Utshovঅধ্যায় 111
111.1
বৈশংপায়ন উবাচ
তত্রাপি তপসি শ্রেষ্ঠে বর্তমানঃ স বীর্যবান্
সিদ্ধচারণসংঘানাং বভূব প্রিয়দর্শনঃ
111.2
শুশ্রূষুরনহংবাদী সংয়তাত্মা জিতেন্দ্রিয়ঃ
স্বর্গং গন্তুং পরাক্রান্তঃ স্বেন বীর্যেণ ভারত
111.3
কেষাংচিদভবদ্ভ্রাতা কেষাংচিদভবত্সখা
ঋষয়স্ত্বপরে চৈনং পুত্রবত্পর্যপালয়ন্
111.4
স তু কালেন মহতা প্রাপ্য নিষ্কল্মষং তপঃ
ব্রহ্মর্ষিসদৃশঃ পাণ্ডুর্বভূব ভরতর্ষভ
111.5
স্বর্গপারং তিতীর্ষন্স শতশৃঙ্গাদুদঙ্মুখঃ
প্রতস্থে সহ পত্নীভ্যামব্রুবংস্তত্র তাপসাঃ
উপর্যুপরি গচ্ছন্তঃ শৈলরাজমুদঙ্মুখাঃ
111.6
দৃষ্টবন্তো গিরেরস্য দুর্গান্দেশান্বহূন্বয়ম্
আক্রীডভূতান্দেবানাং গন্ধর্বাপ্সরসাং তথা
111.7
উদ্যানানি কুবেরস্য সমানি বিষমাণি চ
মহানদীনিতম্বাংশ্চ দুর্গাংশ্চ গিরিগহ্বরান্
111.8
সন্তি নিত্যহিমা দেশা নির্বৃক্ষমৃগপক্ষিণঃ
সন্তি কেচিন্মহাবর্ষা দুর্গাঃ কেচিদ্দুরাসদাঃ
111.9
অতিক্রামেন্ন পক্ষী যান্কুত এবেতরে মৃগাঃ
বায়ুরেকোঽতিগাদ্যত্র সিদ্ধাশ্চ পরমর্ষয়ঃ
111.10
গচ্ছন্ত্যৌ শৈলরাজেঽস্মিন্রাজপুত্র্যৌ কথং ত্বিমে
ন সীদেতামদুঃখার্হে মা গমো ভরতর্ষভ
111.11
পাণ্ডুরুবাচ
অপ্রজস্য মহাভাগা ন দ্বারং পরিচক্ষতে
স্বর্গে তেনাভিতপ্তোঽহমপ্রজস্তদ্ব্রবীমি বঃ
111.12
ঋণৈশ্চতুর্ভিঃ সংয়ুক্তা জায়ন্তে মনুজা ভুবি
পিতৃদেবর্ষিমনুজদেয়ৈঃ শতসহস্রশঃ
111.13
এতানি তু যথাকালং যো ন বুধ্যতি মানবঃ
ন তস্য লোকাঃ সন্তীতি ধর্মবিদ্ভিঃ প্রতিষ্ঠিতম্
111.14
যজ্ঞৈশ্চ দেবান্প্রীণাতি স্বাধ্যায়তপসা মুনীন্
পুত্রৈঃ শ্রাদ্ধৈঃ পিতৄংশ্চাপি আনৃশংস্যেন মানবান্
111.15
ঋষিদেবমনুষ্যাণাং পরিমুক্তোঽস্মি ধর্মতঃ
পিত্র্যাদৃণাদনির্মুক্তস্তেন তপ্যে তপোধনাঃ
111.16
দেহনাশে ধ্রুবো নাশঃ পিতৄণামেষ নিশ্চয়ঃ
ইহ তস্মাত্প্রজাহেতোঃ প্রজায়ন্তে নরোত্তমাঃ
111.17
যথৈবাহং পিতুঃ ক্ষেত্রে সৃষ্টস্তেন মহাত্মনা
তথৈবাস্মিন্মম ক্ষেত্রে কথং বৈ সংভবেত্প্রজা
111.18
তাপসা ঊচুঃ
অস্তি বৈ তব ধর্মাত্মন্বিদ্ম দেবোপমং শুভম্
