Utshovঅধ্যায় 122
122.1
বৈশংপায়ন উবাচ
ততো দ্রুপদমাসাদ্য ভারদ্বাজঃ প্রতাপবান্
অব্রবীত্পার্ষতং রাজন্সখায়ং বিদ্ধি মামিতি
122.2
দ্রুপদ উবাচ
অকৃতেয়ং তব প্রজ্ঞা ব্রহ্মন্নাতিসমঞ্জসী
যন্মাং ব্রবীষি প্রসভং সখা তেঽহমিতি দ্বিজ
122.3
ন হি রাজ্ঞামুদীর্ণানামেবংভূতৈর্নরৈঃ ক্বচিৎ
সখ্যং ভবতি মন্দাত্মঞ্শ্রিয়া হীনৈর্ধনচ্যুতৈঃ
122.4
সৌহৃদান্যপি জীর্যন্তে কালেন পরিজীর্যতাম্
সৌহৃদং মে ত্বয়া হ্যাসীত্পূর্বং সামর্থ্যবন্ধনম্
122.5
ন সখ্যমজরং লোকে জাতু দৃশ্যেত কর্হিচিৎ
কামো বৈনং বিহরতি ক্রোধশ্চৈনং প্রবৃশ্চতি
122.6
মৈবং জীর্ণমুপাসিষ্ঠাঃ সখ্যং নবমুপাকুরু
আসীত্সখ্যং দ্বিজশ্রেষ্ঠ ত্বয়া মেঽর্থনিবন্ধনম্
122.7
ন দরিদ্রো বসুমতো নাবিদ্বান্বিদুষঃ সখা
শূরস্য ন সখা ক্লীবঃ সখিপূর্বং কিমিষ্যতে
122.8
যয়োরেব সমং বিত্তং যয়োরেব সমং কুলম্
তয়োঃ সখ্যং বিবাহশ্চ ন তু পুষ্টবিপুষ্টয়োঃ
122.9
নাশ্রোত্রিয়ঃ শ্রোত্রিয়স্য নারথী রথিনঃ সখা
নারাজ্ঞা সংগতং রাজ্ঞঃ সখিপূর্বং কিমিষ্যতে
122.10
বৈশংপায়ন উবাচ
দ্রুপদেনৈবমুক্তস্তু ভারদ্বাজঃ প্রতাপবান্
মুহূর্তং চিন্তয়ামাস মন্যুনাভিপরিপ্লুতঃ
122.11
স বিনিশ্চিত্য মনসা পাঞ্চালং প্রতি বুদ্ধিমান্
জগাম কুরুমুখ্যানাং নগরং নাগসাহ্বয়ম্
122.12
কুমারাস্ত্বথ নিষ্ক্রম্য সমেতা গজসাহ্বয়াৎ
ক্রীডন্তো বীটয়া তত্র বীরাঃ পর্যচরন্মুদা
122.13
পপাত কূপে সা বীটা তেষাং বৈ ক্রীডতাং তদা
ন চ তে প্রত্যপদ্যন্ত কর্ম বীটোপলব্ধয়ে
122.14
অথ দ্রোণঃ কুমারাংস্তান্দৃষ্ট্বা কৃত্যবতস্তদা
প্রহস্য মন্দং পৈশল্যাদভ্যভাষত বীর্যবান্
122.15
অহো নু ধিগ্বলং ক্ষাত্রং ধিগেতাং বঃ কৃতাস্ত্রতাম্
ভরতস্যান্বয়ে জাতা যে বীটাং নাধিগচ্ছত
122.16
এষ মুষ্টিরিষীকাণাং ময়াস্ত্রেণাভিমন্ত্রিতঃ
অস্য বীর্যং নিরীক্ষধ্বং যদন্যস্য ন বিদ্যতে
122.17
বেত্স্যামীষীকয়া বীটাং তামিষীকামথান্যয়া
তামন্যয়া সমায়োগো বীটায়া গ্রহণে মম
122.18
তদপশ্যন্কুমারাস্তে বিস্ময়োত্ফুল্ললোচনাঃ
অবেষ্ক্য চোদ্ধৃতাং বীটাং বীটাবেদ্ধারমব্রুবন্
122.19
অভিবাদয়ামহে ব্রহ্মন্নৈতদন্যেষু বিদ্যতে
কোঽসি কং ত্বাভিজানীমো বয়ং কিং করবামহে
122.20
দ্রোণ উবাচ
আচক্ষধ্বং চ ভীষ্মায় রূপেণ চ গুণৈশ্চ মাম্
স এব সুমহাবুদ্ধিঃ সাংপ্রতং প্রতিপত্স্যতে
122.21
বৈশংপায়ন উবাচ
তথেত্যুক্ত্বা তু তে সর্বে ভীষ্মমূচুঃ পিতামহম্
ব্রাহ্মণস্য বচস্তথ্যং তচ্চ কর্মবিশেষবৎ
122.22
ভীষ্মঃ শ্রুত্বা কুমারাণাং দ্রোণং তং প্রত্যজানত
যুক্তরূপঃ স হি গুরুরিত্যেবমনুচিন্ত্য চ
122.23
অথৈনমানীয় তদা স্বয়মেব সুসত্কৃতম্
পরিপপ্রচ্ছ নিপুণং ভীষ্মঃ শস্ত্রভৃতাং বরঃ
হেতুমাগমনে তস্য দ্রোণঃ সর্বং ন্যবেদয়ৎ
122.24
মহর্ষেরগ্নিবেশ্যস্য সকাশমহমচ্যুত
