Utshovঅধ্যায় 107
107.1
বৈশংপায়ন উবাচ
ততঃ পুত্রশতং জজ্ঞে গান্ধার্যাং জনমেজয়
ধৃতরাষ্ট্রস্য বৈশ্যায়ামেকশ্চাপি শতাত্পরঃ
107.2
পাণ্ডোঃ কুন্ত্যাং চ মাদ্র্যাং চ পঞ্চ পুত্রা মহারথাঃ
দেবেভ্যঃ সমপদ্যন্ত সংতানায় কুলস্য বৈ
107.3
জনমেজয় উবাচ
কথং পুত্রশতং জজ্ঞে গান্ধার্যাং দ্বিজসত্তম
কিয়তা চৈব কালেন তেষামায়ুশ্চ কিং পরম্
107.4
কথং চৈকঃ স বৈশ্যায়াং ধৃতরাষ্ট্রসুতোঽভবৎ
কথং চ সদৃশীং ভার্যাং গান্ধারীং ধর্মচারিণীম্
আনুকূল্যে বর্তমানাং ধৃতরাষ্ট্রোঽত্যবর্তত
107.5
কথং চ শপ্তস্য সতঃ পাণ্ডোস্তেন মহাত্মনা
সমুত্পন্না দৈবতেভ্যঃ পঞ্চ পুত্রা মহারথাঃ
107.6
এতদ্বিদ্বন্যথাবৃত্তং বিস্তরেণ তপোধন
কথয়স্ব ন মে তৃপ্তিঃ কথ্যমানেষু বন্ধুষু
107.7
বৈশংপায়ন উবাচ
ক্ষুচ্ছ্রমাভিপরিগ্লানং দ্বৈপায়নমুপস্থিতম্
তোষয়ামাস গান্ধারী ব্যাসস্তস্যৈ বরং দদৌ
107.8
সা বব্রে সদৃশং ভর্তুঃ পুত্রাণাং শতমাত্মনঃ
ততঃ কালেন সা গর্ভং ধৃতরাষ্ট্রাদথাগ্রহীৎ
107.9
সংবত্সরদ্বয়ং তং তু গান্ধারী গর্ভমাহিতম্
অপ্রজা ধারয়ামাস ততস্তাং দুঃখমাবিশৎ
107.10
শ্রুত্বা কুন্তীসুতং জাতং বালার্কসমতেজসম্
উদরস্যাত্মনঃ স্থৈর্যমুপলভ্যান্বচিন্তয়ৎ
107.11
অজ্ঞাতং ধৃতরাষ্ট্রস্য যত্নেন মহতা ততঃ
সোদরং পাতয়ামাস গান্ধারী দুঃখমূর্চ্ছিতা
107.12
ততো জজ্ঞে মাংসপেশী লোহাষ্ঠীলেব সংহতা
দ্বিবর্ষসংভৃতাং কুক্ষৌ তামুত্স্রষ্টুং প্রচক্রমে
107.13
অথ দ্বৈপায়নো জ্ঞাত্বা ত্বরিতঃ সমুপাগমৎ
তাং স মাংসময়ীং পেশীং দদর্শ জপতাং বরঃ
107.14
ততোঽব্রবীত্সৌবলেয়ীং কিমিদং তে চিকীর্ষিতম্
সা চাত্মনো মতং সত্যং শশংস পরমর্ষয়ে
107.15
জ্যেষ্ঠং কুন্তীসুতং জাতং শ্রুত্বা রবিসমপ্রভম্
দুঃখেন পরমেণেদমুদরং পাতিতং ময়া
107.16
শতং চ কিল পুত্রাণাং বিতীর্ণং মে ত্বয়া পুরা
ইয়ং চ মে মাংসপেশী জাতা পুত্রশতায় বৈ
107.17
ব্যাস উবাচ
এবমেতত্সৌবলেয়ি নৈতজ্জাত্বন্যথা ভবেৎ
বিতথং নোক্তপূর্বং মে স্বৈরেষ্বপি কুতোঽন্যথা
107.18
ঘৃতপূর্ণং কুণ্ডশতং ক্ষিপ্রমেব বিধীয়তাম্
শীতাভিরদ্ভিরষ্ঠীলামিমাং চ পরিষিঞ্চত
107.19
