Utshovঅধ্যায় 119
119.1
বৈশংপায়ন উবাচ
ততঃ ক্ষত্তা চ রাজা চ ভীষ্মশ্চ সহ বন্ধুভিঃ
দদুঃ শ্রাদ্ধং তদা পাণ্ডোঃ স্বধামৃতময়ং তদা
119.2
কুরূংশ্চ বিপ্রমুখ্যাংশ্চ ভোজয়িত্বা সহস্রশঃ
রত্নৌঘান্দ্বিজমুখ্যেভ্যো দত্ত্বা গ্রামবরানপি
119.3
কৃতশৌচাংস্ততস্তাংস্তু পাণ্ডবান্ভরতর্ষভান্
আদায় বিবিশুঃ পৌরাঃ পুরং বারণসাহ্বয়ম্
119.4
সততং স্মান্বতপ্যন্ত তমেব ভরতর্ষভম্
পৌরজানপদাঃ সর্বে মৃতং স্বমিব বান্ধবম্
119.5
শ্রাদ্ধাবসানে তু তদা দৃষ্ট্বা তং দুঃখিতং জনম্
সংমূঢাং দুঃখশোকার্তাং ব্যাসো মাতরমব্রবীৎ
119.6
অতিক্রান্তসুখাঃ কালাঃ প্রত্যুপস্থিতদারুণাঃ
শ্বঃ শ্বঃ পাপীয়দিবসাঃ পৃথিবী গতয়ৌবনা
119.7
বহুমায়াসমাকীর্ণো নানাদোষসমাকুলঃ
লুপ্তধর্মক্রিয়াচারো ঘোরঃ কালো ভবিষ্যতি
119.8
গচ্ছ ত্বং ত্যাগমাস্থায় যুক্তা বস তপোবনে
মা দ্রক্ষ্যসি কুলস্যাস্য ঘোরং সংক্ষয়মাত্মনঃ
119.9
তথেতি সমনুজ্ঞায় সা প্রবিশ্যাব্রবীত্স্নুষাম্
অম্বিকে তব পুত্রস্য দুর্নয়াত্কিল ভারতাঃ
সানুবন্ধা বিনঙ্ক্ষ্যন্তি পৌত্রাশ্চৈবেতি নঃ শ্রুতম্
119.10
তত্কৌসল্যামিমামার্তাং পুত্রশোকাভিপীডিতাম্
বনমাদায় ভদ্রং তে গচ্ছাবো যদি মন্যসে
119.11
তথেত্যুক্তে অম্বিকয়া ভীষ্মমামন্ত্র্য সুব্রতা
বনং যয়ৌ সত্যবতী স্নুষাভ্যাং সহ ভারত
119.12
তাঃ সুঘোরং তপঃ কৃত্বা দেব্যো ভরতসত্তম
দেহং ত্যক্ত্বা মহারাজ গতিমিষ্টাং যয়ুস্তদা
119.13
অবাপ্নুবন্ত বেদোক্তান্সংস্কারান্পাণ্ডবাস্তদা
অবর্ধন্ত চ ভোগাংস্তে ভুঞ্জানাঃ পিতৃবেশ্মনি
119.14
ধার্তরাষ্ট্রৈশ্চ সহিতাঃ ক্রীডন্তঃ পিতৃবেশ্মনি
বালক্রীডাসু সর্বাসু বিশিষ্টাঃ পাণ্ডবাভবন্
119.15
জবে লক্ষ্যাভিহরণে ভোজ্যে পাংসুবিকর্ষণে
ধার্তরাষ্ট্রান্ভীমসেনঃ সর্বান্স পরিমর্দতি
119.16
হর্ষাদেতান্ক্রীডমানান্গৃহ্য কাকনিলীয়নে
শিরঃসু চ নিগৃহ্যৈনান্যোধয়ামাস পাণ্ডবঃ
119.17
শতমেকোত্তরং তেষাং কুমারাণাং মহৌজসাম্
এক এব বিমৃদ্নাতি নাতিকৃচ্ছ্রাদ্বৃকোদরঃ
119.18
পাদেষু চ নিগৃহ্যৈনান্বিনিহত্য বলাদ্বলী
চকর্ষ ক্রোশতো ভূমৌ ঘৃষ্টজানুশিরোক্ষিকান্
119.19
দশ বালাঞ্জলে ক্রীডন্ভুজাভ্যাং পরিগৃহ্য সঃ
আস্তে স্ম সলিলে মগ্নঃ প্রমৃতাংশ্চ বিমুঞ্চতি
119.20
ফলানি বৃক্ষমারুহ্য প্রচিন্বন্তি চ তে যদা
তদা পাদপ্রহারেণ ভীমঃ কম্পয়তে দ্রুমম্
119.21
প্রহারবেগাভিহতাদ্দ্রুমাদ্ব্যাঘূর্ণিতাস্ততঃ
সফলাঃ প্রপতন্তি স্ম দ্রুতং স্রস্তাঃ কুমারকাঃ
119.22
ন তে নিয়ুদ্ধে ন জবে ন যোগ্যাসু কদাচন
