অধ্যায় 95

95.1

বৈশংপায়ন উবাচ
ততো বিবাহে নির্বৃত্তে স রাজা শংতনুর্নৃপঃ
তাং কন্যাং রূপসংপন্নাং স্বগৃহে সংন্যবেশয়ৎ

ততঃ শাংতনবো ধীমান্সত্যবত্যামজায়ত
বীরশ্চিত্রাঙ্গদো নাম বীর্যেণ মনুজানতি

অথাপরং মহেষ্বাসং সত্যবত্যাং পুনঃ প্রভুঃ
বিচিত্রবীর্যং রাজানং জনয়ামাস বীর্যবান্

অপ্রাপ্তবতি তস্মিংশ্চ যৌবনং ভরতর্ষভ
স রাজা শংতনুর্ধীমান্কালধর্মমুপেয়িবান্

স্বর্গতে শংতনৌ ভীষ্মশ্চিত্রাঙ্গদমরিংদমম্
স্থাপয়ামাস বৈ রাজ্যে সত্যবত্যা মতে স্থিতঃ

স তু চিত্রাঙ্গদঃ শৌর্যাত্সর্বাংশ্চিক্ষেপ পার্থিবান্
মনুষ্যং ন হি মেনে স কংচিত্সদৃশমাত্মনঃ

তং ক্ষিপন্তং সুরাংশ্চৈব মনুষ্যানসুরাংস্তথা
গন্ধর্বরাজো বলবাংস্তুল্যনামাভ্যয়াত্তদা
তেনাস্য সুমহদ্যুদ্ধং কুরুক্ষেত্রে বভূব হ

তয়োর্বলবতোস্তত্র গন্ধর্বকুরুমুখ্যয়োঃ
নদ্যাস্তীরে হিরণ্বত্যাঃ সমাস্তিস্রোঽভবদ্রণঃ

তস্মিন্বিমর্দে তুমুলে শস্ত্রবৃষ্টিসমাকুলে
মায়াধিকোঽবধীদ্বীরং গন্ধর্বঃ কুরুসত্তমম্

চিত্রাঙ্গদং কুরুশ্রেষ্ঠং বিচিত্রশরকার্মুকম্
অন্তায় কৃত্বা গন্ধর্বো দিবমাচক্রমে ততঃ

তস্মিন্নৃপতিশার্দূলে নিহতে ভূরিবর্চসি
ভীষ্মঃ শাংতনবো রাজন্প্রেতকার্যাণ্যকারয়ৎ

বিচিত্রবীর্যং চ তদা বালমপ্রাপ্তয়ৌবনম্
কুরুরাজ্যে মহাবাহুরভ্যষিঞ্চদনন্তরম্

বিচিত্রবীর্যস্তু তদা ভীষ্মস্য বচনে স্থিতঃ
অন্বশাসন্মহারাজ পিতৃপৈতামহং পদম্

স ধর্মশাস্ত্রকুশলো ভীষ্মং শাংতনবং নৃপঃ
পূজয়ামাস ধর্মেণ স চৈনং প্রত্যপালয়ৎ