UtshovChapter 90
90.1
जनमेजय उवाच
श्रुतस्त्वत्तो मया विप्र पूर्वेषां संभवो महान्
उदाराश्चापि वंशेऽस्मिन्राजानो मे परिश्रुताः
Janamejaya uvacha
Shrutastvatto maya vipra purvesham sambhavo mahan
Udarashchapi vanshesminrajano me parishrutah
90.2
किं तु लघ्वर्थसंयुक्तं प्रियाख्यानं न मामति
प्रीणात्यतो भवान्भूयो विस्तरेण ब्रवीतु मे
Kim tu laghvarthasanyuktam priyakhyanam na mamati
Prinatyato bhavanbhuyo vistarena bravitu me
90.3
एतामेव कथां दिव्यामा प्रजापतितो मनोः
तेषामाजननं पुण्यं कस्य न प्रीतिमावहेत्
Etameva katham divyama prajapatito manoh
Teshamajananam punyam kasya na pritimavahet
90.4
सद्धर्मगुणमाहात्म्यैरभिवर्धितमुत्तमम्
विष्टभ्य लोकांस्त्रीनेषां यशः स्फीतमवस्थितम्
Saddharmagunamahatmyairabhivardhitamuttamam
Vishtabhya lokanstrinesham yashah sphitamavasthitam
90.5
गुणप्रभाववीर्यौजःसत्त्वोत्साहवतामहम्
न तृप्यामि कथां शृण्वन्नमृतास्वादसंमिताम्
Gunaprabhavaviryaujahsattvotsahavatamaham
Na tripyami katham shrinvannamritasvadasammitam
90.6
वैशंपायन उवाच
शृणु राजन्पुरा सम्यङ्मया द्वैपायनाच्छ्रुतम्
प्रोच्यमानमिदं कृत्स्नं स्ववंशजननं शुभम्
Vaishampayana uvacha
Shrinu rajanpura samyanmaya dvaipayanachchhrutam
Prochyamanamidam kritsnam svavanshajananam shubham
90.7
दक्षस्यादितिः
अदितेर्विवस्वान्
विवस्वतो मनुः
मनोरिला
इलायाः पुरूरवाः
पुरूरवस आयुः
आयुषो नहुषः
नहुषस्य ययातिः
Dakshasyaditih
Aditervivasvan
Vivasvato manuh
Manorila
Ilayah pururavah
Pururavasa ayuh
Ayusho nahushah
Nahushasya yayatih
90.8
ययातेर्द्वे भार्ये बभूवतुः
उशनसो दुहिता देवयानी वृषपर्वणश्च दुहिता शर्मिष्ठा नाम
अत्रानुवंशो भवति
Yayaterdve bharye babhuvatuh
Ushanaso duhita devayani vrishaparvanashcha duhita sharmishtha nama
Atranuvansho bhavati
90.9
यदुं च तुर्वसुं चैव देवयानी व्यजायत
द्रुह्युं चानुं च पूरुं च शर्मिष्ठा वार्षपर्वणी
Yadum cha turvasum chaiva devayani vyajayata
Druhyum chanum cha purum cha sharmishtha varshaparvani
90.10
तत्र यदोर्यादवाः
पूरोः पौरवाः
Tatra yadoryadavah
Puroh pauravah
90.11
पूरोर्भार्या कौसल्या नाम
तस्यामस्य जज्ञे जनमेजयो नाम
यस्त्रीनश्वमेधानाजहार
विश्वजिता चेष्ट्वा वनं प्रविवेश
Purorbharya kausalya nama
Tasyamasya jagye janamejayo nama
Yastrinashvamedhanajahara
Vishvajita cheshtva vanam pravivesha
90.12
जनमेजयः खल्वनन्तां नामोपयेमे माधवीम्
तस्यामस्य जज्ञे प्राचिन्वान्
यः प्राचीं दिशं जिगाय यावत्सूर्योदयात्
ततस्तस्य प्राचिन्वत्वम्
Janamejayah khalvanantam namopayeme madhavim
Tasyamasya jagye prachinvan
Yah prachim disham jigaya yavatsuryodayat
Tatastasya prachinvatvam
90.13
प्राचिन्वान्खल्वश्मकीमुपयेमे
तस्यामस्य जज्ञे संयातिः
Prachinvankhalvashmakimupayeme
Tasyamasya jagye sanyatih
90.14
संयातिः खलु दृषद्वतो दुहितरं वराङ्गीं नामोपयेमे
