অধ্যায় 120

120.1

জনমেজয় উবাচ
কৃপস্যাপি মহাব্রহ্মন্সংভবং বক্তুমর্হসি
শরস্তম্ভাত্কথং জজ্ঞে কথং চাস্ত্রাণ্যবাপ্তবান্

বৈশংপায়ন উবাচ
মহর্ষের্গৌতমস্যাসীচ্ছরদ্বান্নাম নামতঃ
পুত্রঃ কিল মহারাজ জাতঃ সহ শরৈর্বিভো

ন তস্য বেদাধ্যয়নে তথা বুদ্ধিরজায়ত
যথাস্য বুদ্ধিরভবদ্ধনুর্বেদে পরংতপ

অধিজগ্মুর্যথা বেদাংস্তপসা ব্রহ্মবাদিনঃ
তথা স তপসোপেতঃ সর্বাণ্যস্ত্রাণ্যবাপ হ

ধনুর্বেদপরত্বাচ্চ তপসা বিপুলেন চ
ভৃশং সংতাপয়ামাস দেবরাজং স গৌতমঃ

ততো জালপদীং নাম দেবকন্যাং সুরেশ্বরঃ
প্রাহিণোত্তপসো বিঘ্নং কুরু তস্যেতি কৌরব

সাভিগম্যাশ্রমপদং রমণীয়ং শরদ্বতঃ
ধনুর্বাণধরং বালা লোভয়ামাস গৌতমম্

তামেকবসনাং দৃষ্ট্বা গৌতমোঽপ্সরসং বনে
লোকেঽপ্রতিমসংস্থানামুত্ফুল্লনয়নোঽভবৎ

ধনুশ্চ হি শরাশ্চাস্য করাভ্যাং প্রাপতন্ভুবি
বেপথুশ্চাস্য তাং দৃষ্ট্বা শরীরে সমজায়ত

স তু জ্ঞানগরীয়স্ত্বাত্তপসশ্চ সমন্বয়াৎ
অবতস্থে মহাপ্রাজ্ঞো ধৈর্যেণ পরমেণ হ

যস্ত্বস্য সহসা রাজন্বিকারঃ সমপদ্যত
তেন সুস্রাব রেতোঽস্য স চ তন্নাববুধ্যত

স বিহায়াশ্রমং তং চ তাং চৈবাপ্সরসং মুনিঃ
জগাম রেতস্তত্তস্য শরস্তম্বে পপাত হ

শরস্তম্বে চ পতিতং দ্বিধা তদভবন্নৃপ
তস্যাথ মিথুনং জজ্ঞে গৌতমস্য শরদ্বতঃ

মৃগয়াং চরতো রাজ্ঞঃ শংতনোস্তু যদৃচ্ছয়া
কশ্চিত্সেনাচরোঽরণ্যে মিথুনং তদপশ্যত

ধনুশ্চ সশরং দৃষ্ট্বা তথা কৃষ্ণাজিনানি চ
ব্যবস্য ব্রাহ্মণাপত্যং ধনুর্বেদান্তগস্য তৎ
স রাজ্ঞে দর্শয়ামাস মিথুনং সশরং তদা

স তদাদায় মিথুনং রাজাথ কৃপয়ান্বিতঃ
আজগাম গৃহানেব মম পুত্রাবিতি ব্রুবন্

ততঃ সংবর্ধয়ামাস সংস্কারৈশ্চাপ্যয়োজয়ৎ
গৌতমোঽপি তদাপেত্য ধনুর্বেদপরোঽভবৎ

কৃপয়া যন্ময়া বালাবিমৌ সংবর্ধিতাবিতি
তস্মাত্তয়োর্নাম চক্রে তদেব স মহীপতিঃ

নিহিতৌ গৌতমস্তত্র তপসা তাববিন্দত
আগম্য চাস্মৈ গোত্রাদি সর্বমাখ্যাতবাংস্তদা

চতুর্বিধং ধনুর্বেদমস্ত্রাণি বিবিধানি চ
নিখিলেনাস্য তত্সর্বং গুহ্যমাখ্যাতবাংস্তদা
সোঽচিরেণৈব কালেন পরমাচার্যতাং গতঃ

ততোঽধিজগ্মুঃ সর্বে তে ধনুর্বেদং মহারথাঃ
ধৃতরাষ্ট্রাত্মজাশ্চৈব পাণ্ডবাশ্চ মহাবলাঃ
বৃষ্ণয়শ্চ নৃপাশ্চান্যে নানাদেশসমাগতাঃ