অধ্যায় 121

121.1

বৈশংপায়ন উবাচ
বিশেষার্থী ততো ভীষ্মঃ পৌত্রাণাং বিনয়েপ্সয়া
ইষ্বস্ত্রজ্ঞান্পর্যপৃচ্ছদাচার্যান্বীর্যসংমতান্

নাল্পধীর্নামহাভাগস্তথানানাস্ত্রকোবিদঃ
নাদেবসত্ত্বো বিনয়েত্কুরূনস্ত্রে মহাবলান্

মহর্ষিস্তু ভরদ্বাজো হবির্ধানে চরন্পুরা
দদর্শাপ্সরসং সাক্ষাদ্ঘৃতাচীমাপ্লুতামৃষিঃ

তস্যা বায়ুঃ সমুদ্ধূতো বসনং ব্যপকর্ষত
ততোঽস্য রেতশ্চস্কন্দ তদৃষির্দ্রোণ আদধে

তস্মিন্সমভবদ্দ্রোণঃ কলশে তস্য ধীমতঃ
অধ্যগীষ্ট স বেদাংশ্চ বেদাঙ্গানি চ সর্বশঃ

অগ্নিবেশ্যং মহাভাগং ভরদ্বাজঃ প্রতাপবান্
প্রত্যপাদয়দাগ্নেয়মস্ত্রং ধর্মভৃতাং বরঃ

অগ্নিষ্টুজ্জাতঃ স মুনিস্ততো ভরতসত্তম
ভারদ্বাজং তদাগ্নেয়ং মহাস্ত্রং প্রত্যপাদয়ৎ

ভরদ্বাজসখা চাসীত্পৃষতো নাম পার্থিবঃ
তস্যাপি দ্রুপদো নাম তদা সমভবত্সুতঃ

স নিত্যমাশ্রমং গত্বা দ্রোণেন সহ পার্ষতঃ
চিক্রীডাধ্যয়নং চৈব চকার ক্ষত্রিয়র্ষভঃ

ততো ব্যতীতে পৃষতে স রাজা দ্রুপদোঽভবৎ
পাঞ্চালেষু মহাবাহুরুত্তরেষু নরেশ্বরঃ

ভরদ্বাজোঽপি ভগবানারুরোহ দিবং তদা
ততঃ পিতৃনিয়ুক্তাত্মা পুত্রলোভান্মহায়শাঃ
শারদ্বতীং ততো দ্রোণঃ কৃপীং ভার্যামবিন্দত

অগ্নিহোত্রে চ ধর্মে চ দমে চ সততং রতা
অলভদ্গৌতমী পুত্রমশ্বত্থামানমেব চ

স জাতমাত্রো ব্যনদদ্যথৈবোচ্চৈঃশ্রবা হয়ঃ
তচ্ছ্রুত্বান্তর্হিতং ভূতমন্তরিক্ষস্থমব্রবীৎ

অশ্বস্যেবাস্য যত্স্থাম নদতঃ প্রদিশো গতম্
অশ্বত্থামৈব বালোঽয়ং তস্মান্নাম্না ভবিষ্যতি

সুতেন তেন সুপ্রীতো ভারদ্বাজস্ততোঽভবৎ
তত্রৈব চ বসন্ধীমান্ধনুর্বেদপরোঽভবৎ

স শুশ্রাব মহাত্মানং জামদগ্ন্যং পরংতপম্
ব্রাহ্মণেভ্যস্তদা রাজন্দিত্সন্তং বসু সর্বশঃ

বনং তু প্রস্থিতং রামং ভারদ্বাজস্তদাব্রবীৎ
আগতং বিত্তকামং মাং বিদ্ধি দ্রোণং দ্বিজর্ষভম্

রাম উবাচ
হিরণ্যং মম যচ্চান্যদ্বসু কিংচন বিদ্যতে
ব্রাহ্মণেভ্যো ময়া দত্তং সর্বমেব তপোধন

তথৈবেয়ং ধরা দেবী সাগরান্তা সপত্তনা
কশ্যপায় ময়া দত্তা কৃত্স্না নগরমালিনী

শরীরমাত্রমেবাদ্য ময়েদমবশেষিতম্
অস্ত্রাণি চ মহার্হাণি শস্ত্রাণি বিবিধানি চ
বৃণীষ্ব কিং প্রয়চ্ছামি তুভ্যং দ্রোণ বদাশু তৎ

দ্রোণ উবাচ
অস্ত্রাণি মে সমগ্রাণি সসংহারাণি ভার্গব
সপ্রয়োগরহস্যানি দাতুমর্হস্যশেষতঃ

বৈশংপায়ন উবাচ
তথেত্যুক্ত্বা ততস্তস্মৈ প্রাদাদস্ত্রাণি ভার্গবঃ
সরহস্যব্রতং চৈব ধনুর্বেদমশেষতঃ

প্রতিগৃহ্য তু তত্সর্বং কৃতাস্ত্রো দ্বিজসত্তমঃ
প্রিয়ং সখায়ং সুপ্রীতো জগাম দ্রুপদং প্রতি