অধ্যায় 104

104.1

বৈশংপায়ন উবাচ
শূরো নাম যদুশ্রেষ্ঠো বসুদেবপিতাভবৎ
তস্য কন্যা পৃথা নাম রূপেণাসদৃশী ভুবি

পৈতৃষ্বসেয়ায় স তামনপত্যায় বীর্যবান্
অগ্র্যমগ্রে প্রতিজ্ঞায় স্বস্যাপত্যস্য বীর্যবান্

অগ্রজাতেতি তাং কন্যামগ্র্যানুগ্রহকাঙ্ক্ষিণে
প্রদদৌ কুন্তিভোজায় সখা সখ্যে মহাত্মনে

সা নিয়ুক্তা পিতুর্গেহে দেবতাতিথিপূজনে
উগ্রং পর্যচরদ্ঘোরং ব্রাহ্মণং সংশিতব্রতম্

নিগূঢনিশ্চয়ং ধর্মে যং তং দুর্বাসসং বিদুঃ
তমুগ্রং সংশিতাত্মানং সর্বয়ত্নৈরতোষয়ৎ

তস্যৈ স প্রদদৌ মন্ত্রমাপদ্ধর্মান্ববেক্ষয়া
অভিচারাভিসংয়ুক্তমব্রবীচ্চৈব তাং মুনিঃ

যং যং দেবং ত্বমেতেন মন্ত্রেণাবাহয়িষ্যসি
তস্য তস্য প্রসাদেন পুত্রস্তব ভবিষ্যতি

তথোক্তা সা তু বিপ্রেণ তেন কৌতূহলাত্তদা
কন্যা সতী দেবমর্কমাজুহাব যশস্বিনী

সা দদর্শ তমায়ান্তং ভাস্করং লোকভাবনম্
বিস্মিতা চানবদ্যাঙ্গী দৃষ্ট্বা তন্মহদদ্ভুতম্

প্রকাশকর্মা তপনস্তস্যাং গর্ভং দধৌ ততঃ
অজীজনত্ততো বীরং সর্বশস্ত্রভৃতাং বরম্
আমুক্তকবচঃ শ্রীমান্দেবগর্ভঃ শ্রিয়াবৃতঃ

সহজং কবচং বিভ্রত্কুণ্ডলোদ্দ্যোতিতাননঃ
অজায়ত সুতঃ কর্ণঃ সর্বলোকেষু বিশ্রুতঃ

প্রাদাচ্চ তস্যাঃ কন্যাত্বং পুনঃ স পরমদ্যুতিঃ
দত্ত্বা চ দদতাং শ্রেষ্ঠো দিবমাচক্রমে ততঃ

গূহমানাপচারং তং বন্ধুপক্ষভয়াত্তদা
উত্সসর্জ জলে কুন্তী তং কুমারং সলক্ষণম্

তমুত্সৃষ্টং তদা গর্ভং রাধাভর্তা মহায়শাঃ
পুত্রত্বে কল্পয়ামাস সভার্যঃ সূতনন্দনঃ

নামধেয়ং চ চক্রাতে তস্য বালস্য তাবুভৌ
বসুনা সহ জাতোঽয়ং বসুষেণো ভবত্বিতি

স বর্ধমানো বলবান্সর্বাস্ত্রেষূদ্যতোঽভবৎ
আ পৃষ্ঠতাপাদাদিত্যমুপতস্থে স বীর্যবান্

যস্মিন্কালে জপন্নাস্তে স বীরঃ সত্যসংগরঃ
নাদেয়ং ব্রাহ্মণেষ্বাসীত্তস্মিন্কালে মহাত্মনঃ

তমিন্দ্রো ব্রাহ্মণো ভূত্বা ভিক্ষার্থং ভূতভাবনঃ
কুণ্ডলে প্রার্থয়ামাস কবচং চ মহাদ্যুতিঃ

উত্কৃত্য বিমনাঃ স্বাঙ্গাত্কবচং রুধিরস্রবম্
কর্ণস্তু কুণ্ডলে ছিত্ত্বা প্রায়চ্ছত্স কৃতাঞ্জলিঃ

শক্তিং তস্মৈ দদৌ শক্রঃ বিস্মিতো বাক্যমব্রবীৎ
দেবাসুরমনুষ্যাণাং গন্ধর্বোরগরক্ষসাম্
যস্মৈ ক্ষেপ্স্যসি রুষ্টঃ সন্সোঽনয়া ন ভবিষ্যতি

পুরা নাম তু তস্যাসীদ্বসুষেণ ইতি শ্রুতম্
ততো বৈকর্তনঃ কর্ণঃ কর্মণা তেন সোঽভবৎ