Utshovঅধ্যায় 124
124.1
বৈশংপায়ন উবাচ
কৃতাস্ত্রান্ধার্তরাষ্ট্রাংশ্চ পাণ্ডুপুত্রাংশ্চ ভারত
দৃষ্ট্বা দ্রোণোঽব্রবীদ্রাজন্ধৃতরাষ্ট্রং জনেশ্বরম্
124.2
কৃপস্য সোমদত্তস্য বাহ্লীকস্য চ ধীমতঃ
গাঙ্গেয়স্য চ সাংনিধ্যে ব্যাসস্য বিদুরস্য চ
124.3
রাজন্সংপ্রাপ্তবিদ্যাস্তে কুমরাঃ কুরুসত্তম
তে দর্শয়েয়ুঃ স্বাং শিক্ষাং রাজন্ননুমতে তব
124.4
ততোঽব্রবীন্মহারাজঃ প্রহৃষ্টেনান্তরাত্মনা
ভারদ্বাজ মহত্কর্ম কৃতং তে দ্বিজসত্তম
124.5
যদা তু মন্যসে কালং যস্মিন্দেশে যথা যথা
তথা তথা বিধানায় স্বয়মাজ্ঞাপয়স্ব মাম্
124.6
স্পৃহয়াম্যদ্য নির্বেদাত্পুরুষাণাং সচক্ষুষাম্
অস্ত্রহেতোঃ পরাক্রান্তান্যে মে দ্রক্ষ্যন্তি পুত্রকান্
124.7
ক্ষত্তর্যদ্গুরুরাচার্যো ব্রবীতি কুরু তত্তথা
ন হীদৃশং প্রিয়ং মন্যে ভবিতা ধর্মবত্সল
124.8
ততো রাজানমামন্ত্র্য বিদুরানুগতো বহিঃ
ভারদ্বাজো মহাপ্রাজ্ঞো মাপয়ামাস মেদিনীম্
সমামবৃক্ষাং নির্গুল্মামুদক্প্রবণসংস্থিতাম্
124.9
তস্যাং ভূমৌ বলিং চক্রে তিথৌ নক্ষত্রপূজিতে
অবঘুষ্টং পুরে চাপি তদর্থং বদতাং বর
124.10
রঙ্গভূমৌ সুবিপুলং শাস্ত্রদৃষ্টং যথাবিধি
প্রেক্ষাগারং সুবিহিতং চক্রুস্তত্র চ শিল্পিনঃ
রাজ্ঞঃ সর্বায়ুধোপেতং স্ত্রীণাং চৈব নরর্ষভ
124.11
মঞ্চাংশ্চ কারয়ামাসুস্তত্র জানপদা জনাঃ
বিপুলানুচ্ছ্রয়োপেতাঞ্শিবিকাশ্চ মহাধনাঃ
124.12
তস্মিংস্ততোঽহনি প্রাপ্তে রাজা সসচিবস্তদা
ভীষ্মং প্রমুখতঃ কৃত্বা কৃপং চাচার্যসত্তমম্
124.13
মুক্তাজালপরিক্ষিপ্তং বৈডূর্যমণিভূষিতম্
শাতকুম্ভময়ং দিব্যং প্রেক্ষাগারমুপাগমৎ
124.14
গান্ধারী চ মহাভাগা কুন্তী চ জয়তাং বর
স্ত্রিয়শ্চ সর্বা যা রাজ্ঞঃ সপ্রেষ্যাঃ সপরিচ্ছদাঃ
হর্ষাদারুরুহুর্মঞ্চান্মেরুং দেবস্ত্রিয়ো যথা
124.15
ব্রাহ্মণক্ষত্রিয়াদ্যং চ চাতুর্বর্ণ্যং পুরাদ্দ্রুতম্
দর্শনেপ্সু সমভ্যাগাত্কুমারাণাং কৃতাস্ত্রতাম্
124.16
