Utshovঅধ্যায় 96
96.1
বৈশংপায়ন উবাচ
হতে চিত্রাঙ্গদে ভীষ্মো বালে ভ্রাতরি চানঘ
পালয়ামাস তদ্রাজ্যং সত্যবত্যা মতে স্থিতঃ
96.2
সংপ্রাপ্তয়ৌবনং পশ্যন্ভ্রাতরং ধীমতাং বরম্
ভীষ্মো বিচিত্রবীর্যস্য বিবাহায়াকরোন্মতিম্
96.3
অথ কাশিপতের্ভীষ্মঃ কন্যাস্তিস্রোঽপ্সরঃসমাঃ
শুশ্রাব সহিতা রাজন্বৃণ্বতীর্বৈ স্বয়ং বরম্
96.4
ততঃ স রথিনাং শ্রেষ্ঠো রথেনৈকেন বর্মভৃৎ
জগামানুমতে মাতুঃ পুরীং বারাণসীং প্রতি
96.5
তত্র রাজ্ঞঃ সমুদিতান্সর্বতঃ সমুপাগতান্
দদর্শ কন্যাস্তাশ্চৈব ভীষ্মঃ শংতনুনন্দনঃ
96.6
কীর্ত্যমানেষু রাজ্ঞাং তু নামস্বথ সহস্রশঃ
ভীষ্মঃ স্বয়ং তদা রাজন্বরয়ামাস তাঃ প্রভুঃ
96.7
উবাচ চ মহীপালান্রাজঞ্জলদনিঃস্বনঃ
রথমারোপ্য তাঃ কন্যা ভীষ্মঃ প্রহরতাং বরঃ
96.8
আহূয় দানং কন্যানাং গুণবদ্ভ্যঃ স্মৃতং বুধৈঃ
অলংকৃত্য যথাশক্তি প্রদায় চ ধনান্যপি
96.9
প্রয়চ্ছন্ত্যপরে কন্যাং মিথুনেন গবামপি
বিত্তেন কথিতেনান্যে বলেনান্যেঽনুমান্য চ
96.10
প্রমত্তামুপয়ান্ত্যন্যে স্বয়মন্যে চ বিন্দতে
অষ্টমং তমথো বিত্ত বিবাহং কবিভিঃ স্মৃতম্
96.11
স্বয়ংবরং তু রাজন্যাঃ প্রশংসন্ত্যুপয়ান্তি চ
প্রমথ্য তু হৃতামাহুর্জ্যায়সীং ধর্মবাদিনঃ
96.12
তা ইমাঃ পৃথিবীপালা জিহীর্ষামি বলাদিতঃ
তে যতধ্বং পরং শক্ত্যা বিজয়ায়েতরায় বা
স্থিতোঽহং পৃথিবীপালা যুদ্ধায় কৃতনিশ্চয়ঃ
96.13
এবমুক্ত্বা মহীপালান্কাশিরাজং চ বীর্যবান্
সর্বাঃ কন্যাঃ স কৌরব্যো রথমারোপয়ত্স্বকম্
আমন্ত্র্য চ স তান্প্রায়াচ্ছীঘ্রং কন্যাঃ প্রগৃহ্য তাঃ
96.14
ততস্তে পার্থিবাঃ সর্বে সমুত্পেতুরমর্ষিতাঃ
সংস্পৃশন্তঃ স্বকান্বাহূন্দশন্তো দশনচ্ছদান্
96.15
তেষামাভরণান্যাশু ত্বরিতানাং বিমুঞ্চতাম্
আমুঞ্চতাং চ বর্মাণি সংভ্রমঃ সুমহানভূৎ
96.16
তারাণামিব সংপাতো বভূব জনমেজয়
ভূষণানাং চ শুভ্রাণাং কবচানাং চ সর্বশঃ
96.17
সবর্মভির্ভূষণৈস্তে দ্রাগ্ভ্রাজদ্ভিরিতস্ততঃ
সক্রোধামর্ষজিহ্মভ্রূসকষায়দৃশস্তথা
96.18
সূতোপকৢপ্তান্রুচিরান্সদশ্বোদ্যতধূর্গতান্
রথানাস্থায় তে বীরাঃ সর্বপ্রহরণান্বিতাঃ
প্রয়ান্তমেকং কৌরব্যমনুসস্রুরুদায়ুধাঃ
96.19
ততঃ সমভবদ্যুদ্ধং তেষাং তস্য চ ভারত
একস্য চ বহূনাং চ তুমুলং লোমহর্ষণম্
96.20