तस्यामस्य जज्ञे अहंपातिः
Sanyatih khalu drishadvato duhitaram varangim namopayeme
Tasyamasya jagye ahampatih
90.15
अहंपातिस्तु खलु कृतवीर्यदुहितरमुपयेमे भानुमतीं नाम
तस्यामस्य जज्ञे सार्वभौमः
Ahampatistu khalu kritaviryaduhitaramupayeme bhanumatim nama
Tasyamasya jagye sarvabhaumah
90.16
सार्वभौमः खलु जित्वाजहार कैकेयीं सुनन्दां नाम
तस्यामस्य जज्ञे जयत्सेनः
Sarvabhaumah khalu jitvajahara kaikeyim sunandam nama
Tasyamasya jagye jayatsenah
90.17
जयत्सेनः खलु वैदर्भीमुपयेमे सुषुवां नाम
तस्यामस्य जज्ञे अराचीनः
Jayatsenah khalu vaidarbhimupayeme sushuvam nama
Tasyamasya jagye arachinah
90.18
अराचीनोऽपि वैदर्भीमेवापरामुपयेमे मर्यादां नाम
तस्यामस्य जज्ञे महाभौमः
Arachinopi vaidarbhimevaparamupayeme maryadam nama
Tasyamasya jagye mahabhaumah
90.19
महाभौमः खलु प्रासेनजितीमुपयेमे सुयज्ञां नाम
तस्यामस्य जज्ञे अयुतनायी
यः पुरुषमेधानामयुतमानयत्
तदस्यायुतनायित्वम्
Mahabhaumah khalu prasenajitimupayeme suyagyam nama
Tasyamasya jagye ayutanayi
Yah purushamedhanamayutamanayat
Tadasyayutanayitvam
90.20
अयुतनायी खलु पृथुश्रवसो दुहितरमुपयेमे भासां नाम
तस्यामस्य जज्ञे अक्रोधनः
Ayutanayi khalu prithushravaso duhitaramupayeme bhasam nama
Tasyamasya jagye akrodhanah
90.21
अक्रोधनः खलु कालिङ्गीं करण्डुं नामोपयेमे
तस्यामस्य जज्ञे देवातिथिः
Akrodhanah khalu kalingim karandum namopayeme
Tasyamasya jagye devatithih
90.22
देवातिथिः खलु वैदेहीमुपयेमे मर्यादां नाम
तस्यामस्य जज्ञे ऋचः
Devatithih khalu vaidehimupayeme maryadam nama
Tasyamasya jagye richah
90.23
ऋचः खल्वाङ्गेयीमुपयेमे सुदेवां नाम
तस्यां पुत्रमजनयदृक्षम्
Richah khalvangeyimupayeme sudevam nama
Tasyam putramajanayadriksham
90.24
ऋक्षः खलु तक्षकदुहितरमुपयेमे ज्वालां नाम
तस्यां पुत्रं मतिनारं नामोत्पादयामास
Rikshah khalu takshakaduhitaramupayeme jvalam nama
Tasyam putram matinaram namotpadayamasa
90.25
मतिनारः खलु सरस्वत्यां द्वादशवार्षिकं सत्रमाजहार
Matinarah khalu sarasvatyam dvadashavarshikam satramajahara
90.26
निवृत्ते च सत्रे सरस्वत्यभिगम्य तं भर्तारं वरयामास
तस्यां पुत्रमजनयत्तंसुं नाम
Nivritte cha satre sarasvatyabhigamya tam bhartaram varayamasa
Tasyam putramajanayattansum nama
90.27
अत्रानुवंशो भवति
Atranuvansho bhavati
90.28
तंसुं सरस्वती पुत्रं मतिनारादजीजनत्
इलिनं जनयामास कालिन्द्यां तंसुरात्मजम्
Tansum sarasvati putram matinaradajijanat
Ilinam janayamasa kalindyam tansuratmajam
90.29
इलिनस्तु रथंतर्यां दुःषन्ताद्यान्पञ्च पुत्रानजनयत्
Ilinastu rathantaryam duhshantadyanpancha putranajanayat
90.30
दुःषन्तः खलु विश्वामित्रदुहितरं शकुन्तलां नामोपयेमे
तस्यामस्य जज्ञे भरतः
तत्र श्लोकौ भवतः
Duhshantah khalu vishvamitraduhitaram shakuntalam namopayeme
Tasyamasya jagye bharatah
