Utshovঅধ্যায় 113
113.1
বৈশংপায়ন উবাচ
এবমুক্তস্তয়া রাজা তাং দেবীং পুনরব্রবীৎ
ধর্মবিদ্ধর্মসংয়ুক্তমিদং বচনমুত্তমম্
113.2
এবমেতত্পুরা কুন্তি ব্যুষিতাশ্বশ্চকার হ
যথা ত্বয়োক্তং কল্যাণি স হ্যাসীদমরোপমঃ
113.3
অথ ত্বিমং প্রবক্ষ্যামি ধর্মং ত্বেতং নিবোধ মে
পুরাণমৃষিভির্দৃষ্টং ধর্মবিদ্ভির্মহাত্মভিঃ
113.4
অনাবৃতাঃ কিল পুরা স্ত্রিয় আসন্বরাননে
কামচারবিহারিণ্যঃ স্বতন্ত্রাশ্চারুলোচনে
113.5
তাসাং ব্যুচ্চরমাণানাং কৌমারাত্সুভগে পতীন্
নাধর্মোঽভূদ্বরারোহে স হি ধর্মঃ পুরাভবৎ
113.6
তং চৈব ধর্মং পৌরাণং তির্যগ্যোনিগতাঃ প্রজাঃ
অদ্যাপ্যনুবিধীয়ন্তে কামদ্বেষবিবর্জিতাঃ
পুরাণদৃষ্টো ধর্মোঽয়ং পূজ্যতে চ মহর্ষিভিঃ
113.7
উত্তরেষু চ রম্ভোরু কুরুষ্বদ্যাপি বর্ততে
স্ত্রীণামনুগ্রহকরঃ স হি ধর্মঃ সনাতনঃ
113.8
অস্মিংস্তু লোকে নচিরান্মর্যাদেয়ং শুচিস্মিতে
স্থাপিতা যেন যস্মাচ্চ তন্মে বিস্তরতঃ শৃণু
113.9
বভূবোদ্দালকো নাম মহর্ষিরিতি নঃ শ্রুতম্
শ্বেতকেতুরিতি খ্যাতঃ পুত্রস্তস্যাভবন্মুনিঃ
113.10
মর্যাদেয়ং কৃতা তেন মানুষেষ্বিতি নঃ শ্রুতম্
কোপাত্কমলপত্রাক্ষি যদর্থং তন্নিবোধ মে
113.11
শ্বেতকেতোঃ কিল পুরা সমক্ষং মাতরং পিতুঃ
জগ্রাহ ব্রাহ্মণঃ পাণৌ গচ্ছাব ইতি চাব্রবীৎ
113.12
ঋষিপুত্রস্ততঃ কোপং চকারামর্ষিতস্তদা
মাতরং তাং তথা দৃষ্ট্বা নীয়মানাং বলাদিব
113.13
ক্রুদ্ধং তং তু পিতা দৃষ্ট্বা শ্বেতকেতুমুবাচ হ
মা তাত কোপং কার্ষীস্ত্বমেষ ধর্মঃ সনাতনঃ
113.14
অনাবৃতা হি সর্বেষাং বর্ণানামঙ্গনা ভুবি
যথা গাবঃ স্থিতাস্তাত স্বে স্বে বর্ণে তথা প্রজাঃ
113.15
ঋষিপুত্রোঽথ তং ধর্মং শ্বেতকেতুর্ন চক্ষমে
চকার চৈব মর্যাদামিমাং স্ত্রীপুংসয়োর্ভুবি
113.16
মানুষেষু মহাভাগে ন ত্বেবান্যেষু জন্তুষু
তদা প্রভৃতি মর্যাদা স্থিতেয়মিতি নঃ শ্রুতম্
113.17
ব্যুচ্চরন্ত্যাঃ পতিং নার্যা অদ্য প্রভৃতি পাতকম্
ভ্রূণহত্যাকৃতং পাপং ভবিষ্যত্যসুখাবহম্
113.18
ভার্যাং তথা ব্যুচ্চরতঃ কৌমারীং ব্রহ্মচারিণীম্
পতিব্রতামেতদেব ভবিতা পাতকং ভুবি
113.19
পত্যা নিয়ুক্তা যা চৈব পত্ন্যপত্যার্থমেব চ
ন করিষ্যতি তস্যাশ্চ ভবিষ্যত্যেতদেব হি
113.20
ইতি তেন পুরা ভীরু মর্যাদা স্থাপিতা বলাৎ
উদ্দালকস্য পুত্রেণ ধর্ম্যা বৈ শ্বেতকেতুনা
113.21
সৌদাসেন চ রম্ভোরু নিয়ুক্তাপত্যজন্মনি
মদয়ন্তী জগামর্ষিং বসিষ্ঠমিতি নঃ শ্রুতম্
113.22
তস্মাল্লেভে চ সা পুত্রমশ্মকং নাম ভামিনী
