Utshovঅধ্যায় 117
117.1
বৈশংপায়ন উবাচ
পাণ্ডোরবভৃথং কৃত্বা দেবকল্পা মহর্ষয়ঃ
ততো মন্ত্রমকুর্বন্ত তে সমেত্য তপস্বিনঃ
117.2
হিত্বা রাজ্যং চ রাষ্ট্রং চ স মহাত্মা মহাতপাঃ
অস্মিন্স্থানে তপস্তপ্তুং তাপসাঞ্শরণং গতঃ
117.3
স জাতমাত্রান্পুত্রাংশ্চ দারাংশ্চ ভবতামিহ
প্রদায়োপনিধিং রাজা পাণ্ডুঃ স্বর্গমিতো গতঃ
117.4
তে পরস্পরমামন্ত্র্য সর্বভূতহিতে রতাঃ
পাণ্ডোঃ পুত্রান্পুরস্কৃত্য নগরং নাগসাহ্বয়ম্
117.5
উদারমনসঃ সিদ্ধা গমনে চক্রিরে মনঃ
ভীষ্মায় পাণ্ডবান্দাতুং ধৃতরাষ্ট্রায় চৈব হি
117.6
তস্মিন্নেব ক্ষণে সর্বে তানাদায় প্রতস্থিরে
পাণ্ডোর্দারাংশ্চ পুত্রাংশ্চ শরীরং চৈব তাপসাঃ
117.7
সুখিনী সা পুরা ভূত্বা সততং পুত্রবত্সলা
প্রপন্না দীর্ঘমধ্বানং সংক্ষিপ্তং তদমন্যত
117.8
সা নদীর্ঘেণ কালেন সংপ্রাপ্তা কুরুজাঙ্গলম্
বর্ধমানপুরদ্বারমাসসাদ যশস্বিনী
117.9
তং চারণসহস্রাণাং মুনীনামাগমং তদা
শ্রুত্বা নাগপুরে নৄণাং বিস্ময়ঃ সমজায়ত
117.10
মুহূর্তোদিত আদিত্যে সর্বে ধর্মপুরস্কৃতাঃ
সদারাস্তাপসান্দ্রষ্টুং নির্যয়ুঃ পুরবাসিনঃ
117.11
স্ত্রীসংঘাঃ ক্ষত্রসংঘাশ্চ যানসংঘান্সমাস্থিতাঃ
ব্রাহ্মণৈঃ সহ নির্জগ্মুর্ব্রাহ্মণানাং চ যোষিতঃ
117.12
তথা বিট্শূদ্রসংঘানাং মহান্ব্যতিকরোঽভবৎ
ন কশ্চিদকরোদীর্ষ্যামভবন্ধর্মবুদ্ধয়ঃ
117.13
তথা ভীষ্মঃ শাংতনবঃ সোমদত্তোঽথ বাহ্লিকঃ
প্রজ্ঞাচক্ষুশ্চ রাজর্ষিঃ ক্ষত্তা চ বিদুরঃ স্বয়ম্
117.14
সা চ সত্যবতী দেবী কৌসল্যা চ যশস্বিনী
রাজদারৈঃ পরিবৃতা গান্ধারী চ বিনির্যয়ৌ
117.15
ধৃতরাষ্ট্রস্য দায়াদা দুর্যোধনপুরোগমাঃ
ভূষিতা ভূষণৈশ্চিত্রৈঃ শতসংখ্যা বিনির্যয়ুঃ
117.16
তান্মহর্ষিগণান্সর্বাঞ্শিরোভিরভিবাদ্য চ
উপোপবিবিশুঃ সর্বে কৌরব্যাঃ সপুরোহিতাঃ
117.17
তথৈব শিরসা ভূমাবভিবাদ্য প্রণম্য চ
উপোপবিবিশুঃ সর্বে পৌরজানপদা অপি
117.18
তমকূজমিবাজ্ঞায় জনৌঘং সর্বশস্তদা
ভীষ্মো রাজ্যং চ রাষ্ট্রং চ মহর্ষিভ্যো ন্যবেদয়ৎ
117.19
তেষামথো বৃদ্ধতমঃ প্রত্যুত্থায় জটাজিনী
মহর্ষিমতমাজ্ঞায় মহর্ষিরিদমব্রবীৎ
117.20
যঃ স কৌরব্যদায়াদঃ পাণ্ডুর্নাম নরাধিপঃ
কামভোগান্পরিত্যজ্য শতশৃঙ্গমিতো গতঃ
117.21
ব্রহ্মচর্যব্রতস্থস্য তস্য দিব্যেন হেতুনা
সাক্ষাদ্ধর্মাদয়ং পুত্রস্তস্য জাতো যুধিষ্ঠিরঃ
117.22
তথেমং বলিনাং শ্রেষ্ঠং তস্য রাজ্ঞো মহাত্মনঃ
মাতরিশ্বা দদৌ পুত্রং ভীমং নাম মহাবলম্
117.23
পুরুহূতাদয়ং জজ্ঞে কুন্ত্যাং সত্যপরাক্রমঃ
যস্য কীর্তির্মহেষ্বাসান্সর্বানভিভবিষ্যতি
117.24
যৌ তু মাদ্রী মহেষ্বাসাবসূত কুরুসত্তমৌ
অশ্বিভ্যাং মনুজব্যাঘ্রাবিমৌ তাবপি তিষ্ঠতঃ
117.25
চরতা ধর্মনিত্যেন বনবাসং যশস্বিনা
এষ পৈতামহো বংশঃ পাণ্ডুনা পুনরুদ্ধৃতঃ
117.26
পুত্রাণাং জন্ম বৃদ্ধিং চ বৈদিকাধ্যয়নানি চ
পশ্যতঃ সততং পাণ্ডোঃ শশ্বত্প্রীতিরবর্ধত
117.27
বর্তমানঃ সতাং বৃত্তে পুত্রলাভমবাপ্য চ
পিতৃলোকং গতঃ পাণ্ডুরিতঃ সপ্তদশেঽহনি
117.28
তং চিতাগতমাজ্ঞায় বৈশ্বানরমুখে হুতম্
প্রবিষ্টা পাবকং মাদ্রী হিত্বা জীবিতমাত্মনঃ
117.29
সা গতা সহ তেনৈব পতিলোকমনুব্রতা
তস্যাস্তস্য চ যত্কার্যং ক্রিয়তাং তদনন্তরম্
117.30
ইমে তয়োঃ শরীরে দ্বে সুতাশ্চেমে তয়োর্বরাঃ
ক্রিয়াভিরনুগৃহ্যন্তাং সহ মাত্রা পরংতপাঃ
117.31
প্রেতকার্যে চ নির্বৃত্তে পিতৃমেধং মহায়শাঃ
লভতাং সর্বধর্মজ্ঞঃ পাণ্ডুঃ কুরুকুলোদ্বহঃ
117.32
এবমুক্ত্বা কুরূন্সর্বান্কুরূণামেব পশ্যতাম্
ক্ষণেনান্তর্হিতাঃ সর্বে চারণা গুহ্যকৈঃ সহ
117.33
গন্ধর্বনগরাকারং তত্রৈবান্তর্হিতং পুনঃ
ঋষিসিদ্ধগণং দৃষ্ট্বা বিস্ময়ং তে পরং যয়ুঃ