Tatra shlokau bhavatah
90.31
माता भस्त्रा पितुः पुत्रो येन जातः स एव सः
भरस्व पुत्रं दुःषन्त मावमंस्थाः शकुन्तलाम्
Mata bhastra pituh putro yena jatah sa eva sah
Bharasva putram duhshanta mavamansthah shakuntalam
90.32
रेतोधाः पुत्र उन्नयति नरदेव यमक्षयात्
त्वं चास्य धाता गर्भस्य सत्यमाह शकुन्तला
Retodhah putra unnayati naradeva yamakshayat
Tvam chasya dhata garbhasya satyamaha shakuntala
90.33
ततोऽस्य भरतत्वम्
Tatosya bharatatvam
90.34
भरतः खलु काशेयीमुपयेमे सार्वसेनीं सुनन्दां नाम
तस्यामस्य जज्ञे भुमन्युः
Bharatah khalu kasheyimupayeme sarvasenim sunandam nama
Tasyamasya jagye bhumanyuh
90.35
भुमन्युः खलु दाशार्हीमुपयेमे जयां नाम
तस्यामस्य जज्ञे सुहोत्रः
Bhumanyuh khalu dasharhimupayeme jayam nama
Tasyamasya jagye suhotrah
90.36
सुहोत्रः खल्विक्ष्वाकुकन्यामुपयेमे सुवर्णां नाम
तस्यामस्य जज्ञे हस्ती
य इदं हास्तिनपुरं मापयामास
एतदस्य हास्तिनपुरत्वम्
Suhotrah khalvikshvakukanyamupayeme suvarnam nama
Tasyamasya jagye hasti
Ya idam hastinapuram mapayamasa
Etadasya hastinapuratvam
90.37
हस्ती खलु त्रैगर्तीमुपयेमे यशोधरां नाम
तस्यामस्य जज्ञे विकुण्ठनः
Hasti khalu traigartimupayeme yashodharam nama
Tasyamasya jagye vikunthanah
90.38
विकुण्ठनः खलु दाशार्हीमुपयेमे सुदेवां नाम
तस्यामस्य जज्ञेऽजमीढः
Vikunthanah khalu dasharhimupayeme sudevam nama
Tasyamasya jagyejamidhah
90.39
अजमीढस्य चतुर्विंशं पुत्रशतं बभूव कैकेय्यां नागायां गान्धार्यां विमलायामृक्षायां चेति
पृथक्पृथग्वंशकरा नृपतयः
तत्र वंशकरः संवरणः
Ajamidhasya chaturvinsham putrashatam babhuva kaikeyyam nagayam gandharyam vimalayamrikshayam cheti
Prithakprithagvanshakara nripatayah
Tatra vanshakarah sanvaranah
90.40
संवरणः खलु वैवस्वतीं तपतीं नामोपयेमे
तस्यामस्य जज्ञे कुरुः
Sanvaranah khalu vaivasvatim tapatim namopayeme
Tasyamasya jagye kuruh
90.41
कुरुः खलु दाशार्हीमुपयेमे शुभाङ्गीं नाम
तस्यामस्य जज्ञे विडूरथः
Kuruh khalu dasharhimupayeme shubhangim nama
Tasyamasya jagye vidurathah
90.42
विडूरथस्तु मागधीमुपयेमे संप्रियां नाम
तस्यामस्य जज्ञेऽरुग्वान्नाम
Vidurathastu magadhimupayeme sampriyam nama
Tasyamasya jagyerugvannama
90.43
अरुग्वान्खलु मागधीमुपयेमेऽमृतां नाम
तस्यामस्य जज्ञे परिक्षित्
Arugvankhalu magadhimupayememritam nama
Tasyamasya jagye parikshit
90.44
परिक्षित्खलु बाहुदामुपयेमे सुयशां नाम
तस्यामस्य जज्ञे भीमसेनः
Parikshitkhalu bahudamupayeme suyasham nama
Tasyamasya jagye bhimasenah
90.45
भीमसेनः खलु कैकेयीमुपयेमे सुकुमारीं नाम
तस्यामस्य जज्ञे पर्यश्रवाः
यमाहुः प्रतीपं नाम
Bhimasenah khalu kaikeyimupayeme sukumarim nama
Tasyamasya jagye paryashravah
Yamahuh pratipam nama
90.46
प्रतीपः खलु शैब्यामुपयेमे सुनन्दां नाम
तस्यां पुत्रानुत्पादयामास देवापिं शंतनुं बाह्लीकं चेति
