UtshovChapter 106
106.1
वैशंपायन उवाच
धृतराष्ट्राभ्यनुज्ञातः स्वबाहुविजितं धनम्
भीष्माय सत्यवत्यै च मात्रे चोपजहार सः
Vaishampayana uvacha
Dhritarashtrabhyanugyatah svabahuvijitam dhanam
Bhishmaya satyavatyai cha matre chopajahara sah
106.2
विदुराय च वै पाण्डुः प्रेषयामास तद्धनम्
सुहृदश्चापि धर्मात्मा धनेन समतर्पयत्
Viduraya cha vai panduh preshayamasa taddhanam
Suhridashchapi dharmatma dhanena samatarpayat
106.3
ततः सत्यवतीं भीष्मः कौसल्यां च यशस्विनीम्
शुभैः पाण्डुजितै रत्नैस्तोषयामास भारत
Tatah satyavatim bhishmah kausalyam cha yashasvinim
Shubhaih pandujitai ratnaistoshayamasa bharata
106.4
ननन्द माता कौसल्या तमप्रतिमतेजसम्
जयन्तमिव पौलोमी परिष्वज्य नरर्षभम्
Nananda mata kausalya tamapratimatejasam
Jayantamiva paulomi parishvajya nararshabham
106.5
तस्य वीरस्य विक्रान्तैः सहस्रशतदक्षिणैः
अश्वमेधशतैरीजे धृतराष्ट्रो महामखैः
Tasya virasya vikrantaih sahasrashatadakshinaih
Ashvamedhashatairije dhritarashtro mahamakhaih
106.6
संप्रयुक्तश्च कुन्त्या च माद्र्या च भरतर्षभ
जिततन्द्रीस्तदा पाण्डुर्बभूव वनगोचरः
Samprayuktashcha kuntya cha madrya cha bharatarshabha
Jitatandristada pandurbabhuva vanagocharah
106.7
हित्वा प्रासादनिलयं शुभानि शयनानि च
अरण्यनित्यः सततं बभूव मृगयापरः
Hitva prasadanilayam shubhani shayanani cha
Aranyanityah satatam babhuva mrigayaparah
106.8
स चरन्दक्षिणं पार्श्वं रम्यं हिमवतो गिरेः
उवास गिरिपृष्ठेषु महाशालवनेषु च
Sa charandakshinam parshvam ramyam himavato gireh
Uvasa giriprishtheshu mahashalavaneshu cha
106.9
रराज कुन्त्या माद्र्या च पाण्डुः सह वने वसन्
करेण्वोरिव मध्यस्थः श्रीमान्पौरंदरो गजः
Raraja kuntya madrya cha panduh saha vane vasan
Karenvoriva madhyasthah shrimanpaurandaro gajah
106.10
भारतं सह भार्याभ्यां बाणखड्गधनुर्धरम्
विचित्रकवचं वीरं परमास्त्रविदं नृपम्
देवोऽयमित्यमन्यन्त चरन्तं वनवासिनः
Bharatam saha bharyabhyam banakhadgadhanurdharam
Vichitrakavacham viram paramastravidam nripam
Devoyamityamanyanta charantam vanavasinah
106.11
तस्य कामांश्च भोगांश्च नरा नित्यमतन्द्रिताः
उपजह्रुर्वनान्तेषु धृतराष्ट्रेण चोदिताः
Tasya kamanshcha bhoganshcha nara nityamatandritah
Upajahrurvananteshu dhritarashtrena choditah
106.12
अथ पारशवीं कन्यां देवकस्य महीपतेः
रूपयौवनसंपन्नां स शुश्रावापगासुतः
Atha parashavim kanyam devakasya mahipateh
Rupayauvanasampannam sa shushravapagasutah
106.13
ततस्तु वरयित्वा तामानाय्य पुरुषर्षभः
विवाहं कारयामास विदुरस्य महामतेः
Tatastu varayitva tamanayya purusharshabhah
Vivaham karayamasa vidurasya mahamateh
106.14
तस्यां चोत्पादयामास विदुरः कुरुनन्दनः
पुत्रान्विनयसंपन्नानात्मनः सदृशान्गुणैः
Tasyam chotpadayamasa vidurah kurunandanah
Putranvinayasampannanatmanah sadrishangunaih