Utshovঅধ্যায় 101
101.1
জনমেজয় উবাচ
কিং কৃতং কর্ম ধর্মেণ যেন শাপমুপেয়িবান্
কস্য শাপাচ্চ ব্রহ্মর্ষে শূদ্রয়োনাবজায়ত
101.2
বৈশংপায়ন উবাচ
বভূব ব্রাহ্মণঃ কশ্চিন্মাণ্ডব্য ইতি বিশ্রুতঃ
ধৃতিমান্সর্বধর্মজ্ঞঃ সত্যে তপসি চ স্থিতঃ
101.3
স আশ্রমপদদ্বারি বৃক্ষমূলে মহাতপাঃ
ঊর্ধ্ববাহুর্মহায়োগী তস্থৌ মৌনব্রতান্বিতঃ
101.4
তস্য কালেন মহতা তস্মিংস্তপসি তিষ্ঠতঃ
তমাশ্রমপদং প্রাপ্তা দস্যবো লোপ্ত্রহারিণঃ
অনুসার্যমাণা বহুভী রক্ষিভির্ভরতর্ষভ
101.5
তে তস্যাবসথে লোপ্ত্রং নিদধুঃ কুরুসত্তম
নিধায় চ ভয়াল্লীনাস্তত্রৈবান্বাগতে বলে
101.6
তেষু লীনেষ্বথো শীঘ্রং ততস্তদ্রক্ষিণাং বলম্
আজগাম ততোঽপশ্যংস্তমৃষিং তস্করানুগাঃ
101.7
তমপৃচ্ছংস্ততো রাজংস্তথাবৃত্তং তপোধনম্
কতরেণ পথা যাতা দস্যবো দ্বিজসত্তম
তেন গচ্ছামহে ব্রহ্মন্পথা শীঘ্রতরং বয়ম্
101.8
তথা তু রক্ষিণাং তেষাং ব্রুবতাং স তপোধনঃ
ন কিংচিদ্বচনং রাজন্নবদত্সাধ্বসাধু বা
101.9
ততস্তে রাজপুরুষা বিচিন্বানাস্তদাশ্রমম্
দদৃশুস্তত্র সংলীনাংস্তাংশ্চোরান্দ্রব্যমেব চ
101.10
ততঃ শঙ্কা সমভবদ্রক্ষিণাং তং মুনিং প্রতি
সংয়ম্যৈনং ততো রাজ্ঞে দস্যূংশ্চৈব ন্যবেদয়ন্
101.11
তং রাজা সহ তৈশ্চোরৈরন্বশাদ্বধ্যতামিতি
স বধ্যঘাতৈরজ্ঞাতঃ শূলে প্রোতো মহাতপাঃ
101.12
ততস্তে শূলমারোপ্য তং মুনিং রক্ষিণস্তদা
প্রতিজগ্মুর্মহীপালং ধনান্যাদায় তান্যথ
101.13
শূলস্থঃ স তু ধর্মাত্মা কালেন মহতা ততঃ
নিরাহারোঽপি বিপ্রর্ষির্মরণং নাভ্যুপাগমৎ
ধারয়ামাস চ প্রাণানৃষীংশ্চ সমুপানয়ৎ
101.14
শূলাগ্রে তপ্যমানেন তপস্তেন মহাত্মনা
সংতাপং পরমং জগ্মুর্মুনয়োঽথ পরংতপ
101.15
তে রাত্রৌ শকুনা ভূত্বা সংন্যবর্তন্ত সর্বতঃ
দর্শয়ন্তো যথাশক্তি তমপৃচ্ছন্দ্বিজোত্তমম্
শ্রোতুমিচ্ছামহে ব্রহ্মন্কিং পাপং কৃতবানসি
101.16
ততঃ স মুনিশার্দূলস্তানুবাচ তপোধনান্
দোষতঃ কং গমিষ্যামি ন হি মেঽন্যোঽপরাধ্যতি
101.17
রাজা চ তমৃষিং শ্রুত্বা নিষ্ক্রম্য সহ মন্ত্রিভিঃ
প্রসাদয়ামাস তদা শূলস্থমৃষিসত্তমম্
101.18
যন্ময়াপকৃতং মোহাদজ্ঞানাদৃষিসত্তম
প্রসাদয়ে ত্বাং তত্রাহং ন মে ত্বং ক্রোদ্ধুমর্হসি
101.19
এবমুক্তস্ততো রাজ্ঞা প্রসাদমকরোন্মুনিঃ
কৃতপ্রসাদো রাজা তং ততঃ সমবতারয়ৎ
101.20
অবতার্য চ শূলাগ্রাত্তচ্ছূলং নিশ্চকর্ষ হ
অশক্নুবংশ্চ নিষ্ক্রষ্টুং শূলং মূলে স চিচ্ছিদে
101.21
স তথান্তর্গতেনৈব শূলেন ব্যচরন্মুনিঃ
স তেন তপসা লোকান্বিজিগ্যে দুর্লভান্পরৈঃ
অণীমাণ্ডব্য ইতি চ ততো লোকেষু কথ্যতে
101.22
স গত্বা সদনং বিপ্রো ধর্মস্য পরমার্থবিৎ
আসনস্থং ততো ধর্মং দৃষ্ট্বোপালভত প্রভুঃ
101.23
কিং নু তদ্দুষ্কৃতং কর্ম ময়া কৃতমজানতা
যস্যেয়ং ফলনির্বৃত্তিরীদৃশ্যাসাদিতা ময়া
শীঘ্রমাচক্ষ্ব মে তত্ত্বং পশ্য মে তপসো বলম্
101.24
ধর্ম উবাচ
পতংগকানাং পুচ্ছেষু ত্বয়েষীকা প্রবেশিতা
কর্মণস্তস্য তে প্রাপ্তং ফলমেতত্তপোধন
101.25
অণীমাণ্ডব্য উবাচ
অল্পেঽপরাধে বিপুলো মম দণ্ডস্ত্বয়া কৃতঃ
শূদ্রয়োনাবতো ধর্ম মানুষঃ সংভবিষ্যসি
101.26
মর্যাদাং স্থাপয়াম্যদ্য লোকে ধর্মফলোদয়াম্
আ চতুর্দশমাদ্বর্ষান্ন ভবিষ্যতি পাতকম্
পরেণ কুর্বতামেবং দোষ এব ভবিষ্যতি
101.27
বৈশংপায়ন উবাচ
এতেন ত্বপরাধেন শাপাত্তস্য মহাত্মনঃ
ধর্মো বিদুররূপেণ শূদ্রয়োনাবজায়ত
101.28
ধর্মে চার্থে চ কুশলো লোভক্রোধবিবর্জিতঃ
দীর্ঘদর্শী শমপরঃ কুরূণাং চ হিতে রতঃ