বমুপাগতা
জনয়িত্বা বসূনষ্টৌ জিতা লোকাস্ত্বয়াক্ষয়াঃ
92.53
দেবানাং সময়স্ত্বেষ বসূনাং সংশ্রুতো ময়া
জাতং জাতং মোক্ষয়িষ্যে জন্মতো মানুষাদিতি
92.54
তত্তে শাপাদ্বিনির্মুক্তা আপবস্য মহাত্মনঃ
স্বস্তি তেঽস্তু গমিষ্যামি পুত্রং পাহি মহাব্রতম্
92.55
এষ পর্যায়বাসো মে বসূনাং সংনিধৌ কৃতঃ
মত্প্রসূতং বিজানীহি গঙ্গাদত্তমিমং সুতম্