Utshovঅধ্যায় 110
110.1
বৈশংপায়ন উবাচ
তং ব্যতীতমতিক্রম্য রাজা স্বমিব বান্ধবম্
সভার্যঃ শোকদুঃখার্তঃ পর্যদেবয়দাতুরঃ
110.2
পাণ্ডুরুবাচ
সতামপি কুলে জাতাঃ কর্মণা বত দুর্গতিম্
প্রাপ্নুবন্ত্যকৃতাত্মানঃ কামজালবিমোহিতাঃ
110.3
শশ্বদ্ধর্মাত্মনা জাতো বাল এব পিতা মম
জীবিতান্তমনুপ্রাপ্তঃ কামাত্মৈবেতি নঃ শ্রুতম্
110.4
তস্য কামাত্মনঃ ক্ষেত্রে রাজ্ঞঃ সংয়তবাগৃষিঃ
কৃষ্ণদ্বৈপায়নঃ সাক্ষাদ্ভগবান্মামজীজনৎ
110.5
তস্যাদ্য ব্যসনে বুদ্ধিঃ সংজাতেয়ং মমাধমা
ত্যক্তস্য দেবৈরনয়ান্মৃগয়ায়াং দুরাত্মনঃ
110.6
মোক্ষমেব ব্যবস্যামি বন্ধো হি ব্যসনং মহৎ
সুবৃত্তিমনুবর্তিষ্যে তামহং পিতুরব্যয়াম্
অতীব তপসাত্মানং যোজয়িষ্যাম্যসংশয়ম্
110.7
তস্মাদেকোঽহমেকাহমেকৈকস্মিন্বনস্পতৌ
চরন্ভৈক্ষং মুনির্মুণ্ডশ্চরিষ্যামি মহীমিমাম্
110.8
পাংসুনা সমবচ্ছন্নঃ শূন্যাগারপ্রতিশ্রয়ঃ
বৃক্ষমূলনিকেতো বা ত্যক্তসর্বপ্রিয়াপ্রিয়ঃ
110.9
ন শোচন্ন প্রহৃষ্যংশ্চ তুল্যনিন্দাত্মসংস্তুতিঃ
নিরাশীর্নির্নমস্কারো নির্দ্বন্দ্বো নিষ্পরিগ্রহঃ
110.10
ন চাপ্যবহসন্কংচিন্ন কুর্বন্ভ্রুকুটীং ক্বচিৎ
প্রসন্নবদনো নিত্যং সর্বভূতহিতে রতঃ
110.11
জঙ্গমাজঙ্গমং সর্বমবিহিংসংশ্চতুর্বিধম্
স্বাসু প্রজাস্বিব সদা সমঃ প্রাণভৃতাং প্রতি
110.12
এককালং চরন্ভৈক্ষং কুলানি দ্বে চ পঞ্চ চ
অসংভবে বা ভৈক্ষস্য চরন্ননশনান্যপি
110.13
অল্পমল্পং যথাভোজ্যং পূর্বলাভেন জাতু চিৎ
নিত্যং নাতিচরঁল্লাভে অলাভে সপ্ত পূরয়ন্
110.14
বাস্যৈকং তক্ষতো বাহুং চন্দনেনৈকমুক্ষতঃ
নাকল্যাণং ন কল্যাণং প্রধ্যায়ন্নুভয়োস্তয়োঃ
110.15
ন জিজীবিষুবত্কিংচিন্ন মুমূর্ষুবদাচরন্
মরণং জীবিতং চৈব নাভিনন্দন্ন চ দ্বিষন্
110.16
যাঃ কাশ্চিজ্জীবতা শক্যাঃ কর্তুমভ্যুদয়ক্রিয়াঃ
তাঃ সর্বাঃ সমতিক্রম্য নিমেষাদিষ্ববস্থিতঃ
110.17
তাসু সর্বাস্ববস্থাসু ত্যক্তসর্বেন্দ্রিয়ক্রিয়ঃ
সংপরিত্যক্তধর্মাত্মা সুনির্ণিক্তাত্মকল্মষঃ
110.18
নির্মুক্তঃ সর্বপাপেভ্যো ব্যতীতঃ সর্ববাগুরাঃ
ন বশে কস্যচিত্তিষ্ঠন্সধর্মা মাতরিশ্বনঃ
110.19
এতয়া সততং বৃত্ত্যা চরন্নেবংপ্রকারয়া
দেহং সংধারয়িষ্যামি নির্ভয়ং মার্গমাস্থিতঃ
110.20
নাহং শ্বাচরিতে মার্গে অবীর্যকৃপণোচিতে
স্বধর্মাত্সততাপেতে রমেয়ং বীর্যবর্জিতঃ
110.21
সত্কৃতোঽসক্তৃতো বাপি যোঽন্যাং কৃপণচক্ষুষা
উপৈতি বৃত্তিং কামাত্মা স শুনাং বর্ততে পথি
110.22
বৈশংপায়ন উবাচ
এবমুক্ত্বা সুদুঃখার্তো নিঃশ্বাসপরমো নৃপঃ
অবেক্ষমাণঃ কুন্তীং চ মাদ্রীং চ সমভাষত
110.23
কৌসল্যা বিদুরঃ ক্ষত্তা রাজা চ সহ বন্ধুভিঃ
আর্যা সত্যবতী ভীষ্মস্তে চ রাজপুরোহিতাঃ
