Utshovঅধ্যায় 114
114.1
বৈশংপায়ন উবাচ
সংবত্সরাহিতে গর্ভে গান্ধার্যা জনমেজয়
আহ্বয়ামাস বৈ কুন্তী গর্ভার্থং ধর্মমচ্যুতম্
114.2
সা বলিং ত্বরিতা দেবী ধর্মায়োপজহার হ
জজাপ জপ্যং বিধিবদ্দত্তং দুর্বাসসা পুরা
114.3
সংগম্য সা তু ধর্মেণ যোগমূর্তিধরেণ বৈ
লেভে পুত্রং বরারোহা সর্বপ্রাণভৃতাং বরম্
114.4
ঐন্দ্রে চন্দ্রসমায়ুক্তে মুহূর্তেঽভিজিতেঽষ্টমে
দিবা মধ্যগতে সূর্যে তিথৌ পুণ্যেঽভিপূজিতে
114.5
সমৃদ্ধয়শসং কুন্তী সুষাব সময়ে সুতম্
জাতমাত্রে সুতে তস্মিন্বাগুবাচাশরীরিণী
114.6
এষ ধর্মভৃতাং শ্রেষ্ঠো ভবিষ্যতি ন সংশয়ঃ
যুধিষ্ঠির ইতি খ্যাতঃ পাণ্ডোঃ প্রথমজঃ সুতঃ
114.7
ভবিতা প্রথিতো রাজা ত্রিষু লোকেষু বিশ্রুতঃ
যশসা তেজসা চৈব বৃত্তেন চ সমন্বিতঃ
114.8
ধার্মিকং তং সুতং লব্ধ্বা পাণ্ডুস্তাং পুনরব্রবীৎ
প্রাহুঃ ক্ষত্রং বলজ্যেষ্ঠং বলজ্যেষ্ঠং সুতং বৃণু
114.9
ততস্তথোক্তা পত্যা তু বায়ুমেবাজুহাব সা
তস্মাজ্জজ্ঞে মহাবাহুর্ভীমো ভীমপরাক্রমঃ
114.10
তমপ্যতিবলং জাতং বাগভ্যবদদচ্যুতম্
সর্বেষাং বলিনাং শ্রেষ্ঠো জাতোঽয়মিতি ভারত
114.11
ইদমত্যদ্ভুতং চাসীজ্জাতমাত্রে বৃকোদরে
যদঙ্কাত্পতিতো মাতুঃ শিলাং গাত্রৈরচূর্ণয়ৎ
114.12
কুন্তী ব্যাঘ্রভয়োদ্বিগ্না সহসোত্পতিতা কিল
নান্ববুধ্যত সংসুপ্তমুত্সঙ্গে স্বে বৃকোদরম্
114.13
ততঃ স বজ্রসংঘাতঃ কুমারোঽভ্যপতদ্গিরৌ
পততা তেন শতধা শিলা গাত্রৈর্বিচূর্ণিতা
তাং শিলাং চূর্ণিতাং দৃষ্ট্বা পাণ্ডুর্বিস্ময়মাগমৎ
114.14
যস্মিন্নহনি ভীমস্তু জজ্ঞে ভরতসত্তম
দুর্যোধনোঽপি তত্রৈব প্রজজ্ঞে বসুধাধিপ
114.15
জাতে বৃকোদরে পাণ্ডুরিদং ভূয়োঽন্বচিন্তয়ৎ
কথং নু মে বরঃ পুত্রো লোকশ্রেষ্ঠো ভবেদিতি
114.16
দৈবে পুরুষকারে চ লোকোঽয়ং হি প্রতিষ্ঠিতঃ
তত্র দৈবং তু বিধিনা কালয়ুক্তেন লভ্যতে
114.17
ইন্দ্রো হি রাজা দেবানাং প্রধান ইতি নঃ শ্রুতম্
অপ্রমেয়বলোত্সাহো বীর্যবানমিতদ্যুতিঃ
114.18
তং তোষয়িত্বা তপসা পুত্রং লপ্স্যে মহাবলম্
যং দাস্যতি স মে পুত্রং স বরীয়ান্ভবিষ্যতি
কর্মণা মনসা বাচা তস্মাত্তপ্স্যে মহত্তপঃ
114.19
ততঃ পাণ্ডুর্মহাতেজা মন্ত্রয়িত্বা মহর্ষিভিঃ
দিদেশ কুন্ত্যাঃ কৌরব্যো ব্রতং সাংবত্সরং শুভম্
114.20
আত্মনা চ মহাবাহুরেকপাদস্থিতোঽভবৎ
উগ্রং স তপ আতস্থে পরমেণ সমাধিনা
114.21
আরিরাধয়িষুর্দেবং ত্রিদশানাং তমীশ্বরম্
সূর্যেণ সহ ধর্মাত্মা পর্যবর্তত ভারত
114.22
তং তু কালেন মহতা বাসবঃ প্রত্যভাষত
