Utshovঅধ্যায় 100
100.1
বৈশংপায়ন উবাচ
ততঃ সত্যবতী কালে বধূং স্নাতামৃতৌ তদা
সংবেশয়ন্তী শয়নে শনকৈর্বাক্যমব্রবীৎ
100.2
কৌসল্যে দেবরস্তেঽস্তি সোঽদ্য ত্বানুপ্রবেক্ষ্যতি
অপ্রমত্তা প্রতীক্ষৈনং নিশীথে আগমিষ্যতি
100.3
শ্বশ্র্বাস্তদ্বচনং শ্রুত্বা শয়ানা শয়নে শুভে
সাচিন্তয়ত্তদা ভীষ্মমন্যাংশ্চ কুরুপুংগবান্
100.4
ততোঽম্বিকায়াং প্রথমং নিয়ুক্তঃ সত্যবাগৃষিঃ
দীপ্যমানেষু দীপেষু শয়নং প্রবিবেশ হ
100.5
তস্য কৃষ্ণস্য কপিলা জটা দীপ্তে চ লোচনে
বভ্রূণি চৈব শ্মশ্রূণি দৃষ্ট্বা দেবী ন্যমীলয়ৎ
100.6
সংবভূব তয়া রাত্রৌ মাতুঃ প্রিয়চিকীর্ষয়া
ভয়াত্কাশিসুতা তং তু নাশক্নোদভিবীক্ষিতুম্
100.7
ততো নিষ্ক্রান্তমাসাদ্য মাতা পুত্রমথাব্রবীৎ
অপ্যস্যাং গুণবান্পুত্র রাজপুত্রো ভবিষ্যতি
100.8
নিশম্য তদ্বচো মাতুর্ব্যাসঃ পরমবুদ্ধিমান্
প্রোবাচাতীন্দ্রিয়জ্ঞানো বিধিনা সংপ্রচোদিতঃ
100.9
নাগায়ুতসমপ্রাণো বিদ্বান্রাজর্ষিসত্তমঃ
মহাভাগো মহাবীর্যো মহাবুদ্ধির্ভবিষ্যতি
100.10
তস্য চাপি শতং পুত্রা ভবিষ্যন্তি মহাবলাঃ
কিং তু মাতুঃ স বৈগুণ্যাদন্ধ এব ভবিষ্যতি
100.11
তস্য তদ্বচনং শ্রুত্বা মাতা পুত্রমথাব্রবীৎ
নান্ধঃ কুরূণাং নৃপতিরনুরূপস্তপোধন
100.12
জ্ঞাতিবংশস্য গোপ্তারং পিতৄণাং বংশবর্ধনম্
দ্বিতীয়ং কুরুবংশস্য রাজানং দাতুমর্হসি
100.13
স তথেতি প্রতিজ্ঞায় নিশ্চক্রাম মহাতপাঃ
সাপি কালেন কৌসল্যা সুষুবেঽন্ধং তমাত্মজম্
100.14
পুনরেব তু সা দেবী পরিভাষ্য স্নুষাং ততঃ
ঋষিমাবাহয়ত্সত্যা যথাপূর্বমনিন্দিতা
100.15
ততস্তেনৈব বিধিনা মহর্ষিস্তামপদ্যত
অম্বালিকামথাভ্যাগাদৃষিং দৃষ্ট্বা চ সাপি তম্
বিষণ্ণা পাণ্ডুসংকাশা সমপদ্যত ভারত
100.16
তাং ভীতাং পাণ্ডুসংকাশাং বিষণ্ণাং প্রেক্ষ্য পার্থিব
ব্যাসঃ সত্যবতীপুত্র ইদং বচনমব্রবীৎ
100.17
যস্মাত্পাণ্ডুত্বমাপন্না বিরূপং প্রেক্ষ্য মামপি
তস্মাদেষ সুতস্তুভ্যং পাণ্ডুরেব ভবিষ্যতি
100.18
নাম চাস্য তদেবেহ ভবিষ্যতি শুভাননে
ইত্যুক্ত্বা স নিরাক্রামদ্ভগবানৃষিসত্তমঃ
100.19
ততো নিষ্ক্রান্তমালোক্য সত্যা পুত্রমভাষত
শশংস স পুনর্মাত্রে তস্য বালস্য পাণ্ডুতাম্
100.20
তং মাতা পুনরেবান্যমেকং পুত্রময়াচত
তথেতি চ মহর্ষিস্তাং মাতরং প্রত্যভাষত
100.21
ততঃ কুমারং সা দেবী প্রাপ্তকালমজীজনৎ
পাণ্ডুং লক্ষণসংপন্নং দীপ্যমানমিব শ্রিয়া
তস্য পুত্রা মহেষ্বাসা জজ্ঞিরে পঞ্চ পাণ্ডবাঃ
100.22
ঋতুকালে ততো জ্যেষ্ঠাং বধূং তস্মৈ ন্যয়োজয়ৎ
সা তু রূপং চ গন্ধং চ মহর্ষেঃ প্রবিচিন্ত্য তম্
নাকরোদ্বচনং দেব্যা ভয়াত্সুরসুতোপমা
100.23
ততঃ স্বৈর্ভূষণৈর্দাসীং ভূষয়িত্বাপ্সরোপমাম্
প্রেষয়ামাস কৃষ্ণায় ততঃ কাশিপতেঃ সুতা
100.24
দাসী ঋষিমনুপ্রাপ্তং প্রত্যুদ্গম্যাভিবাদ্য চ
সংবিবেশাভ্যনুজ্ঞাতা সত্কৃত্যোপচচার হ
100.25
কামোপভোগেন তু স তস্যাং তুষ্টিমগাদৃষিঃ
তয়া সহোষিতো রাত্রিং মহর্ষিঃ প্রীয়মাণয়া
100.26
উত্তিষ্ঠন্নব্রবীদেনামভুজিষ্যা ভবিষ্যসি
অয়ং চ তে শুভে গর্ভঃ শ্রীমানুদরমাগতঃ
ধর্মাত্মা ভবিতা লোকে সর্ববুদ্ধিমতাং বরঃ
100.27
স জজ্ঞে বিদুরো নাম কৃষ্ণদ্বৈপায়নাত্মজঃ
ধৃতরাষ্ট্রস্য চ ভ্রাতা পাণ্ডোশ্চামিতবুদ্ধিমান্
100.28
ধর্মো বিদুররূপেণ শাপাত্তস্য মহাত্মনঃ
মাণ্ডব্যস্যার্থতত্ত্বজ্ঞঃ কামক্রোধবিবর্জিতঃ
100.29
স ধর্মস্যানৃণো ভূত্বা পুনর্মাত্রা সমেত্য চ
তস্যৈ গর্ভং সমাবেদ্য তত্রৈবান্তরধীয়ত
100.30
এবং বিচিত্রবীর্যস্য ক্ষেত্রে দ্বৈপায়নাদপি
জজ্ঞিরে দেবগর্ভাভাঃ কুরুবংশবিবর্ধনাঃ