UtshovChapter 94
94.1
वैशंपायन उवाच
स एवं शंतनुर्धीमान्देवराजर्षिसत्कृतः
धर्मात्मा सर्वलोकेषु सत्यवागिति विश्रुतः
Vaishampayana uvacha
Sa evam shantanurdhimandevarajarshisatkritah
Dharmatma sarvalokeshu satyavagiti vishrutah
94.2
दमो दानं क्षमा बुद्धिर्ह्रीर्धृतिस्तेज उत्तमम्
नित्यान्यासन्महासत्त्वे शंतनौ पुरुषर्षभे
Damo danam kshama buddhirhrirdhritisteja uttamam
Nityanyasanmahasattve shantanau purusharshabhe
94.3
एवं स गुणसंपन्नो धर्मार्थकुशलो नृपः
आसीद्भरतवंशस्य गोप्ता साधुजनस्य च
Evam sa gunasampanno dharmarthakushalo nripah
Asidbharatavanshasya gopta sadhujanasya cha
94.4
कम्बुग्रीवः पृथुव्यंसो मत्तवारणविक्रमः
धर्म एव परः कामादर्थाच्चेति व्यवस्थितः
Kambugrivah prithuvyanso mattavaranavikramah
Dharma eva parah kamadarthachcheti vyavasthitah
94.5
एतान्यासन्महासत्त्वे शंतनौ भरतर्षभ
न चास्य सदृशः कश्चित्क्षत्रियो धर्मतोऽभवत्
Etanyasanmahasattve shantanau bharatarshabha
Na chasya sadrishah kashchitkshatriyo dharmatobhavat
94.6
वर्तमानं हि धर्मे स्वे सर्वधर्मविदां वरम्
तं महीपा महीपालं राजराज्येऽभ्यषेचयन्
Vartamanam hi dharme sve sarvadharmavidam varam
Tam mahipa mahipalam rajarajyebhyashechayan
94.7
वीतशोकभयाबाधाः सुखस्वप्नविबोधनाः
प्रति भारतगोप्तारं समपद्यन्त भूमिपाः
Vitashokabhayabadhah sukhasvapnavibodhanah
Prati bharatagoptaram samapadyanta bhumipah
94.8
शंतनुप्रमुखैर्गुप्ते लोके नृपतिभिस्तदा
नियमात्सर्ववर्णानां ब्रह्मोत्तरमवर्तत
Shantanupramukhairgupte loke nripatibhistada
Niyamatsarvavarnanam brahmottaramavartata
94.9
ब्रह्म पर्यचरत्क्षत्रं विशः क्षत्रमनुव्रताः
ब्रह्मक्षत्रानुरक्ताश्च शूद्राः पर्यचरन्विशः
Brahma paryacharatkshatram vishah kshatramanuvratah
Brahmakshatranuraktashcha shudrah paryacharanvishah
94.10
स हास्तिनपुरे रम्ये कुरूणां पुटभेदने
वसन्सागरपर्यन्तामन्वशाद्वै वसुंधराम्
Sa hastinapure ramye kurunam putabhedane
Vasansagaraparyantamanvashadvai vasundharam
94.11
स देवराजसदृशो धर्मज्ञः सत्यवागृजुः
दानधर्मतपोयोगाच्छ्रिया परमया युतः
Sa devarajasadrisho dharmagyah satyavagrijuh
Danadharmatapoyogachchhriya paramaya yutah
94.12
अरागद्वेषसंयुक्तः सोमवत्प्रियदर्शनः
तेजसा सूर्यसंकाशो वायुवेगसमो जवे
अन्तकप्रतिमः कोपे क्षमया पृथिवीसमः
Aragadveshasanyuktah somavatpriyadarshanah
Tejasa suryasankasho vayuvegasamo jave
Antakapratimah kope kshamaya prithivisamah
94.13
वधः पशुवराहाणां तथैव मृगपक्षिणाम्
शंतनौ पृथिवीपाले नावर्तत वृथा नृप
Vadhah pashuvarahanam tathaiva mrigapakshinam
Shantanau prithivipale navartata vritha nripa
94.14
धर्मब्रह्मोत्तरे राज्ये शंतनुर्विनयात्मवान्
समं शशास भूतानि कामरागविवर्जितः
Dharmabrahmottare rajye shantanurvinayatmavan
