Utshovঅধ্যায় 94
94.1
বৈশংপায়ন উবাচ
স এবং শংতনুর্ধীমান্দেবরাজর্ষিসত্কৃতঃ
ধর্মাত্মা সর্বলোকেষু সত্যবাগিতি বিশ্রুতঃ
94.2
দমো দানং ক্ষমা বুদ্ধির্হ্রীর্ধৃতিস্তেজ উত্তমম্
নিত্যান্যাসন্মহাসত্ত্বে শংতনৌ পুরুষর্ষভে
94.3
এবং স গুণসংপন্নো ধর্মার্থকুশলো নৃপঃ
আসীদ্ভরতবংশস্য গোপ্তা সাধুজনস্য চ
94.4
কম্বুগ্রীবঃ পৃথুব্যংসো মত্তবারণবিক্রমঃ
ধর্ম এব পরঃ কামাদর্থাচ্চেতি ব্যবস্থিতঃ
94.5
এতান্যাসন্মহাসত্ত্বে শংতনৌ ভরতর্ষভ
ন চাস্য সদৃশঃ কশ্চিত্ক্ষত্রিয়ো ধর্মতোঽভবৎ
94.6
বর্তমানং হি ধর্মে স্বে সর্বধর্মবিদাং বরম্
তং মহীপা মহীপালং রাজরাজ্যেঽভ্যষেচয়ন্
94.7
বীতশোকভয়াবাধাঃ সুখস্বপ্নবিবোধনাঃ
প্রতি ভারতগোপ্তারং সমপদ্যন্ত ভূমিপাঃ
94.8
শংতনুপ্রমুখৈর্গুপ্তে লোকে নৃপতিভিস্তদা
নিয়মাত্সর্ববর্ণানাং ব্রহ্মোত্তরমবর্তত
94.9
ব্রহ্ম পর্যচরত্ক্ষত্রং বিশঃ ক্ষত্রমনুব্রতাঃ
ব্রহ্মক্ষত্রানুরক্তাশ্চ শূদ্রাঃ পর্যচরন্বিশঃ
94.10
স হাস্তিনপুরে রম্যে কুরূণাং পুটভেদনে
বসন্সাগরপর্যন্তামন্বশাদ্বৈ বসুংধরাম্
94.11
স দেবরাজসদৃশো ধর্মজ্ঞঃ সত্যবাগৃজুঃ
দানধর্মতপোয়োগাচ্ছ্রিয়া পরময়া যুতঃ
94.12
অরাগদ্বেষসংয়ুক্তঃ সোমবত্প্রিয়দর্শনঃ
তেজসা সূর্যসংকাশো বায়ুবেগসমো জবে
অন্তকপ্রতিমঃ কোপে ক্ষময়া পৃথিবীসমঃ
94.13
বধঃ পশুবরাহাণাং তথৈব মৃগপক্ষিণাম্
শংতনৌ পৃথিবীপালে নাবর্তত বৃথা নৃপ
94.14
ধর্মব্রহ্মোত্তরে রাজ্যে শংতনুর্বিনয়াত্মবান্
সমং শশাস ভূতানি কামরাগবিবর্জিতঃ
94.15
দেবর্ষিপিতৃয়জ্ঞার্থমারভ্যন্ত তদা ক্রিয়াঃ
ন চাধর্মেণ কেষাংচিত্প্রাণিনামভবদ্বধঃ
94.16
অসুখানামনাথানাং তির্যগ্যোনিষু বর্ততাম্
স এব রাজা ভূতানাং সর্বেষামভবত্পিতা
94.17
তস্মিন্কুরুপতিশ্রেষ্ঠে রাজরাজেশ্বরে সতি
শ্রিতা বাগভবত্সত্যং দানধর্মাশ্রিতং মনঃ
94.18
স সমাঃ ষোডশাষ্টৌ চ চতস্রোঽষ্টৌ তথাপরাঃ
রতিমপ্রাপ্নুবন্স্ত্রীষু বভূব বনগোচরঃ
94.19
তথারূপস্তথাচারস্তথাবৃত্তস্তথাশ্রুতঃ
গাঙ্গেয়স্তস্য পুত্রোঽভূন্নাম্না দেবব্রতো বসুঃ
94.20
সর্বাস্ত্রেষু স নিষ্ণাতঃ পার্থিবেষ্বিতরেষু চ
