Utshovঅধ্যায় 123
123.1
বৈশংপায়ন উবাচ
অর্জুনস্তু পরং যত্নমাতস্থে গুরুপূজনে
অস্ত্রে চ পরমং যোগং প্রিয়ো দ্রোণস্য চাভবৎ
123.2
দ্রোণেন তু তদাহূয় রহস্যুক্তোঽন্নসাধকঃ
অন্ধকারেঽর্জুনায়ান্নং ন দেয়ং তে কথংচন
123.3
ততঃ কদাচিদ্ভুঞ্জানে প্রববৌ বায়ুরর্জুনে
তেন তত্র প্রদীপঃ স দীপ্যমানো নিবাপিতঃ
123.4
ভুঙ্ক্ত এবার্জুনো ভক্তং ন চাস্যাস্যাদ্ব্যমুহ্যত
হস্তস্তেজস্বিনো নিত্যমন্নগ্রহণকারণাৎ
তদভ্যাসকৃতং মত্বা রাত্রাবভ্যস্ত পাণ্ডবঃ
123.5
তস্য জ্যাতলনির্ঘোষং দ্রোণঃ শুশ্রাব ভারত
উপেত্য চৈনমুত্থায় পরিষ্বজ্যেদমব্রবীৎ
123.6
প্রয়তিষ্যে তথা কর্তুং যথা নান্যো ধনুর্ধরঃ
ত্বত্সমো ভবিতা লোকে সত্যমেতদ্ব্রবীমি তে
123.7
ততো দ্রোণোঽর্জুনং ভূয়ো রথেষু চ গজেষু চ
অশ্বেষু ভূমাবপি চ রণশিক্ষামশিক্ষয়ৎ
123.8
গদায়ুদ্ধেঽসিচর্যায়াং তোমরপ্রাসশক্তিষু
দ্রোণঃ সংকীর্ণয়ুদ্ধেষু শিক্ষয়ামাস পাণ্ডবম্
123.9
তস্য তত্কৌশলং দৃষ্ট্বা ধনুর্বেদজিঘৃক্ষবঃ
রাজানো রাজপুত্রাশ্চ সমাজগ্মুঃ সহস্রশঃ
123.10
ততো নিষাদরাজস্য হিরণ্যধনুষঃ সুতঃ
একলব্যো মহারাজ দ্রোণমভ্যাজগাম হ
123.11
ন স তং প্রতিজগ্রাহ নৈষাদিরিতি চিন্তয়ন্
শিষ্যং ধনুষি ধর্মজ্ঞস্তেষামেবান্ববেক্ষয়া
123.12
স তু দ্রোণস্য শিরসা পাদৌ গৃহ্য পরংতপঃ
অরণ্যমনুসংপ্রাপ্তঃ কৃত্বা দ্রোণং মহীময়ম্
123.13
তস্মিন্নাচার্যবৃত্তিং চ পরমামাস্থিতস্তদা
ইষ্বস্ত্রে যোগমাতস্থে পরং নিয়মমাস্থিতঃ
123.14
পরয়া শ্রদ্ধয়া যুক্তো যোগেন পরমেণ চ
বিমোক্ষাদানসংধানে লঘুত্বং পরমাপ সঃ
123.15
অথ দ্রোণাভ্যনুজ্ঞাতাঃ কদাচিত্কুরুপাণ্ডবাঃ
রথৈর্বিনির্যয়ুঃ সর্বে মৃগয়ামরিমর্দনাঃ
123.16
তত্রোপকরণং গৃহ্য নরঃ কশ্চিদ্যদৃচ্ছয়া
রাজন্ননুজগামৈকঃ শ্বানমাদায় পাণ্ডবান্
123.17
তেষাং বিচরতাং তত্র তত্তত্কর্ম চিকীর্ষতাম্
শ্বা চরন্স বনে মূঢো নৈষাদিং প্রতি জগ্মিবান্
123.18
স কৃষ্ণং মলদিগ্ধাঙ্গং কৃষ্ণাজিনধরং বনে
নৈষাদিং শ্বা সমালক্ষ্য ভষংস্তস্থৌ তদন্তিকে
123.19
তদা তস্যাথ ভষতঃ শুনঃ সপ্ত শরান্মুখে
লাঘবং দর্শয়ন্নস্ত্রে মুমোচ যুগপদ্যথা
123.20
স তু শ্বা শরপূর্ণাস্যঃ পাণ্ডবানাজগাম হ
তং দৃষ্ট্বা পাণ্ডবা বীরা বিস্ময়ং পরমং যয়ুঃ
