Utshovঅধ্যায় 116
116.1
বৈশংপায়ন উবাচ
দর্শনীয়াংস্ততঃ পুত্রান্পাণ্ডুঃ পঞ্চ মহাবনে
তান্পশ্যন্পর্বতে রেমে স্ববাহুবলপালিতান্
116.2
সুপুষ্পিতবনে কালে কদাচিন্মধুমাধবে
ভূতসংমোহনে রাজা সভার্যো ব্যচরদ্বনম্
116.3
পলাশৈস্তিলকৈশ্চূতৈশ্চম্পকৈঃ পারিভদ্রকৈঃ
অন্যৈশ্চ বহুভির্বৃক্ষৈঃ ফলপুষ্পসমৃদ্ধিভিঃ
116.4
জলস্থানৈশ্চ বিবিধৈঃ পদ্মিনীভিশ্চ শোভিতম্
পাণ্ডোর্বনং তু সংপ্রেক্ষ্য প্রজজ্ঞে হৃদি মন্মথঃ
116.5
প্রহৃষ্টমনসং তত্র বিহরন্তং যথামরম্
তং মাদ্র্যনুজগামৈকা বসনং বিভ্রতী শুভম্
116.6
সমীক্ষমাণঃ স তু তাং বয়ঃস্থাং তনুবাসসম্
তস্য কামঃ প্রববৃধে গহনেঽগ্নিরিবোত্থিতঃ
116.7
রহস্যাত্মসমাং দৃষ্ট্বা রাজা রাজীবলোচনাম্
ন শশাক নিয়ন্তুং তং কামং কামবলাত্কৃতঃ
116.8
তত এনাং বলাদ্রাজা নিজগ্রাহ রহোগতাম্
বার্যমাণস্তয়া দেব্যা বিস্ফুরন্ত্যা যথাবলম্
116.9
স তু কামপরীতাত্মা তং শাপং নান্ববুধ্যত
মাদ্রীং মৈথুনধর্মেণ গচ্ছমানো বলাদিব
116.10
জীবিতান্তায় কৌরব্যো মন্মথস্য বশং গতঃ
শাপজং ভয়মুত্সৃজ্য জগামৈব বলাত্প্রিয়াম্
116.11
তস্য কামাত্মনো বুদ্ধিঃ সাক্ষাত্কালেন মোহিতা
সংপ্রমথ্যেন্দ্রিয়গ্রামং প্রনষ্টা সহ চেতসা
116.12
স তয়া সহ সংগম্য ভার্যয়া কুরুনন্দন
পাণ্ডুঃ পরমধর্মাত্মা যুয়ুজে কালধর্মণা
116.13
ততো মাদ্রী সমালিঙ্গ্য রাজানং গতচেতসম্
মুমোচ দুঃখজং শব্দং পুনঃ পুনরতীব হ
116.14
সহ পুত্রৈস্ততঃ কুন্তী মাদ্রীপুত্রৌ চ পাণ্ডবৌ
আজগ্মুঃ সহিতাস্তত্র যত্র রাজা তথাগতঃ
116.15
ততো মাদ্র্যব্রবীদ্রাজন্নার্তা কুন্তীমিদং বচঃ
একৈব ত্বমিহাগচ্ছ তিষ্ঠন্ত্বত্রৈব দারকাঃ
116.16
তচ্ছ্রুত্বা বচনং তস্যাস্তত্রৈবাবার্য দারকান্
হতাহমিতি বিক্রুশ্য সহসোপজগাম হ
116.17
দৃষ্ট্বা পাণ্ডুং চ মাদ্রীং চ শয়ানৌ ধরণীতলে
কুন্তী শোকপরীতাঙ্গী বিললাপ সুদুঃখিতা
116.18
রক্ষ্যমাণো ময়া নিত্যং বীরঃ সততমাত্মবান্
কথং ত্বমভ্যতিক্রান্তঃ শাপং জানন্বনৌকসঃ
116.19
ননু নাম ত্বয়া মাদ্রি রক্ষিতব্যো জনাধিপঃ
সা কথং লোভিতবতী বিজনে ত্বং নরাধিপম্
116.20
কথং দীনস্য সততং ত্বামাসাদ্য রহোগতাম্
তং বিচিন্তয়তঃ শাপং প্রহর্ষঃ সমজায়ত
116.21
ধন্যা ত্বমসি বাহ্লীকি মত্তো ভাগ্যতরা তথা
দৃষ্টবত্যসি যদ্বক্ত্রং প্রহৃষ্টস্য মহীপতেঃ
116.22
মাদ্র্যুবাচ
বিলোভ্যমানেন ময়া বার্যমাণেন চাসকৃৎ
আত্মা ন বারিতোঽনেন সত্যং দিষ্টং চিকীর্ষুণা
116.23
কুন্ত্যুবাচ
অহং জ্যেষ্ঠা ধর্মপত্নী জ্যেষ্ঠং ধর্মফলং মম
অবশ্যং ভাবিনো ভাবান্মা মাং মাদ্রি নিবর্তয়
116.24
অন্বেষ্যামীহ ভর্তারমহং প্রেতবশং গতম্
উত্তিষ্ঠ ত্বং বিসৃজ্যৈনমিমান্রক্ষস্ব দারকান্
116.25
মাদ্র্যুবাচ
অহমেবানুয়াস্যামি ভর্তারমপলায়িনম্
ন হি তৃপ্তাস্মি কামানাং তজ্জ্যেষ্ঠা অনুমন্যতাম্
116.26
মাং চাভিগম্য ক্ষীণোঽয়ং কামাদ্ভরতসত্তমঃ
তমুচ্ছিন্দ্যামস্য কামং কথং নু যমসাদনে
116.27
ন চাপ্যহং বর্তয়ন্তী নির্বিশেষং সুতেষু তে
বৃত্তিমার্যে চরিষ্যামি স্পৃশেদেনস্তথা হি মাম্
116.28
তস্মান্মে সুতয়োঃ কুন্তি বর্তিতব্যং স্বপুত্রবৎ
মাং হি কাময়মানোঽয়ং রাজা প্রেতবশং গতঃ
116.29
রাজ্ঞঃ শরীরেণ সহ মমাপীদং কলেবরম্
দগ্ধব্যং সুপ্রতিচ্ছন্নমেতদার্যে প্রিয়ং কুরু
116.30
দারকেষ্বপ্রমত্তা চ ভবেথাশ্চ হিতা মম
অতোঽন্যন্ন প্রপশ্যামি সংদেষ্টব্যং হি কিংচন
116.31
বৈশংপায়ন উবাচ
ইত্যুক্ত্বা তং চিতাগ্নিস্থং ধর্মপত্নী নরর্ষভম্
মদ্ররাজাত্মজা তূর্ণমন্বারোহদ্যশস্বিনী