মহাবলো মহাসত্ত্বো মহাবীর্যো মহারথঃ
94.21
স কদাচিন্মৃগং বিদ্ধ্বা গঙ্গামনুসরন্নদীম্
ভাগীরথীমল্পজলাং শংতনুর্দৃষ্টবান্নৃপঃ
94.22
তাং দৃষ্ট্বা চিন্তয়ামাস শংতনুঃ পুরুষর্ষভঃ
স্যন্দতে কিং ন্বিয়ং নাদ্য সরিচ্ছ্রেষ্ঠা যথা পুরা
94.23
ততো নিমিত্তমন্বিচ্ছন্দদর্শ স মহামনাঃ
কুমারং রূপসংপন্নং বৃহন্তং চারুদর্শনম্
94.24
দিব্যমস্ত্রং বিকুর্বাণং যথা দেবং পুরংদরম্
কৃত্স্নাং গঙ্গাং সমাবৃত্য শরৈস্তীক্ষ্ণৈরবস্থিতম্
94.25
তাং শরৈরাবৃতাং দৃষ্ট্বা নদীং গঙ্গাং তদন্তিকে
অভবদ্বিস্মিতো রাজা কর্ম দৃষ্ট্বাতিমানুষম্
94.26
জাতমাত্রং পুরা দৃষ্টং তং পুত্রং শংতনুস্তদা
নোপলেভে স্মৃতিং ধীমানভিজ্ঞাতুং তমাত্মজম্
94.27
স তু তং পিতরং দৃষ্ট্বা মোহয়ামাস মায়য়া
সংমোহ্য তু ততঃ ক্ষিপ্রং তত্রৈবান্তরধীয়ত
94.28
তদদ্ভুতং তদা দৃষ্ট্বা তত্র রাজা স শংতনুঃ
শঙ্কমানঃ সুতং গঙ্গামব্রবীদ্দর্শয়েতি হ
94.29
দর্শয়ামাস তং গঙ্গা বিভ্রতী রূপমুত্তমম্
গৃহীত্বা দক্ষিণে পাণৌ তং কুমারমলংকৃতম্
94.30
অলংকৃতামাভরণৈররজোম্বরধারিণীম্
দৃষ্টপূর্বামপি সতীং নাভ্যজানাত্স শংতনুঃ
94.31
গঙ্গোবাচ
যং পুত্রমষ্টমং রাজংস্ত্বং পুরা ময্যজায়িথাঃ
স তেঽয়ং পুরুষব্যাঘ্র নয়স্বৈনং গৃহান্তিকম্
94.32
বেদানধিজগে সাঙ্গান্বসিষ্ঠাদেব বীর্যবান্
কৃতাস্ত্রঃ পরমেষ্বাসো দেবরাজসমো যুধি
94.33
সুরাণাং সংমতো নিত্যমসুরাণাং চ ভারত
উশনা বেদ যচ্ছাস্ত্রময়ং তদ্বেদ সর্বশঃ
94.34
তথৈবাঙ্গিরসঃ পুত্রঃ সুরাসুরনমস্কৃতঃ
যদ্বেদ শাস্ত্রং তচ্চাপি কৃত্স্নমস্মিন্প্রতিষ্ঠিতম্
তব পুত্রে মহাবাহৌ সাঙ্গোপাঙ্গং মহাত্মনি
94.35
ঋষিঃ পরৈরনাধৃষ্যো জামদগ্ন্যঃ প্রতাপবান্
যদস্ত্রং বেদ রামশ্চ তদপ্যস্মিন্প্রতিষ্ঠিতম্
94.36
মহেষ্বাসমিমং রাজন্রাজধর্মার্থকোবিদম্
ময়া দত্তং নিজং পুত্রং বীরং বীর গৃহান্নয়
94.37
বৈশংপায়ন উবাচ
তয়ৈবং সমনুজ্ঞাতঃ পুত্রমাদায় শংতনুঃ
ভ্রাজমানং যথাদিত্যমায়য়ৌ স্বপুরং প্রতি
94.38
পৌরবঃ স্বপুরং গত্বা পুরংদরপুরোপমম্
সর্বকামসমৃদ্ধার্থং মেনে আত্মানমাত্মনা