Samam shashasa bhutani kamaragavivarjitah
94.15
देवर्षिपितृयज्ञार्थमारभ्यन्त तदा क्रियाः
न चाधर्मेण केषांचित्प्राणिनामभवद्वधः
Devarshipitriyagyarthamarabhyanta tada kriyah
Na chadharmena keshanchitpraninamabhavadvadhah
94.16
असुखानामनाथानां तिर्यग्योनिषु वर्तताम्
स एव राजा भूतानां सर्वेषामभवत्पिता
Asukhanamanathanam tiryagyonishu vartatam
Sa eva raja bhutanam sarveshamabhavatpita
94.17
तस्मिन्कुरुपतिश्रेष्ठे राजराजेश्वरे सति
श्रिता वागभवत्सत्यं दानधर्माश्रितं मनः
Tasminkurupatishreshthe rajarajeshvare sati
Shrita vagabhavatsatyam danadharmashritam manah
94.18
स समाः षोडशाष्टौ च चतस्रोऽष्टौ तथापराः
रतिमप्राप्नुवन्स्त्रीषु बभूव वनगोचरः
Sa samah shodashashtau cha chatasroshtau tathaparah
Ratimaprapnuvanstrishu babhuva vanagocharah
94.19
तथारूपस्तथाचारस्तथावृत्तस्तथाश्रुतः
गाङ्गेयस्तस्य पुत्रोऽभून्नाम्ना देवव्रतो वसुः
Tatharupastathacharastathavrittastathashrutah
Gangeyastasya putrobhunnamna devavrato vasuh
94.20
सर्वास्त्रेषु स निष्णातः पार्थिवेष्वितरेषु च
महाबलो महासत्त्वो महावीर्यो महारथः
Sarvastreshu sa nishnatah parthiveshvitareshu cha
Mahabalo mahasattvo mahaviryo maharathah
94.21
स कदाचिन्मृगं विद्ध्वा गङ्गामनुसरन्नदीम्
भागीरथीमल्पजलां शंतनुर्दृष्टवान्नृपः
Sa kadachinmrigam viddhva gangamanusarannadim
Bhagirathimalpajalam shantanurdrishtavannripah
94.22
तां दृष्ट्वा चिन्तयामास शंतनुः पुरुषर्षभः
स्यन्दते किं न्वियं नाद्य सरिच्छ्रेष्ठा यथा पुरा
Tam drishtva chintayamasa shantanuh purusharshabhah
Syandate kim nviyam nadya sarichchhreshtha yatha pura
94.23
ततो निमित्तमन्विच्छन्ददर्श स महामनाः
कुमारं रूपसंपन्नं बृहन्तं चारुदर्शनम्
Tato nimittamanvichchhandadarsha sa mahamanah
Kumaram rupasampannam brihantam charudarshanam
94.24
दिव्यमस्त्रं विकुर्वाणं यथा देवं पुरंदरम्
कृत्स्नां गङ्गां समावृत्य शरैस्तीक्ष्णैरवस्थितम्
Divyamastram vikurvanam yatha devam purandaram
Kritsnam gangam samavritya sharaistikshnairavasthitam
94.25
तां शरैरावृतां दृष्ट्वा नदीं गङ्गां तदन्तिके
अभवद्विस्मितो राजा कर्म दृष्ट्वातिमानुषम्
Tam sharairavritam drishtva nadim gangam tadantike
Abhavadvismito raja karma drishtvatimanusham
94.26
जातमात्रं पुरा दृष्टं तं पुत्रं शंतनुस्तदा
नोपलेभे स्मृतिं धीमानभिज्ञातुं तमात्मजम्
Jatamatram pura drishtam tam putram shantanustada
Nopalebhe smritim dhimanabhigyatum tamatmajam
94.27
स तु तं पितरं दृष्ट्वा मोहयामास मायया
संमोह्य तु ततः क्षिप्रं तत्रैवान्तरधीयत
Sa tu tam pitaram drishtva mohayamasa mayaya
Sammohya tu tatah kshipram tatraivantaradhiyata
94.28
तदद्भुतं तदा दृष्ट्वा तत्र राजा स शंतनुः
शङ्कमानः सुतं गङ्गामब्रवीद्दर्शयेति ह
