UtshovChapter 107
107.1
वैशंपायन उवाच
ततः पुत्रशतं जज्ञे गान्धार्यां जनमेजय
धृतराष्ट्रस्य वैश्यायामेकश्चापि शतात्परः
Vaishampayana uvacha
Tatah putrashatam jagye gandharyam janamejaya
Dhritarashtrasya vaishyayamekashchapi shatatparah
107.2
पाण्डोः कुन्त्यां च माद्र्यां च पञ्च पुत्रा महारथाः
देवेभ्यः समपद्यन्त संतानाय कुलस्य वै
Pandoh kuntyam cha madryam cha pancha putra maharathah
Devebhyah samapadyanta santanaya kulasya vai
107.3
जनमेजय उवाच
कथं पुत्रशतं जज्ञे गान्धार्यां द्विजसत्तम
कियता चैव कालेन तेषामायुश्च किं परम्
Janamejaya uvacha
Katham putrashatam jagye gandharyam dvijasattama
Kiyata chaiva kalena teshamayushcha kim param
107.4
कथं चैकः स वैश्यायां धृतराष्ट्रसुतोऽभवत्
कथं च सदृशीं भार्यां गान्धारीं धर्मचारिणीम्
आनुकूल्ये वर्तमानां धृतराष्ट्रोऽत्यवर्तत
Katham chaikah sa vaishyayam dhritarashtrasutobhavat
Katham cha sadrishim bharyam gandharim dharmacharinim
Anukulye vartamanam dhritarashtrotyavartata
107.5
कथं च शप्तस्य सतः पाण्डोस्तेन महात्मना
समुत्पन्ना दैवतेभ्यः पञ्च पुत्रा महारथाः
Katham cha shaptasya satah pandostena mahatmana
Samutpanna daivatebhyah pancha putra maharathah
107.6
एतद्विद्वन्यथावृत्तं विस्तरेण तपोधन
कथयस्व न मे तृप्तिः कथ्यमानेषु बन्धुषु
Etadvidvanyathavrittam vistarena tapodhana
Kathayasva na me triptih kathyamaneshu bandhushu
107.7
वैशंपायन उवाच
क्षुच्छ्रमाभिपरिग्लानं द्वैपायनमुपस्थितम्
तोषयामास गान्धारी व्यासस्तस्यै वरं ददौ
Vaishampayana uvacha
Kshuchchhramabhipariglanam dvaipayanamupasthitam
Toshayamasa gandhari vyasastasyai varam dadau
107.8
सा वव्रे सदृशं भर्तुः पुत्राणां शतमात्मनः
ततः कालेन सा गर्भं धृतराष्ट्रादथाग्रहीत्
Sa vavre sadrisham bhartuh putranam shatamatmanah
Tatah kalena sa garbham dhritarashtradathagrahit
107.9
संवत्सरद्वयं तं तु गान्धारी गर्भमाहितम्
अप्रजा धारयामास ततस्तां दुःखमाविशत्
Sanvatsaradvayam tam tu gandhari garbhamahitam
Apraja dharayamasa tatastam duhkhamavishat
107.10
श्रुत्वा कुन्तीसुतं जातं बालार्कसमतेजसम्
उदरस्यात्मनः स्थैर्यमुपलभ्यान्वचिन्तयत्
Shrutva kuntisutam jatam balarkasamatejasam
Udarasyatmanah sthairyamupalabhyanvachintayat
107.11
अज्ञातं धृतराष्ट्रस्य यत्नेन महता ततः
सोदरं पातयामास गान्धारी दुःखमूर्च्छिता
Agyatam dhritarashtrasya yatnena mahata tatah
Sodaram patayamasa gandhari duhkhamurchchhita
107.12
ततो जज्ञे मांसपेशी लोहाष्ठीलेव संहता
द्विवर्षसंभृतां कुक्षौ तामुत्स्रष्टुं प्रचक्रमे