প্রবাদিতৈশ্চ বাদিত্রৈর্জনকৌতূহলেন চ
মহার্ণব ইব ক্ষুব্ধঃ সমাজঃ সোঽভবত্তদা
124.17
ততঃ শুক্লাম্বরধরঃ শুক্লয়জ্ঞোপবীতবান্
শুক্লকেশঃ সিতশ্মশ্রুঃ শুক্লমাল্যানুলেপনঃ
124.18
রঙ্গমধ্যং তদাচার্যঃ সপুত্রঃ প্রবিবেশ হ
নভো জলধরৈর্হীনং সাঙ্গারক ইবাংশুমান্
124.19
স যথাসময়ং চক্রে বলিং বলবতাং বরঃ
ব্রাহ্মণাংশ্চাত্র মন্ত্রজ্ঞান্বাচয়ামাস মঙ্গলম্
124.20
অথ পুণ্যাহঘোষস্য পুণ্যস্য তদনন্তরম্
বিবিশুর্বিবিধং গৃহ্য শস্ত্রোপকরণং নরাঃ
124.21
ততো বদ্ধতনুত্রাণা বদ্ধকক্ষ্যা মহাবলাঃ
বদ্ধতূণাঃ সধনুষো বিবিশুর্ভরতর্ষভাঃ
124.22
অনুজ্যেষ্ঠং চ তে তত্র যুধিষ্ঠিরপুরোগমাঃ
চক্রুরস্ত্রং মহাবীর্যাঃ কুমারাঃ পরমাদ্ভুতম্
124.23
কেচিচ্ছরাক্ষেপভয়াচ্ছিরাংস্যবননামিরে
মনুজা ধৃষ্টমপরে বীক্ষাং চক্রুঃ সবিস্ময়াঃ
124.24
তে স্ম লক্ষ্যাণি বিবিধুর্বাণৈর্নামাঙ্কশোভিতৈঃ
বিবিধৈর্লাঘবোত্সৃষ্টৈরুহ্যন্তো বাজিভির্দ্রুতম্
124.25
তত্কুমারবলং তত্র গৃহীতশরকার্মুকম্
গন্ধর্বনগরাকারং প্রেক্ষ্য তে বিস্মিতাভবন্
124.26
সহসা চুক্রুশুস্তত্র নরাঃ শতসহস্রশঃ
বিস্ময়োত্ফুল্লনয়নাঃ সাধু সাধ্বিতি ভারত
124.27
কৃত্বা ধনুষি তে মার্গান্রথচর্যাসু চাসকৃৎ
গজপৃষ্ঠেঽশ্বপৃষ্ঠে চ নিয়ুদ্ধে চ মহাবলাঃ
124.28
গৃহীতখড্গচর্মাণস্ততো ভূয়ঃ প্রহারিণঃ
ত্সরুমার্গান্যথোদ্দিষ্টাংশ্চেরুঃ সর্বাসু ভূমিষু
124.29
লাঘবং সৌষ্ঠবং শোভাং স্থিরত্বং দৃঢমুষ্টিতাম্
দদৃশুস্তত্র সর্বেষাং প্রয়োগে খড্গচর্মণাম্
124.30
অথ তৌ নিত্যসংহৃষ্টৌ সুয়োধনবৃকোদরৌ
অবতীর্ণৌ গদাহস্তাবেকশৃঙ্গাবিবাচলৌ
124.31
বদ্ধকক্ষ্যৌ মহাবাহূ পৌরুষে পর্যবস্থিতৌ
বৃংহন্তৌ বাশিতাহেতোঃ সমদাবিব কুঞ্জরৌ
124.32
তৌ প্রদক্ষিণসব্যানি মণ্ডলানি মহাবলৌ
চেরতুর্নির্মলগদৌ সমদাবিব গোবৃষৌ
124.33
বিদুরো ধৃতরাষ্ট্রায় গান্ধার্যৈ পাণ্ডবারণিঃ
ন্যবেদয়েতাং তত্সর্বং কুমারাণাং বিচেষ্টিতম্