Tadadbhutam tada drishtva tatra raja sa shantanuh
Shankamanah sutam gangamabraviddarshayeti ha
94.29
दर्शयामास तं गङ्गा बिभ्रती रूपमुत्तमम्
गृहीत्वा दक्षिणे पाणौ तं कुमारमलंकृतम्
Darshayamasa tam ganga bibhrati rupamuttamam
Grihitva dakshine panau tam kumaramalankritam
94.30
अलंकृतामाभरणैररजोम्बरधारिणीम्
दृष्टपूर्वामपि सतीं नाभ्यजानात्स शंतनुः
Alankritamabharanairarajombaradharinim
Drishtapurvamapi satim nabhyajanatsa shantanuh
94.31
गङ्गोवाच
यं पुत्रमष्टमं राजंस्त्वं पुरा मय्यजायिथाः
स तेऽयं पुरुषव्याघ्र नयस्वैनं गृहान्तिकम्
Gangovacha
Yam putramashtamam rajanstvam pura mayyajayithah
Sa teyam purushavyaghra nayasvainam grihantikam
94.32
वेदानधिजगे साङ्गान्वसिष्ठादेव वीर्यवान्
कृतास्त्रः परमेष्वासो देवराजसमो युधि
Vedanadhijage sanganvasishthadeva viryavan
Kritastrah parameshvaso devarajasamo yudhi
94.33
सुराणां संमतो नित्यमसुराणां च भारत
उशना वेद यच्छास्त्रमयं तद्वेद सर्वशः
Suranam sammato nityamasuranam cha bharata
Ushana veda yachchhastramayam tadveda sarvashah
94.34
तथैवाङ्गिरसः पुत्रः सुरासुरनमस्कृतः
यद्वेद शास्त्रं तच्चापि कृत्स्नमस्मिन्प्रतिष्ठितम्
तव पुत्रे महाबाहौ साङ्गोपाङ्गं महात्मनि
Tathaivangirasah putrah surasuranamaskritah
Yadveda shastram tachchapi kritsnamasminpratishthitam
Tava putre mahabahau sangopangam mahatmani
94.35
ऋषिः परैरनाधृष्यो जामदग्न्यः प्रतापवान्
यदस्त्रं वेद रामश्च तदप्यस्मिन्प्रतिष्ठितम्
Rishih parairanadhrishyo jamadagnyah pratapavan
Yadastram veda ramashcha tadapyasminpratishthitam
94.36
महेष्वासमिमं राजन्राजधर्मार्थकोविदम्
मया दत्तं निजं पुत्रं वीरं वीर गृहान्नय
Maheshvasamimam rajanrajadharmarthakovidam
Maya dattam nijam putram viram vira grihannaya
94.37
वैशंपायन उवाच
तयैवं समनुज्ञातः पुत्रमादाय शंतनुः
भ्राजमानं यथादित्यमाययौ स्वपुरं प्रति
Vaishampayana uvacha
Tayaivam samanugyatah putramadaya shantanuh
Bhrajamanam yathadityamayayau svapuram prati
94.38
पौरवः स्वपुरं गत्वा पुरंदरपुरोपमम्
सर्वकामसमृद्धार्थं मेने आत्मानमात्मना
पौरवेषु ततः पुत्रं यौवराज्येऽभ्यषेचयत्
Pauravah svapuram gatva purandarapuropamam
Sarvakamasamriddhartham mene atmanamatmana
Pauraveshu tatah putram yauvarajyebhyashechayat
94.39
पौरवाञ्शंतनोः पुत्रः पितरं च महायशाः
राष्ट्रं च रञ्जयामास वृत्तेन भरतर्षभ
Pauravanshantanoh putrah pitaram cha mahayashah
Rashtram cha ranjayamasa vrittena bharatarshabha
94.40
स तथा सह पुत्रेण रममाणो महीपतिः
वर्तयामास वर्षाणि चत्वार्यमितविक्रमः
Sa tatha saha putrena ramamano mahipatih
Vartayamasa varshani chatvaryamitavikramah
94.41
स कदाचिद्वनं यातो यमुनामभितो नदीम्
महीपतिरनिर्देश्यमाजिघ्रद्गन्धमुत्तमम्
