Utshovঅধ্যায় 115
115.1
বৈশংপায়ন উবাচ
কুন্তীপুত্রেষু জাতেষু ধৃতরাষ্ট্রাত্মজেষু চ
মদ্ররাজসুতা পাণ্ডুং রহো বচনমব্রবীৎ
115.2
ন মেঽস্তি ত্বয়ি সংতাপো বিগুণেঽপি পরংতপ
নাবরত্বে বরার্হায়াঃ স্থিত্বা চানঘ নিত্যদা
115.3
গান্ধার্যাশ্চৈব নৃপতে জাতং পুত্রশতং তথা
শ্রুত্বা ন মে তথা দুঃখমভবত্কুরুনন্দন
115.4
ইদং তু মে মহদ্দুঃখং তুল্যতায়ামপুত্রতা
দিষ্ট্যা ত্বিদানীং ভর্তুর্মে কুন্ত্যামপ্যস্তি সংততিঃ
115.5
যদি ত্বপত্যসংতানং কুন্তিরাজসুতা ময়ি
কুর্যাদনুগ্রহো মে স্যাত্তব চাপি হিতং ভবেৎ
115.6
স্তম্ভো হি মে সপত্নীত্বাদ্বক্তুং কুন্তিসুতাং প্রতি
যদি তু ত্বং প্রসন্নো মে স্বয়মেনাং প্রচোদয়
115.7
পাণ্ডুরুবাচ
মমাপ্যেষ সদা মাদ্রি হৃদ্যর্থঃ পরিবর্ততে
ন তু ত্বাং প্রসহে বক্তুমিষ্টানিষ্টবিবক্ষয়া
115.8
তব ত্বিদং মতং জ্ঞাত্বা প্রয়তিষ্যাম্যতঃ পরম্
মন্যে ধ্রুবং ময়োক্তা সা বচো মে প্রতিপত্স্যতে
115.9
বৈশংপায়ন উবাচ
ততঃ কুন্তীং পুনঃ পাণ্ডুর্বিবিক্ত ইদমব্রবীৎ
কুলস্য মম সংতানং লোকস্য চ কুরু প্রিয়ম্
115.10
মম চাপিণ্ডনাশায় পূর্বেষামপি চাত্মনঃ
মত্প্রিয়ার্থং চ কল্যাণি কুরু কল্যাণমুত্তমম্
115.11
যশসোঽর্থায় চৈব ত্বং কুরু কর্ম সুদুষ্করম্
প্রাপ্যাধিপত্যমিন্দ্রেণ যজ্ঞৈরিষ্টং যশোর্থিনা
115.12
তথা মন্ত্রবিদো বিপ্রাস্তপস্তপ্ত্বা সুদুষ্করম্
গুরূনভ্যুপগচ্ছন্তি যশসোঽর্থায় ভামিনি
115.13
তথা রাজর্ষয়ঃ সর্বে ব্রাহ্মণাশ্চ তপোধনাঃ
চক্রুরুচ্চাবচং কর্ম যশসোঽর্থায় দুষ্করম্
115.14
সা ত্বং মাদ্রীং প্লবেনেব তারয়েমামনিন্দিতে
অপত্যসংবিভাগেন পরাং কীর্তিমবাপ্নুহি
115.15
এবমুক্তাব্রবীন্মাদ্রীং সকৃচ্চিন্তয় দৈবতম্
তস্মাত্তে ভবিতাপত্যমনুরূপমসংশয়ম্
115.16
ততো মাদ্রী বিচার্যৈব জগাম মনসাশ্বিনৌ
তাবাগম্য সুতৌ তস্যাং জনয়ামাসতুর্যমৌ
115.17
নকুলং সহদেবং চ রূপেণাপ্রতিমৌ ভুবি
তথৈব তাবপি যমৌ বাগুবাচাশরীরিণী
115.18
রূপসত্ত্বগুণোপেতাবেতাবন্যাঞ্জনানতি
ভাসতস্তেজসাত্যর্থং রূপদ্রবিণসংপদা
115.19
নামানি চক্রিরে তেষাং শতশৃঙ্গনিবাসিনঃ
ভক্ত্যা চ কর্মণা চৈব তথাশীর্ভির্বিশাং পতে
115.20
জ্যেষ্ঠং যুধিষ্ঠিরেত্যাহুর্ভীমসেনেতি মধ্যমম্
অর্জুনেতি তৃতীয়ং চ কুন্তীপুত্রানকল্পয়ন্
115.21
পূর্বজং নকুলেত্যেবং সহদেবেতি চাপরম্
মাদ্রীপুত্রাবকথয়ংস্তে বিপ্রাঃ প্রীতমানসাঃ
অনুসংবত্সরং জাতা অপি তে কুরুসত্তমাঃ
115.22
কুন্তীমথ পুনঃ পাণ্ডুর্মাদ্র্যর্থে সমচোদয়ৎ
তমুবাচ পৃথা রাজন্রহস্যুক্তা সতী সদা
115.23
উক্তা সকৃদ্দ্বন্দ্বমেষা লেভে তেনাস্মি বঞ্চিতা
বিভেম্যস্যাঃ পরিভবান্নারীণাং গতিরীদৃশী
115.24
নাজ্ঞাসিষমহং মূঢা দ্বন্দ্বাহ্বানে ফলদ্বয়ম্
তস্মান্নাহং নিয়োক্তব্যা ত্বয়ৈষোঽস্তু বরো মম
115.25
এবং পাণ্ডোঃ সুতাঃ পঞ্চ দেবদত্তা মহাবলাঃ
সংভূতাঃ কীর্তিমন্তস্তে কুরুবংশবিবর্ধনাঃ
115.26
শুভলক্ষণসংপন্নাঃ সোমবত্প্রিয়দর্শনাঃ
সিংহদর্পা মহেষ্বাসাঃ সিংহবিক্রান্তগামিনঃ
সিংহগ্রীবা মনুষ্যেন্দ্রা ববৃধুর্দেববিক্রমাঃ
115.27
বিবর্ধমানাস্তে তত্র পুণ্যে হৈমবতে গিরৌ
বিস্ময়ং জনয়ামাসুর্মহর্ষীণাং সমেয়ুষাম্
115.28
তে চ পঞ্চ শতং চৈব কুরুবংশবিবর্ধনাঃ
সর্বে ববৃধুরল্পেন কালেনাপ্স্বিব নীরজাঃ