পুত্রং তব প্রদাস্যামি ত্রিষু লোকেষু বিশ্রুতম্
114.23
দেবানাং ব্রাহ্মণানাং চ সুহৃদাং চার্থসাধকম্
সুতং তেঽগ্র্যং প্রদাস্যামি সর্বামিত্রবিনাশনম্
114.24
ইত্যুক্তঃ কৌরবো রাজা বাসবেন মহাত্মনা
উবাচ কুন্তীং ধর্মাত্মা দেবরাজবচঃ স্মরন্
114.25
নীতিমন্তং মহাত্মানমাদিত্যসমতেজসম্
দুরাধর্ষং ক্রিয়াবন্তমতীবাদ্ভুতদর্শনম্
114.26
পুত্রং জনয় সুশ্রোণি ধাম ক্ষত্রিয়তেজসাম্
লব্ধঃ প্রসাদো দেবেন্দ্রাত্তমাহ্বয় শুচিস্মিতে
114.27
এবমুক্তা ততঃ শক্রমাজুহাব যশস্বিনী
অথাজগাম দেবেন্দ্রো জনয়ামাস চার্জুনম্
114.28
জাতমাত্রে কুমারে তু বাগুবাচাশরীরিণী
মহাগম্ভীরনির্ঘোষা নভো নাদয়তী তদা
114.29
কার্তবীর্যসমঃ কুন্তি শিবিতুল্যপরাক্রমঃ
এষ শক্র ইবাজেয়ো যশস্তে প্রথয়িষ্যতি
114.30
অদিত্যা বিষ্ণুনা প্রীতির্যথাভূদভিবর্ধিতা
তথা বিষ্ণুসমঃ প্রীতিং বর্ধয়িষ্যতি তেঽর্জুনঃ
114.31
এষ মদ্রান্বশে কৃত্বা কুরূংশ্চ সহ কেকয়ৈঃ
চেদিকাশিকরূষাংশ্চ কুরুলক্ষ্ম সুধাস্যতি
114.32
এতস্য ভুজবীর্যেণ খাণ্ডবে হব্যবাহনঃ
মেদসা সর্বভূতানাং তৃপ্তিং যাস্যতি বৈ পরাম্
114.33
গ্রামণীশ্চ মহীপালানেষ জিত্বা মহাবলঃ
ভ্রাতৃভিঃ সহিতো বীরস্ত্রীন্মেধানাহরিষ্যতি
114.34
জামদগ্ন্যসমঃ কুন্তি বিষ্ণুতুল্যপরাক্রমঃ
এষ বীর্যবতাং শ্রেষ্ঠো ভবিষ্যত্যপরাজিতঃ
114.35
তথা দিব্যানি চাস্ত্রাণি নিখিলান্যাহরিষ্যতি
বিপ্রনষ্টাং শ্রিয়ং চায়মাহর্তা পুরুষর্ষভঃ
114.36
এতামত্যদ্ভুতাং বাচং কুন্তীপুত্রস্য সূতকে
উক্তবান্বায়ুরাকাশে কুন্তী শুশ্রাব চাস্য তাম্
114.37
বাচমুচ্চারিতামুচ্চৈস্তাং নিশম্য তপস্বিনাম্
বভূব পরমো হর্ষঃ শতশৃঙ্গনিবাসিনাম্
114.38
তথা দেবঋষীণাং চ সেন্দ্রাণাং চ দিবৌকসাম্
আকাশে দুন্দুভীনাং চ বভূব তুমুলঃ স্বনঃ
114.39
উদতিষ্ঠন্মহাঘোষঃ পুষ্পবৃষ্টিভিরাবৃতঃ
সমবেত্য চ দেবানাং গণাঃ পার্থমপূজয়ন্
114.40
কাদ্রবেয়া বৈনতেয়া গন্ধর্বাপ্সরসস্তথা
প্রজানাং পতয়ঃ সর্বে সপ্ত চৈব মহর্ষয়ঃ
114.41
ভরদ্বাজঃ কশ্যপো গৌতমশ্চ; বিশ্বামিত্রো জমদগ্নির্বসিষ্ঠঃ
যশ্চোদিতো ভাস্করেঽভূত্প্রনষ্টে; সোঽপ্যত্রাত্রির্ভগবানাজগাম
114.42
মরীচিরঙ্গিরাশ্চৈব পুলস্ত্যঃ পুলহঃ ক্রতুঃ
দক্ষঃ প্রজাপতিশ্চৈব গন্ধর্বাপ্সরসস্তথা
114.43
দিব্যমাল্যাম্বরধরাঃ সর্বালংকারভূষিতাঃ
উপগায়ন্তি বীভত্সুমুপনৃত্যন্তি চাপ্সরাঃ
গন্ধর্বৈঃ সহিতঃ শ্রীমান্প্রাগায়ত চ তুম্বুরুঃ
114.44
ভীমসেনোগ্রসেনৌ চ ঊর্ণায়ুরনঘস্তথা