Sa kadachidvanam yato yamunamabhito nadim
Mahipatiranirdeshyamajighradgandhamuttamam
94.42
तस्य प्रभवमन्विच्छन्विचचार समन्ततः
स ददर्श तदा कन्यां दाशानां देवरूपिणीम्
Tasya prabhavamanvichchhanvichachara samantatah
Sa dadarsha tada kanyam dashanam devarupinim
94.43
तामपृच्छत्स दृष्ट्वैव कन्यामसितलोचनाम्
कस्य त्वमसि का चासि किं च भीरु चिकीर्षसि
Tamaprichchhatsa drishtvaiva kanyamasitalochanam
Kasya tvamasi ka chasi kim cha bhiru chikirshasi
94.44
साब्रवीद्दाशकन्यास्मि धर्मार्थं वाहये तरीम्
पितुर्नियोगाद्भद्रं ते दाशराज्ञो महात्मनः
Sabraviddashakanyasmi dharmartham vahaye tarim
Piturniyogadbhadram te dasharagyo mahatmanah
94.45
रूपमाधुर्यगन्धैस्तां संयुक्तां देवरूपिणीम्
समीक्ष्य राजा दाशेयीं कामयामास शंतनुः
Rupamadhuryagandhaistam sanyuktam devarupinim
Samikshya raja dasheyim kamayamasa shantanuh
94.46
स गत्वा पितरं तस्या वरयामास तां तदा
पर्यपृच्छत्ततस्तस्याः पितरं चात्मकारणात्
Sa gatva pitaram tasya varayamasa tam tada
Paryaprichchhattatastasyah pitaram chatmakaranat
94.47
स च तं प्रत्युवाचेदं दाशराजो महीपतिम्
जातमात्रैव मे देया वराय वरवर्णिनी
हृदि कामस्तु मे कश्चित्तं निबोध जनेश्वर
Sa cha tam pratyuvachedam dasharajo mahipatim
Jatamatraiva me deya varaya varavarnini
Hridi kamastu me kashchittam nibodha janeshvara
94.48
यदीमां धर्मपत्नीं त्वं मत्तः प्रार्थयसेऽनघ
सत्यवागसि सत्येन समयं कुरु मे ततः
Yadimam dharmapatnim tvam mattah prarthayasenagha
Satyavagasi satyena samayam kuru me tatah
94.49
समयेन प्रदद्यां ते कन्यामहमिमां नृप
न हि मे त्वत्समः कश्चिद्वरो जातु भविष्यति
Samayena pradadyam te kanyamahamimam nripa
Na hi me tvatsamah kashchidvaro jatu bhavishyati
94.50
शंतनुरुवाच
श्रुत्वा तव वरं दाश व्यवस्येयमहं न वा
दातव्यं चेत्प्रदास्यामि न त्वदेयं कथंचन
Shantanuruvacha
Shrutva tava varam dasha vyavasyeyamaham na va
Datavyam chetpradasyami na tvadeyam kathanchana
94.51
दाश उवाच
अस्यां जायेत यः पुत्रः स राजा पृथिवीपतिः
त्वदूर्ध्वमभिषेक्तव्यो नान्यः कश्चन पार्थिव
Dasha uvacha
Asyam jayeta yah putrah sa raja prithivipatih
Tvadurdhvamabhishektavyo nanyah kashchana parthiva
94.52
वैशंपायन उवाच
नाकामयत तं दातुं वरं दाशाय शंतनुः
शरीरजेन तीव्रेण दह्यमानोऽपि भारत
Vaishampayana uvacha
Nakamayata tam datum varam dashaya shantanuh
Sharirajena tivrena dahyamanopi bharata
94.53
स चिन्तयन्नेव तदा दाशकन्यां महीपतिः
प्रत्ययाद्धास्तिनपुरं शोकोपहतचेतनः
Sa chintayanneva tada dashakanyam mahipatih
Pratyayaddhastinapuram shokopahatachetanah
94.54
ततः कदाचिच्छोचन्तं शंतनुं ध्यानमास्थितम्
पुत्रो देवव्रतोऽभ्येत्य पितरं वाक्यमब्रवीत्
Tatah kadachichchhochantam shantanum dhyanamasthitam