অপত্যমনঘং রাজন্বয়ং দিব্যেন চক্ষুষা
111.19
দৈবদিষ্টং নরব্যাঘ্র কর্মণেহোপপাদয়
অক্লিষ্টং ফলমব্যগ্রো বিন্দতে বুদ্ধিমান্নরঃ
111.20
তস্মিন্দৃষ্টে ফলে তাত প্রয়ত্নং কর্তুমর্হসি
অপত্যং গুণসংপন্নং লব্ধ্বা প্রীতিমবাপ্স্যসি
111.21
বৈশংপায়ন উবাচ
তচ্ছ্রুত্বা তাপসবচঃ পাণ্ডুশ্চিন্তাপরোঽভবৎ
আত্মনো মৃগশাপেন জানন্নুপহতাং ক্রিয়াম্
111.22
সোঽব্রবীদ্বিজনে কুন্তীং ধর্মপত্নীং যশস্বিনীম্
অপত্যোত্পাদনে যোগমাপদি প্রসমর্থয়ন্
111.23
অপত্যং নাম লোকেষু প্রতিষ্ঠা ধর্মসংহিতা
ইতি কুন্তি বিদুর্ধীরাঃ শাশ্বতং ধর্মমাদিতঃ
111.24
ইষ্টং দত্তং তপস্তপ্তং নিয়মশ্চ স্বনুষ্ঠিতঃ
সর্বমেবানপত্যস্য ন পাবনমিহোচ্যতে
111.25
সোঽহমেবং বিদিত্বৈতত্প্রপশ্যামি শুচিস্মিতে
অনপত্যঃ শুভাঁল্লোকান্নাবাপ্স্যামীতি চিন্তয়ন্
111.26
মৃগাভিশাপান্নষ্টং মে প্রজনং হ্যকৃতাত্মনঃ
নৃশংসকারিণো ভীরু যথৈবোপহতং তথা
111.27
ইমে বৈ বন্ধুদায়াদাঃ ষট্পুত্রা ধর্মদর্শনে
ষডেবাবন্ধুদায়াদাঃ পুত্রাস্তাঞ্শৃণু মে পৃথে
111.28
স্বয়ংজাতঃ প্রণীতশ্চ পরিক্রীতশ্চ যঃ সুতঃ
পৌনর্ভবশ্চ কানীনঃ স্বৈরিণ্যাং যশ্চ জায়তে
111.29
দত্তঃ ক্রীতঃ কৃত্রিমশ্চ উপগচ্ছেত্স্বয়ং চ যঃ
সহোঢো জাতরেতাশ্চ হীনয়োনিধৃতশ্চ যঃ
111.30
পূর্বপূর্বতমাভাবে মত্বা লিপ্সেত বৈ সুতম্
উত্তমাদবরাঃ পুংসঃ কাঙ্ক্ষন্তে পুত্রমাপদি
111.31
অপত্যং ধর্মফলদং শ্রেষ্ঠং বিন্দন্তি সাধবঃ
আত্মশুক্রাদপি পৃথে মনুঃ স্বায়ম্ভুবোঽব্রবীৎ
111.32
তস্মাত্প্রহেষ্যাম্যদ্য ত্বাং হীনঃ প্রজননাত্স্বয়ম্
সদৃশাচ্ছ্রেয়সো বা ত্বং বিদ্ধ্যপত্যং যশস্বিনি
111.33
শৃণু কুন্তি কথাং চেমাং শারদণ্ডায়নীং প্রতি
যা বীরপত্নী গুরুভির্নিয়ুক্তাপত্যজন্মনি
111.34
পুষ্পেণ প্রয়তা স্নাতা নিশি কুন্তি চতুষ্পথে
বরয়িত্বা দ্বিজং সিদ্ধং হুত্বা পুংসবনেঽনলম্
111.35
কর্মণ্যবসিতে তস্মিন্সা তেনৈব সহাবসৎ
তত্র ত্রীঞ্জনয়ামাস দুর্জয়াদীন্মহারথান্
111.36
তথা ত্বমপি কল্যাণি ব্রাহ্মণাত্তপসাধিকাৎ
মন্নিয়োগাদ্যত ক্ষিপ্রমপত্যোত্পাদনং প্রতি