পৌরবেষু ততঃ পুত্রং যৌবরাজ্যেঽভ্যষেচয়ৎ
94.39
পৌরবাঞ্শংতনোঃ পুত্রঃ পিতরং চ মহায়শাঃ
রাষ্ট্রং চ রঞ্জয়ামাস বৃত্তেন ভরতর্ষভ
94.40
স তথা সহ পুত্রেণ রমমাণো মহীপতিঃ
বর্তয়ামাস বর্ষাণি চত্বার্যমিতবিক্রমঃ
94.41
স কদাচিদ্বনং যাতো যমুনামভিতো নদীম্
মহীপতিরনির্দেশ্যমাজিঘ্রদ্গন্ধমুত্তমম্
94.42
তস্য প্রভবমন্বিচ্ছন্বিচচার সমন্ততঃ
স দদর্শ তদা কন্যাং দাশানাং দেবরূপিণীম্
94.43
তামপৃচ্ছত্স দৃষ্ট্বৈব কন্যামসিতলোচনাম্
কস্য ত্বমসি কা চাসি কিং চ ভীরু চিকীর্ষসি
94.44
সাব্রবীদ্দাশকন্যাস্মি ধর্মার্থং বাহয়ে তরীম্
পিতুর্নিয়োগাদ্ভদ্রং তে দাশরাজ্ঞো মহাত্মনঃ
94.45
রূপমাধুর্যগন্ধৈস্তাং সংয়ুক্তাং দেবরূপিণীম্
সমীক্ষ্য রাজা দাশেয়ীং কাময়ামাস শংতনুঃ
94.46
স গত্বা পিতরং তস্যা বরয়ামাস তাং তদা
পর্যপৃচ্ছত্ততস্তস্যাঃ পিতরং চাত্মকারণাৎ
94.47
স চ তং প্রত্যুবাচেদং দাশরাজো মহীপতিম্
জাতমাত্রৈব মে দেয়া বরায় বরবর্ণিনী
হৃদি কামস্তু মে কশ্চিত্তং নিবোধ জনেশ্বর
94.48
যদীমাং ধর্মপত্নীং ত্বং মত্তঃ প্রার্থয়সেঽনঘ
সত্যবাগসি সত্যেন সময়ং কুরু মে ততঃ
94.49
সময়েন প্রদদ্যাং তে কন্যামহমিমাং নৃপ
ন হি মে ত্বত্সমঃ কশ্চিদ্বরো জাতু ভবিষ্যতি
94.50
শংতনুরুবাচ
শ্রুত্বা তব বরং দাশ ব্যবস্যেয়মহং ন বা
দাতব্যং চেত্প্রদাস্যামি ন ত্বদেয়ং কথংচন
94.51
দাশ উবাচ
অস্যাং জায়েত যঃ পুত্রঃ স রাজা পৃথিবীপতিঃ
ত্বদূর্ধ্বমভিষেক্তব্যো নান্যঃ কশ্চন পার্থিব
94.52
বৈশংপায়ন উবাচ
নাকাময়ত তং দাতুং বরং দাশায় শংতনুঃ
শরীরজেন তীব্রেণ দহ্যমানোঽপি ভারত
94.53
স চিন্তয়ন্নেব তদা দাশকন্যাং মহীপতিঃ
প্রত্যয়াদ্ধাস্তিনপুরং শোকোপহতচেতনঃ
94.54
ততঃ কদাচিচ্ছোচন্তং শংতনুং ধ্যানমাস্থিতম্
পুত্রো দেবব্রতোঽভ্যেত্য পিতরং বাক্যমব্রবীৎ
94.55
সর্বতো ভবতঃ ক্ষেমং বিধেয়াঃ সর্বপার্থিবাঃ
তত্কিমর্থমিহাভীক্ষ্ণং পরিশোচসি দুঃখিতঃ
ধ্যায়ন্নিব চ কিং রাজন্নাভিভাষসি কিংচন
94.56
এবমুক্তঃ স পুত্রেণ শংতনুঃ প্রত্যভাষত
অসংশয়ং ধ্যানপরং যথা মাত্থ তথাস্ম্যুত
94.57