Putro devavratobhyetya pitaram vakyamabravit
94.55
सर्वतो भवतः क्षेमं विधेयाः सर्वपार्थिवाः
तत्किमर्थमिहाभीक्ष्णं परिशोचसि दुःखितः
ध्यायन्निव च किं राजन्नाभिभाषसि किंचन
Sarvato bhavatah kshemam vidheyah sarvaparthivah
Tatkimarthamihabhikshnam parishochasi duhkhitah
Dhyayanniva cha kim rajannabhibhashasi kinchana
94.56
एवमुक्तः स पुत्रेण शंतनुः प्रत्यभाषत
असंशयं ध्यानपरं यथा मात्थ तथास्म्युत
Evamuktah sa putrena shantanuh pratyabhashata
Asanshayam dhyanaparam yatha mattha tathasmyuta
94.57
अपत्यं नस्त्वमेवैकः कुले महति भारत
अनित्यता च मर्त्यानामतः शोचामि पुत्रक
Apatyam nastvamevaikah kule mahati bharata
Anityata cha martyanamatah shochami putraka
94.58
कथंचित्तव गाङ्गेय विपत्तौ नास्ति नः कुलम्
असंशयं त्वमेवैकः शतादपि वरः सुतः
Kathanchittava gangeya vipattau nasti nah kulam
Asanshayam tvamevaikah shatadapi varah sutah
94.59
न चाप्यहं वृथा भूयो दारान्कर्तुमिहोत्सहे
संतानस्याविनाशाय कामये भद्रमस्तु ते
अनपत्यतैकपुत्रत्वमित्याहुर्धर्मवादिनः
Na chapyaham vritha bhuyo darankartumihotsahe
Santanasyavinashaya kamaye bhadramastu te
Anapatyataikaputratvamityahurdharmavadinah
94.60
अग्निहोत्रं त्रयो वेदा यज्ञाश्च सहदक्षिणाः
सर्वाण्येतान्यपत्यस्य कलां नार्हन्ति षोडशीम्
Agnihotram trayo veda yagyashcha sahadakshinah
Sarvanyetanyapatyasya kalam narhanti shodashim
94.61
एवमेव मनुष्येषु स्याच्च सर्वप्रजास्वपि
यदपत्यं महाप्राज्ञ तत्र मे नास्ति संशयः
एषा त्रयी पुराणानामुत्तमानां च शाश्वती
Evameva manushyeshu syachcha sarvaprajasvapi
Yadapatyam mahapragya tatra me nasti sanshayah
Esha trayi purananamuttamanam cha shashvati
94.62
त्वं च शूरः सदामर्षी शस्त्रनित्यश्च भारत
नान्यत्र शस्त्रात्तस्मात्ते निधनं विद्यतेऽनघ
Tvam cha shurah sadamarshi shastranityashcha bharata
Nanyatra shastrattasmatte nidhanam vidyatenagha
94.63
सोऽस्मि संशयमापन्नस्त्वयि शान्ते कथं भवेत्
इति ते कारणं तात दुःखस्योक्तमशेषतः
Sosmi sanshayamapannastvayi shante katham bhavet
Iti te karanam tata duhkhasyoktamasheshatah
94.64
ततस्तत्कारणं ज्ञात्वा कृत्स्नं चैवमशेषतः
देवव्रतो महाबुद्धिः प्रययावनुचिन्तयन्
Tatastatkaranam gyatva kritsnam chaivamasheshatah
Devavrato mahabuddhih prayayavanuchintayan
94.65
अभ्यगच्छत्तदैवाशु वृद्धामात्यं पितुर्हितम्
तमपृच्छत्तदाभ्येत्य पितुस्तच्छोककारणम्
Abhyagachchhattadaivashu vriddhamatyam piturhitam
Tamaprichchhattadabhyetya pitustachchhokakaranam
94.66
तस्मै स कुरुमुख्याय यथावत्परिपृच्छते
वरं शशंस कन्यां तामुद्दिश्य भरतर्षभ
Tasmai sa kurumukhyaya yathavatpariprichchhate
Varam shashansa kanyam tamuddishya bharatarshabha
94.67
ततो देवव्रतो वृद्धैः क्षत्रियैः सहितस्तदा
अभिगम्य दाशराजानं कन्यां वव्रे पितुः स्वयम्
