Utshovঅধ্যায় 118
118.1
ধৃতরাষ্ট্র উবাচ
পাণ্ডোর্বিদুর সর্বাণি প্রেতকার্যাণি কারয়
রাজবদ্রাজসিংহস্য মাদ্র্যাশ্চৈব বিশেষতঃ
118.2
পশূন্বাসাংসি রত্নানি ধনানি বিবিধানি চ
পাণ্ডোঃ প্রয়চ্ছ মাদ্র্যাশ্চ যেভ্যো যাবচ্চ বাঞ্ছিতম্
118.3
যথা চ কুন্তী সত্কারং কুর্যান্মাদ্র্যাস্তথা কুরু
যথা ন বায়ুর্নাদিত্যঃ পশ্যেতাং তাং সুসংবৃতাম্
118.4
ন শোচ্যঃ পাণ্ডুরনঘঃ প্রশস্যঃ স নরাধিপঃ
যস্য পঞ্চ সুতা বীরা জাতাঃ সুরসুতোপমাঃ
118.5
বৈশংপায়ন উবাচ
বিদুরস্তং তথেত্যুক্ত্বা ভীষ্মেণ সহ ভারত
পাণ্ডুং সংস্কারয়ামাস দেশে পরমসংবৃতে
118.6
ততস্তু নগরাত্তূর্ণমাজ্যহোমপুরস্কৃতাঃ
নির্হৃতাঃ পাবকা দীপ্তাঃ পাণ্ডো রাজপুরোহিতৈঃ
118.7
অথৈনমার্তবৈর্গন্ধৈর্মাল্যৈশ্চ বিবিধৈর্বরৈঃ
শিবিকাং সমলংচক্রুর্বাসসাচ্ছাদ্য সর্বশঃ
118.8
তাং তথা শোভিতাং মাল্যৈর্বাসোভিশ্চ মহাধনৈঃ
অমাত্যা জ্ঞাতয়শ্চৈব সুহৃদশ্চোপতস্থিরে
118.9
নৃসিংহং নরয়ুক্তেন পরমালংকৃতেন তম্
অবহন্যানমুখ্যেন সহ মাদ্র্যা সুসংবৃতম্
118.10
পাণ্ডুরেণাতপত্রেণ চামরব্যজনেন চ
সর্ববাদিত্রনাদৈশ্চ সমলংচক্রিরে ততঃ
118.11
রত্নানি চাপ্যুপাদায় বহূনি শতশো নরাঃ
প্রদদুঃ কাঙ্ক্ষমাণেভ্যঃ পাণ্ডোস্তত্রৌর্ধ্বদেহিকম্
118.12
অথ ছত্রাণি শুভ্রাণি পাণ্ডুরাণি বৃহন্তি চ
আজহ্রুঃ কৌরবস্যার্থে বাসাংসি রুচিরাণি চ
118.13
যাজকৈঃ শুক্লবাসোভির্হূয়মানা হুতাশনাঃ
অগচ্ছন্নগ্রতস্তস্য দীপ্যমানাঃ স্বলংকৃতাঃ
118.14
ব্রাহ্মণাঃ ক্ষত্রিয়া বৈশ্যাঃ শূদ্রাশ্চৈব সহস্রশঃ
রুদন্তঃ শোকসংতপ্তা অনুজগ্মুর্নরাধিপম্
118.15
অয়মস্মানপাহায় দুঃখে চাধায় শাশ্বতে
কৃত্বানাথান্পরো নাথঃ ক্ব যাস্যতি নরাধিপঃ
118.16
ক্রোশন্তঃ পাণ্ডবাঃ সর্বে ভীষ্মো বিদুর এব চ
রমণীয়ে বনোদ্দেশে গঙ্গাতীরে সমে শুভে
118.17
ন্যাসয়ামাসুরথ তাং শিবিকাং সত্যবাদিনঃ
সভার্যস্য নৃসিংহস্য পাণ্ডোরক্লিষ্টকর্মণঃ
118.18
ততস্তস্য শরীরং তত্সর্বগন্ধনিষেবিতম্
শুচিকালীয়কাদিগ্ধং মুখ্যস্নানাধিবাসিতম্
পর্যষিঞ্চজ্জলেনাশু শাতকুম্ভময়ৈর্ঘটৈঃ
118.19
চন্দনেন চ মুখ্যেন শুক্লেন সমলেপয়ন্
কালাগুরুবিমিশ্রেণ তথা তুঙ্গরসেন চ
118.20
অথৈনং দেশজৈঃ শুক্লৈর্বাসোভিঃ সময়োজয়ন্
আচ্ছন্নঃ স তু বাসোভির্জীবন্নিব নরর্ষভঃ
শুশুভে পুরুষব্যাঘ্রো মহার্হশয়নোচিতঃ
118.21
যাজকৈরভ্যনুজ্ঞাতং প্রেতকর্মণি নিষ্ঠিতৈঃ
ঘৃতাবসিক্তং রাজানং সহ মাদ্র্যা স্বলংকৃতম্
118.22
তুঙ্গপদ্মকমিশ্রেণ চন্দনেন সুগন্ধিনা
অন্যৈশ্চ বিবিধৈর্গন্ধৈরনল্পৈঃ সমদাহয়ন্
118.23
ততস্তয়োঃ শরীরে তে দৃষ্ট্বা মোহবশং গতা
হাহা পুত্রেতি কৌসল্যা পপাত সহসা ভুবি
118.24
তাং প্রেক্ষ্য পতিতামার্তাং পৌরজানপদো জনঃ
রুরোদ সস্বনং সর্বো রাজভক্ত্যা কৃপান্বিতঃ
118.25
ক্লান্তানীবার্তনাদেন সর্বাণি চ বিচুক্রুশুঃ
মানুষৈঃ সহ ভূতানি তির্যগ্যোনিগতান্যপি
118.26
তথা ভীষ্মঃ শাংতনবো বিদুরশ্চ মহামতিঃ
সর্বশঃ কৌরবাশ্চৈব প্রাণদন্ভৃশদুঃখিতাঃ
118.27
ততো ভীষ্মোঽথ বিদুরো রাজা চ সহ বন্ধুভিঃ
উদকং চক্রিরে তস্য সর্বাশ্চ কুরুয়োষিতঃ
118.28
কৃতোদকাংস্তানাদায় পাণ্ডবাঞ্শোককর্শিতান্
সর্বাঃ প্রকৃতয়ো রাজঞ্শোচন্ত্যঃ পর্যবারয়ন্
118.29
যথৈব পাণ্ডবা ভূমৌ সুষুপুঃ সহ বান্ধবৈঃ
তথৈব নাগরা রাজঞ্শিশ্যিরে ব্রাহ্মণাদয়ঃ
118.30
তদনানন্দমস্বস্থমাকুমারমহৃষ্টবৎ
বভূব পাণ্ডবৈঃ সার্ধং নগরং দ্বাদশ ক্ষপাঃ