অধ্যায় 106

106.1

বৈশংপায়ন উবাচ
ধৃতরাষ্ট্রাভ্যনুজ্ঞাতঃ স্ববাহুবিজিতং ধনম্
ভীষ্মায় সত্যবত্যৈ চ মাত্রে চোপজহার সঃ

বিদুরায় চ বৈ পাণ্ডুঃ প্রেষয়ামাস তদ্ধনম্
সুহৃদশ্চাপি ধর্মাত্মা ধনেন সমতর্পয়ৎ

ততঃ সত্যবতীং ভীষ্মঃ কৌসল্যাং চ যশস্বিনীম্
শুভৈঃ পাণ্ডুজিতৈ রত্নৈস্তোষয়ামাস ভারত

ননন্দ মাতা কৌসল্যা তমপ্রতিমতেজসম্
জয়ন্তমিব পৌলোমী পরিষ্বজ্য নরর্ষভম্

তস্য বীরস্য বিক্রান্তৈঃ সহস্রশতদক্ষিণৈঃ
অশ্বমেধশতৈরীজে ধৃতরাষ্ট্রো মহামখৈঃ

সংপ্রয়ুক্তশ্চ কুন্ত্যা চ মাদ্র্যা চ ভরতর্ষভ
জিততন্দ্রীস্তদা পাণ্ডুর্বভূব বনগোচরঃ

হিত্বা প্রাসাদনিলয়ং শুভানি শয়নানি চ
অরণ্যনিত্যঃ সততং বভূব মৃগয়াপরঃ

স চরন্দক্ষিণং পার্শ্বং রম্যং হিমবতো গিরেঃ
উবাস গিরিপৃষ্ঠেষু মহাশালবনেষু চ

ররাজ কুন্ত্যা মাদ্র্যা চ পাণ্ডুঃ সহ বনে বসন্
করেণ্বোরিব মধ্যস্থঃ শ্রীমান্পৌরংদরো গজঃ

ভারতং সহ ভার্যাভ্যাং বাণখড্গধনুর্ধরম্
বিচিত্রকবচং বীরং পরমাস্ত্রবিদং নৃপম্
দেবোঽয়মিত্যমন্যন্ত চরন্তং বনবাসিনঃ

তস্য কামাংশ্চ ভোগাংশ্চ নরা নিত্যমতন্দ্রিতাঃ
উপজহ্রুর্বনান্তেষু ধৃতরাষ্ট্রেণ চোদিতাঃ

অথ পারশবীং কন্যাং দেবকস্য মহীপতেঃ
রূপয়ৌবনসংপন্নাং স শুশ্রাবাপগাসুতঃ

ততস্তু বরয়িত্বা তামানায্য পুরুষর্ষভঃ
বিবাহং কারয়ামাস বিদুরস্য মহামতেঃ

তস্যাং চোত্পাদয়ামাস বিদুরঃ কুরুনন্দনঃ
পুত্রান্বিনয়সংপন্নানাত্মনঃ সদৃশান্গুণৈঃ