Tato devavrato vriddhaih kshatriyaih sahitastada
Abhigamya dasharajanam kanyam vavre pituh svayam
94.68
तं दाशः प्रतिजग्राह विधिवत्प्रतिपूज्य च
अब्रवीच्चैनमासीनं राजसंसदि भारत
Tam dashah pratijagraha vidhivatpratipujya cha
Abravichchainamasinam rajasansadi bharata
94.69
त्वमेव नाथः पर्याप्तः शंतनोः पुरुषर्षभ
पुत्रः पुत्रवतां श्रेष्ठः किं नु वक्ष्यामि ते वचः
Tvameva nathah paryaptah shantanoh purusharshabha
Putrah putravatam shreshthah kim nu vakshyami te vachah
94.70
को हि संबन्धकं श्लाघ्यमीप्सितं यौनमीदृशम्
अतिक्रामन्न तप्येत साक्षादपि शतक्रतुः
Ko hi sambandhakam shlaghyamipsitam yaunamidrisham
Atikramanna tapyeta sakshadapi shatakratuh
94.71
अपत्यं चैतदार्यस्य यो युष्माकं समो गुणैः
यस्य शुक्रात्सत्यवती प्रादुर्भूता यशस्विनी
Apatyam chaitadaryasya yo yushmakam samo gunaih
Yasya shukratsatyavati pradurbhuta yashasvini
94.72
तेन मे बहुशस्तात पिता ते परिकीर्तितः
अर्हः सत्यवतीं वोढुं सर्वराजसु भारत
Tena me bahushastata pita te parikirtitah
Arhah satyavatim vodhum sarvarajasu bharata
94.73
असितो ह्यपि देवर्षिः प्रत्याख्यातः पुरा मया
सत्यवत्या भृशं ह्यर्थी स आसीदृषिसत्तमः
Asito hyapi devarshih pratyakhyatah pura maya
Satyavatya bhrisham hyarthi sa asidrishisattamah
94.74
कन्यापितृत्वात्किंचित्तु वक्ष्यामि भरतर्षभ
बलवत्सपत्नतामत्र दोषं पश्यामि केवलम्
Kanyapitritvatkinchittu vakshyami bharatarshabha
Balavatsapatnatamatra dosham pashyami kevalam
94.75
यस्य हि त्वं सपत्नः स्या गन्धर्वस्यासुरस्य वा
न स जातु सुखं जीवेत्त्वयि क्रुद्धे परंतप
Yasya hi tvam sapatnah sya gandharvasyasurasya va
Na sa jatu sukham jivettvayi kruddhe parantapa
94.76
एतावानत्र दोषो हि नान्यः कश्चन पार्थिव
एतज्जानीहि भद्रं ते दानादाने परंतप
Etavanatra dosho hi nanyah kashchana parthiva
Etajjanihi bhadram te danadane parantapa
94.77
एवमुक्तस्तु गाङ्गेयस्तद्युक्तं प्रत्यभाषत
शृण्वतां भूमिपालानां पितुरर्थाय भारत
Evamuktastu gangeyastadyuktam pratyabhashata
Shrinvatam bhumipalanam piturarthaya bharata
94.78
इदं मे मतमादत्स्व सत्यं सत्यवतां वर
नैव जातो न वाजात ईदृशं वक्तुमुत्सहेत्
Idam me matamadatsva satyam satyavatam vara
Naiva jato na vajata idrisham vaktumutsahet
94.79
एवमेतत्करिष्यामि यथा त्वमनुभाषसे
योऽस्यां जनिष्यते पुत्रः स नो राजा भविष्यति
Evametatkarishyami yatha tvamanubhashase
Yosyam janishyate putrah sa no raja bhavishyati
94.80
इत्युक्तः पुनरेवाथ तं दाशः प्रत्यभाषत
चिकीर्षुर्दुष्करं कर्म राज्यार्थे भरतर्षभ
Ityuktah punarevatha tam dashah pratyabhashata
Chikirshurdushkaram karma rajyarthe bharatarshabha
94.81
त्वमेव नाथः पर्याप्तः शंतनोरमितद्युतेः
