Utshovঅধ্যায় 99
99.1
ভীষ্ম উবাচ
পুনর্ভরতবংশস্য হেতুং সংতানবৃদ্ধয়ে
বক্ষ্যামি নিয়তং মাতস্তন্মে নিগদতঃ শৃণু
99.2
ব্রাহ্মণো গুণবান্কশ্চিদ্ধনেনোপনিমন্ত্র্যতাম্
বিচিত্রবীর্যক্ষেত্রেষু যঃ সমুত্পাদয়েত্প্রজাঃ
99.3
বৈশংপায়ন উবাচ
ততঃ সত্যবতী ভীষ্মং বাচা সংসজ্জমানয়া
বিহসন্তীব সব্রীডমিদং বচনমব্রবীৎ
99.4
সত্যমেতন্মহাবাহো যথা বদসি ভারত
বিশ্বাসাত্তে প্রবক্ষ্যামি সংতানায় কুলস্য চ
ন তে শক্যমনাখ্যাতুমাপদ্ধীয়ং তথাবিধা
99.5
ত্বমেব নঃ কুলে ধর্মস্ত্বং সত্যং ত্বং পরা গতিঃ
তস্মান্নিশম্য বাক্যং মে কুরুষ্ব যদনন্তরম্
99.6
ধর্ময়ুক্তস্য ধর্মাত্মন্পিতুরাসীত্তরী মম
সা কদাচিদহং তত্র গতা প্রথময়ৌবনে
99.7
অথ ধর্মভৃতাং শ্রেষ্ঠঃ পরমর্ষিঃ পরাশরঃ
আজগাম তরীং ধীমাংস্তরিষ্যন্যমুনাং নদীম্
99.8
স তার্যমাণো যমুনাং মামুপেত্যাব্রবীত্তদা
সান্ত্বপূর্বং মুনিশ্রেষ্ঠঃ কামার্তো মধুরং বহু
99.9
তমহং শাপভীতা চ পিতুর্ভীতা চ ভারত
বরৈরসুলভৈরুক্তা ন প্রত্যাখ্যাতুমুত্সহে
99.10
অভিভূয় স মাং বালাং তেজসা বশমানয়ৎ
তমসা লোকমাবৃত্য নৌগতামেব ভারত
99.11
মত্স্যগন্ধো মহানাসীত্পুরা মম জুগুপ্সিতঃ
তমপাস্য শুভং গন্ধমিমং প্রাদাত্স মে মুনিঃ
99.12
ততো মামাহ স মুনির্গর্ভমুত্সৃজ্য মামকম্
দ্বীপেঽস্যা এব সরিতঃ কন্যৈব ত্বং ভবিষ্যসি
99.13
পারাশর্যো মহায়োগী স বভূব মহানৃষিঃ
কন্যাপুত্রো মম পুরা দ্বৈপায়ন ইতি স্মৃতঃ
99.14
যো ব্যস্য বেদাংশ্চতুরস্তপসা ভগবানৃষিঃ
লোকে ব্যাসত্বমাপেদে কার্ষ্ণ্যাত্কৃষ্ণত্বমেব চ
99.15
সত্যবাদী শমপরস্তপস্বী দগ্ধকিল্বিষঃ
স নিয়ুক্তো ময়া ব্যক্তং ত্বয়া চ অমিতদ্যুতে
ভ্রাতুঃ ক্ষেত্রেষু কল্যাণমপত্যং জনয়িষ্যতি
99.16
স হি মামুক্তবাংস্তত্র স্মরেঃ কৃত্যেষু মামিতি
তং স্মরিষ্যে মহাবাহো যদি ভীষ্ম ত্বমিচ্ছসি
99.17
তব হ্যনুমতে ভীষ্ম নিয়তং স মহাতপাঃ
বিচিত্রবীর্যক্ষেত্রেষু পুত্রানুত্পাদয়িষ্যতি
99.18
মহর্ষেঃ কীর্তনে তস্য ভীষ্মঃ প্রাঞ্জলিরব্রবীৎ
ধর্মমর্থং চ কামং চ ত্রীনেতান্যোঽনুপশ্যতি
99.19
অর্থমর্থানুবন্ধং চ ধর্মং ধর্মানুবন্ধনম্
কামং কামানুবন্ধং চ বিপরীতান্পৃথক্পৃথক্
যো বিচিন্ত্য ধিয়া সম্যগ্ব্যবস্যতি স বুদ্ধিমান্
99.20
তদিদং ধর্ময়ুক্তং চ হিতং চৈব কুলস্য নঃ
উক্তং ভবত্যা যচ্ছ্রেয়ঃ পরমং রোচতে মম
99.21
ততস্তস্মিন্প্রতিজ্ঞাতে ভীষ্মেণ কুরুনন্দন
কৃষ্ণদ্বৈপায়নং কালী চিন্তয়ামাস বৈ মুনিম্
99.22
স বেদান্বিব্রুবন্ধীমান্মাতুর্বিজ্ঞায় চিন্তিতম্
প্রাদুর্বভূবাবিদিতঃ ক্ষণেন কুরুনন্দন
99.23
তস্মৈ পূজাং তদা দত্ত্বা সুতায় বিধিপূর্বকম্
পরিষ্বজ্য চ বাহুভ্যাং প্রস্নবৈরভিষিচ্য চ
মুমোচ বাষ্পং দাশেয়ী পুত্রং দৃষ্ট্বা চিরস্য তম্
99.24
তামদ্ভিঃ পরিষিচ্যার্তাং মহর্ষিরভিবাদ্য চ
মাতরং পূর্বজঃ পুত্রো ব্যাসো বচনমব্রবীৎ
