অধ্যায় 103

103.1

ভীষ্ম উবাচ
গুণৈঃ সমুদিতং সম্যগিদং নঃ প্রথিতং কুলম্
অত্যন্যান্পৃথিবীপালান্পৃথিব্যামধিরাজ্যভাক্

রক্ষিতং রাজভিঃ পূর্বৈর্ধর্মবিদ্ভির্মহাত্মভিঃ
নোত্সাদমগমচ্চেদং কদাচিদিহ নঃ কুলম্

ময়া চ সত্যবত্যা চ কৃষ্ণেন চ মহাত্মনা
সমবস্থাপিতং ভূয়ো যুষ্মাসু কুলতন্তুষু

বর্ধতে তদিদং পুত্র কুলং সাগরবদ্যথা
তথা ময়া বিধাতব্যং ত্বয়া চৈব বিশেষতঃ

শ্রূয়তে যাদবী কন্যা অনুরূপা কুলস্য নঃ
সুবলস্যাত্মজা চৈব তথা মদ্রেশ্বরস্য চ

কুলীনা রূপবত্যশ্চ নাথবত্যশ্চ সর্বশঃ
উচিতাশ্চৈব সংবন্ধে তেঽস্মাকং ক্ষত্রিয়র্ষভাঃ

মন্যে বরয়িতব্যাস্তা ইত্যহং ধীমতাং বর
সংতানার্থং কুলস্যাস্য যদ্বা বিদুর মন্যসে

বিদুর উবাচ
ভবান্পিতা ভবান্মাতা ভবান্নঃ পরমো গুরুঃ
তস্মাত্স্বয়ং কুলস্যাস্য বিচার্য কুরু যদ্ধিতম্

বৈশংপায়ন উবাচ
অথ শুশ্রাব বিপ্রেভ্যো গান্ধারীং সুবলাত্মজাম্
আরাধ্য বরদং দেবং ভগনেত্রহরং হরম্
গান্ধারী কিল পুত্রাণাং শতং লেভে বরং শুভা

ইতি শ্রুত্বা চ তত্ত্বেন ভীষ্মঃ কুরুপিতামহঃ
ততো গান্ধাররাজস্য প্রেষয়ামাস ভারত

অচক্ষুরিতি তত্রাসীত্সুবলস্য বিচারণা
কুলং খ্যাতিং চ বৃত্তং চ বুদ্ধ্যা তু প্রসমীক্ষ্য সঃ
দদৌ তাং ধৃতরাষ্ট্রায় গান্ধারীং ধর্মচারিণীম্

গান্ধারী ত্বপি শুশ্রাব ধৃতরাষ্ট্রমচক্ষুষম্
আত্মানং দিত্সিতং চাস্মৈ পিত্রা মাত্রা চ ভারত

ততঃ সা পট্টমাদায় কৃত্বা বহুগুণং শুভা
ববন্ধ নেত্রে স্বে রাজন্পতিব্রতপরায়ণা
নাত্যশ্নীয়াং পতিমহমিত্যেবং কৃতনিশ্চয়া

ততো গান্ধাররাজস্য পুত্রঃ শকুনিরভ্যয়াৎ
স্বসারং পরয়া লক্ষ্ম্যা যুক্তামাদায় কৌরবান্

দত্ত্বা স ভগিনীং বীরো যথার্হং চ পরিচ্ছদম্
পুনরায়াত্স্বনগরং ভীষ্মেণ প্রতিপূজিতঃ

গান্ধার্যপি বরারোহা শীলাচারবিচেষ্টিতৈঃ
তুষ্টিং কুরূণাং সর্বেষাং জনয়ামাস ভারত

বৃত্তেনারাধ্য তান্সর্বান্পতিব্রতপরায়ণা
বাচাপি পুরুষানন্যান্সুব্রতা নান্বকীর্তয়ৎ