Utshovঅধ্যায় 105
105.1
বৈশংপায়ন উবাচ
রূপসত্ত্বগুণোপেতা ধর্মারামা মহাব্রতা
দুহিতা কুন্তিভোজস্য কৃতে পিত্রা স্বয়ংবরে
105.2
সিংহদংষ্ট্রং গজস্কন্ধমৃষভাক্ষং মহাবলম্
ভূমিপালসহস্রাণাং মধ্যে পাণ্ডুমবিন্দত
105.3
স তয়া কুন্তিভোজস্য দুহিত্রা কুরুনন্দনঃ
যুয়ুজেঽমিতসৌভাগ্যঃ পৌলোম্যা মঘবানিব
105.4
যাত্বা দেবব্রতেনাপি মদ্রাণাং পুটভেদনম্
বিশ্রুতা ত্রিষু লোকেষু মাদ্রী মদ্রপতেঃ সুতা
105.5
সর্বরাজসু বিখ্যাতা রূপেণাসদৃশী ভুবি
পাণ্ডোরর্থে পরিক্রীতা ধনেন মহতা তদা
বিবাহং কারয়ামাস ভীষ্মঃ পাণ্ডোর্মহাত্মনঃ
105.6
সিংহোরস্কং গজস্কন্ধমৃষভাক্ষং মনস্বিনম্
পাণ্ডুং দৃষ্ট্বা নরব্যাঘ্রং ব্যস্ময়ন্ত নরা ভুবি
105.7
কৃতোদ্বাহস্ততঃ পাণ্ডুর্বলোত্সাহসমন্বিতঃ
জিগীষমাণো বসুধাং যয়ৌ শত্রূননেকশঃ
105.8
পূর্বমাগস্কৃতো গত্বা দশার্ণাঃ সমরে জিতাঃ
পাণ্ডুনা নরসিংহেন কৌরবাণাং যশোভৃতা
105.9
ততঃ সেনামুপাদায় পাণ্ডুর্নানাবিধধ্বজাম্
প্রভূতহস্ত্যশ্বরথাং পদাতিগণসংকুলাম্
105.10
আগস্কৃত্সর্ববীরাণাং বৈরী সর্বমহীভৃতাম্
গোপ্তা মগধরাষ্ট্রস্য দার্বো রাজগৃহে হতঃ
105.11
ততঃ কোশং সমাদায় বাহনানি বলানি চ
পাণ্ডুনা মিথিলাং গত্বা বিদেহাঃ সমরে জিতাঃ
105.12
তথা কাশিষু সুহ্মেষু পুণ্ড্রেষু ভরতর্ষভ
স্ববাহুবলবীর্যেণ কুরূণামকরোদ্যশঃ
105.13
তং শরৌঘমহাজ্বালমস্ত্রার্চিষমরিংদমম্
পাণ্ডুপাবকমাসাদ্য ব্যদহ্যন্ত নরাধিপাঃ
105.14
তে সসেনাঃ সসেনেন বিধ্বংসিতবলা নৃপাঃ
পাণ্ডুনা বশগাঃ কৃত্বা করকর্মসু যোজিতাঃ
105.15
তেন তে নির্জিতাঃ সর্বে পৃথিব্যাং সর্বপার্থিবাঃ
তমেকং মেনিরে শূরং দেবেষ্বিব পুরংদরম্
105.16
তং কৃতাঞ্জলয়ঃ সর্বে প্রণতা বসুধাধিপাঃ
উপাজগ্মুর্ধনং গৃহ্য রত্নানি বিবিধানি চ
105.17
মণিমুক্তাপ্রবালং চ সুবর্ণং রজতং তথা
গোরত্নান্যশ্বরত্নানি রথরত্নানি কুঞ্জরান্
105.18
খরোষ্ট্রমহিষাংশ্চৈব যচ্চ কিংচিদজাবিকম্
তত্সর্বং প্রতিজগ্রাহ রাজা নাগপুরাধিপঃ
105.19
তদাদায় যয়ৌ পাণ্ডুঃ পুনর্মুদিতবাহনঃ
হর্ষয়িষ্যন্স্বরাষ্ট্রাণি পুরং চ গজসাহ্বয়ম্
105.20
শংতনো রাজসিংহস্য ভরতস্য চ ধীমতঃ
প্রনষ্টঃ কীর্তিজঃ শব্দঃ পাণ্ডুনা পুনরুদ্ধৃতঃ
105.21
যে পুরা কুরুরাষ্ট্রাণি জহ্রুঃ কুরুধনানি চ
তে নাগপুরসিংহেন পাণ্ডুনা করদাঃ কৃতাঃ
105.22
ইত্যভাষন্ত রাজানো রাজামাত্যাশ্চ সংগতাঃ
প্রতীতমনসো হৃষ্টাঃ পৌরজানপদৈঃ সহ
105.23
প্রত্যুদ্যয়ুস্তং সংপ্রাপ্তং সর্বে ভীষ্মপুরোগমাঃ
তে নদূরমিবাধ্বানং গত্বা নাগপুরালয়াঃ
আবৃতং দদৃশুর্লোকং হৃষ্টা বহুবিধৈর্জনৈঃ
105.24
নানায়ানসমানীতৈ রত্নৈরুচ্চাবচৈস্তথা
হস্ত্যশ্বরথরত্নৈশ্চ গোভিরুষ্ট্রৈরথাবিকৈঃ
নান্তং দদৃশুরাসাদ্য ভীষ্মেণ সহ কৌরবাঃ
105.25
সোঽভিবাদ্য পিতুঃ পাদৌ কৌসল্যানন্দবর্ধনঃ
যথার্হং মানয়ামাস পৌরজানপদানপি
105.26
প্রমৃদ্য পররাষ্ট্রাণি কৃতার্থং পুনরাগতম্
পুত্রমাসাদ্য ভীষ্মস্তু হর্ষাদশ্রূণ্যবর্তয়ৎ
105.27
স তূর্যশতসংঘানাং ভেরীণাং চ মহাস্বনৈঃ
হর্ষয়ন্সর্বশঃ পৌরান্বিবেশ গজসাহ্বয়ম্