123.21
লাঘবং শব্দবেধিত্বং দৃষ্ট্বা তত্পরমং তদা
প্রেক্ষ্য তং ব্রীডিতাশ্চাসন্প্রশশংসুশ্চ সর্বশঃ
123.22
তং ততোঽন্বেষমাণাস্তে বনে বননিবাসিনম্
দদৃশুঃ পাণ্ডবা রাজন্নস্যন্তমনিশং শরান্
123.23
ন চৈনমভ্যজানংস্তে তদা বিকৃতদর্শনম্
অথৈনং পরিপপ্রচ্ছুঃ কো ভবান্কস্য বেত্যুত
123.24
একলব্য উবাচ
নিষাদাধিপতের্বীরা হিরণ্যধনুষঃ সুতম্
দ্রোণশিষ্যং চ মাং বিত্ত ধনুর্বেদকৃতশ্রমম্
123.25
বৈশংপায়ন উবাচ
তে তমাজ্ঞায় তত্ত্বেন পুনরাগম্য পাণ্ডবাঃ
যথাবৃত্তং চ তে সর্বং দ্রোণায়াচখ্যুরদ্ভুতম্
123.26
কৌন্তেয়স্ত্বর্জুনো রাজন্নেকলব্যমনুস্মরন্
রহো দ্রোণং সমাগম্য প্রণয়াদিদমব্রবীৎ
123.27
নন্বহং পরিরভ্যৈকঃ প্রীতিপূর্বমিদং বচঃ
ভবতোক্তো ন মে শিষ্যস্ত্বদ্বিশিষ্টো ভবিষ্যতি
123.28
অথ কস্মান্মদ্বিশিষ্টো লোকাদপি চ বীর্যবান্
অস্ত্যন্যো ভবতঃ শিষ্যো নিষাদাধিপতেঃ সুতঃ
123.29
মুহূর্তমিব তং দ্রোণশ্চিন্তয়িত্বা বিনিশ্চয়ম্
সব্যসাচিনমাদায় নৈষাদিং প্রতি জগ্মিবান্
123.30
দদর্শ মলদিগ্ধাঙ্গং জটিলং চীরবাসসম্
একলব্যং ধনুষ্পাণিমস্যন্তমনিশং শরান্
123.31
একলব্যস্তু তং দৃষ্ট্বা দ্রোণমায়ান্তমন্তিকাৎ
অভিগম্যোপসংগৃহ্য জগাম শিরসা মহীম্
123.32
পূজয়িত্বা ততো দ্রোণং বিধিবত্স নিষাদজঃ
নিবেদ্য শিষ্যমাত্মানং তস্থৌ প্রাঞ্জলিরগ্রতঃ
123.33
ততো দ্রোণোঽব্রবীদ্রাজন্নেকলব্যমিদং বচঃ
যদি শিষ্যোঽসি মে তূর্ণং বেতনং সংপ্রদীয়তাম্
123.34
একলব্যস্তু তচ্ছ্রুত্বা প্রীয়মাণোঽব্রবীদিদম্
কিং প্রয়চ্ছামি ভগবন্নাজ্ঞাপয়তু মাং গুরুঃ
123.35
ন হি কিংচিদদেয়ং মে গুরবে ব্রহ্মবিত্তম
তমব্রবীত্ত্বয়াঙ্গুষ্ঠো দক্ষিণো দীয়তাং মম
123.36
একলব্যস্তু তচ্ছ্রুত্বা বচো দ্রোণস্য দারুণম্
প্রতিজ্ঞামাত্মনো রক্ষন্সত্যে চ নিরতঃ সদা
123.37
তথৈব হৃষ্টবদনস্তথৈবাদীনমানসঃ
ছিত্ত্বাবিচার্য তং প্রাদাদ্দ্রোণায়াঙ্গুষ্ঠমাত্মনঃ
123.38
ততঃ পরং তু নৈষাদিরঙ্গুলীভির্ব্যকর্ষত
ন তথা স তু শীঘ্রোঽভূদ্যথা পূর্বং নরাধিপ
123.39
ততোঽর্জুনঃ প্রীতমনা বভূব বিগতজ্বরঃ
দ্রোণশ্চ সত্যবাগাসীন্নান্যোঽভ্যভবদর্জুনম্
123.40
দ্রোণস্য তু তদা শিষ্যৌ গদায়োগ্যাং বিশেষতঃ
দুর্যোধনশ্চ ভীমশ্চ কুরূণামভ্যগচ্ছতাম্
