Utshovঅধ্যায় 112
112.1
বৈশংপায়ন উবাচ
এবমুক্তা মহারাজ কুন্তী পাণ্ডুমভাষত
কুরূণামৃষভং বীরং তদা ভূমিপতিং পতিম্
112.2
ন মামর্হসি ধর্মজ্ঞ বক্তুমেবং কথংচন
ধর্মপত্নীমভিরতাং ত্বয়ি রাজীবলোচন
112.3
ত্বমেব তু মহাবাহো ময্যপত্যানি ভারত
বীর বীর্যোপপন্নানি ধর্মতো জনয়িষ্যসি
112.4
স্বর্গং মনুজশার্দূল গচ্ছেয়ং সহিতা ত্বয়া
অপত্যায় চ মাং গচ্ছ ত্বমেব কুরুনন্দন
112.5
ন হ্যহং মনসাপ্যন্যং গচ্ছেয়ং ত্বদৃতে নরম্
ত্বত্তঃ প্রতিবিশিষ্টশ্চ কোঽন্যোঽস্তি ভুবি মানবঃ
112.6
ইমাং চ তাবদ্ধর্ম্যাং ত্বং পৌরাণীং শৃণু মে কথাম্
পরিশ্রুতাং বিশালাক্ষ কীর্তয়িষ্যামি যামহম্
112.7
ব্যুষিতাশ্ব ইতি খ্যাতো বভূব কিল পার্থিবঃ
পুরা পরমধর্মিষ্ঠঃ পূরোর্বংশবিবর্ধনঃ
112.8
তস্মিংশ্চ যজমানে বৈ ধর্মাত্মনি মহাত্মনি
উপাগমংস্ততো দেবাঃ সেন্দ্রাঃ সহ মহর্ষিভিঃ
112.9
অমাদ্যদিন্দ্রঃ সোমেন দক্ষিণাভির্দ্বিজাতয়ঃ
ব্যুষিতাশ্বস্য রাজর্ষেস্ততো যজ্ঞে মহাত্মনঃ
112.10
ব্যুষিতাশ্বস্ততো রাজন্নতি মর্ত্যান্ব্যরোচত
সর্বভূতান্যতি যথা তপনঃ শিশিরাত্যয়ে
112.11
স বিজিত্য গৃহীত্বা চ নৃপতীন্রাজসত্তমঃ
প্রাচ্যানুদীচ্যান্মধ্যাংশ্চ দক্ষিণাত্যানকালয়ৎ
112.12
অশ্বমেধে মহায়জ্ঞে ব্যুষিতাশ্বঃ প্রতাপবান্
বভূব স হি রাজেন্দ্রো দশনাগবলান্বিতঃ
112.13
অপ্যত্র গাথাং গায়ন্তি যে পুরাণবিদো জনাঃ
ব্যুষিতাশ্বঃ সমুদ্রান্তাং বিজিত্যেমাং বসুংধরাম্
অপালয়ত্সর্ববর্ণান্পিতা পুত্রানিবৌরসান্
112.14
যজমানো মহায়জ্ঞৈর্ব্রাহ্মণেভ্যো দদৌ ধনম্
অনন্তরত্নান্যাদায় আজহার মহাক্রতূন্
সুষাব চ বহূন্সোমান্সোমসংস্থাস্ততান চ
112.15
আসীত্কাক্ষীবতী চাস্য ভার্যা পরমসংমতা
ভদ্রা নাম মনুষ্যেন্দ্র রূপেণাসদৃশী ভুবি
112.16
কাময়ামাসতুস্তৌ তু পরস্পরমিতি শ্রুতিঃ
স তস্যাং কামসংমত্তো যক্ষ্মাণং সমপদ্যত
112.17
তেনাচিরেণ কালেন জগামাস্তমিবাংশুমান্
তস্মিন্প্রেতে মনুষ্যেন্দ্রে ভার্যাস্য ভৃশদুঃখিতা
112.18
অপুত্রা পুরুষব্যাঘ্র বিললাপেতি নঃ শ্রুতম্
ভদ্রা পরমদুঃখার্তা তন্নিবোধ নরাধিপ
112.19
নারী পরমধর্মজ্ঞ সর্বা পুত্রবিনাকৃতা
পতিং বিনা জীবতি যা ন সা জীবতি দুঃখিতা
112.20
পতিং বিনা মৃতং শ্রেয়ো নার্যাঃ ক্ষত্রিয়পুংগব
ত্বদ্গতিং গন্তুমিচ্ছামি প্রসীদস্ব নয়স্ব মাম্
112.21
ত্বয়া হীনা ক্ষণমপি নাহং জীবিতুমুত্সহে
প্রসাদং কুরু মে রাজন্নিতস্তূর্ণং নয়স্ব মাম্
112.22
পৃষ্ঠতোঽনুগমিষ্যামি সমেষু বিষমেষু চ
ত্বামহং নরশার্দূল গচ্ছন্তমনিবর্তিনম্
112.23
ছায়েবানপগা রাজন্সততং বশবর্তিনী
ভবিষ্যামি নরব্যাঘ্র নিত্যং প্রিয়হিতে রতা
112.24
অদ্য প্রভৃতি মাং রাজন্কষ্টা হৃদয়শোষণাঃ
আধয়োঽভিভবিষ্যন্তি ত্বদৃতে পুষ্করেক্ষণ
112.25
অভাগ্যয়া ময়া নূনং বিয়ুক্তাঃ সহচারিণঃ
সংয়োগা বিপ্রয়ুক্তা বা পূর্বদেহেষু পার্থিব
112.26
তদিদং কর্মভিঃ পাপৈঃ পূর্বদেহেষু সংচিতম্
দুঃখং মামনুসংপ্রাপ্তং রাজংস্ত্বদ্বিপ্রয়োগজম্
112.27
অদ্য প্রভৃত্যহং রাজন্কুশপ্রস্তরশায়িনী
ভবিষ্যাম্যসুখাবিষ্টা ত্বদ্দর্শনপরায়ণা
112.28
দর্শয়স্ব নরব্যাঘ্র সাধু মামসুখান্বিতাম্
দীনামনাথাং কৃপণাং বিলপন্তীং নরেশ্বর
112.29
এবং বহুবিধং তস্যাং বিলপন্ত্যাং পুনঃ পুনঃ
তং শবং সংপরিষ্বজ্য বাক্কিলান্তর্হিতাব্রবীৎ
112.30
উত্তিষ্ঠ ভদ্রে গচ্ছ ত্বং দদানীহ বরং তব
জনয়িষ্যাম্যপত্যানি ত্বয্যহং চারুহাসিনি
112.31
আত্মীয়ে চ বরারোহে শয়নীয়ে চতুর্দশীম্
অষ্টমীং বা ঋতুস্নাতা সংবিশেথা ময়া সহ
112.32
এবমুক্তা তু সা দেবী তথা চক্রে পতিব্রতা
যথোক্তমেব তদ্বাক্যং ভদ্রা পুত্রার্থিনী তদা
112.33
সা তেন সুষুবে দেবী শবেন মনুজাধিপ
ত্রীঞ্শাল্বাংশ্চতুরো মদ্রান্সুতান্ভরতসত্তম
112.34
তথা ত্বমপি ময্যেব মনসা ভরতর্ষভ
শক্তো জনয়িতুং পুত্রাংস্তপোয়োগবলান্বয়াৎ