Utshovঅধ্যায় 93
93.1
শংতনুরুবাচ
আপবো নাম কো ন্বেষ বসূনাং কিং চ দুষ্কৃতম্
যস্যাভিশাপাত্তে সর্বে মানুষীং তনুমাগতাঃ
93.2
অনেন চ কুমারেণ গঙ্গাদত্তেন কিং কৃতম্
যস্য চৈব কৃতেনায়ং মানুষেষু নিবত্স্যতি
93.3
ঈশানাঃ সর্বলোকস্য বসবস্তে চ বৈ কথম্
মানুষেষূদপদ্যন্ত তন্মমাচক্ষ্ব জাহ্নবি
93.4
বৈশংপায়ন উবাচ
সৈবমুক্তা ততো গঙ্গা রাজানমিদমব্রবীৎ
ভর্তারং জাহ্নবী দেবী শংতনুং পুরুষর্ষভম্
93.5
যং লেভে বরুণঃ পুত্রং পুরা ভরতসত্তম
বসিষ্ঠো নাম স মুনিঃ খ্যাত আপব ইত্যুত
93.6
তস্যাশ্রমপদং পুণ্যং মৃগপক্ষিগণান্বিতম্
মেরোঃ পার্শ্বে নগেন্দ্রস্য সর্বর্তুকুসুমাবৃতম্
93.7
স বারুণিস্তপস্তেপে তস্মিন্ভরতসত্তম
বনে পুণ্যকৃতাং শ্রেষ্ঠঃ স্বাদুমূলফলোদকে
93.8
দক্ষস্য দুহিতা যা তু সুরভীত্যতিগর্বিতা
গাং প্রজাতা তু সা দেবী কশ্যপাদ্ভরতর্ষভ
93.9
অনুগ্রহার্থং জগতঃ সর্বকামদুঘাং বরাম্
তাং লেভে গাং তু ধর্মাত্মা হোমধেনুং স বারুণিঃ
93.10
সা তস্মিংস্তাপসারণ্যে বসন্তী মুনিসেবিতে
চচার রম্যে ধর্ম্যে চ গৌরপেতভয়া তদা
93.11
অথ তদ্বনমাজগ্মুঃ কদাচিদ্ভরতর্ষভ
পৃথ্বাদ্যা বসবঃ সর্বে দেবদেবর্ষিসেবিতম্
93.12
তে সদারা বনং তচ্চ ব্যচরন্ত সমন্ততঃ
রেমিরে রমণীয়েষু পর্বতেষু বনেষু চ
93.13
তত্রৈকস্য তু ভার্যা বৈ বসোর্বাসববিক্রম
সা চরন্তী বনে তস্মিন্গাং দদর্শ সুমধ্যমা
যা সা বসিষ্ঠস্য মুনেঃ সর্বকামধুগুত্তমা
93.14
সা বিস্ময়সমাবিষ্টা শীলদ্রবিণসংপদা
দিবে বৈ দর্শয়ামাস তাং গাং গোবৃষভেক্ষণ
93.15
স্বাপীনাং চ সুদোগ্ধ্রীং চ সুবালধিমুখাং শুভাম্
উপপন্নাং গুণৈঃ সর্বৈঃ শীলেনানুত্তমেন চ
93.16
এবংগুণসমায়ুক্তাং বসবে বসুনন্দিনী
দর্শয়ামাস রাজেন্দ্র পুরা পৌরবনন্দন
93.17
দ্যৌস্তদা তাং তু দৃষ্ট্বৈব গাং গজেন্দ্রেন্দ্রবিক্রম
উবাচ রাজংস্তাং দেবীং তস্যা রূপগুণান্বদন্
93.18
এষা গৌরুত্তমা দেবি বারুণেরসিতেক্ষণে
ঋষেস্তস্য বরারোহে যস্যেদং বনমুত্তমম্
93.19
অস্যাঃ ক্ষীরং পিবেন্মর্ত্যঃ স্বাদু যো বৈ সুমধ্যমে
দশ বর্ষসহস্রাণি স জীবেত্স্থিরয়ৌবনঃ
93.20
এতচ্ছ্রুত্বা তু সা দেবী নৃপোত্তম সুমধ্যমা
তমুবাচানবদ্যাঙ্গী ভর্তারং দীপ্ততেজসম্
93.21
অস্তি মে মানুষে লোকে নরদেবাত্মজা সখী
নাম্না জিনবতী নাম রূপয়ৌবনশালিনী
93.22
উশীনরস্য রাজর্ষেঃ সত্যসংধস্য ধীমতঃ
দুহিতা প্রথিতা লোকে মানুষে রূপসংপদা
93.23
তস্যা হেতোর্মহাভাগ সবত্সাং গাং মমেপ্সিতাম্
আনয়স্বামরশ্রেষ্ঠ ত্বরিতং পুণ্যবর্ধন
93.24
যাবদস্যাঃ পয়ঃ পীত্বা সা সখী মম মানদ
মানুষেষু ভবত্বেকা জরারোগবিবর্জিতা
93.25