123.41
অশ্বত্থামা রহস্যেষু সর্বেষ্বভ্যধিকোঽভবৎ
তথাতি পুরুষানন্যান্ত্সারুকৌ যমজাবুভৌ
যুধিষ্ঠিরো রথশ্রেষ্ঠঃ সর্বত্র তু ধনংজয়ঃ
123.42
প্রথিতঃ সাগরান্তায়াং রথয়ূথপয়ূথপঃ
বুদ্ধিয়োগবলোত্সাহৈঃ সর্বাস্ত্রেষু চ পাণ্ডবঃ
123.43
অস্ত্রে গুর্বনুরাগে চ বিশিষ্টোঽভবদর্জুনঃ
তুল্যেষ্বস্ত্রোপদেশেষু সৌষ্ঠবেন চ বীর্যবান্
একঃ সর্বকুমারাণাং বভূবাতিরথোঽর্জুনঃ
123.44
প্রাণাধিকং ভীমসেনং কৃতবিদ্যং ধনংজয়ম্
ধার্তরাষ্ট্রা দুরাত্মানো নামৃষ্যন্ত নরাধিপ
123.45
তাংস্তু সর্বান্সমানীয় সর্ববিদ্যাসু নিষ্ঠিতান্
দ্রোণঃ প্রহরণজ্ঞানে জিজ্ঞাসুঃ পুরুষর্ষভ
123.46
কৃত্রিমং ভাসমারোপ্য বৃক্ষাগ্রে শিল্পিভিঃ কৃতম্
অবিজ্ঞাতং কুমারাণাং লক্ষ্যভূতমুপাদিশৎ
123.47
দ্রোণ উবাচ
শীঘ্রং ভবন্তঃ সর্বে বৈ ধনূংষ্যাদায় সত্বরাঃ
ভাসমেতং সমুদ্দিশ্য তিষ্ঠন্তাং সংহিতেষবঃ
123.48
মদ্বাক্যসমকালং চ শিরোঽস্য বিনিপাত্যতাম্
একৈকশো নিয়োক্ষ্যামি তথা কুরুত পুত্রকাঃ
123.49
বৈশংপায়ন উবাচ
ততো যুধিষ্ঠিরং পূর্বমুবাচাঙ্গিরসাং বরঃ
সংধত্স্ব বাণং দুর্ধর্ষ মদ্বাক্যান্তে বিমুঞ্চ চ
123.50
ততো যুধিষ্ঠিরঃ পূর্বং ধনুর্গৃহ্য মহারবম্
তস্থৌ ভাসং সমুদ্দিশ্য গুরুবাক্যপ্রচোদিতঃ
123.51
ততো বিততধন্বানং দ্রোণস্তং কুরুনন্দনম্
স মুহূর্তাদুবাচেদং বচনং ভরতর্ষভ
123.52
পশ্যস্যেনং দ্রুমাগ্রস্থং ভাসং নরবরাত্মজ
পশ্যামীত্যেবমাচার্যং প্রত্যুবাচ যুধিষ্ঠিরঃ
123.53
স মুহূর্তাদিব পুনর্দ্রোণস্তং প্রত্যভাষত
অথ বৃক্ষমিমং মাং বা ভ্রাতৄন্বাপি প্রপশ্যসি
123.54
তমুবাচ স কৌন্তেয়ঃ পশ্যাম্যেনং বনস্পতিম্
ভবন্তং চ তথা ভ্রাতৄন্ভাসং চেতি পুনঃ পুনঃ
123.55
তমুবাচাপসর্পেতি দ্রোণোঽপ্রীতমনা ইব
নৈতচ্ছক্যং ত্বয়া বেদ্ধুং লক্ষ্যমিত্যেব কুত্সয়ন্
123.56
ততো দুর্যোধনাদীংস্তান্ধার্তরাষ্ট্রান্মহায়শাঃ
তেনৈব ক্রময়োগেন জিজ্ঞাসুঃ পর্যপৃচ্ছত
123.57
অন্যাংশ্চ শিষ্যান্ভীমাদীন্রাজ্ঞশ্চৈবান্যদেশজান্
তথা চ সর্বে সর্বং তত্পশ্যাম ইতি কুত্সিতাঃ
123.58
ততো ধনংজয়ং দ্রোণঃ স্ময়মানোঽভ্যভাষত
ত্বয়েদানীং প্রহর্তব্যমেতল্লক্ষ্যং নিশম্যতাম্
123.59
মদ্বাক্যসমকালং তে মোক্তব্যোঽত্র ভবেচ্ছরঃ
বিতত্য কার্মুকং পুত্র তিষ্ঠ তাবন্মুহূর্তকম্
