অধ্যায় 108

108.1

জনমেজয় উবাচ
জ্যেষ্ঠানুজ্যেষ্ঠতাং তেষাং নামধেয়ানি চাভিভো
ধৃতরাষ্ট্রস্য পুত্রাণামানুপূর্ব্যেণ কীর্তয়

বৈশংপায়ন উবাচ
দুর্যোধনো যুয়ুত্সুশ্চ রাজন্দুঃশাসনস্তথা
দুঃসহো দুঃশলশ্চৈব জলসংধঃ সমঃ সহঃ

বিন্দানুবিন্দৌ দুর্ধর্ষঃ সুবাহুর্দুষ্প্রধর্ষণঃ
দুর্মর্ষণো দুর্মুখশ্চ দুষ্কর্ণঃ কর্ণ এব চ

বিবিংশতির্বিকর্ণশ্চ জলসংধঃ সুলোচনঃ
চিত্রোপচিত্রৌ চিত্রাক্ষশ্চারুচিত্রঃ শরাসনঃ

দুর্মদো দুষ্প্রগাহশ্চ বিবিত্সুর্বিকটঃ সমঃ
ঊর্ণনাভঃ সুনাভশ্চ তথা নন্দোপনন্দকৌ

সেনাপতিঃ সুষেণশ্চ কুণ্ডোদরমহোদরৌ
চিত্রবাণশ্চিত্রবর্মা সুবর্মা দুর্বিমোচনঃ

অয়োবাহুর্মহাবাহুশ্চিত্রাঙ্গশ্চিত্রকুণ্ডলঃ
ভীমবেগো ভীমবলো বলাকী বলবর্ধনঃ

উগ্রায়ুধো ভীমকর্মা কনকায়ুর্দৃঢায়ুধঃ
দৃঢবর্মা দৃঢক্ষত্রঃ সোমকীর্তিরনূদরঃ

দৃঢসংধো জরাসংধঃ সত্যসংধঃ সদঃসুবাক্
উগ্রশ্রবা অশ্বসেনঃ সেনানীর্দুষ্পরাজয়ঃ

অপরাজিতঃ পণ্ডিতকো বিশালাক্ষো দুরাবরঃ
দৃঢহস্তঃ সুহস্তশ্চ বাতবেগসুবর্চসৌ

আদিত্যকেতুর্বহ্বাশী নাগদন্তোগ্রয়ায়িনৌ
কবচী নিষঙ্গী পাশী চ দণ্ডধারো ধনুর্গ্রহঃ

উগ্রো ভীমরথো বীরো বীরবাহুরলোলুপঃ
অভয়ো রৌদ্রকর্মা চ তথা দৃঢরথস্ত্রয়ঃ

অনাধৃষ্যঃ কুণ্ডভেদী বিরাবী দীর্ঘলোচনঃ
দীর্ঘবাহুর্মহাবাহুর্ব্যূঢোরুঃ কনকধ্বজঃ

কুণ্ডাশী বিরজাশ্চৈব দুঃশলা চ শতাধিকা
এতদেকশতং রাজন্কন্যা চৈকা প্রকীর্তিতা

নামধেয়ানুপূর্ব্যেণ বিদ্ধি জন্মক্রমং নৃপ
সর্বে ত্বতিরথাঃ শূরাঃ সর্বে যুদ্ধবিশারদাঃ

সর্বে বেদবিদশ্চৈব রাজশাস্ত্রেষু কোবিদাঃ
সর্বে সংসর্গবিদ্যাসু বিদ্যাভিজনশোভিনঃ

সর্বেষামনুরূপাশ্চ কৃতা দারা মহীপতে
ধৃতরাষ্ট্রেণ সময়ে সমীক্ষ্য বিধিবত্তদা

দুঃশলাং সময়ে রাজা সিন্ধুরাজায় ভারত
জয়দ্রথায় প্রদদৌ সৌবলানুমতে তদা