99.25
ভবত্যা যদভিপ্রেতং তদহং কর্তুমাগতঃ
শাধি মাং ধর্মতত্ত্বজ্ঞে করবাণি প্রিয়ং তব
99.26
তস্মৈ পূজাং ততোঽকার্ষীত্পুরোধাঃ পরমর্ষয়ে
স চ তাং প্রতিজগ্রাহ বিধিবন্মন্ত্রপূর্বকম্
99.27
তমাসনগতং মাতা পৃষ্ট্বা কুশলমব্যয়ম্
সত্যবত্যভিবীক্ষ্যৈনমুবাচেদমনন্তরম্
99.28
মাতাপিত্রোঃ প্রজায়ন্তে পুত্রাঃ সাধারণাঃ কবে
তেষাং পিতা যথা স্বামী তথা মাতা ন সংশয়ঃ
99.29
বিধাতৃবিহিতঃ স ত্বং যথা মে প্রথমঃ সুতঃ
বিচিত্রবীর্যো ব্রহ্মর্ষে তথা মেঽবরজঃ সুতঃ
99.30
যথৈব পিতৃতো ভীষ্মস্তথা ত্বমপি মাতৃতঃ
ভ্রাতা বিচিত্রবীর্যস্য যথা বা পুত্র মন্যসে
99.31
অয়ং শাংতনবঃ সত্যং পালয়ন্সত্যবিক্রমঃ
বুদ্ধিং ন কুরুতেঽপত্যে তথা রাজ্যানুশাসনে
99.32
স ত্বং ব্যপেক্ষয়া ভ্রাতুঃ সংতানায় কুলস্য চ
ভীষ্মস্য চাস্য বচনান্নিয়োগাচ্চ মমানঘ
99.33
অনুক্রোশাচ্চ ভূতানাং সর্বেষাং রক্ষণায় চ
আনৃশংস্যেন যদ্ব্রূয়াং তচ্ছ্রুত্বা কর্তুমর্হসি
99.34
যবীয়সস্তব ভ্রাতুর্ভার্যে সুরসুতোপমে
রূপয়ৌবনসংপন্নে পুত্রকামে চ ধর্মতঃ
99.35
তয়োরুত্পাদয়াপত্যং সমর্থো হ্যসি পুত্রক
অনুরূপং কুলস্যাস্য সংতত্যাঃ প্রসবস্য চ
99.36
ব্যাস উবাচ
বেত্থ ধর্মং সত্যবতি পরং চাপরমেব চ
যথা চ তব ধর্মজ্ঞে ধর্মে প্রণিহিতা মতিঃ
99.37
তস্মাদহং ত্বন্নিয়োগাদ্ধর্মমুদ্দিশ্য কারণম্
ঈপ্সিতং তে করিষ্যামি দৃষ্টং হ্যেতত্পুরাতনম্
99.38
ভ্রাতুঃ পুত্রান্প্রদাস্যামি মিত্রাবরুণয়োঃ সমান্
ব্রতং চরেতাং তে দেব্যৌ নির্দিষ্টমিহ যন্ময়া
99.39
সংবত্সরং যথান্যায়ং ততঃ শুদ্ধে ভবিষ্যতঃ
ন হি মামব্রতোপেতা উপেয়াত্কাচিদঙ্গনা
99.40
সত্যবত্যুবাচ
যথা সদ্যঃ প্রপদ্যেত দেবী গর্ভং তথা কুরু
অরাজকেষু রাষ্ট্রেষু নাস্তি বৃষ্টির্ন দেবতাঃ
99.41
কথমরাজকং রাষ্ট্রং শক্যং ধারয়িতুং প্রভো
তস্মাদ্গর্ভং সমাধত্স্ব ভীষ্মস্তং বর্ধয়িষ্যতি
99.42
ব্যাস উবাচ
যদি পুত্রঃ প্রদাতব্যো ময়া ক্ষিপ্রমকালিকম্
বিরূপতাং মে সহতামেতদস্যাঃ পরং ব্রতম্
99.43
যদি মে সহতে গন্ধং রূপং বেষং তথা বপুঃ
অদ্যৈব গর্ভং কৌসল্যা বিশিষ্টং প্রতিপদ্যতাম্
99.44
বৈশংপায়ন উবাচ
সমাগমনমাকাঙ্ক্ষন্নিতি সোঽন্তর্হিতো মুনিঃ
ততোঽভিগম্য সা দেবী স্নুষাং রহসি সংগতাম্
ধর্ম্যমর্থসমায়ুক্তমুবাচ বচনং হিতম্
99.45
কৌসল্যে ধর্মতন্ত্রং যদ্ব্রবীমি ত্বাং নিবোধ মে
ভরতানাং সমুচ্ছেদো ব্যক্তং মদ্ভাগ্যসংক্ষয়াৎ
99.46
ব্যথিতাং মাং চ সংপ্রেক্ষ্য পিতৃবংশং চ পীডিতম্
ভীষ্মো বুদ্ধিমদান্মেঽত্র ধর্মস্য চ বিবৃদ্ধয়ে
99.47
সা চ বুদ্ধিস্তবাধীনা পুত্রি জ্ঞাতং ময়েতি হ
নষ্টং চ ভারতং বংশং পুনরেব সমুদ্ধর
99.48
পুত্রং জনয় সুশ্রোণি দেবরাজসমপ্রভম্
স হি রাজ্যধুরং গুর্বীমুদ্বক্ষ্যতি কুলস্য নঃ
99.49
সা ধর্মতোঽনুনীয়ৈনাং কথংচিদ্ধর্মচারিণীম্
ভোজয়ামাস বিপ্রাংশ্চ দেবর্ষীনতিথীংস্তথা