অপত্যং নস্ত্বমেবৈকঃ কুলে মহতি ভারত
অনিত্যতা চ মর্ত্যানামতঃ শোচামি পুত্রক
94.58
কথংচিত্তব গাঙ্গেয় বিপত্তৌ নাস্তি নঃ কুলম্
অসংশয়ং ত্বমেবৈকঃ শতাদপি বরঃ সুতঃ
94.59
ন চাপ্যহং বৃথা ভূয়ো দারান্কর্তুমিহোত্সহে
সংতানস্যাবিনাশায় কাময়ে ভদ্রমস্তু তে
অনপত্যতৈকপুত্রত্বমিত্যাহুর্ধর্মবাদিনঃ
94.60
অগ্নিহোত্রং ত্রয়ো বেদা যজ্ঞাশ্চ সহদক্ষিণাঃ
সর্বাণ্যেতান্যপত্যস্য কলাং নার্হন্তি ষোডশীম্
94.61
এবমেব মনুষ্যেষু স্যাচ্চ সর্বপ্রজাস্বপি
যদপত্যং মহাপ্রাজ্ঞ তত্র মে নাস্তি সংশয়ঃ
এষা ত্রয়ী পুরাণানামুত্তমানাং চ শাশ্বতী
94.62
ত্বং চ শূরঃ সদামর্ষী শস্ত্রনিত্যশ্চ ভারত
নান্যত্র শস্ত্রাত্তস্মাত্তে নিধনং বিদ্যতেঽনঘ
94.63
সোঽস্মি সংশয়মাপন্নস্ত্বয়ি শান্তে কথং ভবেৎ
ইতি তে কারণং তাত দুঃখস্যোক্তমশেষতঃ
94.64
ততস্তত্কারণং জ্ঞাত্বা কৃত্স্নং চৈবমশেষতঃ
দেবব্রতো মহাবুদ্ধিঃ প্রয়য়াবনুচিন্তয়ন্
94.65
অভ্যগচ্ছত্তদৈবাশু বৃদ্ধামাত্যং পিতুর্হিতম্
তমপৃচ্ছত্তদাভ্যেত্য পিতুস্তচ্ছোককারণম্
94.66
তস্মৈ স কুরুমুখ্যায় যথাবত্পরিপৃচ্ছতে
বরং শশংস কন্যাং তামুদ্দিশ্য ভরতর্ষভ
94.67
ততো দেবব্রতো বৃদ্ধৈঃ ক্ষত্রিয়ৈঃ সহিতস্তদা
অভিগম্য দাশরাজানং কন্যাং বব্রে পিতুঃ স্বয়ম্
94.68
তং দাশঃ প্রতিজগ্রাহ বিধিবত্প্রতিপূজ্য চ
অব্রবীচ্চৈনমাসীনং রাজসংসদি ভারত
94.69
ত্বমেব নাথঃ পর্যাপ্তঃ শংতনোঃ পুরুষর্ষভ
পুত্রঃ পুত্রবতাং শ্রেষ্ঠঃ কিং নু বক্ষ্যামি তে বচঃ
94.70
কো হি সংবন্ধকং শ্লাঘ্যমীপ্সিতং যৌনমীদৃশম্
অতিক্রামন্ন তপ্যেত সাক্ষাদপি শতক্রতুঃ
94.71
অপত্যং চৈতদার্যস্য যো যুষ্মাকং সমো গুণৈঃ
যস্য শুক্রাত্সত্যবতী প্রাদুর্ভূতা যশস্বিনী
94.72
তেন মে বহুশস্তাত পিতা তে পরিকীর্তিতঃ
অর্হঃ সত্যবতীং বোঢুং সর্বরাজসু ভারত
94.73
অসিতো হ্যপি দেবর্ষিঃ প্রত্যাখ্যাতঃ পুরা ময়া
সত্যবত্যা ভৃশং হ্যর্থী স আসীদৃষিসত্তমঃ
94.74
কন্যাপিতৃত্বাত্কিংচিত্তু বক্ষ্যামি ভরতর্ষভ
বলবত্সপত্নতামত্র দোষং পশ্যামি কেবলম্
94.75
যস্য হি ত্বং সপত্নঃ স্যা গন্ধর্বস্যাসুরস্য বা