গোপতির্ধৃতরাষ্ট্রশ্চ সূর্যবর্চাশ্চ সপ্তমঃ
114.45
যুগপস্তৃণপঃ কার্ষ্ণির্নন্দিশ্চিত্ররথস্তথা
ত্রয়োদশঃ শালিশিরাঃ পর্জন্যশ্চ চতুর্দশঃ
114.46
কলিঃ পঞ্চদশশ্চাত্র নারদশ্চৈব ষোডশঃ
সদ্বা বৃহদ্বা বৃহকঃ করালশ্চ মহায়শাঃ
114.47
ব্রহ্মচারী বহুগুণঃ সুপর্ণশ্চেতি বিশ্রুতঃ
বিশ্বাবসুর্ভুমন্যুশ্চ সুচন্দ্রো দশমস্তথা
114.48
গীতমাধুর্যসংপন্নৌ বিখ্যাতৌ চ হহাহুহূ
ইত্যেতে দেবগন্ধর্বা জগুস্তত্র নরর্ষভম্
114.49
তথৈবাপ্সরসো হৃষ্টাঃ সর্বালংকারভূষিতাঃ
ননৃতুর্বৈ মহাভাগা জগুশ্চায়তলোচনাঃ
114.50
অনূনা চানবদ্যা চ প্রিয়মুখ্যা গুণাবরা
অদ্রিকা চ তথা সাচী মিশ্রকেশী অলম্বুসা
114.51
মরীচিঃ শিচুকা চৈব বিদ্যুত্পর্ণা তিলোত্তমা
অগ্নিকা লক্ষণা ক্ষেমা দেবী রম্ভা মনোরমা
114.52
অসিতা চ সুবাহুশ্চ সুপ্রিয়া সুবপুস্তথা
পুণ্ডরীকা সুগন্ধা চ সুরথা চ প্রমাথিনী
114.53
কাম্যা শারদ্বতী চৈব ননৃতুস্তত্র সংঘশঃ
মেনকা সহজন্যা চ পর্ণিকা পুঞ্জিকস্থলা
114.54
ক্রতুস্থলা ঘৃতাচী চ বিশ্বাচী পূর্বচিত্ত্যপি
উম্লোচেত্যভিবিখ্যাতা প্রম্লোচেতি চ তা দশ
উর্বশ্যেকাদশীত্যেতা জগুরায়তলোচনাঃ
114.55
ধাতার্যমা চ মিত্রশ্চ বরুণোংঽশো ভগস্তথা
ইন্দ্রো বিবস্বান্পূষা চ ত্বষ্টা চ সবিতা তথা
114.56
পর্জন্যশ্চৈব বিষ্ণুশ্চ আদিত্যাঃ পাবকার্চিষঃ
মহিমানং পাণ্ডবস্য বর্ধয়ন্তোঽম্বরে স্থিতাঃ
114.57
মৃগব্যাধশ্চ শর্বশ্চ নিরৃতিশ্চ মহায়শাঃ
অজৈকপাদহির্বুধ্ন্যঃ পিনাকী চ পরংতপঃ
114.58
দহনোঽথেশ্বরশ্চৈব কপালী চ বিশাং পতে
স্থাণুর্ভবশ্চ ভগবান্রুদ্রাস্তত্রাবতস্থিরে
114.59
অশ্বিনৌ বসবশ্চাষ্টৌ মরুতশ্চ মহাবলাঃ
বিশ্বেদেবাস্তথা সাধ্যাস্তত্রাসন্পরিসংস্থিতাঃ
114.60
কর্কোটকোঽথ শেষশ্চ বাসুকিশ্চ ভুজংগমঃ
কচ্ছপশ্চাপকুণ্ডশ্চ তক্ষকশ্চ মহোরগঃ
114.61
আয়য়ুস্তেজসা যুক্তা মহাক্রোধা মহাবলাঃ
এতে চান্যে চ বহবস্তত্র নাগা ব্যবস্থিতাঃ
114.62
তার্ক্ষ্যশ্চারিষ্টনেমিশ্চ গরুডশ্চাসিতধ্বজঃ
অরুণশ্চারুণিশ্চৈব বৈনতেয়া ব্যবস্থিতাঃ
114.63
তদ্দৃষ্ট্বা মহদাশ্চর্যং বিস্মিতা মুনিসত্তমাঃ
অধিকাং স্ম ততো বৃত্তিমবর্তন্পাণ্ডবান্প্রতি
114.64
পাণ্ডুস্তু পুনরেবৈনাং পুত্রলোভান্মহায়শাঃ
প্রাহিণোদ্দর্শনীয়াঙ্গীং কুন্তী ত্বেনমথাব্রবীৎ
114.65
নাতশ্চতুর্থং প্রসবমাপত্স্বপি বদন্ত্যুত
অতঃ পরং চারিণী স্যাত্পঞ্চমে বন্ধকী ভবেৎ
114.66
স ত্বং বিদ্বন্ধর্মমিমং বুদ্ধিগম্যং কথং নু মাম্
অপত্যার্থং সমুত্ক্রম্য প্রমাদাদিব ভাষসে