UtshovChapter 109
109.1
जनमेजय उवाच
कथितो धार्तराष्ट्राणामार्षः संभव उत्तमः
अमानुषो मानुषाणां भवता ब्रह्मवित्तम
Janamejaya uvacha
Kathito dhartarashtranamarshah sambhava uttamah
Amanusho manushanam bhavata brahmavittama
109.2
नामधेयानि चाप्येषां कथ्यमानानि भागशः
त्वत्तः श्रुतानि मे ब्रह्मन्पाण्डवानां तु कीर्तय
Namadheyani chapyesham kathyamanani bhagashah
Tvattah shrutani me brahmanpandavanam tu kirtaya
109.3
ते हि सर्वे महात्मानो देवराजपराक्रमाः
त्वयैवांशावतरणे देवभागाः प्रकीर्तिताः
Te hi sarve mahatmano devarajaparakramah
Tvayaivanshavatarane devabhagah prakirtitah
109.4
तस्मादिच्छाम्यहं श्रोतुमतिमानुषकर्मणाम्
तेषामाजननं सर्वं वैशंपायन कीर्तय
Tasmadichchhamyaham shrotumatimanushakarmanam
Teshamajananam sarvam vaishampayana kirtaya
109.5
वैशंपायन उवाच
राजा पाण्डुर्महारण्ये मृगव्यालनिषेविते
वने मैथुनकालस्थं ददर्श मृगयूथपम्
Vaishampayana uvacha
Raja pandurmaharanye mrigavyalanishevite
Vane maithunakalastham dadarsha mrigayuthapam
109.6
ततस्तां च मृगीं तं च रुक्मपुङ्खैः सुपत्रिभिः
निर्बिभेद शरैस्तीक्ष्णैः पाण्डुः पञ्चभिराशुगैः
Tatastam cha mrigim tam cha rukmapunkhaih supatribhih
Nirbibheda sharaistikshnaih panduh panchabhirashugaih
109.7
स च राजन्महातेजा ऋषिपुत्रस्तपोधनः
भार्यया सह तेजस्वी मृगरूपेण संगतः
Sa cha rajanmahateja rishiputrastapodhanah
Bharyaya saha tejasvi mrigarupena sangatah
109.8
संसक्तस्तु तया मृग्या मानुषीमीरयन्गिरम्
क्षणेन पतितो भूमौ विललापाकुलेन्द्रियः
Sansaktastu taya mrigya manushimirayangiram
Kshanena patito bhumau vilalapakulendriyah
109.9
मृग उवाच
काममन्युपरीतापि बुद्ध्यङ्गरहितापि च
वर्जयन्ति नृशंसानि पापेष्वभिरता नराः
Mriga uvacha
Kamamanyuparitapi buddhyangarahitapi cha
Varjayanti nrishansani papeshvabhirata narah
109.10
न विधिं ग्रसते प्रज्ञा प्रज्ञां तु ग्रसते विधिः
विधिपर्यागतानर्थान्प्रज्ञा न प्रतिपद्यते
Na vidhim grasate pragya pragyam tu grasate vidhih
Vidhiparyagatanarthanpragya na pratipadyate
109.11
शश्वद्धर्मात्मनां मुख्ये कुले जातस्य भारत
कामलोभाभिभूतस्य कथं ते चलिता मतिः
Shashvaddharmatmanam mukhye kule jatasya bharata
Kamalobhabhibhutasya katham te chalita matih
109.12
पाण्डुरुवाच
शत्रूणां या वधे वृत्तिः सा मृगाणां वधे स्मृता
राज्ञां मृग न मां मोहात्त्वं गर्हयितुमर्हसि
Panduruvacha
Shatrunam ya vadhe vrittih sa mriganam vadhe smrita
Ragyam mriga na mam mohattvam garhayitumarhasi
109.13
अच्छद्मनामायया च मृगाणां वध इष्यते
स एव धर्मो राज्ञां तु तद्विद्वान्किं नु गर्हसे
Achchhadmanamayaya cha mriganam vadha ishyate
Sa eva dharmo ragyam tu tadvidvankim nu garhase
109.14
अगस्त्यः सत्रमासीनश्चचार मृगयामृषिः
आरण्यान्सर्वदैवत्यान्मृगान्प्रोक्ष्य महावने
Agastyah satramasinashchachara mrigayamrishih
Aranyansarvadaivatyanmriganprokshya mahavane
109.15
प्रमाणदृष्टधर्मेण कथमस्मान्विगर्हसे
अगस्त्यस्याभिचारेण युष्माकं वै वपा हुता
Pramanadrishtadharmena kathamasmanvigarhase
Agastyasyabhicharena yushmakam vai vapa huta
109.16
मृग उवाच
न रिपून्वै समुद्दिश्य विमुञ्चन्ति पुरा शरान्
रन्ध्र एषां विशेषेण वधकालः प्रशस्यते
Mriga uvacha
Na ripunvai samuddishya vimunchanti pura sharan
Randhra esham visheshena vadhakalah prashasyate
109.17
पाण्डुरुवाच
प्रमत्तमप्रमत्तं वा विवृतं घ्नन्ति चौजसा
उपायैरिषुभिस्तीक्ष्णैः कस्मान्मृग विगर्हसे
Panduruvacha
Pramattamapramattam va vivritam ghnanti chaujasa