Pratipah khalu shaibyamupayeme sunandam nama
Tasyam putranutpadayamasa devapim shantanum bahlikam cheti
90.47
देवापिः खलु बाल एवारण्यं प्रविवेश
शंतनुस्तु महीपालोऽभवत्
अत्रानुवंशो भवति
Devapih khalu bala evaranyam pravivesha
Shantanustu mahipalobhavat
Atranuvansho bhavati
90.48
यं यं कराभ्यां स्पृशति जीर्णं स सुखमश्नुते
पुनर्युवा च भवति तस्मात्तं शंतनुं विदुः
Yam yam karabhyam sprishati jirnam sa sukhamashnute
Punaryuva cha bhavati tasmattam shantanum viduh
90.49
तदस्य शंतनुत्वम्
Tadasya shantanutvam
90.50
शंतनुः खलु गङ्गां भागीरथीमुपयेमे
तस्यामस्य जज्ञे देवव्रतः
यमाहुर्भीष्म इति
Shantanuh khalu gangam bhagirathimupayeme
Tasyamasya jagye devavratah
Yamahurbhishma iti
90.51
भीष्मः खलु पितुः प्रियचिकीर्षया सत्यवतीमुदवहन्मातरम्
यामाहुर्गन्धकालीति
Bhishmah khalu pituh priyachikirshaya satyavatimudavahanmataram
Yamahurgandhakaliti
90.52
तस्यां कानीनो गर्भः पराशराद्द्वैपायनः
तस्यामेव शंतनोर्द्वौ पुत्रौ बभूवतुः
चित्राङ्गदो विचित्रवीर्यश्च
Tasyam kanino garbhah parasharaddvaipayanah
Tasyameva shantanordvau putrau babhuvatuh
Chitrangado vichitraviryashcha
90.53
तयोरप्राप्तयौवन एव चित्राङ्गदो गन्धर्वेण हतः
विचित्रवीर्यस्तु राजा समभवत्
Tayorapraptayauvana eva chitrangado gandharvena hatah
Vichitraviryastu raja samabhavat
90.54
विचित्रवीर्यः खलु कौसल्यात्मजेऽम्बिकाम्बालिके काशिराजदुहितरावुपयेमे
Vichitraviryah khalu kausalyatmajembikambalike kashirajaduhitaravupayeme
90.55
विचित्रवीर्यस्त्वनपत्य एव विदेहत्वं प्राप्तः
Vichitraviryastvanapatya eva videhatvam praptah
90.56
ततः सत्यवती चिन्तयामास
दौःषन्तो वंश उच्छिद्यते इति
Tatah satyavati chintayamasa
Dauhshanto vansha uchchhidyate iti
90.57
सा द्वैपायनमृषिं चिन्तयामास
Sa dvaipayanamrishim chintayamasa
90.58
स तस्याः पुरतः स्थितः किं करवाणीति
Sa tasyah puratah sthitah kim karavaniti
90.59
सा तमुवाच
भ्राता तवानपत्य एव स्वर्यातो विचित्रवीर्यः
साध्वपत्यं तस्योत्पादयेति
Sa tamuvacha
Bhrata tavanapatya eva svaryato vichitraviryah
Sadhvapatyam tasyotpadayeti
90.60
स परमित्युक्त्वा त्रीन्पुत्रानुत्पादयामास धृतराष्ट्रं पाण्डुं विदुरं चेति
Sa paramityuktva trinputranutpadayamasa dhritarashtram pandum viduram cheti
90.61
तत्र धृतराष्ट्रस्य राज्ञः पुत्रशतं बभूव गान्धार्यां वरदानाद्द्वैपायनस्य
Tatra dhritarashtrasya ragyah putrashatam babhuva gandharyam varadanaddvaipayanasya
90.62
तेषां धृतराष्ट्रस्य पुत्राणां चत्वारः प्रधाना बभूवुर्दुर्योधनो दुःशासनो विकर्णश्चित्रसेन इति
Tesham dhritarashtrasya putranam chatvarah pradhana babhuvurduryodhano duhshasano vikarnashchitrasena iti
90.63
पाण्डोस्तु द्वे भार्ये बभूवतुः कुन्ती माद्री चेत्युभे स्त्रीरत्ने
Pandostu dve bharye babhuvatuh kunti madri chetyubhe striratne