বৈশংপায়ন উবাচ
সা সিচ্যমানা অষ্ঠীলা অভবচ্ছতধা তদা
অঙ্গুষ্ঠপর্বমাত্রাণাং গর্ভাণাং পৃথগেব তু
107.20
একাধিকশতং পূর্ণং যথায়োগং বিশাং পতে
মাংসপেশ্যাস্তদা রাজন্ক্রমশঃ কালপর্যয়াৎ
107.21
ততস্তাংস্তেষু কুণ্ডেষু গর্ভানবদধে তদা
স্বনুগুপ্তেষু দেশেষু রক্ষাং চ ব্যদধাত্ততঃ
107.22
শশাস চৈব ভগবান্কালেনৈতাবতা পুনঃ
বিঘট্টনীয়ান্যেতানি কুণ্ডানীতি স্ম সৌবলীম্
107.23
ইত্যুক্ত্বা ভগবান্ব্যাসস্তথা প্রতিবিধায় চ
জগাম তপসে ধীমান্হিমবন্তং শিলোচ্চয়ম্
107.24
জজ্ঞে ক্রমেণ চৈতেন তেষাং দুর্যোধনো নৃপঃ
জন্মতস্তু প্রমাণেন জ্যেষ্ঠো রাজা যুধিষ্ঠিরঃ
107.25
জাতমাত্রে সুতে তস্মিন্ধৃতরাষ্ট্রোঽব্রবীদিদম্
সমানীয় বহূন্বিপ্রান্ভীষ্মং বিদুরমেব চ
107.26
যুধিষ্ঠিরো রাজপুত্রো জ্যেষ্ঠো নঃ কুলবর্ধনঃ
প্রাপ্তঃ স্বগুণতো রাজ্যং ন তস্মিন্বাচ্যমস্তি নঃ
107.27
অয়ং ত্বনন্তরস্তস্মাদপি রাজা ভবিষ্যতি
এতদ্ধি ব্রূত মে সত্যং যদত্র ভবিতা ধ্রুবম্
107.28
বাক্যস্যৈতস্য নিধনে দিক্ষু সর্বাসু ভারত
ক্রব্যাদাঃ প্রাণদন্ঘোরাঃ শিবাশ্চাশিবশংসিনঃ
107.29
লক্ষয়িত্বা নিমিত্তানি তানি ঘোরাণি সর্বশঃ
তেঽব্রুবন্ব্রাহ্মণা রাজন্বিদুরশ্চ মহামতিঃ
107.30
ব্যক্তং কুলান্তকরণো ভবিতৈষ সুতস্তব
তস্য শান্তিঃ পরিত্যাগে পুষ্ট্যা ত্বপনয়ো মহান্
107.31
শতমেকোনমপ্যস্তু পুত্রাণাং তে মহীপতে
একেন কুরু বৈ ক্ষেমং লোকস্য চ কুলস্য চ
107.32
ত্যজেদেকং কুলস্যার্থে গ্রামস্যার্থে কুলং ত্যজেৎ
গ্রামং জনপদস্যার্থে আত্মার্থে পৃথিবীং ত্যজেৎ
107.33
স তথা বিদুরেণোক্তস্তৈশ্চ সর্বৈর্দ্বিজোত্তমৈঃ
ন চকার তথা রাজা পুত্রস্নেহসমন্বিতঃ
107.34
ততঃ পুত্রশতং সর্বং ধৃতরাষ্ট্রস্য পার্থিব
মাসমাত্রেণ সংজজ্ঞে কন্যা চৈকা শতাধিকা
107.35
গান্ধার্যাং ক্লিশ্যমানায়ামুদরেণ বিবর্ধতা
ধৃতরাষ্ট্রং মহাবাহুং বৈশ্যা পর্যচরত্কিল
107.36
তস্মিন্সংবত্সরে রাজন্ধৃতরাষ্ট্রান্মহায়শাঃ
জজ্ঞে ধীমাংস্ততস্তস্যাং যুয়ুত্সুঃ করণো নৃপ
107.37
এবং পুত্রশতং জজ্ঞে ধৃতরাষ্ট্রস্য ধীমতঃ
মহারথানাং বীরাণাং কন্যা চৈকাথ দুঃশলা