এতন্মম মহাভাগ কর্তুমর্হস্যনিন্দিত
প্রিয়ং প্রিয়তরং হ্যস্মান্নাস্তি মেঽন্যত্কথংচন
93.26
এতচ্ছ্রুত্বা বচস্তস্যা দেব্যাঃ প্রিয়চিকীর্ষয়া
পৃথ্বাদ্যৈর্ভ্রাতৃভিঃ সার্ধং দ্যৌস্তদা তাং জহার গাম্
93.27
তয়া কমলপত্রাক্ষ্যা নিয়ুক্তো দ্যৌস্তদা নৃপ
ঋষেস্তস্য তপস্তীব্রং ন শশাক নিরীক্ষিতুম্
হৃতা গৌঃ সা তদা তেন প্রপাতস্তু ন তর্কিতঃ
93.28
অথাশ্রমপদং প্রাপ্তঃ ফলান্যাদায় বারুণিঃ
ন চাপশ্যত গাং তত্র সবত্সাং কাননোত্তমে
93.29
ততঃ স মৃগয়ামাস বনে তস্মিংস্তপোধনঃ
নাধ্যগচ্ছচ্চ মৃগয়ংস্তাং গাং মুনিরুদারধীঃ
93.30
জ্ঞাত্বা তথাপনীতাং তাং বসুভির্দিব্যদর্শনঃ
যয়ৌ ক্রোধবশং সদ্যঃ শশাপ চ বসূংস্তদা
93.31
যস্মান্মে বসবো জহ্রুর্গাং বৈ দোগ্ধ্রীং সুবালধিম্
তস্মাত্সর্বে জনিষ্যন্তি মানুষেষু ন সংশয়ঃ
93.32
এবং শশাপ ভগবান্বসূংস্তান্মুনিসত্তমঃ
বশং কোপস্য সংপ্রাপ্ত আপবো ভরতর্ষভ
93.33
শপ্ত্বা চ তান্মহাভাগস্তপস্যেব মনো দধে
এবং স শপ্তবান্রাজন্বসূনষ্টৌ তপোধনঃ
মহাপ্রভাবো ব্রহ্মর্ষির্দেবান্রোষসমন্বিতঃ
93.34
অথাশ্রমপদং প্রাপ্য তং স্ম ভূয়ো মহাত্মনঃ
শপ্তাঃ স্ম ইতি জানন্ত ঋষিং তমুপচক্রমুঃ
93.35
প্রসাদয়ন্তস্তমৃষিং বসবঃ পার্থিবর্ষভ
ন লেভিরে চ তস্মাত্তে প্রসাদমৃষিসত্তমাৎ
আপবাত্পুরুষব্যাঘ্র সর্বধর্মবিশারদাৎ
93.36
উবাচ চ স ধর্মাত্মা সপ্ত যূয়ং ধরাদয়ঃ
অনু সংবত্সরাচ্ছাপমোক্ষং বৈ সমবাপ্স্যথ
93.37
অয়ং তু যত্কৃতে যূয়ং ময়া শপ্তাঃ স বত্স্যতি
দ্যৌস্তদা মানুষে লোকে দীর্ঘকালং স্বকর্মণা
93.38
নানৃতং তচ্চিকীর্ষামি যুষ্মান্ক্রুদ্ধো যদব্রুবম্
ন প্রজাস্যতি চাপ্যেষ মানুষেষু মহামনাঃ
93.39
ভবিষ্যতি চ ধর্মাত্মা সর্বশাস্ত্রবিশারদঃ
পিতুঃ প্রিয়হিতে যুক্তঃ স্ত্রীভোগান্বর্জয়িষ্যতি
এবমুক্ত্বা বসূন্সর্বাঞ্জগাম ভগবানৃষিঃ
93.40
ততো মামুপজগ্মুস্তে সমস্তা বসবস্তদা
অয়াচন্ত চ মাং রাজন্বরং স চ ময়া কৃতঃ
জাতাঞ্জাতান্প্রক্ষিপাস্মান্স্বয়ং গঙ্গে ত্বমম্ভসি
93.41
এবং তেষামহং সম্যক্শপ্তানাং রাজসত্তম
মোক্ষার্থং মানুষাল্লোকাদ্যথাবত্কৃতবত্যহম্
93.42
অয়ং শাপাদৃষেস্তস্য এক এব নৃপোত্তম
দ্যৌ রাজন্মানুষে লোকে চিরং বত্স্যতি ভারত
93.43
এতদাখ্যায় সা দেবী তত্রৈবান্তরধীয়ত
আদায় চ কুমারং তং জগামাথ যথেপ্সিতম্
93.44
স তু দেবব্রতো নাম গাঙ্গেয় ইতি চাভবৎ
দ্বিনামা শংতনোঃ পুত্রঃ শংতনোরধিকো গুণৈঃ
93.45
শংতনুশ্চাপি শোকার্তো জগাম স্বপুরং ততঃ
তস্যাহং কীর্তয়িষ্যামি শংতনোরমিতান্গুণান্
93.46
মহাভাগ্যং চ নৃপতের্ভারতস্য যশস্বিনঃ
যস্যেতিহাসো দ্যুতিমান্মহাভারতমুচ্যতে