Utshovঅধ্যায় 97
97.1
বৈশংপায়ন উবাচ
ততঃ সত্যবতী দীনা কৃপণা পুত্রগৃদ্ধিনী
পুত্রস্য কৃত্বা কার্যাণি স্নুষাভ্যাং সহ ভারত
97.2
ধর্মং চ পিতৃবংশং চ মাতৃবংশং চ মানিনী
প্রসমীক্ষ্য মহাভাগা গাঙ্গেয়ং বাক্যমব্রবীৎ
97.3
শংতনোর্ধর্মনিত্যস্য কৌরব্যস্য যশস্বিনঃ
ত্বয়ি পিণ্ডশ্চ কীর্তিশ্চ সংতানং চ প্রতিষ্ঠিতম্
97.4
যথা কর্ম শুভং কৃত্বা স্বর্গোপগমনং ধ্রুবম্
যথা চায়ুর্ধ্রুবং সত্যে ত্বয়ি ধর্মস্তথা ধ্রুবঃ
97.5
বেত্থ ধর্মাংশ্চ ধর্মজ্ঞ সমাসেনেতরেণ চ
বিবিধাস্ত্বং শ্রুতীর্বেত্থ বেত্থ বেদাংশ্চ সর্বশঃ
97.6
ব্যবস্থানং চ তে ধর্মে কুলাচারং চ লক্ষয়ে
প্রতিপত্তিং চ কৃচ্ছ্রেষু শুক্রাঙ্গিরসয়োরিব
97.7
তস্মাত্সুভৃশমাশ্বস্য ত্বয়ি ধর্মভৃতাং বর
কার্যে ত্বাং বিনিয়োক্ষ্যামি তচ্ছ্রুত্বা কর্তুমর্হসি
97.8
মম পুত্রস্তব ভ্রাতা বীর্যবান্সুপ্রিয়শ্চ তে
বাল এব গতঃ স্বর্গমপুত্রঃ পুরুষর্ষভ
97.9
ইমে মহিষ্যৌ ভ্রাতুস্তে কাশিরাজসুতে শুভে
রূপয়ৌবনসংপন্নে পুত্রকামে চ ভারত
97.10
তয়োরুত্পাদয়াপত্যং সংতানায় কুলস্য নঃ
মন্নিয়োগান্মহাভাগ ধর্মং কর্তুমিহার্হসি
97.11
রাজ্যে চৈবাভিষিচ্যস্ব ভারতাননুশাধি চ
দারাংশ্চ কুরু ধর্মেণ মা নিমজ্জীঃ পিতামহান্
97.12
তথোচ্যমানো মাত্রা চ সুহৃদ্ভিশ্চ পরংতপঃ
প্রত্যুবাচ স ধর্মাত্মা ধর্ম্যমেবোত্তরং বচঃ
97.13
অসংশয়ং পরো ধর্মস্ত্বয়া মাতরুদাহৃতঃ
ত্বমপত্যং প্রতি চ মে প্রতিজ্ঞাং বেত্থ বৈ পরাম্
97.14
জানাসি চ যথাবৃত্তং শুল্কহেতোস্ত্বদন্তরে
স সত্যবতি সত্যং তে প্রতিজানাম্যহং পুনঃ
97.15
পরিত্যজেয়ং ত্রৈলোক্যং রাজ্যং দেবেষু বা পুনঃ
যদ্বাপ্যধিকমেতাভ্যাং ন তু সত্যং কথংচন
97.16
ত্যজেচ্চ পৃথিবী গন্ধমাপশ্চ রসমাত্মনঃ
জ্যোতিস্তথা ত্যজেদ্রূপং বায়ুঃ স্পর্শগুণং ত্যজেৎ
97.17
প্রভাং সমুত্সৃজেদর্কো ধূমকেতুস্তথোষ্ণতাম্
ত্যজেচ্ছব্দং তথাকাশঃ সোমঃ শীতাংশুতাং ত্যজেৎ
97.18
বিক্রমং বৃত্রহা জহ্যাদ্ধর্মং জহ্যাচ্চ ধর্মরাট্
ন ত্বহং সত্যমুত্স্রষ্টুং ব্যবসেয়ং কথংচন
97.19
এবমুক্তা তু পুত্রেণ ভূরিদ্রবিণতেজসা
মাতা সত্যবতী ভীষ্মমুবাচ তদনন্তরম্
97.20
জানামি তে স্থিতিং সত্যে পরাং সত্যপরাক্রম
ইচ্ছন্সৃজেথাস্ত্রীঁল্লোকানন্যাংস্ত্বং স্বেন তেজসা
97.21
জানামি চৈব সত্যং তন্মদর্থং যদভাষথাঃ
আপদ্ধর্মমবেক্ষস্ব বহ পৈতামহীং ধুরম্
97.22
যথা তে কুলতন্তুশ্চ ধর্মশ্চ ন পরাভবেৎ
সুহৃদশ্চ প্রহৃষ্যেরংস্তথা কুরু পরংতপ
97.23
লালপ্যমানাং তামেবং কৃপণাং পুত্রগৃদ্ধিনীম্
ধর্মাদপেতং ব্রুবতীং ভীষ্মো ভূয়োঽব্রবীদিদম্
97.24
রাজ্ঞি ধর্মানবেক্ষস্ব মা নঃ সর্বান্ব্যনীনশঃ
সত্যাচ্চ্যুতিঃ ক্ষত্রিয়স্য ন ধর্মেষু প্রশস্যতে
97.25
শংতনোরপি সংতানং যথা স্যাদক্ষয়ং ভুবি
তত্তে ধর্মং প্রবক্ষ্যামি ক্ষাত্রং রাজ্ঞি সনাতনম্
97.26
শ্রুত্বা তং প্রতিপদ্যেথাঃ প্রাজ্ঞৈঃ সহ পুরোহিতৈঃ
আপদ্ধর্মার্থকুশলৈর্লোকতন্ত্রমবেক্ষ্য চ