110.24
ব্রাহ্মণাশ্চ মহাত্মানঃ সোমপাঃ সংশিতব্রতাঃ
পৌরবৃদ্ধাশ্চ যে তত্র নিবসন্ত্যস্মদাশ্রয়াঃ
প্রসাদ্য সর্বে বক্তব্যাঃ পাণ্ডুঃ প্রব্রজিতো বনম্
110.25
নিশম্য বচনং ভর্তুর্বনবাসে ধৃতাত্মনঃ
তত্সমং বচনং কুন্তী মাদ্রী চ সমভাষতাম্
110.26
অন্যেঽপি হ্যাশ্রমাঃ সন্তি যে শক্যা ভরতর্ষভ
আবাভ্যাং ধর্মপত্নীভ্যাং সহ তপ্ত্বা তপো মহৎ
ত্বমেব ভবিতা সার্থঃ স্বর্গস্যাপি ন সংশয়ঃ
110.27
প্রণিধায়েন্দ্রিয়গ্রামং ভর্তৃলোকপরায়ণে
ত্যক্তকামসুখে হ্যাবাং তপ্স্যাবো বিপুলং তপঃ
110.28
যদি আবাং মহাপ্রাজ্ঞ ত্যক্ষ্যসি ত্বং বিশাং পতে
অদ্যৈবাবাং প্রহাস্যাবো জীতিবং নাত্র সংশয়ঃ
110.29
পাণ্ডুরুবাচ
যদি ব্যবসিতং হ্যেতদ্যুবয়োর্ধর্মসংহিতম্
স্ববৃত্তিমনুবর্তিষ্যে তামহং পিতুরব্যয়াম্
110.30
ত্যক্তগ্রাম্যসুখাচারস্তপ্যমানো মহত্তপঃ
বল্কলী ফলমূলাশী চরিষ্যামি মহাবনে
110.31
অগ্নিং জুহ্বন্নুভৌ কালাবুভৌ কালাবুপস্পৃশন্
কৃশঃ পরিমিতাহারশ্চীরচর্মজটাধরঃ
110.32
শীতবাতাতপসহঃ ক্ষুত্পিপাসাশ্রমান্বিতঃ
তপসা দুশ্চরেণেদং শরীরমুপশোষয়ন্
110.33
একান্তশীলী বিমৃশন্পক্বাপক্বেন বর্তয়ন্
পিতৄন্দেবাংশ্চ বন্যেন বাগ্ভিরদ্ভিশ্চ তর্পয়ন্
110.34
বানপ্রস্থজনস্যাপি দর্শনং কুলবাসিনাম্
নাপ্রিয়াণ্যাচরঞ্জাতু কিং পুনর্গ্রামবাসিনাম্
110.35
এবমারণ্যশাস্ত্রাণামুগ্রমুগ্রতরং বিধিম্
কাঙ্ক্ষমাণোঽহমাসিষ্যে দেহস্যাস্য সমাপনাৎ
110.36
বৈশংপায়ন উবাচ
ইত্যেবমুক্ত্বা ভার্যে তে রাজা কৌরববংশজঃ
ততশ্চূডামণিং নিষ্কমঙ্গদে কুণ্ডলানি চ
বাসাংসি চ মহার্হাণি স্ত্রীণামাভরণানি চ
110.37
প্রদায় সর্বং বিপ্রেভ্যঃ পাণ্ডুঃ পুনরভাষত
গত্বা নাগপুরং বাচ্যং পাণ্ডুঃ প্রব্রজিতো বনম্
110.38
অর্থং কামং সুখং চৈব রতিং চ পরমাত্মিকাম্
প্রতস্থে সর্বমুত্সৃজ্য সভার্যঃ কুরুপুংগবঃ
110.39
ততস্তস্যানুয়াত্রাণি তে চৈব পরিচারকাঃ
শ্রুত্বা ভরতসিংহস্য বিবিধাঃ করুণা গিরঃ
ভীমমার্তস্বরং কৃত্বা হাহেতি পরিচুক্রুশুঃ
110.40
উষ্ণমশ্রু বিমুঞ্চন্তস্তং বিহায় মহীপতিম্
যয়ুর্নাগপুরং তূর্ণং সর্বমাদায় তদ্বচঃ
110.41
শ্রুত্বা চ তেভ্যস্তত্সর্বং যথাবৃত্তং মহাবনে
ধৃতরাষ্ট্রো নরশ্রেষ্ঠঃ পাণ্ডুমেবান্বশোচত
110.42
রাজপুত্রস্তু কৌরব্যঃ পাণ্ডুর্মূলফলাশনঃ
জগাম সহ ভার্যাভ্যাং ততো নাগসভং গিরিম্
110.43
স চৈত্ররথমাসাদ্য বারিষেণমতীত্য চ
হিমবন্তমতিক্রম্য প্রয়য়ৌ গন্ধমাদনম্
110.44
রক্ষ্যমাণো মহাভূতৈঃ সিদ্ধৈশ্চ পরমর্ষিভিঃ
উবাস স তদা রাজা সমেষু বিষমেষু চ
110.45
ইন্দ্রদ্যুম্নসরঃ প্রাপ্য হংসকূটমতীত্য চ
শতশৃঙ্গে মহারাজ তাপসঃ সমপদ্যত