অস্ত্রার্থমগমং পূর্বং ধনুর্বেদজিঘৃক্ষয়া
122.25
ব্রহ্মচারী বিনীতাত্মা জটিলো বহুলাঃ সমাঃ
অবসং তত্র সুচিরং ধনুর্বেদচিকীর্ষয়া
122.26
পাঞ্চালরাজপুত্রস্তু যজ্ঞসেনো মহাবলঃ
ময়া সহাকরোদ্বিদ্যাং গুরোঃ শ্রাম্যন্সমাহিতঃ
122.27
স মে তত্র সখা চাসীদুপকারী প্রিয়শ্চ মে
তেনাহং সহ সংগম্য রতবান্সুচিরং বত
বাল্যাত্প্রভৃতি কৌরব্য সহাধ্যয়নমেব চ
122.28
স সমাসাদ্য মাং তত্র প্রিয়কারী প্রিয়ংবদঃ
অব্রবীদিতি মাং ভীষ্ম বচনং প্রীতিবর্ধনম্
122.29
অহং প্রিয়তমঃ পুত্রঃ পিতুর্দ্রোণ মহাত্মনঃ
অভিষেক্ষ্যতি মাং রাজ্যে স পাঞ্চাল্যো যদা তদা
122.30
ত্বদ্ভোজ্যং ভবিতা রাজ্যং সখে সত্যেন তে শপে
মম ভোগাশ্চ বিত্তং চ ত্বদধীনং সুখানি চ
122.31
এবমুক্তঃ প্রবব্রাজ কৃতাস্ত্রোঽহং ধনেপ্সয়া
অভিষিক্তং চ শ্রুত্বৈনং কৃতার্থোঽস্মীতি চিন্তয়ন্
122.32
প্রিয়ং সখায়ং সুপ্রীতো রাজ্যস্থং পুনরাব্রজম্
সংস্মরন্সংগমং চৈব বচনং চৈব তস্য তৎ
122.33
ততো দ্রুপদমাগম্য সখিপূর্বমহং প্রভো
অব্রুবং পুরুষব্যাঘ্র সখায়ং বিদ্ধি মামিতি
122.34
উপস্থিতং তু দ্রুপদঃ সখিবচ্চাভিসংগতম্
স মাং নিরাকারমিব প্রহসন্নিদমব্রবীৎ
122.35
অকৃতেয়ং তব প্রজ্ঞা ব্রহ্মন্নাতিসমঞ্জসী
যদাত্থ মাং ত্বং প্রসভং সখা তেঽহমিতি দ্বিজ
122.36
ন হি রাজ্ঞামুদীর্ণানামেবংভূতৈর্নরৈঃ ক্বচিৎ
সখ্যং ভবতি মন্দাত্মঞ্শ্রিয়া হীনৈর্ধনচ্যুতৈঃ
122.37
নাশ্রোত্রিয়ঃ শ্রোত্রিয়স্য নারথী রথিনঃ সখা
নারাজা পার্থিবস্যাপি সখিপূর্বং কিমিষ্যতে
122.38
দ্রুপদেনৈবমুক্তোঽহং মন্যুনাভিপরিপ্লুতঃ
অভ্যাগচ্ছং কুরূন্ভীষ্ম শিষ্যৈরর্থী গুণান্বিতৈঃ
122.39
প্রতিজগ্রাহ তং ভীষ্মো গুরুং পাণ্ডুসুতৈঃ সহ
পৌত্রানাদায় তান্সর্বান্বসূনি বিবিধানি চ
122.40
শিষ্যা ইতি দদৌ রাজন্দ্রোণায় বিধিপূর্বকম্
স চ শিষ্যান্মহেষ্বাসঃ প্রতিজগ্রাহ কৌরবান্
122.41
প্রতিগৃহ্য চ তান্সর্বান্দ্রোণো বচনমব্রবীৎ
রহস্যেকঃ প্রতীতাত্মা কৃতোপসদনাংস্তদা
122.42
কার্যং মে কাঙ্ক্ষিতং কিংচিদ্ধৃদি সংপরিবর্ততে
কৃতাস্ত্রৈস্তত্প্রদেয়ং মে তদৃতং বদতানঘাঃ
122.43
তচ্ছ্রুত্বা কৌরবেয়াস্তে তূষ্ণীমাসন্বিশাং পতে
অর্জুনস্তু ততঃ সর্বং প্রতিজজ্ঞে পরংতপঃ
122.44
ততোঽর্জুনং মূর্ধ্নি তদা সমাঘ্রায় পুনঃ পুনঃ
প্রীতিপূর্বং পরিষ্বজ্য প্ররুরোদ মুদা তদা
122.45
ততো দ্রোণঃ পাণ্ডুপুত্রানস্ত্রাণি বিবিধানি চ
গ্রাহয়ামাস দিব্যানি মানুষাণি চ বীর্যবান্
122.46
রাজপুত্রাস্তথৈবান্যে সমেত্য ভরতর্ষভ
অভিজগ্মুস্ততো দ্রোণমস্ত্রার্থে দ্বিজসত্তমম্
বৃষ্ণয়শ্চান্ধকাশ্চৈব নানাদেশ্যাশ্চ পার্থিবাঃ
122.47
সূতপুত্রশ্চ রাধেয়ো গুরুং দ্রোণমিয়াত্তদা
স্পর্ধমানস্তু পার্থেন সূতপুত্রোঽত্যমর্ষণঃ
দুর্যোধনমুপাশ্রিত্য পাণ্ডবানত্যমন্যত