UtshovChapter 95
95.1
वैशंपायन उवाच
ततो विवाहे निर्वृत्ते स राजा शंतनुर्नृपः
तां कन्यां रूपसंपन्नां स्वगृहे संन्यवेशयत्
Vaishampayana uvacha
Tato vivahe nirvritte sa raja shantanurnripah
Tam kanyam rupasampannam svagrihe sannyaveshayat
95.2
ततः शांतनवो धीमान्सत्यवत्यामजायत
वीरश्चित्राङ्गदो नाम वीर्येण मनुजानति
Tatah shantanavo dhimansatyavatyamajayata
Virashchitrangado nama viryena manujanati
95.3
अथापरं महेष्वासं सत्यवत्यां पुनः प्रभुः
विचित्रवीर्यं राजानं जनयामास वीर्यवान्
Athaparam maheshvasam satyavatyam punah prabhuh
Vichitraviryam rajanam janayamasa viryavan
95.4
अप्राप्तवति तस्मिंश्च यौवनं भरतर्षभ
स राजा शंतनुर्धीमान्कालधर्ममुपेयिवान्
Apraptavati tasminshcha yauvanam bharatarshabha
Sa raja shantanurdhimankaladharmamupeyivan
95.5
स्वर्गते शंतनौ भीष्मश्चित्राङ्गदमरिंदमम्
स्थापयामास वै राज्ये सत्यवत्या मते स्थितः
Svargate shantanau bhishmashchitrangadamarindamam
Sthapayamasa vai rajye satyavatya mate sthitah
95.6
स तु चित्राङ्गदः शौर्यात्सर्वांश्चिक्षेप पार्थिवान्
मनुष्यं न हि मेने स कंचित्सदृशमात्मनः
Sa tu chitrangadah shauryatsarvanshchikshepa parthivan
Manushyam na hi mene sa kanchitsadrishamatmanah
95.7
तं क्षिपन्तं सुरांश्चैव मनुष्यानसुरांस्तथा
गन्धर्वराजो बलवांस्तुल्यनामाभ्ययात्तदा
तेनास्य सुमहद्युद्धं कुरुक्षेत्रे बभूव ह
Tam kshipantam suranshchaiva manushyanasuranstatha
Gandharvarajo balavanstulyanamabhyayattada
Tenasya sumahadyuddham kurukshetre babhuva ha
95.8
तयोर्बलवतोस्तत्र गन्धर्वकुरुमुख्ययोः
नद्यास्तीरे हिरण्वत्याः समास्तिस्रोऽभवद्रणः
Tayorbalavatostatra gandharvakurumukhyayoh
Nadyastire hiranvatyah samastisrobhavadranah
95.9
तस्मिन्विमर्दे तुमुले शस्त्रवृष्टिसमाकुले
मायाधिकोऽवधीद्वीरं गन्धर्वः कुरुसत्तमम्
Tasminvimarde tumule shastravrishtisamakule
Mayadhikovadhidviram gandharvah kurusattamam
95.10
चित्राङ्गदं कुरुश्रेष्ठं विचित्रशरकार्मुकम्
अन्ताय कृत्वा गन्धर्वो दिवमाचक्रमे ततः
Chitrangadam kurushreshtham vichitrasharakarmukam
Antaya kritva gandharvo divamachakrame tatah
95.11
तस्मिन्नृपतिशार्दूले निहते भूरिवर्चसि
भीष्मः शांतनवो राजन्प्रेतकार्याण्यकारयत्
Tasminnripatishardule nihate bhurivarchasi
Bhishmah shantanavo rajanpretakaryanyakarayat
95.12
विचित्रवीर्यं च तदा बालमप्राप्तयौवनम्
कुरुराज्ये महाबाहुरभ्यषिञ्चदनन्तरम्
Vichitraviryam cha tada balamapraptayauvanam
Kururajye mahabahurabhyashinchadanantaram
95.13
विचित्रवीर्यस्तु तदा भीष्मस्य वचने स्थितः
अन्वशासन्महाराज पितृपैतामहं पदम्
Vichitraviryastu tada bhishmasya vachane sthitah
Anvashasanmaharaja pitripaitamaham padam
95.14
स धर्मशास्त्रकुशलो भीष्मं शांतनवं नृपः
पूजयामास धर्मेण स चैनं प्रत्यपालयत्
Sa dharmashastrakushalo bhishmam shantanavam nripah
Pujayamasa dharmena sa chainam pratyapalayat