তে ত্বিষূন্দশসাহস্রাংস্তস্মৈ যুগপদাক্ষিপন্
অপ্রাপ্তাংশ্চৈব তানাশু ভীষ্মঃ সর্বাংস্তদাচ্ছিনৎ
96.21
ততস্তে পার্থিবাঃ সর্বে সর্বতঃ পরিবারয়ন্
ববর্ষুঃ শরবর্ষেণ বর্ষেণেবাদ্রিমম্বুদাঃ
96.22
স তদ্বাণময়ং বর্ষং শরৈরাবার্য সর্বতঃ
ততঃ সর্বান্মহীপালান্প্রত্যবিধ্যত্ত্রিভিস্ত্রিভিঃ
96.23
তস্যাতি পুরুষানন্যাঁল্লাঘবং রথচারিণঃ
রক্ষণং চাত্মনঃ সংখ্যে শত্রবোঽপ্যভ্যপূজয়ন্
96.24
তান্বিনির্জিত্য তু রণে সর্বশস্ত্রবিশারদঃ
কন্যাভিঃ সহিতঃ প্রায়াদ্ভারতো ভারতান্প্রতি
96.25
ততস্তং পৃষ্ঠতো রাজঞ্শাল্বরাজো মহারথঃ
অভ্যাহনদমেয়াত্মা ভীষ্মং শাংতনবং রণে
96.26
বারণং জঘনে নিঘ্নন্দন্তাভ্যামপরো যথা
বাশিতামনুসংপ্রাপ্তো যূথপো বলিনাং বরঃ
96.27
স্ত্রীকাম তিষ্ঠ তিষ্ঠেতি ভীষ্মমাহ স পার্থিবঃ
শাল্বরাজো মহাবাহুরমর্ষেণাভিচোদিতঃ
96.28
ততঃ স পুরুষব্যাঘ্রো ভীষ্মঃ পরবলার্দনঃ
তদ্বাক্যাকুলিতঃ ক্রোধাদ্বিধূমোঽগ্নিরিব জ্বলন্
96.29
ক্ষত্রধর্মং সমাস্থায় ব্যপেতভয়সংভ্রমঃ
নিবর্তয়ামাস রথং শাল্বং প্রতি মহারথঃ
96.30
নিবর্তমানং তং দৃষ্ট্বা রাজানঃ সর্ব এব তে
প্রেক্ষকাঃ সমপদ্যন্ত ভীষ্মশাল্বসমাগমে
96.31
তৌ বৃষাবিব নর্দন্তৌ বলিনৌ বাশিতান্তরে
অন্যোন্যমভিবর্তেতাং বলবিক্রমশালিনৌ
96.32
ততো ভীষ্মং শাংতনবং শরৈঃ শতসহস্রশঃ
শাল্বরাজো নরশ্রেষ্ঠঃ সমবাকিরদাশুগৈঃ
96.33
পূর্বমভ্যর্দিতং দৃষ্ট্বা ভীষ্মং শাল্বেন তে নৃপাঃ
বিস্মিতাঃ সমপদ্যন্ত সাধু সাধ্বিতি চাব্রুবন্
96.34
লাঘবং তস্য তে দৃষ্ট্বা সংয়ুগে সর্বপার্থিবাঃ
অপূজয়ন্ত সংহৃষ্টা বাগ্ভিঃ শাল্বং নরাধিপাঃ
96.35
ক্ষত্রিয়াণাং তদা বাচঃ শ্রুত্বা পরপুরংজয়ঃ
ক্রুদ্ধঃ শাংতনবো ভীষ্মস্তিষ্ঠ তিষ্ঠেত্যভাষত
96.36
সারথিং চাব্রবীত্ক্রুদ্ধো যাহি যত্রৈষ পার্থিবঃ
যাবদেনং নিহন্ম্যদ্য ভুজংগমিব পক্ষিরাট্
96.37
ততোঽস্ত্রং বারুণং সম্যগ্যোজয়ামাস কৌরবঃ
তেনাশ্বাংশ্চতুরোঽমৃদ্নাচ্ছাল্বরাজ্ঞো নরাধিপ
96.38
অস্ত্রৈরস্ত্রাণি সংবার্য শাল্বরাজ্ঞঃ স কৌরবঃ
ভীষ্মো নৃপতিশার্দূল ন্যবধীত্তস্য সারথিম্
অস্ত্রেণ চাপ্যথৈকেন ন্যবধীত্তুরগোত্তমান্
96.39
কন্যাহেতোর্নরশ্রেষ্ঠ ভীষ্মঃ শাংতনবস্তদা
জিত্বা বিসর্জয়ামাস জীবন্তং নৃপসত্তমম্
ততঃ শাল্বঃ স্বনগরং প্রয়য়ৌ ভরতর্ষভ
96.40