90.64
अथ पाण्डुर्मृगयां चरन्मैथुनगतमृषिमपश्यन्मृग्यां वर्तमानम्
तथैवाप्लुतमनासादितकामरसमतृप्तं बाणेनाभिजघान
Atha pandurmrigayam charanmaithunagatamrishimapashyanmrigyam vartamanam
Tathaivaplutamanasaditakamarasamatriptam banenabhijaghana
90.65
स बाणविद्ध उवाच पाण्डुम्
चरता धर्ममिमं येन त्वयाभिज्ञेन कामरसस्याहमनवाप्तकामरसोऽभिहतस्तस्मात्त्वमप्येतामवस्थामासाद्यानवाप्तकामरसः पञ्चत्वमाप्स्यसि क्षिप्रमेवेति
Sa banaviddha uvacha pandum
Charata dharmamimam yena tvayabhigyena kamarasasyahamanavaptakamarasobhihatastasmattvamapyetamavasthamasadyanavaptakamarasah panchatvamapsyasi kshiprameveti
90.66
स विवर्णरूपः पाण्डुः शापं परिहरमाणो नोपासर्पत भार्ये
Sa vivarnarupah panduh shapam pariharamano nopasarpata bharye
90.67
वाक्यं चोवाच
स्वचापल्यादिदं प्राप्तवानहम्
शृणोमि च नानपत्यस्य लोका सन्तीति
Vakyam chovacha
Svachapalyadidam praptavanaham
Shrinomi cha nanapatyasya loka santiti
90.68
सा त्वं मदर्थे पुत्रानुत्पादयेति कुन्तीमुवाच
Sa tvam madarthe putranutpadayeti kuntimuvacha
90.69
सा तत्र पुत्रानुत्पादयामास धर्माद्युधिष्ठिरं मारुताद्भीमसेनं शक्रादर्जुनमिति
Sa tatra putranutpadayamasa dharmadyudhishthiram marutadbhimasenam shakradarjunamiti
90.70
स तां हृष्टरूपः पाण्डुरुवाच
इयं ते सपत्न्यनपत्या
साध्वस्यामपत्यमुत्पाद्यतामिति
Sa tam hrishtarupah panduruvacha
Iyam te sapatnyanapatya
Sadhvasyamapatyamutpadyatamiti
90.71
स एवमस्त्वित्युक्तः कुन्त्या
Sa evamastvityuktah kuntya
90.72
ततो माद्र्यामश्विभ्यां नकुलसहदेवावुत्पादितौ
Tato madryamashvibhyam nakulasahadevavutpaditau
90.73
माद्रीं खल्वलंकृतां दृष्ट्वा पाण्डुर्भावं चक्रे
Madrim khalvalankritam drishtva pandurbhavam chakre
90.74
स तां स्पृष्ट्वैव विदेहत्वं प्राप्तः
Sa tam sprishtvaiva videhatvam praptah
90.75
तत्रैनं चितास्थं माद्री समन्वारुरोह
Tatrainam chitastham madri samanvaruroha
90.76
उवाच कुन्तीम्
यमयोरार्ययाप्रमत्तया भवितव्यमिति
Uvacha kuntim
Yamayoraryayapramattaya bhavitavyamiti
90.77
ततस्ते पञ्च पाण्डवाः कुन्त्या सहिता हास्तिनपुरमानीय तापसैर्भीष्मस्य विदुरस्य च निवेदिताः
Tataste pancha pandavah kuntya sahita hastinapuramaniya tapasairbhishmasya vidurasya cha niveditah
90.78
तत्रापि जतुगृहे दग्धुं समारब्धा न शकिता विदुरमन्त्रितेन
Tatrapi jatugrihe dagdhum samarabdha na shakita viduramantritena
90.79
ततश्च हिडिम्बमन्तरा हत्वा एकचक्रां गताः
Tatashcha hidimbamantara hatva ekachakram gatah
90.80
तस्यामप्येकचक्रायां बकं नाम राक्षसं हत्वा पाञ्चालनगरमभिगताः
Tasyamapyekachakrayam bakam nama rakshasam hatva panchalanagaramabhigatah
90.81
तस्माद्द्रौपदीं भार्यामविन्दन्स्वविषयं चाजग्मुः कुशलिनः
Tasmaddraupadim bharyamavindansvavishayam chajagmuh kushalinah
90.82