123.60
এবমুক্তঃ সব্যসাচী মণ্ডলীকৃতকার্মুকঃ
তস্থৌ লক্ষ্যং সমুদ্দিশ্য গুরুবাক্যপ্রচোদিতঃ
123.61
মুহূর্তাদিব তং দ্রোণস্তথৈব সমভাষত
পশ্যস্যেনং স্থিতং ভাসং দ্রুমং মামপি বেত্যুত
123.62
পশ্যাম্যেনং ভাসমিতি দ্রোণং পার্থোঽভ্যভাষত
ন তু বৃক্ষং ভবন্তং বা পশ্যামীতি চ ভারত
123.63
ততঃ প্রীতমনা দ্রোণো মুহূর্তাদিব তং পুনঃ
প্রত্যভাষত দুর্ধর্ষঃ পাণ্ডবানাং রথর্ষভম্
123.64
ভাসং পশ্যসি যদ্যেনং তথা ব্রূহি পুনর্বচঃ
শিরঃ পশ্যামি ভাসস্য ন গাত্রমিতি সোঽব্রবীৎ
123.65
অর্জুনেনৈবমুক্তস্তু দ্রোণো হৃষ্টতনূরুহঃ
মুঞ্চস্বেত্যব্রবীত্পার্থং স মুমোচাবিচারয়ন্
123.66
ততস্তস্য নগস্থস্য ক্ষুরেণ নিশিতেন হ
শির উত্কৃত্য তরসা পাতয়ামাস পাণ্ডবঃ
123.67
তস্মিন্কর্মণি সংসিদ্ধে পর্যশ্বজত ফল্গুনম্
মেনে চ দ্রুপদং সংখ্যে সানুবন্ধং পরাজিতম্
123.68
কস্যচিত্ত্বথ কালস্য সশিষ্যোঽঙ্গিরসাং বরঃ
জগাম গঙ্গামভিতো মজ্জিতুং ভরতর্ষভ
123.69
অবগাঢমথো দ্রোণং সলিলে সলিলেচরঃ
গ্রাহো জগ্রাহ বলবাঞ্জঙ্ঘান্তে কালচোদিতঃ
123.70
স সমর্থোঽপি মোক্ষায় শিষ্যান্সর্বানচোদয়ৎ
গ্রাহং হত্বা মোক্ষয়ধ্বং মামিতি ত্বরয়ন্নিব
123.71
তদ্বাক্যসমকালং তু বীভত্সুর্নিশিতৈঃ শরৈঃ
আবাপৈঃ পঞ্চভির্গ্রাহং মগ্নমম্ভস্যতাডয়ৎ
ইতরে তু বিসংমূঢাস্তত্র তত্র প্রপেদিরে
123.72
তং চ দৃষ্ট্বা ক্রিয়োপেতং দ্রোণোঽমন্যত পাণ্ডবম্
বিশিষ্টং সর্বশিষ্যেভ্যঃ প্রীতিমাংশ্চাভবত্তদা
123.73
স পার্থবাণৈর্বহুধা খণ্ডশঃ পরিকল্পিতঃ
গ্রাহঃ পঞ্চত্বমাপেদে জঙ্ঘাং ত্যক্ত্বা মহাত্মনঃ
123.74
অথাব্রবীন্মহাত্মানং ভারদ্বাজো মহারথম্
গৃহাণেদং মহাবাহো বিশিষ্টমতিদুর্ধরম্
অস্ত্রং ব্রহ্মশিরো নাম সপ্রয়োগনিবর্তনম্
123.75
ন চ তে মানুষেষ্বেতত্প্রয়োক্তব্যং কথংচন
জগদ্বিনির্দহেদেতদল্পতেজসি পাতিতম্
123.76
অসামান্যমিদং তাত লোকেষ্বস্ত্রং নিগদ্যতে
তদ্ধারয়েথাঃ প্রয়তঃ শৃণু চেদং বচো মম
123.77
বাধেতামানুষঃ শত্রুর্যদা ত্বাং বীর কশ্চন
তদ্বধায় প্রয়ুঞ্জীথাস্তদাস্ত্রমিদমাহবে
123.78
তথেতি তত্প্রতিশ্রুত্য বীভত্সুঃ স কৃতাঞ্জলিঃ
জগ্রাহ পরমাস্ত্রং তদাহ চৈনং পুনর্গুরুঃ
ভবিতা ত্বত্সমো নান্যঃ পুমাঁল্লোকে ধনুর্ধরঃ