রাজানো যে চ তত্রাসন্স্বয়ংবরদিদৃক্ষবঃ
স্বান্যেব তেঽপি রাষ্ট্রাণি জগ্মুঃ পরপুরংজয়
96.41
এবং বিজিত্য তাঃ কন্যা ভীষ্মঃ প্রহরতাং বরঃ
প্রয়য়ৌ হাস্তিনপুরং যত্র রাজা স কৌরবঃ
96.42
সোঽচিরেণৈব কালেন অত্যক্রামন্নরাধিপ
বনানি সরিতশ্চৈব শৈলাংশ্চ বিবিধদ্রুমান্
96.43
অক্ষতঃ ক্ষপয়িত্বারীন্সংখ্যেঽসংখ্যেয়বিক্রমঃ
আনয়ামাস কাশ্যস্য সুতাঃ সাগরগাসুতঃ
96.44
স্নুষা ইব স ধর্মাত্মা ভগিন্য ইব চানুজাঃ
যথা দুহিতরশ্চৈব প্রতিগৃহ্য যয়ৌ কুরূন্
96.45
তাঃ সর্বা গুণসংপন্না ভ্রাতা ভ্রাত্রে যবীয়সে
ভীষ্মো বিচিত্রবীর্যায় প্রদদৌ বিক্রমাহৃতাঃ
96.46
সতাং ধর্মেণ ধর্মজ্ঞঃ কৃত্বা কর্মাতিমানুষম্
ভ্রাতুর্বিচিত্রবীর্যস্য বিবাহায়োপচক্রমে
সত্যবত্যা সহ মিথঃ কৃত্বা নিশ্চয়মাত্মবান্
96.47
বিবাহং কারয়িষ্যন্তং ভীষ্মং কাশিপতেঃ সুতা
জ্যেষ্ঠা তাসামিদং বাক্যমব্রবীদ্ধ সতী তদা
96.48
ময়া সৌভপতিঃ পূর্বং মনসাভিবৃতঃ পতিঃ
তেন চাস্মি বৃতা পূর্বমেষ কামশ্চ মে পিতুঃ
96.49
ময়া বরয়িতব্যোঽভূচ্ছাল্বস্তস্মিন্স্বয়ংবরে
এতদ্বিজ্ঞায় ধর্মজ্ঞ ততস্ত্বং ধর্মমাচর
96.50
এবমুক্তস্তয়া ভীষ্মঃ কন্যয়া বিপ্রসংসদি
চিন্তামভ্যগমদ্বীরো যুক্তাং তস্যৈব কর্মণঃ
96.51
স বিনিশ্চিত্য ধর্মজ্ঞো ব্রাহ্মণৈর্বেদপারগৈঃ
অনুজজ্ঞে তদা জ্যেষ্টামম্বাং কাশিপতেঃ সুতাম্
96.52
অম্বিকাম্বালিকে ভার্যে প্রাদাদ্ভ্রাত্রে যবীয়সে
ভীষ্মো বিচিত্রবীর্যায় বিধিদৃষ্টেন কর্মণা
96.53
তয়োঃ পাণিং গৃহীত্বা স রূপয়ৌবনদর্পিতঃ
বিচিত্রবীর্যো ধর্মাত্মা কামাত্মা সমপদ্যত
96.54
তে চাপি বৃহতী শ্যামে নীলকুঞ্চিতমূর্ধজে
রক্ততুঙ্গনখোপেতে পীনশ্রোণিপয়োধরে
96.55
আত্মনঃ প্রতিরূপোঽসৌ লব্ধঃ পতিরিতি স্থিতে
বিচিত্রবীর্যং কল্যাণং পূজয়ামাসতুস্তু তে
96.56
স চাশ্বিরূপসদৃশো দেবসত্ত্বপরাক্রমঃ
সর্বাসামেব নারীণাং চিত্তপ্রমথনোঽভবৎ
96.57
তাভ্যাং সহ সমাঃ সপ্ত বিহরন্পৃথিবীপতিঃ
বিচিত্রবীর্যস্তরুণো যক্ষ্মাণং সমপদ্যত
96.58
সুহৃদাং যতমানানামাপ্তৈঃ সহ চিকিত্সকৈঃ
জগামাস্তমিবাদিত্যঃ কৌরব্যো যমসাদনম্
96.59
প্রেতকার্যাণি সর্বাণি তস্য সম্যগকারয়ৎ
রাজ্ঞো বিচিত্রবীর্যস্য সত্যবত্যা মতে স্থিতঃ
ঋত্বিগ্ভিঃ সহিতো ভীষ্মঃ সর্বৈশ্চ কুরুপুংগবৈঃ