Utshovঅধ্যায় 98
98.1
ভীষ্ম উবাচ
জামদগ্ন্যেন রামেণ পিতুর্বধমমৃষ্যতা
ক্রুদ্ধেন চ মহাভাগে হৈহয়াধিপতির্হতঃ
শতানি দশ বাহূনাং নিকৃত্তান্যর্জুনস্য বৈ
98.2
পুনশ্চ ধনুরাদায় মহাস্ত্রাণি প্রমুঞ্চতা
নির্দগ্ধং ক্ষত্রমসকৃদ্রথেন জয়তা মহীম্
98.3
এবমুচ্চাবচৈরস্ত্রৈর্ভার্গবেণ মহাত্মনা
ত্রিঃসপ্তকৃত্বঃ পৃথিবী কৃতা নিঃক্ষত্রিয়া পুরা
98.4
ততঃ সংভূয় সর্বাভিঃ ক্ষত্রিয়াভিঃ সমন্ততঃ
উত্পাদিতান্যপত্যানি ব্রাহ্মণৈর্নিয়তাত্মভিঃ
98.5
পাণিগ্রাহস্য তনয় ইতি বেদেষু নিশ্চিতম্
ধর্মং মনসি সংস্থাপ্য ব্রাহ্মণাংস্তাঃ সমভ্যয়ুঃ
লোকেঽপ্যাচরিতো দৃষ্টঃ ক্ষত্রিয়াণাং পুনর্ভবঃ
98.6
অথোতথ্য ইতি খ্যাত আসীদ্ধীমানৃষিঃ পুরা
মমতা নাম তস্যাসীদ্ভার্যা পরমসংমতা
98.7
উতথ্যস্য যবীয়াংস্তু পুরোধাস্ত্রিদিবৌকসাম্
বৃহস্পতির্বৃহত্তেজা মমতাং সোঽন্বপদ্যত
98.8
উবাচ মমতা তং তু দেবরং বদতাং বরম্
অন্তর্বত্নী অহং ভ্রাত্রা জ্যেষ্ঠেনারম্যতামিতি
98.9
অয়ং চ মে মহাভাগ কুক্ষাবেব বৃহস্পতে
ঔতথ্যো বেদমত্রৈব ষডঙ্গং প্রত্যধীয়ত
98.10
অমোঘরেতাস্ত্বং চাপি নূনং ভবিতুমর্হসি
তস্মাদেবংগতেঽদ্য ত্বমুপারমিতুমর্হসি
98.11
এবমুক্তস্তয়া সম্যগ্বৃহত্তেজা বৃহস্পতিঃ
কামাত্মানং তদাত্মানং ন শশাক নিয়চ্ছিতুম্
98.12
সংবভূব ততঃ কামী তয়া সার্ধমকাময়া
উত্সৃজন্তং তু তং রেতঃ স গর্ভস্থোঽভ্যভাষত
98.13
ভোস্তাত কন্যস বদে দ্বয়োর্নাস্ত্যত্র সংভবঃ
অমোঘশুক্রশ্চ ভবান্পূর্বং চাহমিহাগতঃ
98.14
শশাপ তং ততঃ ক্রুদ্ধ এবমুক্তো বৃহস্পতিঃ
উতথ্যপুত্রং গর্ভস্থং নির্ভর্ত্স্য ভগবানৃষিঃ
98.15
যস্মাত্ত্বমীদৃশে কালে সর্বভূতেপ্সিতে সতি
এবমাত্থ বচস্তস্মাত্তমো দীর্ঘং প্রবেক্ষ্যসি
98.16
স বৈ দীর্ঘতমা নাম শাপাদৃষিরজায়ত
বৃহস্পতের্বৃহত্কীর্তের্বৃহস্পতিরিবৌজসা
98.17
স পুত্রাঞ্জনয়ামাস গৌতমাদীন্মহায়শাঃ
ঋষেরুতথ্যস্য তদা সংতানকুলবৃদ্ধয়ে
98.18
লোভমোহাভিভূতাস্তে পুত্রাস্তং গৌতমাদয়ঃ
কাষ্ঠে সমুদ্গে প্রক্ষিপ্য গঙ্গায়াং সমবাসৃজন্
98.19
ন স্যাদন্ধশ্চ বৃদ্ধশ্চ ভর্তব্যোঽয়মিতি স্ম তে
চিন্তয়িত্বা ততঃ ক্রূরাঃ প্রতিজগ্মুরথো গৃহান্
98.20
সোঽনুস্রোতস্তদা রাজন্প্লবমান ঋষিস্ততঃ
জগাম সুবহূন্দেশানন্ধস্তেনোডুপেন হ
98.21
তং তু রাজা বলির্নাম সর্বধর্মবিশারদঃ
অপশ্যন্মজ্জনগতঃ স্রোতসাভ্যাশমাগতম্
98.22
জগ্রাহ চৈনং ধর্মাত্মা বলিঃ সত্যপরাক্রমঃ
জ্ঞাত্বা চৈনং স বব্রেঽথ পুত্রার্থং মনুজর্ষভ
98.23
সংতানার্থং মহাভাগ ভার্যাসু মম মানদ
পুত্রান্ধর্মার্থকুশলানুত্পাদয়িতুমর্হসি
98.24
এবমুক্তঃ স তেজস্বী তং তথেত্যুক্তবানৃষিঃ
তস্মৈ স রাজা স্বাং ভার্যাং সুদেষ্ণাং প্রাহিণোত্তদা
98.25
অন্ধং বৃদ্ধং চ তং মত্বা ন সা দেবী জগাম হ
স্বাং তু ধাত্রেয়িকাং তস্মৈ বৃদ্ধায় প্রাহিণোত্তদা
98.26
তস্যাং কাক্ষীবদাদীন্স শূদ্রয়োনাবৃষির্বশী
জনয়ামাস ধর্মাত্মা পুত্রানেকাদশৈব তু
98.27
কাক্ষীবদাদীন্পুত্রাংস্তান্দৃষ্ট্বা সর্বানধীয়তঃ
উবাচ তমৃষিং রাজা মমৈত ইতি বীর্যবান্
98.28
নেত্যুবাচ মহর্ষিস্তং মমৈবৈত ইতি ব্রুবন্
শূদ্রয়োনৌ ময়া হীমে জাতাঃ কাক্ষীবদাদয়ঃ
98.29
অন্ধং বৃদ্ধং চ মাং মত্বা সুদেষ্ণা মহিষী তব
অবমন্য দদৌ মূঢা শূদ্রাং ধাত্রেয়িকাং হি মে
98.30
ততঃ প্রসাদয়ামাস পুনস্তমৃষিসত্তমম্
বলিঃ সুদেষ্ণাং ভার্যাং চ তস্মৈ তাং প্রাহিণোত্পুনঃ
98.31
তাং স দীর্ঘতমাঙ্গেষু স্পৃষ্ট্বা দেবীমথাব্রবীৎ
ভবিষ্যতি কুমারস্তে তেজস্বী সত্যবাগিতি
98.32
তত্রাঙ্গো নাম রাজর্ষিঃ সুদেষ্ণায়ামজায়ত
এবমন্যে মহেষ্বাসা ব্রাহ্মণৈঃ ক্ষত্রিয়া ভুবি
98.33
জাতাঃ পরমধর্মজ্ঞা বীর্যবন্তো মহাবলাঃ
এতচ্ছ্রুত্বা ত্বমপ্যত্র মাতঃ কুরু যথেপ্সিতম্