Tato jagye mansapeshi lohashthileva sanhata
Dvivarshasambhritam kukshau tamutsrashtum prachakrame
107.13
अथ द्वैपायनो ज्ञात्वा त्वरितः समुपागमत्
तां स मांसमयीं पेशीं ददर्श जपतां वरः
Atha dvaipayano gyatva tvaritah samupagamat
Tam sa mansamayim peshim dadarsha japatam varah
107.14
ततोऽब्रवीत्सौबलेयीं किमिदं ते चिकीर्षितम्
सा चात्मनो मतं सत्यं शशंस परमर्षये
Tatobravitsaubaleyim kimidam te chikirshitam
Sa chatmano matam satyam shashansa paramarshaye
107.15
ज्येष्ठं कुन्तीसुतं जातं श्रुत्वा रविसमप्रभम्
दुःखेन परमेणेदमुदरं पातितं मया
Jyeshtham kuntisutam jatam shrutva ravisamaprabham
Duhkhena paramenedamudaram patitam maya
107.16
शतं च किल पुत्राणां वितीर्णं मे त्वया पुरा
इयं च मे मांसपेशी जाता पुत्रशताय वै
Shatam cha kila putranam vitirnam me tvaya pura
Iyam cha me mansapeshi jata putrashataya vai
107.17
व्यास उवाच
एवमेतत्सौबलेयि नैतज्जात्वन्यथा भवेत्
वितथं नोक्तपूर्वं मे स्वैरेष्वपि कुतोऽन्यथा
Vyasa uvacha
Evametatsaubaleyi naitajjatvanyatha bhavet
Vitatham noktapurvam me svaireshvapi kutonyatha
107.18
घृतपूर्णं कुण्डशतं क्षिप्रमेव विधीयताम्
शीताभिरद्भिरष्ठीलामिमां च परिषिञ्चत
Ghritapurnam kundashatam kshiprameva vidhiyatam
Shitabhiradbhirashthilamimam cha parishinchata
107.19
वैशंपायन उवाच
सा सिच्यमाना अष्ठीला अभवच्छतधा तदा
अङ्गुष्ठपर्वमात्राणां गर्भाणां पृथगेव तु
Vaishampayana uvacha
Sa sichyamana ashthila abhavachchhatadha tada
Angushthaparvamatranam garbhanam prithageva tu
107.20
एकाधिकशतं पूर्णं यथायोगं विशां पते
मांसपेश्यास्तदा राजन्क्रमशः कालपर्ययात्
Ekadhikashatam purnam yathayogam visham pate
Mansapeshyastada rajankramashah kalaparyayat
107.21
ततस्तांस्तेषु कुण्डेषु गर्भानवदधे तदा
स्वनुगुप्तेषु देशेषु रक्षां च व्यदधात्ततः
Tatastansteshu kundeshu garbhanavadadhe tada
Svanugupteshu desheshu raksham cha vyadadhattatah
107.22
शशास चैव भगवान्कालेनैतावता पुनः
विघट्टनीयान्येतानि कुण्डानीति स्म सौबलीम्
Shashasa chaiva bhagavankalenaitavata punah
Vighattaniyanyetani kundaniti sma saubalim
107.23
इत्युक्त्वा भगवान्व्यासस्तथा प्रतिविधाय च
जगाम तपसे धीमान्हिमवन्तं शिलोच्चयम्
Ityuktva bhagavanvyasastatha pratividhaya cha
Jagama tapase dhimanhimavantam shilochchayam
107.24
जज्ञे क्रमेण चैतेन तेषां दुर्योधनो नृपः
जन्मतस्तु प्रमाणेन ज्येष्ठो राजा युधिष्ठिरः
Jagye kramena chaitena tesham duryodhano nripah
Janmatastu pramanena jyeshtho raja yudhishthirah
107.25
जातमात्रे सुते तस्मिन्धृतराष्ट्रोऽब्रवीदिदम्