কুমারা উত্তরং চক্রুঃ স্পর্ধমানা বৃকোদরম্
119.23
এবং স ধার্তরাষ্ট্রাণাং স্পর্ধমানো বৃকোদরঃ
অপ্রিয়েঽতিষ্ঠদত্যন্তং বাল্যান্ন দ্রোহচেতসা
119.24
ততো বলমতিখ্যাতং ধার্তরাষ্ট্রঃ প্রতাপবান্
ভীমসেনস্য তজ্জ্ঞাত্বা দুষ্টভাবমদর্শয়ৎ
119.25
তস্য ধর্মাদপেতস্য পাপানি পরিপশ্যতঃ
মোহাদৈশ্বর্যলোভাচ্চ পাপা মতিরজায়ত
119.26
অয়ং বলবতাং শ্রেষ্ঠঃ কুন্তীপুত্রো বৃকোদরঃ
মধ্যমঃ পাণ্ডুপুত্রাণাং নিকৃত্যা সংনিহন্যতাম্
119.27
অথ তস্মাদবরজং জ্যেষ্ঠং চৈব যুধিষ্ঠিরম্
প্রসহ্য বন্ধনে বদ্ধ্বা প্রশাসিষ্যে বসুংধরাম্
119.28
এবং স নিশ্চয়ং পাপঃ কৃত্বা দুর্যোধনস্তদা
নিত্যমেবান্তরপ্রেক্ষী ভীমস্যাসীন্মহাত্মনঃ
119.29
ততো জলবিহারার্থং কারয়ামাস ভারত
চেলকম্বলবেশ্মানি বিচিত্রাণি মহান্তি চ
119.30
প্রমাণকোট্যামুদ্দেশং স্থলং কিংচিদুপেত্য চ
ক্রীডাবসানে সর্বে তে শুচিবস্ত্রাঃ স্বলংকৃতাঃ
সর্বকামসমৃদ্ধং তদন্নং বুভুজিরে শনৈঃ
119.31
দিবসান্তে পরিশ্রান্তা বিহৃত্য চ কুরূদ্বহাঃ
বিহারাবসথেষ্বেব বীরা বাসমরোচয়ন্
119.32
খিন্নস্তু বলবান্ভীমো ব্যায়ামাভ্যধিকস্তদা
বাহয়িত্বা কুমারাংস্তাঞ্জলক্রীডাগতান্বিভুঃ
প্রমাণকোট্যাং বাসার্থী সুষ্বাপারুহ্য তত্স্থলম্
119.33
শীতং বাসং সমাসাদ্য শ্রান্তো মদবিমোহিতঃ
নিশ্চেষ্টঃ পাণ্ডবো রাজন্সুষ্বাপ মৃতকল্পবৎ
119.34
ততো বদ্ধ্বা লতাপাশৈর্ভীমং দুর্যোধনঃ শনৈঃ
গম্ভীরং ভীমবেগং চ স্থলাজ্জলমপাতয়ৎ
119.35
ততঃ প্রবুদ্ধঃ কৌন্তেয়ঃ সর্বং সংছিদ্য বন্ধনম্
উদতিষ্ঠজ্জলাদ্ভূয়ো ভীমঃ প্রহরতাং বরঃ
119.36
সুপ্তং চাপি পুনঃ সর্পৈস্তীক্ষ্ণদংষ্ট্রৈর্মহাবিষৈঃ
কুপিতৈর্দংশয়ামাস সর্বেষ্বেবাঙ্গমর্মসু
119.37
দংষ্ট্রাশ্চ দংষ্ট্রিণাং তেষাং মর্মস্বপি নিপাতিতাঃ
ত্বচং নৈবাস্য বিভিদুঃ সারত্বাত্পৃথুবক্ষসঃ
119.38
প্রতিবুদ্ধস্তু ভীমস্তান্সর্বান্সর্পানপোথয়ৎ
সারথিং চাস্য দয়িতমপহস্তেন জঘ্নিবান্
119.39
ভোজনে ভীমসেনস্য পুনঃ প্রাক্ষেপয়দ্বিষম্
কালকূটং নবং তীক্ষ্ণং সংভৃতং লোমহর্ষণম্
119.40
বৈশ্যাপুত্রস্তদাচষ্ট পার্থানাং হিতকাম্যয়া
তচ্চাপি ভুক্ত্বাজরয়দবিকারো বৃকোদরঃ
119.41
বিকারং ন হ্যজনয়ত্সুতীক্ষ্ণমপি তদ্বিষম্
ভীমসংহননো ভীমস্তদপ্যজরয়ত্ততঃ
119.42
এবং দুর্যোধনঃ কর্ণঃ শকুনিশ্চাপি সৌবলঃ
অনেকৈরভ্যুপায়ৈস্তাঞ্জিঘাংসন্তি স্ম পাণ্ডবান্
119.43
পাণ্ডবাশ্চাপি তত্সর্বং প্রত্যজানন্নরিংদমাঃ
উদ্ভাবনমকুর্বন্তো বিদুরস্য মতে স্থিতাঃ