ভার্যা কল্মাষপাদস্য ভর্তুঃ প্রিয়চিকীর্ষয়া
113.23
অস্মাকমপি তে জন্ম বিদিতং কমলেক্ষণে
কৃষ্ণদ্বৈপায়নাদ্ভীরু কুরূণাং বংশবৃদ্ধয়ে
113.24
অত এতানি সর্বাণি কারণানি সমীক্ষ্য বৈ
মমৈতদ্বচনং ধর্ম্যং কর্তুমর্হস্যনিন্দিতে
113.25
ঋতাবৃতৌ রাজপুত্রি স্ত্রিয়া ভর্তা যতব্রতে
নাতিবর্তব্য ইত্যেবং ধর্মং ধর্মবিদো বিদুঃ
113.26
শেষেষ্বন্যেষু কালেষু স্বাতন্ত্র্যং স্ত্রী কিলার্হতি
ধর্মমেতং জনাঃ সন্তঃ পুরাণং পরিচক্ষতে
113.27
ভর্তা ভার্যাং রাজপুত্রি ধর্ম্যং বাধর্ম্যমেব বা
যদ্ব্রূয়াত্তত্তথা কার্যমিতি ধর্মবিদো বিদুঃ
113.28
বিশেষতঃ পুত্রগৃদ্ধী হীনঃ প্রজননাত্স্বয়ম্
যথাহমনবদ্যাঙ্গি পুত্রদর্শনলালসঃ
113.29
তথা রক্তাঙ্গুলিতলঃ পদ্মপত্রনিভঃ শুভে
প্রসাদার্থং ময়া তেঽয়ং শিরস্যভ্যুদ্যতোঽঞ্জলিঃ
113.30
মন্নিয়োগাত্সুকেশান্তে দ্বিজাতেস্তপসাধিকাৎ
পুত্রান্গুণসমায়ুক্তানুত্পাদয়িতুমর্হসি
ত্বত্কৃতেঽহং পৃথুশ্রোণি গচ্ছেয়ং পুত্রিণাং গতিম্
113.31
এবমুক্তা ততঃ কুন্তী পাণ্ডুং পরপুরংজয়ম্
প্রত্যুবাচ বরারোহা ভর্তুঃ প্রিয়হিতে রতা
113.32
পিতৃবেশ্মন্যহং বালা নিয়ুক্তাতিথিপূজনে
উগ্রং পর্যচরং তত্র ব্রাহ্মণং সংশিতব্রতম্
113.33
নিগূঢনিশ্চয়ং ধর্মে যং তং দুর্বাসসং বিদুঃ
তমহং সংশিতাত্মানং সর্বয়ত্নৈরতোষয়ম্
113.34
স মেঽভিচারসংয়ুক্তমাচষ্ট ভগবান্বরম্
মন্ত্রগ্রামং চ মে প্রাদাদব্রবীচ্চৈব মামিদম্
113.35
যং যং দেবং ত্বমেতেন মন্ত্রেণাবাহয়িষ্যসি
অকামো বা সকামো বা স তে বশমুপৈষ্যতি
113.36
ইত্যুক্তাহং তদা তেন পিতৃবেশ্মনি ভারত
ব্রাহ্মণেন বচস্তথ্যং তস্য কালোঽয়মাগতঃ
113.37
অনুজ্ঞাতা ত্বয়া দেবমাহ্বয়েয়মহং নৃপ
তেন মন্ত্রেণ রাজর্ষে যথা স্যান্নৌ প্রজা বিভো
113.38
আবাহয়ামি কং দেবং ব্রূহি তত্ত্ববিদাং বর
ত্বত্তোঽনুজ্ঞাপ্রতীক্ষাং মাং বিদ্ধ্যস্মিন্কর্মণি স্থিতাম্
113.39
পাণ্ডুরুবাচ
অদ্যৈব ত্বং বরারোহে প্রয়তস্ব যথাবিধি
ধর্মমাবাহয় শুভে স হি দেবেষু পুণ্যভাক্
113.40
অধর্মেণ ন নো ধর্মঃ সংয়ুজ্যেত কথংচন
লোকশ্চায়ং বরারোহে ধর্মোঽয়মিতি মংস্যতে
113.41
ধার্মিকশ্চ কুরূণাং স ভবিষ্যতি ন সংশয়ঃ
দত্তস্যাপি চ ধর্মেণ নাধর্মে রংস্যতে মনঃ
113.42
তস্মাদ্ধর্মং পুরস্কৃত্য নিয়তা ত্বং শুচিস্মিতে
উপচারাভিচারাভ্যাং ধর্মমারাধয়স্ব বৈ
113.43
বৈশংপায়ন উবাচ
সা তথোক্তা তথেত্যুক্ত্বা তেন ভর্ত্রা বরাঙ্গনা
অভিবাদ্যাভ্যনুজ্ঞাতা প্রদক্ষিণমবর্তত