कन्यायाश्चैव धर्मात्मन्प्रभुर्दानाय चेश्वरः
Tvameva nathah paryaptah shantanoramitadyuteh
Kanyayashchaiva dharmatmanprabhurdanaya cheshvarah
94.82
इदं तु वचनं सौम्य कार्यं चैव निबोध मे
कौमारिकाणां शीलेन वक्ष्याम्यहमरिंदम
Idam tu vachanam saumya karyam chaiva nibodha me
Kaumarikanam shilena vakshyamyahamarindama
94.83
यत्त्वया सत्यवत्यर्थे सत्यधर्मपरायण
राजमध्ये प्रतिज्ञातमनुरूपं तवैव तत्
Yattvaya satyavatyarthe satyadharmaparayana
Rajamadhye pratigyatamanurupam tavaiva tat
94.84
नान्यथा तन्महाबाहो संशयोऽत्र न कश्चन
तवापत्यं भवेद्यत्तु तत्र नः संशयो महान्
Nanyatha tanmahabaho sanshayotra na kashchana
Tavapatyam bhavedyattu tatra nah sanshayo mahan
94.85
तस्य तन्मतमाज्ञाय सत्यधर्मपरायणः
प्रत्यजानात्तदा राजन्पितुः प्रियचिकीर्षया
Tasya tanmatamagyaya satyadharmaparayanah
Pratyajanattada rajanpituh priyachikirshaya
94.86
देवव्रत उवाच
दाशराज निबोधेदं वचनं मे नृपोत्तम
शृण्वतां भूमिपालानां यद्ब्रवीमि पितुः कृते
Devavrata uvacha
Dasharaja nibodhedam vachanam me nripottama
Shrinvatam bhumipalanam yadbravimi pituh krite
94.87
राज्यं तावत्पूर्वमेव मया त्यक्तं नराधिप
अपत्यहेतोरपि च करोम्येष विनिश्चयम्
Rajyam tavatpurvameva maya tyaktam naradhipa
Apatyahetorapi cha karomyesha vinishchayam
94.88
अद्य प्रभृति मे दाश ब्रह्मचर्यं भविष्यति
अपुत्रस्यापि मे लोका भविष्यन्त्यक्षया दिवि
Adya prabhriti me dasha brahmacharyam bhavishyati
Aputrasyapi me loka bhavishyantyakshaya divi
94.89
वैशंपायन उवाच
तस्य तद्वचनं श्रुत्वा संप्रहृष्टतनूरुहः
ददानीत्येव तं दाशो धर्मात्मा प्रत्यभाषत
Vaishampayana uvacha
Tasya tadvachanam shrutva samprahrishtatanuruhah
Dadanityeva tam dasho dharmatma pratyabhashata
94.90
ततोऽन्तरिक्षेऽप्सरसो देवाः सर्षिगणास्तथा
अभ्यवर्षन्त कुसुमैर्भीष्मोऽयमिति चाब्रुवन्
Tatontarikshepsaraso devah sarshiganastatha
Abhyavarshanta kusumairbhishmoyamiti chabruvan
94.91
ततः स पितुरर्थाय तामुवाच यशस्विनीम्
अधिरोह रथं मातर्गच्छावः स्वगृहानिति
Tatah sa piturarthaya tamuvacha yashasvinim
Adhiroha ratham matargachchhavah svagrihaniti
94.92
एवमुक्त्वा तु भीष्मस्तां रथमारोप्य भामिनीम्
आगम्य हास्तिनपुरं शंतनोः संन्यवेदयत्
Evamuktva tu bhishmastam rathamaropya bhaminim
Agamya hastinapuram shantanoh sannyavedayat
94.93
तस्य तद्दुष्करं कर्म प्रशशंसुर्नराधिपाः
समेताश्च पृथक्चैव भीष्मोऽयमिति चाब्रुवन्
Tasya taddushkaram karma prashashansurnaradhipah
Sametashcha prithakchaiva bhishmoyamiti chabruvan
94.94
तद्दृष्ट्वा दुष्करं कर्म कृतं भीष्मेण शंतनुः
स्वच्छन्दमरणं तस्मै ददौ तुष्टः पिता स्वयम्
Taddrishtva dushkaram karma kritam bhishmena shantanuh
Svachchhandamaranam tasmai dadau tushtah pita svayam