ন স জাতু সুখং জীবেত্ত্বয়ি ক্রুদ্ধে পরংতপ
94.76
এতাবানত্র দোষো হি নান্যঃ কশ্চন পার্থিব
এতজ্জানীহি ভদ্রং তে দানাদানে পরংতপ
94.77
এবমুক্তস্তু গাঙ্গেয়স্তদ্যুক্তং প্রত্যভাষত
শৃণ্বতাং ভূমিপালানাং পিতুরর্থায় ভারত
94.78
ইদং মে মতমাদত্স্ব সত্যং সত্যবতাং বর
নৈব জাতো ন বাজাত ঈদৃশং বক্তুমুত্সহেৎ
94.79
এবমেতত্করিষ্যামি যথা ত্বমনুভাষসে
যোঽস্যাং জনিষ্যতে পুত্রঃ স নো রাজা ভবিষ্যতি
94.80
ইত্যুক্তঃ পুনরেবাথ তং দাশঃ প্রত্যভাষত
চিকীর্ষুর্দুষ্করং কর্ম রাজ্যার্থে ভরতর্ষভ
94.81
ত্বমেব নাথঃ পর্যাপ্তঃ শংতনোরমিতদ্যুতেঃ
কন্যায়াশ্চৈব ধর্মাত্মন্প্রভুর্দানায় চেশ্বরঃ
94.82
ইদং তু বচনং সৌম্য কার্যং চৈব নিবোধ মে
কৌমারিকাণাং শীলেন বক্ষ্যাম্যহমরিংদম
94.83
যত্ত্বয়া সত্যবত্যর্থে সত্যধর্মপরায়ণ
রাজমধ্যে প্রতিজ্ঞাতমনুরূপং তবৈব তৎ
94.84
নান্যথা তন্মহাবাহো সংশয়োঽত্র ন কশ্চন
তবাপত্যং ভবেদ্যত্তু তত্র নঃ সংশয়ো মহান্
94.85
তস্য তন্মতমাজ্ঞায় সত্যধর্মপরায়ণঃ
প্রত্যজানাত্তদা রাজন্পিতুঃ প্রিয়চিকীর্ষয়া
94.86
দেবব্রত উবাচ
দাশরাজ নিবোধেদং বচনং মে নৃপোত্তম
শৃণ্বতাং ভূমিপালানাং যদ্ব্রবীমি পিতুঃ কৃতে
94.87
রাজ্যং তাবত্পূর্বমেব ময়া ত্যক্তং নরাধিপ
অপত্যহেতোরপি চ করোম্যেষ বিনিশ্চয়ম্
94.88
অদ্য প্রভৃতি মে দাশ ব্রহ্মচর্যং ভবিষ্যতি
অপুত্রস্যাপি মে লোকা ভবিষ্যন্ত্যক্ষয়া দিবি
94.89
বৈশংপায়ন উবাচ
তস্য তদ্বচনং শ্রুত্বা সংপ্রহৃষ্টতনূরুহঃ
দদানীত্যেব তং দাশো ধর্মাত্মা প্রত্যভাষত
94.90
ততোঽন্তরিক্ষেঽপ্সরসো দেবাঃ সর্ষিগণাস্তথা
অভ্যবর্ষন্ত কুসুমৈর্ভীষ্মোঽয়মিতি চাব্রুবন্
94.91
ততঃ স পিতুরর্থায় তামুবাচ যশস্বিনীম্
অধিরোহ রথং মাতর্গচ্ছাবঃ স্বগৃহানিতি
94.92
এবমুক্ত্বা তু ভীষ্মস্তাং রথমারোপ্য ভামিনীম্
আগম্য হাস্তিনপুরং শংতনোঃ সংন্যবেদয়ৎ
94.93
তস্য তদ্দুষ্করং কর্ম প্রশশংসুর্নরাধিপাঃ
সমেতাশ্চ পৃথক্চৈব ভীষ্মোঽয়মিতি চাব্রুবন্
94.94
তদ্দৃষ্ট্বা দুষ্করং কর্ম কৃতং ভীষ্মেণ শংতনুঃ
স্বচ্ছন্দমরণং তস্মৈ দদৌ তুষ্টঃ পিতা স্বয়ম্