অধ্যায় 102

102.1

বৈশংপায়ন উবাচ
তেষু ত্রিষু কুমারেষু জাতেষু কুরুজাঙ্গলম্
কুরবোঽথ কুরুক্ষেত্রং ত্রয়মেতদবর্ধত

ঊর্ধ্বসস্যাভবদ্ভূমিঃ সস্যানি ফলবন্তি চ
যথর্তুবর্ষী পর্জন্যো বহুপুষ্পফলা দ্রুমাঃ

বাহনানি প্রহৃষ্টানি মুদিতা মৃগপক্ষিণঃ
গন্ধবন্তি চ মাল্যানি রসবন্তি ফলানি চ

বণিগ্ভিশ্চাবকীর্যন্ত নগরাণ্যথ শিল্পিভিঃ
শূরাশ্চ কৃতবিদ্যাশ্চ সন্তশ্চ সুখিনোঽভবন্

নাভবন্দস্যবঃ কেচিন্নাধর্মরুচয়ো জনাঃ
প্রদেশেষ্বপি রাষ্ট্রাণাং কৃতং যুগমবর্তত

দানক্রিয়াধর্মশীলা যজ্ঞব্রতপরায়ণাঃ
অন্যোন্যপ্রীতিসংয়ুক্তা ব্যবর্ধন্ত প্রজাস্তদা

মানক্রোধবিহীনাশ্চ জনা লোভবিবর্জিতাঃ
অন্যোন্যমভ্যবর্ধন্ত ধর্মোত্তরমবর্তত

তন্মহোদধিবত্পূর্ণং নগরং বৈ ব্যরোচত
দ্বারতোরণনির্যূহৈর্যুক্তমভ্রচয়োপমৈঃ
প্রাসাদশতসংবাধং মহেন্দ্রপুরসংনিভম্

নদীষু বনখণ্ডেষু বাপীপল্বলসানুষু
কাননেষু চ রম্যেষু বিজহ্রুর্মুদিতা জনাঃ

উত্তরৈঃ কুরুভিঃ সার্ধং দক্ষিণাঃ কুরবস্তদা
বিস্পর্ধমানা ব্যচরংস্তথা সিদ্ধর্ষিচারণৈঃ
নাভবত্কৃপণঃ কশ্চিন্নাভবন্বিধবাঃ স্ত্রিয়ঃ

তস্মিঞ্জনপদে রম্যে বহবঃ কুরুভিঃ কৃতাঃ
কূপারামসভাবাপ্যো ব্রাহ্মণাবসথাস্তথা
ভীষ্মেণ শাস্ত্রতো রাজন্সর্বতঃ পরিরক্ষিতে

বভূব রমণীয়শ্চ চৈত্যয়ূপশতাঙ্কিতঃ
স দেশঃ পররাষ্ট্রাণি প্রতিগৃহ্যাভিবর্ধিতঃ
ভীষ্মেণ বিহিতং রাষ্ট্রে ধর্মচক্রমবর্তত

ক্রিয়মাণেষু কৃত্যেষু কুমারাণাং মহাত্মনাম্
পৌরজানপদাঃ সর্বে বভূবুঃ সততোত্সবাঃ

গৃহেষু কুরুমুখ্যানাং পৌরাণাং চ নরাধিপ
দীয়তাং ভুজ্যতাং চেতি বাচোঽশ্রূয়ন্ত সর্বশঃ

ধৃতরাষ্ট্রশ্চ পাণ্ডুশ্চ বিদুরশ্চ মহামতিঃ
জন্মপ্রভৃতি ভীষ্মেণ পুত্রবত্পরিপালিতাঃ

সংস্কারৈঃ সংস্কৃতাস্তে তু ব্রতাধ্যয়নসংয়ুতাঃ
শ্রমব্যায়ামকুশলাঃ সমপদ্যন্ত যৌবনম্

ধনুর্বেদেঽশ্বপৃষ্ঠে চ গদায়ুদ্ধেঽসিচর্মণি
তথৈব গজশিক্ষায়াং নীতিশাস্ত্রে চ পারগাঃ

ইতিহাসপুরাণেষু নানাশিক্ষাসু চাভিভো
বেদবেদাঙ্গতত্ত্বজ্ঞাঃ সর্বত্র কৃতনিশ্রমাঃ

পাণ্ডুর্ধনুষি বিক্রান্তো নরেভ্যোঽভ্যধিকোঽভবৎ
অত্যন্যান্বলবানাসীদ্ধৃতরাষ্ট্রো মহীপতিঃ

ত্রিষু লোকেষু ন ত্বাসীত্কশ্চিদ্বিদুরসংমিতঃ
ধর্মনিত্যস্ততো রাজন্ধর্মে চ পরমং গতঃ

প্রনষ্টং শংতনোর্বংশং সমীক্ষ্য পুনরুদ্ধৃতম্
ততো নির্বচনং লোকে সর্বরাষ্ট্রেষ্ববর্তত

বীরসূনাং কাশিসুতে দেশানাং কুরুজাঙ্গলম্
সর্বধর্মবিদাং ভীষ্মঃ পুরাণাং গজসাহ্বয়ম্

ধৃতরাষ্ট্রস্ত্বচক্ষুষ্ট্বাদ্রাজ্যং ন প্রত্যপদ্যত
করণত্বাচ্চ বিদুরঃ পাণ্ডুরাসীন্মহীপতিঃ