पुत्रांश्चोत्पादयामासुः
प्रतिविन्ध्यं युधिष्ठिरः
सुतसोमं वृकोदरः
श्रुतकीर्तिमर्जुनः
शतानीकं नकुलः
श्रुतकर्माणं सहदेव इति
Putranshchotpadayamasuh
Prativindhyam yudhishthirah
Sutasomam vrikodarah
Shrutakirtimarjunah
Shatanikam nakulah
Shrutakarmanam sahadeva iti
90.83
युधिष्ठिरस्तु गोवासनस्य शैब्यस्य देविकां नाम कन्यां स्वयंवरे लेभे
तस्यां पुत्रं जनयामास यौधेयं नाम
Yudhishthirastu govasanasya shaibyasya devikam nama kanyam svayanvare lebhe
Tasyam putram janayamasa yaudheyam nama
90.84
भीमसेनोऽपि काश्यां बलधरां नामोपयेमे वीर्यशुल्काम्
तस्यां पुत्रं सर्वगं नामोत्पादयामास
Bhimasenopi kashyam baladharam namopayeme viryashulkam
Tasyam putram sarvagam namotpadayamasa
90.85
अर्जुनः खलु द्वारवतीं गत्वा भगिनीं वासुदेवस्य सुभद्रां नाम भार्यामुदवहत्
तस्यां पुत्रमभिमन्युं नाम जनयामास
Arjunah khalu dvaravatim gatva bhaginim vasudevasya subhadram nama bharyamudavahat
Tasyam putramabhimanyum nama janayamasa
90.86
नकुलस्तु चैद्यां करेणुवतीं नाम भार्यामुदवहत्
तस्यां पुत्रं निरमित्रं नामाजनयत्
Nakulastu chaidyam karenuvatim nama bharyamudavahat
Tasyam putram niramitram namajanayat
90.87
सहदेवोऽपि माद्रीमेव स्वयंवरे विजयां नामोपयेमे
तस्यां पुत्रमजनयत्सुहोत्रं नाम
Sahadevopi madrimeva svayanvare vijayam namopayeme
Tasyam putramajanayatsuhotram nama
90.88
भीमसेनस्तु पूर्वमेव हिडिम्बायां राक्षस्यां घटोत्कचं नाम पुत्रं जनयामास
Bhimasenastu purvameva hidimbayam rakshasyam ghatotkacham nama putram janayamasa
90.89
इत्येते एकादश पाण्डवानां पुत्राः
Ityete ekadasha pandavanam putrah
90.90
विराटस्य दुहितरमुत्तरां नामाभिमन्युरुपयेमे
तस्यामस्य परासुर्गर्भोऽजायत
Viratasya duhitaramuttaram namabhimanyurupayeme
Tasyamasya parasurgarbhojayata
90.91
तमुत्सङ्गेन प्रतिजग्राह पृथा नियोगात्पुरुषोत्तमस्य वासुदेवस्य
षाण्मासिकं गर्भमहमेनं जीवयिष्यामीति
Tamutsangena pratijagraha pritha niyogatpurushottamasya vasudevasya
Shanmasikam garbhamahamenam jivayishyamiti
90.92
संजीवयित्वा चैनमुवाच
परिक्षीणे कुले जातो भवत्वयं परिक्षिन्नामेति
Sanjivayitva chainamuvacha
Parikshine kule jato bhavatvayam parikshinnameti
90.93
परिक्षित्तु खलु माद्रवतीं नामोपयेमे
तस्यामस्य जनमेजयः
Parikshittu khalu madravatim namopayeme
Tasyamasya janamejayah
90.94
जनमेजयात्तु वपुष्टमायां द्वौ पुत्रौ शतानीकः शङ्कुश्च
Janamejayattu vapushtamayam dvau putrau shatanikah shankushcha
90.95
शतानीकस्तु खलु वैदेहीमुपयेमे
तस्यामस्य जज्ञे पुत्रोऽश्वमेधदत्तः
Shatanikastu khalu vaidehimupayeme
Tasyamasya jagye putroshvamedhadattah
90.96
इत्येष पूरोर्वंशस्तु पाण्डवानां च कीर्तितः
पूरोर्वंशमिमं श्रुत्वा सर्वपापैः प्रमुच्यते
Ityesha purorvanshastu pandavanam cha kirtitah
Purorvanshamimam shrutva sarvapapaih pramuchyate