समानीय बहून्विप्रान्भीष्मं विदुरमेव च
Jatamatre sute tasmindhritarashtrobravididam
Samaniya bahunvipranbhishmam vidurameva cha
107.26
युधिष्ठिरो राजपुत्रो ज्येष्ठो नः कुलवर्धनः
प्राप्तः स्वगुणतो राज्यं न तस्मिन्वाच्यमस्ति नः
Yudhishthiro rajaputro jyeshtho nah kulavardhanah
Praptah svagunato rajyam na tasminvachyamasti nah
107.27
अयं त्वनन्तरस्तस्मादपि राजा भविष्यति
एतद्धि ब्रूत मे सत्यं यदत्र भविता ध्रुवम्
Ayam tvanantarastasmadapi raja bhavishyati
Etaddhi bruta me satyam yadatra bhavita dhruvam
107.28
वाक्यस्यैतस्य निधने दिक्षु सर्वासु भारत
क्रव्यादाः प्राणदन्घोराः शिवाश्चाशिवशंसिनः
Vakyasyaitasya nidhane dikshu sarvasu bharata
Kravyadah pranadanghorah shivashchashivashansinah
107.29
लक्षयित्वा निमित्तानि तानि घोराणि सर्वशः
तेऽब्रुवन्ब्राह्मणा राजन्विदुरश्च महामतिः
Lakshayitva nimittani tani ghorani sarvashah
Tebruvanbrahmana rajanvidurashcha mahamatih
107.30
व्यक्तं कुलान्तकरणो भवितैष सुतस्तव
तस्य शान्तिः परित्यागे पुष्ट्या त्वपनयो महान्
Vyaktam kulantakarano bhavitaisha sutastava
Tasya shantih parityage pushtya tvapanayo mahan
107.31
शतमेकोनमप्यस्तु पुत्राणां ते महीपते
एकेन कुरु वै क्षेमं लोकस्य च कुलस्य च
Shatamekonamapyastu putranam te mahipate
Ekena kuru vai kshemam lokasya cha kulasya cha
107.32
त्यजेदेकं कुलस्यार्थे ग्रामस्यार्थे कुलं त्यजेत्
ग्रामं जनपदस्यार्थे आत्मार्थे पृथिवीं त्यजेत्
Tyajedekam kulasyarthe gramasyarthe kulam tyajet
Gramam janapadasyarthe atmarthe prithivim tyajet
107.33
स तथा विदुरेणोक्तस्तैश्च सर्वैर्द्विजोत्तमैः
न चकार तथा राजा पुत्रस्नेहसमन्वितः
Sa tatha vidurenoktastaishcha sarvairdvijottamaih
Na chakara tatha raja putrasnehasamanvitah
107.34
ततः पुत्रशतं सर्वं धृतराष्ट्रस्य पार्थिव
मासमात्रेण संजज्ञे कन्या चैका शताधिका
Tatah putrashatam sarvam dhritarashtrasya parthiva
Masamatrena sanjagye kanya chaika shatadhika
107.35
गान्धार्यां क्लिश्यमानायामुदरेण विवर्धता
धृतराष्ट्रं महाबाहुं वैश्या पर्यचरत्किल
Gandharyam klishyamanayamudarena vivardhata
Dhritarashtram mahabahum vaishya paryacharatkila
107.36
तस्मिन्संवत्सरे राजन्धृतराष्ट्रान्महायशाः
जज्ञे धीमांस्ततस्तस्यां युयुत्सुः करणो नृप
Tasminsanvatsare rajandhritarashtranmahayashah
Jagye dhimanstatastasyam yuyutsuh karano nripa
107.37
एवं पुत्रशतं जज्ञे धृतराष्ट्रस्य धीमतः
महारथानां वीराणां कन्या चैकाथ दुःशला
Evam putrashatam jagye dhritarashtrasya dhimatah
Maharathanam viranam kanya chaikatha duhshala