Utshovঅধ্যায় 109
109.1
জনমেজয় উবাচ
কথিতো ধার্তরাষ্ট্রাণামার্ষঃ সংভব উত্তমঃ
অমানুষো মানুষাণাং ভবতা ব্রহ্মবিত্তম
109.2
নামধেয়ানি চাপ্যেষাং কথ্যমানানি ভাগশঃ
ত্বত্তঃ শ্রুতানি মে ব্রহ্মন্পাণ্ডবানাং তু কীর্তয়
109.3
তে হি সর্বে মহাত্মানো দেবরাজপরাক্রমাঃ
ত্বয়ৈবাংশাবতরণে দেবভাগাঃ প্রকীর্তিতাঃ
109.4
তস্মাদিচ্ছাম্যহং শ্রোতুমতিমানুষকর্মণাম্
তেষামাজননং সর্বং বৈশংপায়ন কীর্তয়
109.5
বৈশংপায়ন উবাচ
রাজা পাণ্ডুর্মহারণ্যে মৃগব্যালনিষেবিতে
বনে মৈথুনকালস্থং দদর্শ মৃগয়ূথপম্
109.6
ততস্তাং চ মৃগীং তং চ রুক্মপুঙ্খৈঃ সুপত্রিভিঃ
নির্বিভেদ শরৈস্তীক্ষ্ণৈঃ পাণ্ডুঃ পঞ্চভিরাশুগৈঃ
109.7
স চ রাজন্মহাতেজা ঋষিপুত্রস্তপোধনঃ
ভার্যয়া সহ তেজস্বী মৃগরূপেণ সংগতঃ
109.8
সংসক্তস্তু তয়া মৃগ্যা মানুষীমীরয়ন্গিরম্
ক্ষণেন পতিতো ভূমৌ বিললাপাকুলেন্দ্রিয়ঃ
109.9
মৃগ উবাচ
কামমন্যুপরীতাপি বুদ্ধ্যঙ্গরহিতাপি চ
বর্জয়ন্তি নৃশংসানি পাপেষ্বভিরতা নরাঃ
109.10
ন বিধিং গ্রসতে প্রজ্ঞা প্রজ্ঞাং তু গ্রসতে বিধিঃ
বিধিপর্যাগতানর্থান্প্রজ্ঞা ন প্রতিপদ্যতে
109.11
শশ্বদ্ধর্মাত্মনাং মুখ্যে কুলে জাতস্য ভারত
কামলোভাভিভূতস্য কথং তে চলিতা মতিঃ
109.12
পাণ্ডুরুবাচ
শত্রূণাং যা বধে বৃত্তিঃ সা মৃগাণাং বধে স্মৃতা
রাজ্ঞাং মৃগ ন মাং মোহাত্ত্বং গর্হয়িতুমর্হসি
109.13
অচ্ছদ্মনামায়য়া চ মৃগাণাং বধ ইষ্যতে
স এব ধর্মো রাজ্ঞাং তু তদ্বিদ্বান্কিং নু গর্হসে
109.14
অগস্ত্যঃ সত্রমাসীনশ্চচার মৃগয়ামৃষিঃ
আরণ্যান্সর্বদৈবত্যান্মৃগান্প্রোক্ষ্য মহাবনে
109.15
প্রমাণদৃষ্টধর্মেণ কথমস্মান্বিগর্হসে
অগস্ত্যস্যাভিচারেণ যুষ্মাকং বৈ বপা হুতা
109.16
মৃগ উবাচ
ন রিপূন্বৈ সমুদ্দিশ্য বিমুঞ্চন্তি পুরা শরান্
রন্ধ্র এষাং বিশেষেণ বধকালঃ প্রশস্যতে
109.17
পাণ্ডুরুবাচ
প্রমত্তমপ্রমত্তং বা বিবৃতং ঘ্নন্তি চৌজসা
উপায়ৈরিষুভিস্তীক্ষ্ণৈঃ কস্মান্মৃগ বিগর্হসে
109.18
মৃগ উবাচ
নাহং ঘ্নন্তং মৃগান্রাজন্বিগর্হে আত্মকারণাৎ
মৈথুনং তু প্রতীক্ষ্যং মে স্যাত্ত্বয়েহানৃশংসতঃ
109.19
সর্বভূতহিতে কালে সর্বভূতেপ্সিতে তথা
কো হি বিদ্বান্মৃগং হন্যাচ্চরন্তং মৈথুনং বনে
পুরুষার্থফলং কান্তং যত্ত্বয়া বিতথং কৃতম্
109.20
পৌরবাণামৃষীণাং চ তেষামক্লিষ্টকর্মণাম্
বংশে জাতস্য কৌরব্য নানুরূপমিদং তব
109.21
নৃশংসং কর্ম সুমহত্সর্বলোকবিগর্হিতম্
অস্বর্গ্যময়শস্যং চ অধর্মিষ্ঠং চ ভারত
109.22
স্ত্রীভোগানাং বিশেষজ্ঞঃ শাস্ত্রধর্মার্থতত্ত্ববিৎ
নার্হস্ত্বং সুরসংকাশ কর্তুমস্বর্গ্যমীদৃশম্
109.23
ত্বয়া নৃশংসকর্তারঃ পাপাচারাশ্চ মানবাঃ
নিগ্রাহ্যাঃ পার্থিবশ্রেষ্ঠ ত্রিবর্গপরিবর্জিতাঃ
109.24
কিং কৃতং তে নরশ্রেষ্ঠ নিঘ্নতো মামনাগসম্
মুনিং মূলফলাহারং মৃগবেষধরং নৃপ
বসমানমরণ্যেষু নিত্যং শমপরায়ণম্
109.25
ত্বয়াহং হিংসিতো যস্মাত্তস্মাত্ত্বামপ্যসংশয়ম্
দ্বয়োর্নৃশংসকর্তারমবশং কামমোহিতম্
জীবিতান্তকরো ভাব এবমেবাগমিষ্যতি
109.26
অহং হি কিংদমো নাম তপসাপ্রতিমো মুনিঃ
ব্যপত্রপন্মনুষ্যাণাং মৃগ্যাং মৈথুনমাচরম্
109.27
মৃগো ভূত্বা মৃগৈঃ সার্ধং চরামি গহনে বনে
ন তু তে ব্রহ্মহত্যেয়ং ভবিষ্যত্যবিজানতঃ
মৃগরূপধরং হত্বা মামেবং কামমোহিতম্
109.28
অস্য তু ত্বং ফলং মূঢ প্রাপ্স্যসীদৃশমেব হি
প্রিয়য়া সহ সংবাসং প্রাপ্য কামবিমোহিতঃ
ত্বমপ্যস্যামবস্থায়াং প্রেতলোকং গমিষ্যসি
109.29
অন্তকালে চ সংবাসং যয়া গন্তাসি কান্তয়া
প্রেতরাজবশং প্রাপ্তং সর্বভূতদুরত্যয়ম্
ভক্ত্যা মতিমতাং শ্রেষ্ঠ সৈব ত্বামনুয়াস্যতি
109.30
বর্তমানঃ সুখে দুঃখং যথাহং প্রাপিতস্ত্বয়া
তথা সুখং ত্বাং সংপ্রাপ্তং দুঃখমভ্যাগমিষ্যতি
109.31
বৈশংপায়ন উবাচ
এবমুক্ত্বা সুদুঃখার্তো জীবিতাত্স ব্যয়ুজ্যত
মৃগঃ পাণ্ডুশ্চ শোকার্তঃ ক্ষণেন সমপদ্যত