Upayairishubhistikshnaih kasmanmriga vigarhase
109.18
मृग उवाच
नाहं घ्नन्तं मृगान्राजन्विगर्हे आत्मकारणात्
मैथुनं तु प्रतीक्ष्यं मे स्यात्त्वयेहानृशंसतः
Mriga uvacha
Naham ghnantam mriganrajanvigarhe atmakaranat
Maithunam tu pratikshyam me syattvayehanrishansatah
109.19
सर्वभूतहिते काले सर्वभूतेप्सिते तथा
को हि विद्वान्मृगं हन्याच्चरन्तं मैथुनं वने
पुरुषार्थफलं कान्तं यत्त्वया वितथं कृतम्
Sarvabhutahite kale sarvabhutepsite tatha
Ko hi vidvanmrigam hanyachcharantam maithunam vane
Purusharthaphalam kantam yattvaya vitatham kritam
109.20
पौरवाणामृषीणां च तेषामक्लिष्टकर्मणाम्
वंशे जातस्य कौरव्य नानुरूपमिदं तव
Pauravanamrishinam cha teshamaklishtakarmanam
Vanshe jatasya kauravya nanurupamidam tava
109.21
नृशंसं कर्म सुमहत्सर्वलोकविगर्हितम्
अस्वर्ग्यमयशस्यं च अधर्मिष्ठं च भारत
Nrishansam karma sumahatsarvalokavigarhitam
Asvargyamayashasyam cha adharmishtham cha bharata
109.22
स्त्रीभोगानां विशेषज्ञः शास्त्रधर्मार्थतत्त्ववित्
नार्हस्त्वं सुरसंकाश कर्तुमस्वर्ग्यमीदृशम्
Stribhoganam visheshagyah shastradharmarthatattvavit
Narhastvam surasankasha kartumasvargyamidrisham
109.23
त्वया नृशंसकर्तारः पापाचाराश्च मानवाः
निग्राह्याः पार्थिवश्रेष्ठ त्रिवर्गपरिवर्जिताः
Tvaya nrishansakartarah papacharashcha manavah
Nigrahyah parthivashreshtha trivargaparivarjitah
109.24
किं कृतं ते नरश्रेष्ठ निघ्नतो मामनागसम्
मुनिं मूलफलाहारं मृगवेषधरं नृप
वसमानमरण्येषु नित्यं शमपरायणम्
Kim kritam te narashreshtha nighnato mamanagasam
Munim mulaphalaharam mrigaveshadharam nripa
Vasamanamaranyeshu nityam shamaparayanam
109.25
त्वयाहं हिंसितो यस्मात्तस्मात्त्वामप्यसंशयम्
द्वयोर्नृशंसकर्तारमवशं काममोहितम्
जीवितान्तकरो भाव एवमेवागमिष्यति
Tvayaham hinsito yasmattasmattvamapyasanshayam
Dvayornrishansakartaramavasham kamamohitam
Jivitantakaro bhava evamevagamishyati
109.26
अहं हि किंदमो नाम तपसाप्रतिमो मुनिः
व्यपत्रपन्मनुष्याणां मृग्यां मैथुनमाचरम्
Aham hi kindamo nama tapasapratimo munih
Vyapatrapanmanushyanam mrigyam maithunamacharam
109.27
मृगो भूत्वा मृगैः सार्धं चरामि गहने वने
न तु ते ब्रह्महत्येयं भविष्यत्यविजानतः
मृगरूपधरं हत्वा मामेवं काममोहितम्
Mrigo bhutva mrigaih sardham charami gahane vane
Na tu te brahmahatyeyam bhavishyatyavijanatah
Mrigarupadharam hatva mamevam kamamohitam
109.28
अस्य तु त्वं फलं मूढ प्राप्स्यसीदृशमेव हि
प्रियया सह संवासं प्राप्य कामविमोहितः
त्वमप्यस्यामवस्थायां प्रेतलोकं गमिष्यसि
Asya tu tvam phalam mudha prapsyasidrishameva hi
Priyaya saha sanvasam prapya kamavimohitah
Tvamapyasyamavasthayam pretalokam gamishyasi
109.29
अन्तकाले च संवासं यया गन्तासि कान्तया
प्रेतराजवशं प्राप्तं सर्वभूतदुरत्ययम्
भक्त्या मतिमतां श्रेष्ठ सैव त्वामनुयास्यति
Antakale cha sanvasam yaya gantasi kantaya
Pretarajavasham praptam sarvabhutaduratyayam
Bhaktya matimatam shreshtha saiva tvamanuyasyati
109.30
वर्तमानः सुखे दुःखं यथाहं प्रापितस्त्वया
तथा सुखं त्वां संप्राप्तं दुःखमभ्यागमिष्यति
Vartamanah sukhe duhkham yathaham prapitastvaya
Tatha sukham tvam sampraptam duhkhamabhyagamishyati
109.31
वैशंपायन उवाच
एवमुक्त्वा सुदुःखार्तो जीवितात्स व्ययुज्यत
मृगः पाण्डुश्च शोकार्तः क्षणेन समपद्यत
Vaishampayana uvacha
Evamuktva suduhkharto jivitatsa vyayujyata
Mrigah pandushcha shokartah kshanena samapadyata